Author: Asturies F1

Llega’l Gran Premiu d’España y con él les tradicionales evoluciones nos coches qu’escueyen estes feches pa dar un pasu alantre y más nesti añu onde les llimitaciones  a les meyores nes unidaes de potencia tán menos llimitaes. Sicasí nun hai qu’olvidar tampoco que cada equipu tendrá en cuenta’l ciclu de motores respectivu pa nun forzar más cambios de los necesarios. Con too habrá que ver si dalgún equipu lleva a Montmeló dalgo que xiringue’l tableru o’l campeonatu va a siguir siendo una partida ente Ferrari y Mercedes lo que queda de temporada.

Dos victores pa Ferrari y otres does pa Mercedes, col primer puestu del podiu repartíu llegamos al quintu gran premiu de la temporada con batalla asegurada. Si bien en Ferrari ta siendo Vettel el qu’axunte los primeros puestos, les fleches platiaes tán repartiéndoles ente los sos dos pilotos y esti puede ser un factor importante de cara al campeonatu a final de temporada. Habrá que ver si Hamilton ye quien a recuperase y nun se repiten los problemes de Rusia, veremos si ye cuestión d’acertar cola configuración anque Wolff yá adelanto que yeren problemes que nun se diben iguar de la nueche a la mañana. Bottas, pela so parte yá demostró que ta preparáu tamién pa ganar carreres y ¿por qué non? incluso aspirar al títulu mundial. De la capacidá de Kimi Raikkonen pa interferir ente los Mercedes tamién taremos atentos yá que cada puntu cuenta y esti añu la cosa tien pinta de decidise por detalles.

Red Bull precisa dar un saltu p’alantre pa algamar a los dos cabezaleros y quiciás nesta cita tengamos una pista de si van ser quien de ponese al so altor, Force India nun quieren ser menos y aspiren a ponese al mesmu nivel que los de Horner según les sos propies palabres. Veremos a ver si son quien a ello. Lo que ta claro ye que Williams tampoco se van quedar mirando y Toro Rosso tien tovía muncho marxe per delantre. Pa Carlos Sáinz esta cita sedrá un plus dafechu onde reivindicase de cara a lo que queda de temporada y al añu que vien.

Nuevamente’l focu tará puestu tamién en McLaren. Anque Alonso yera escépticu sobre que l’equipu diera grande pasos alantre nesta cita y cincaba na necesidá d’ameyorar na fiabilidá del coche primero que nel rendimientu, la escudería de Woking tovía tien pendiente acabar un eventu colos dos coches. Y qué meyor llugar que Barcelona p’acabar con esa racha, y qué meyor momentu pa Alonso que xusto enantes de probar fortuna n’Indianápolis.

Nunos díes tendremos clares estes cuestiones, pero de momento vamos faciendo boca colos datos del circuitu. Nun se nos olvidé qu’esti eventu va a ser retresmitíu en directu n’abiertu per TVE. Asina qu’esta vez nun hai escusa posible.

Cuando entrugues a la xente cuales son les sos prediciones pa los grandes premios, últimamente entren Ferrari (más concretamente Vettel) en toles quinieles y, por defectu, Hamilton. Güei nel gran premiu de Rusia más d’ún y de dos tuvieron de romper les sos quinieles cuando’l finlandés Valtteri Bottas se facía cola victoria dempués de una carrera na que se punxo llíder dende la mesma salida.

Y ye que, dempués de ver a Ferrari ocupar les dos primeres posiciones de la parrilla de salida’l sábadu, cuntábemos que diba ser daqué cenciello pa ellos: Sochi ye un circuitu au adelantar nun ye fácil ya’l ritmu de los Ferrari fuera meyor que’l de les fleches plateaes demientres tol fin de selmana. Menos güei.

Como dicimos, foi dende bien ceo, dende la mesma salida, que Bottas garró la primer posición y decidió nun soltala. Los Ferrari salieron con duldes, y Vettel casi cede la so posición énte’l so compañeru Kimi ya’l otru Mercedes, el de Hamilton. L’alemán sedría quien a aguantar esos primeros metros, y darréu intentaría dir a la caza de Bottas que punxera bien de segundos ente elli y los sos persiguidores.

Nun podemos dicir que fuera un gran premiu mui intensu a toles hores, pero sí tuvo dellos momentos destacables: aparte de la gran salida de Bottas, tenemos de falar del primer incidente que tuvo de protagonistes al Renault de Jolyon Palmer, n’otru gran premiu pa olvidar del británicu, ya’l Haas de Romain Grosjean, que tampoco tuvo un fin de selmana mui buenu. Anque dambos pilotos culpaben al otru, los comisarios nun penalizaron a nengún de los dos y la verdá ye que dambos tuvieron lo suyo, polo que calificalo d’incidente de carrera nun ye incorreuto. Lo que sí víamos yera’l primer y únicu coche de seguridá de la carrera, que favorecía la entrada en boxes de los pilotos de Sauber y del McLaren de Vandoorne.

Unos metros más allá, topábemos a Stroll mirando pal llau que nun yera, dempués de facer un trompu demientres otros coches lu adelantaben. El canadiense falaba de que fuera por culpa de Hülkenberg que lu tocara per detrás, pero otra vegada, los comisarios nun interpretaron qu’hubiere nengún motivu pa sancionar al pilotu de Renault.

Pelos primeros puestos, Bottas siguía poniendo distancia con Vettel y ésti con Kimi y Hamilton. Sedría esti l’esquema de la mayor parte de la carrera. Hamilton nunca nun tuvo posibilidaes reales de ponese a tiru de podiu. Oyíemoslu quexase del coche, taba claro que nun taba cómodu y los sos inxenieros avisábenlu de que’l coche taba al llímite.

Nel primer cuartu de carrera, perdíemos tamién a Daniel Ricciardo, con problemes nos frenos. Red Bull tuvieron bastante discretos esti fin de selmana, anque Verstappen foi quintu, pero fexo una carrera normalina, casi más preocupáu de que nun fallara’l coche que de lluchar polo que se punxera delantre. Cuntamos con que Red Bull traigan meyores pa Montmeló, dientro dos selmanes, y veremos si son quien a ponese a l’altura de Ferrari y Mercedes. Buena falta tienen si nun quieren descolgase nel mundial de constructores.

Tres de la emoción de les primeres vueltes, la carrera asentó y, ente penalizaciones por nun respetar los llímites del trazáu (cinco segundos pa Magnussen y Vandoorne) víemos pasar les vueltes y Vettel dir arrancando milésimes a Bottas pero ensin ser una amenaza real. Esperábemos que camudaren les coses col baile de paraes en boxes, pero Ferrari anduvieron lentos y nun fueron quien a replicar los movimientos de Mercedes. De fechu, paeznos que confiaben más no que pudiera facer Vettel en pista que na estratexa na parada; quiciás más preocupaos por conservar posición que por ganala. La parada de Vettel amás, foi relativamente lenta pa los intereses del alemán y, teniendo en cuenta lo apertao que quedó too al final, quédanos la dulda de si eses milésimes tuvieran ayudao a Vettel a garrar a Bottas.

Hasta la bandera a cuadros, fuimos testigos de la batalla Bottas-Vettel col alemán recortando vuelta a vuelta, ayudáu de qu’un planu de Bottas nuna frenaza complico-y a esti la existencia nes últimes vueltes faciendo’l coche más difícil de llevar, y los doblaos (hasta’l décimu toos lo fueron) xugando un papel importante. Ye más, munchos quixeron ver na maniobra de Massa cuando Vettel lu intentaba adelantar con banderes azules un guiñu al so antiguu compañeru en Williams. Anque’l brasileñu dixo llueu que non, que nun yera la so intención bloquiar a Vettel, ta claro que dalgo lu retrasó, rematando d’esa forma’l resultáu de la carrera: Bottas diba convertise nel quintu finlandés en ganar un gran premiu de Fórmula Uno dempués de Keke Rosberg, Mika Häkkinen, Heikki Kovalainen ya’l propiu Kimi Räikkönen.

Per detrás d’esti par, llegaron los sos compañeros d’equipu, Kimi terceru y Hamilton cuartu. Verstappen como diximo sedría quintu, mientres que los dos pilotos de Force India sumaríen puntos perimportantes pa los sos intereses nel mundial de constructores siendo sextu Pérez y séptimu Ocon. El francés lleva puntuando en toles carreres dende qu’empezó la temporada. Octavu sedría Massa, que sigue siendo l’únicu en sumar puntos pa Williams ya que, anque Stroll esta vez consiguió terminar la carrera, nun foi quien a metese ente los diez primeros, quedando a les puertes nel puestu once. Los dos últimos puestos de puntos sedríen pa Nico Hülkenberg nel novenu puestu y Sáinz conseguiría un puntín que sabe a gloria dempués d’empezar décimocuartu pola so penalización de tres posiciones (pel incidente de la carrera anterior).

Fuera de los puntos, aparte de Stroll, atopamos a Kvyat, que namás pudo ser duodécimu nel gran premiu de so casa y del que s’esperaba bastante más y Magnussen que quedó xusto detrás, y que rodaba décimu cuando los comisarios lu penalizaron por saltase los llímites del trazáu, dalgo qu’ensin duldes torgó’l restu de la so carrera.

Décimocuartu sedría Vandoorne, únicu McLaren que vería la bandera a cuadros dempués de que Fernando Alonso nin siquiera pudiera salir por problemes col ERS na vuelta formación que lu dexaría tiráu na entrada al pitlane. Per detrás de Vandoorne atopamos a los dos Sauber, con milenta problemas y una carrera pa dexar nel olvidu. Ericsson acabó nel puestu quince col so compañeru d’equipu, Pascal Wehrlein xusto detrás.

Empezábemos el domingu cola noticia de qu’apartir de 2018 Honda va suministrar motores tamién a la escudería Sauber, dalgo que se recibió con variedá d’opiniones, ente elles l’aplausu de quien piensa que ye dalgo bono pa Honda y necesario pa McLaren, a los que dicen qu’agora Honda va tener dos equipos p’arruinar. Entá queda muncho pa 2018 y de xuru nun van parar les especulaciones, pero en principiu l’añu que vien tendremos dos equipos con motores Honda, si nun se cumplen los pronósticos de los que dicen que McLaren va tornar a motores Mercedes.

La próxima parada tenémosla en Montmeló dientro de quince díes. Equí vos dexamos la información de la sesión de clasificación del sábadu y los resultaos del domingu:

Carrera

Son munches les veces que dexamos que nos allume tol glamour de la Fórmula Uno y escaecemos que nes categoríes inferiores les coses son bien distintes. Estos últimos díes recibíemos un par de noticies d’eses qu’encueyen les coraes y que nos faen ver una realidá distinta a la velocidá que lleva la F1. N’una de les carreres de F4 del domingu en Donington Park, un gravísimu accidente dexaba a un rapaz de 17 años ensin les dos piernes, y esti fin de selmana pasáu otru nenu, esta vez de 11, dexaba la so vida nel asfaltu del Circuitu Fernando Alonso en La Morgal.

Cuando llees estes coses y te das cuenta de qu’estos nenos teníen munchísimes ilusiones na cabeza, de xuru montaos en dalgún d’esos monoplazas que vemos cada dos selmanes nos circuitos de tol mundo, yes consciente del peligru que s’escuende tres d’esti deporte y que percibimos poco poles grandes meyores que demientres toos estos años se tán incorporando. Enantes de metenos dafechu na crónica del gran premiu de Sochi, queríemos dexar equí’l nuestru humilde homenaxe a estos dos pilotos, el recuerdu pal que nos dexó y la fuercia pal qu’agora tien d’entamar la so vida de nuevo.

Y toca aterrizar en Rusia pal cuartu gran premiu de la temporada. Con Vettel de llíder y Ferrari a tres puntos de Mercedes nel mundial de constructores, el pasu de les carreres ta consiguiendo enganchanos namás por ver si Vettel ye quien a seguir pasando perriba’l restu o si Mercedes son quien a borrar les duldes qu’asomaron na carrera pasada. Y, con permisu d’estos dos equipos, taremos sollertes a los movimientos per detrás, con McLaren que, en teoría, podría dir meyor que nes carreres pasaes, con Williams y la necesidá de Stroll de facer dalgo qu’arranque dalgún aplausu a favor, con Force India y la racha de Ocon de tres diez puestos nes tres carreres disputaes, con Haas ya’l fin de la mala suerte de Magnussen, con Renault y la llucha de Palmer por volver entrar na Q3, con Sauber y Wehrlein con ganes de puntuar por primer vegada col so nuevu equipu, con Red Bull y dambos pilotos deseyando subise a ún de los peldaños del podiu , y con Toro Rosso y les ganes de volver a puntuar (nun escaecemos que Kvyat cuerre en casa).

Podéis consultar tola información sobre’l circuitu de Sochi equí.

Entá nun tábemos recuperaos del Gran Premiu de China de va siete díes y yá nos punxeron delantre’l circuitu de Sakhir y la tercer carrera de la temporada. Con un vienres onde la rutina volvió a ser protagonista (alcordaivos qu’en China’l vienres quedó pa prau) paecía que díbemos a ver una sesión de clasificación de sábadu dientro de lo que vien siendo normal: Hamilton perriba Vettel y Bottas o Räikkönen zarrando los tres primeros. Pero non, ehí taba’l recién llegáu a les fleches platiaes pa dexanos a toos, al so compañeru’l primeru, con un palmu narices. Podíemos dicir que ye que la vuelta de Hamilton nun foi perfeuta pero tamién ye verdá que pa tar delantre de Hamilton, incluso cuando falla, hai que tar ehí, y el finlandés tuvo y féxose cola primer pole de la so carrera.

El domingu pintaba carrera daqué monótona pol vezu que tenemos coles carreres en Baḥréin nel pasáu, ensin contar delles escepciones. Tolo más ver si Hamilton y Vettel se pegaben muncho o poco pol primer puestu y lo que facíen per detrás los Force India, si acasu dalgunu de los Toro Rosso y quiciás Williams. Pocu más.

Tan pronto como na salida pa colocar en coche en parrilla, perdíemos al primer pilotu en pista: Stoffel Vandoorne nun podía nin siquiera empezar la carrera por problemes col MGU-K. Ye verdá que’l belga tuvo bregando col coche tol fin de selmana pero esperábemos que quiciás el domingu la suerte-y sorriera un pocu. Pero non, ta visto qu’esti añu, increyiblemente, pue ser muncho peor que’l pasáu pa la escudería de Woking. Por terminar con ellos, el so compañeru Fernando Alonso, tuvo de retirase tamién na penúltima vuelta del gran premiu y con problemes de motor. Oyíemos dellos comentarios pela radio que nun dexaben duldes de les ganes de baxase del coche del asturianu.

Bottas fexo una bona salida, consiguiendo dexar al so compañeru d’equipu y a Vettel per detrás. Hamilton pel so llau nun pudo con Vettel y viose terceru nos primeros metros de carrera, dempués de salir pel llau suciu de la pista. Per detrás, pilotos como Sáinz, Pérez o Ocon aprovechaben la montonera de coches na primer curva p’adelantar posiciones y compensar la mala sesión de clasificación del sábadu.

Pasaron d’elles vueltes, tranquiles, nes que víemos a Vettel nun despegase de Bottas, siempre controláu por Hamilton, hasta que la carrera tuviera’l so primer revés. Magnussen retirábase con problemes na vuelta diez y dos vueltes más tarde, víemos como un fallu nos frenos acababa con Verstappen n’una de les escapatories y cola carrera acabada. Con tolos güeyos puestos no que pasara al pilotu holandés llegaba’l incidente que trexo a pista’l primer ya únicu coche de seguridá de la carrera: Carlos Sáinz salía de boxes y topábase con Lance Stroll que xusto garraba la curva, confiáu de que’l pilotu de Toro Rosso lu viera dalgo que nun pasó. Sáinz empotrose escontra’l pilotu de Williams, acabando dambos fuera de carrera.

Col coche de seguridá empezaben los bailes a boxes y más incidentes: Hamilton yera penalizáu con cinco segundos por dir demasiao despacio na entrada a pits xusto cuando tenía detrás d’elli a Daniel Ricciardo. Los comisarios interpretaron que lu frenó inxustificadamente, polo que decidíen penalizalu.

Tres d’esto, y anque tovía quedaben bien de vueltes, la carrera quedó sentenciada. Mercedes intentaría xestionar de la meyor manera posible les carreres de los sos dos pilotos: l’ún penalizáu y con ritmu pa ganar carrera, y l’otru per delantre del so compañeru pero con milenta problemes coles gomes. La solución foi ver a Bottas ceder, por dos vegaes, el so puestu a Hamilton, actu que, de toles formes, nun sirvió pa nada. Vettel garrara la victoria y nun tenía pensao soltala.

Per detrás d’esta batalla, teníemos a un Kimi Räikkönen con “necesidá” de reivindicase y un Daniel Ricciardo con ansies d’ameyorar les sensaciones de carreres pasaes. Williams sólo pudo puntuar con Massa, al que vimos facer una perbona carrera. Cualquiera diría que hai unos meses naide nun cuntaba con elli pa conducir esi coche. El restu de puestos dientro de los diez primeros sedría pa Pérez y Ocon, confirmando lo bien que se-y da a Force India esti circuitu. Ocon, amás, puntúa por tercer vegada.

A ellos tenemos de sumar el Renault de Hülkenberg, qu’acabó novenu, anque decepcionáu por nun ser quien ameyorar la so clasificación. Palmer, pel so llau nun puntuó, pero ente’l pasu a Q3 d’ayeri y dellos momentos interesantes en pista, paeznos que tien drechu a lo menos a un aplausu. Otru que merez un aplausu ye Romain Grosjean, que volvió a facer una bona carrera tres un finde bastante irregular, sumando puntos per primer vegada esti añu siendo octavu.

Yá fuera los puntos atopamos a Kvyat, únicu superviviente de la escudería Toro Rosso y que completó una carrera bastante irregular, y a Wehrlein, que consiguió metese ayeri en Q2 nel so retornu a la F1 y güei presentó batalla en delles ocasiones, llegando a tar en puntos. El so compañeru Ericsson retirábase na vuelta cincuenta y tres por problemes col coche.

Dempués de la carrera, y pa sumar a los cincos segundos de penalización que Hamilton sirviera demientres el so segundu pit-stop, los comisarios decidieron quita-y dos puntos de la so llicencia. Sáinz tamién foi penalizáu pol incidente con Stroll, nel so casu con tres posiciones na parrilla de salida del próximu gran premiu.

Dempués d’esta victoria, Vettel ponse llíder per delantre de Hamilton, al que saca siete puntos. Nel mundial de constructores, Ferrari nun consigue quitase d’enriba a Mercedes, al que sólo saca tres puntinos. El próximu gran premiu sedrá, en dos selmanes, nel circuitu de Sochi pal Gran Premiu de Rusia.

Carrera

Y de China al desiertu. Concretamente a Baḥréin. Y vuelta a los horarios que nun nos faen madrugar. Esti gran premiu tien tantos amigos como enemigos: dende los que dicen que yá, pa entamar, nun debería tar faciéndose un gran premiu nel país hasta los que creen que ye una de les cites más importantes del calendariu sobre too dende que s’optó por facela carrera nocturna. Como pasa con casi toles carreres, hai opiniones y preferencies pa toos.

El casu ye que llegamos a esti tercer gran premiu de la temporada con dos pilotos, d’equipos distintos, empataos a puntos, con una victoria caún, y dos equipos separtaos por un puntu nel mundial de constructores. Paez que nin pidiéndolo a propósito podíemos tener un entamu de temporada más interesante.

Ensin embargu, nun son too sorrises en Ferrari pesie al bon comienzu d’esti 2017. Dellos medios fixéronse ecu de les declaraciones de Sergio Marchionne sobre l’estáu de forma actual de Kimi, que nun fueron nada positives. A nós paeznos que ye un poquín temprano pa xulgar la forma d’un pilotu por mucho que l’otru que tengas yá ganara una carrera. La temporada ye bien llarga y tolos que siguimos la Fórmula Uno sabemos que, en dellos casos, los comienzos nun son pa nada determinantes.

Al marxe de la carrera, onde vamos tar sollertes a lo que se faga na cabeza y a los equipos “medianos” que vienen dando guerra y espectáculu no que llevamos d’añu formuleru, hai un par de noticies a comentar.

Per un llau, la futura participación de Fernando Alonso nes 500 milles d’Indianápolis el próximu 29 de mayu, cita que lu obliga a perder el míticu Gran Premiu de Mónaco. Ta claro que la confianza d’Alonso nuna recuperación del equipu pa eses feches ye nula, polo que pue permitise’l dexar un fin de selmana en blanco sabiendo que, probablemente el resultáu vaiga a ser el mesmu que si compitiera. Sicasi tamién ye verdá que Mónaco ye un circuitu onde les oportunidaes de puntuar pa los que nun tienen vezu de facelo aumenten. El so substitutu sedrá Jenson Button que, anque nun siguió mui de cerca les primeres carreres de la temporada, siguía en nómina como tercer pilotu quiciás previendo circunstancies como la que se va a dar en mayu.

Per otru llau, por fin vamos poder ver a Pascal Wehrlein competir a los mandos del Sauber, totalmente recuperáu yá del accidente que tuviera nel RoC y de xuru dispuestu a facer por contrarrestar estos dos grandes premios perdíos y los comentarios que llevantó la so ausencia nes dos primeres cites.

Por últimu, na mañana del xueves, Renault anunciaba qu’Oliver Rowland diba ser el so pilotu de desarrollu. Amás, el británicu va competir na Fórmula 2 col equipu DAMS.

Too llisto pa poder esfrutar un nuevu gran premiu d’esta temporada 2017. Equí vos dexamos daqué información sobre’l circuitu pa que nun perdáis detalle. Y esta ye la información que proporciona Pirelli sobre la carrera:

Munches yeren les duldes plantegaes enantes de que s’apagaren güei les lluces colloraes y los pilotos pisaren l’aceleraor nel Gran Premiu de China. El vienres, el borrín fexo que los coches nun pudieren salir de los sos garaxes. L’helicópteru médicu nun tenía garantizáu’l so aterrizaxe nel hospital correspondiente al circuitu, ya’l viaxe n’ambulancia nun baxaba de los venti minutos, tiempu estipuláu p’atender apropiadamente a un pilotu dempués d’un accidente. Asina ye que’l vienres, los fans tuvieron de conformase con ver a los sos pilotos pasear pelos boxes y a Hamilton tirándo-yos gorres firmaes, un detalle más del pilotu inglés pa colos sos siguidores.

El sábadu, y con milenta incógnites, sí pudimos ver yá a los coches en pista, tanto pa los llibres como pa la sesión de clasificación, onde too paeció siguir el patrón marcáu n’Australia: pole pa Hamilton con Vettel al so llau y los sos compañeros respeutivos na segunda llínia. Saltaba la sorpresa con Verstappen que calificó penúltimu por problemes col coche. Too facía albidrar que’l domingu la llucha diba tar ente Mercedes y Ferrari como yá víemos n’Australia. Tábemos equivocaos.

Anque nun hebo quién quitar a Hamilton del primer puestu en tola carrera, lo que vimos per detrás foi bien interesante: dende bien temprano topábemos a Stroll na grava dempués de un choque con Pérez nel que’l mexicanu sacaba de pista al canadiense, siendo ésti’l primer abandonu de carrera y faciendo que se tuviera qu’activar el coche de seguridá virtual. Esti momentu foi aprovecháu por xente como Sebastian Vettel pa cambiar gomes. Ye importante reseñar que tolos coches salieron con intermedios non siendo Sáinz que s’arriesgó a salir con super soft y tuvo pagándolo en dellos momentos de la primer parte de la carrera.

Cuando yá los coches taben preparándose pa volver a mou carrera, otru incidente, esta vegada na recta de meta, facía que saliera’l coche de seguridá. El pilotu de Sauber Giovinazzi perdía’l control del coche xusto de la qu’entraba na recta y quedaba torgáu en mediu’l trazáu y con milenta cachos del chasis del Sauber espardíos, lo que fexo que, aparte del coche, el restu de pilotos tuvieren de pasar pel carril de pit pa evitar la parte del accidente. Ta claro qu’esti nun foi’l finde del pilotu italianu, que tuvo otru incidente’l día enantes demientres la Q1, xusto nel mesmu sitiu. Les cares de la xente de Sauber yeren un poema.

Dende’l momentu nel que’l coche de seguridá volvía a entrar nel pit y teníemos carrera ente manes, pudimos ver una llucha continua ente Verstappen, que nun s’apeó de los puntos dende l’empiezu la carrera, y cualquier pilotu que se-y punxera delantre: Vettel, Ricciardo, Bottas…El pilotu de Red Bull completó una carrera perbona teniendo en cuenta dende onde salía y dexando de llau que les condiciones en pista yeren especiales. Vímoslu más centráu que n’otres carreres, menos nerviosu ya obsesionáu por pasar a los sos rivales, anque nun dexaba de quexáse, nes últimes vueltes y con Ricciardo casi encima, del Haas de Grosjean. Seya como fuere, el pilotu holandés consiguió facese col tercer caxón del podiu, per detrás de Hamilton y Vettel.

Bottas nun lo fexo en xeneral mal pero descolgose n’un momentu nel que se salió de pista por un error puntual, cuando esta entá tenía delles partes con agua, y llueu yá sólo pudo ponese quintu. Räikkönen tamién tuvo dellos problemes col coche, y namás pudo ser cuartu. El restu d’equipos tuvieron actuaciones irregulares: dambos Force India entrar en puntos, n’otra bona actuación d’Ocon que, pasín ente pasu, paez que va convenciéndose ya convenciéndonos. El so compañeru tamién entró nos puntos. Toro Rosso tamién puntúo, pero namás con ún de los sos pilotos, Sáinz, mientres Kvyat quedaba fuera a mitá de carrera.

Renault nun entró nos puntos, con Hülkenberg décimosegundu ya Palmer xusto detrás, y Haas namás puntuó con Magnussen, que foi octavu. Grosjean quedó a les puertes de los diez primeros, dempués de qu’ayeri la so clasificación se viera afeutada pol accidente de Giovinazzi y amás llevara una penalización de cinco posiciones por nun frenar con banderes amarielles, dalgo polo que tamién foi penalizáu Palmer.

McLaren tuvo rodando con Alonso dientro de los diez primeres tol tiempu que tuvieron en pista, anque foi pocu consuelu cuando primero Vandoorne y llueu’l propiu Alonso teníen d’abandonar, sumando otru gran premiu ensin nengún puntu. Xunto al equipu de Woking tamién decepcionó Williams, con Massa nel puesto décimocuartu y Stroll fuera. Sauber namás pudo terminar con un coche, el d’Ericsson, nel puestu décimoquintu.

Agora mesmo, Mercedes saca namás un puntu a Ferrari nel mundial de constructores y nel de pilotos Hamilton y Vettel tán empataos. En siete díes tenemos otra cita formulera, esta vegada con horarios más decentes, nel Gran Premiu de Baréin.

Por si nun valiera col madrugón p’Australia, agora tócanos facelo otra vuelta, pero pa China. Y ye que yá sabéis que los entamos de les temporaes siempre suelen dase pal otru llau del mundu colo qu’eso trai, cares de sueñu demientres tol fin del selmana.

Dempués d’Australia y con munches duldes nel aire, averámonos agora al circuitu de Shanghai. Siempre paez que la primer carrera del añu formuleru ye namás un trámite pa ponese en plan a partir de China, y ye que Melbourne poques veces ye espeyu de lo que va vinir dempués na temporada. Esto nun quier dicir que Ferrari nun tenga de tar en toles quinieles: paeznos que tienen motivos de sobres pa tar ehí y no más alto, pero aventuranos a estes altures del partíu ye quiciabes arriesgao. Les sorrisines que nos apaecíen na cara a dalgunos cuando víemos que Mercedes nun empezaba ganando, tórnense agora en cares series, pendientes de lo que vaiga pasar en China, el primer gran asaltu.

¿Foi Australia una casualidá? ¿Tamos a piques de ver como’l color rosso-y planta cara a les fleches platiaes otra vez? Como dicíemos arriba, tamos énte una carrera que cásique plantega más duldes qu’Australia porque yá vimos los coches en pista, yá tenemos un resultáu, y entá nun sabemos per onde garralo. Asina que toca, sentase con paciencia nel sofá col café bien cerca y analizar lo que vaigamos viendo dende bien ceo’l vienres, nos entrenos llibres dende les cuatro la mañana hasta la carrera del domingu (a les ocho la mañana). El sábadu, tocarános ver quién se fai cola pole a partir de les nueve.

Amás, China va ser la segunda carrera na que veamos correr a Giovinazzi a los mandos del Sauber, por cuenta la baxa de Wehrlein, que sigui ensin tar en plan pa poder ponese al volante. Otra oportunidá pal italianu pa dexase ver de cara a un futuru, non mui llonxanu, na categoría reina del motor.

Ensin más, nesti enllaz podéis consultar más información sobre’l circuitu al que vamos viaxar n’unos díes, el circuitu de Shanghai pal Gran Premiu de China.

Güei bien ceo, estrenábemos temporada de F1 y, anque pintaba que les Silver Arrows diben a coronase, continuando cola tónica de la temporada pasada, pagó la pena’l madrugón pa ver a Ferrari volver a ganar una carrera de manes de Vettel.

En la clasificación Lewis Hamilton volvió a lliderar los tiempos, pero esta vez los Mercedes nun taben solos magar que Vettel metíase segundu ente él y el so compañeru Bottas. El progresu de Ferrari empezaba a vese cuando llegaba lo serio. Tamién que pesie al cambiu de reglamentación Mercedes diba siguir lluchando no cimero. Ricciardo tuvo un choque que lu llastraría’l restu del fin de selmana y Verstappen intentaba acercase a la cabeza. Mención especial pa Romain Grosjean que llograría un 6 puestu col so Haas.

Yá na carrera, tres d’una salida ensin incidentes pero que tuvo d’albuertase porque Hülkenberg se colocó nel sitiu que nun-y tocaba, Hamilton taba decidíu a repitir lo que tantes otres vegaes-y funcionare: garrar la primer posición y tirar hasta meter tanta distancia al segundu que yá nun tuviera de preocupase de los retrovisores pal restu la carrera. Pero esta vez nun diba consiguilo y anque consiguía meter daqué distancia col pilotu de Ferrari, nun foi quien a perdelu de vista hasta la so entrada en boxes.

Tamos avezaos a que les carreres de Mercedes seyan, polo normal, tranquiles y que les coses-yos salgan según planeen. Ensin embargu, y pa sorpresa, esta vez fallaron cola estratexa, y apuraos pol desgaste que taba teniendo’l Mercedes coles gomes ultrablandes metieron a Hamilton enantes de que parare Vettel cuntando con aprovechase del “undercut” (ello ye, cuando un pilotu entra primero que’l que tien xusto detrás p’aprovechase de les gomes nueves). N’otres circunstancies quiciabes esta fuera la meyor opción, pero Hamilton salió a pista con Giovinazzi per delantre (que pilotaba pa Sauber dempués de la baxa de Wehrlein), y perdió daqué tiempu intentando desfacese d’elli. Llueu, pasó-y lo mesmo con Verstappen y el pilotu de Red Bull nun foi tán fácil de despachar. Hamilton entró na vuelta 17 demientres que Vettel aguantó y ensin dexar de meter tiempu pel medio hasta la 24. Tamos fechos a que les estratexes de Ferrari nunca nun funcionen, pero güei sí, güei yera’l so día y diba pagar la pena aguantar en pista. El pilotu alemán diba salir per delantre de Verstappen y Hamilton, y yá nun diba baxar d’esi puestu hasta terminar la carrera.

Hamilton nun tuvo una carrera mui tranquila tampoco, dexando de llau la estratexa: nun tuvo cómodu coles gomes y tampoco nun se-y vía cómodu como otres veces. El so compañeru, Valtteri Bottas, acabó terceru ensin facer munchu ruíu y con menos problemas que l’inglés. Räikkönen, tamién con una carrera bastante tranquila, terminaría siendo cuartu, con Verstappen quintu como únicu Red Bull en carrera.

La escudería del toru coloráu empezaba’l día con problemas n’un sensor de la caxa cambios de Ricciardo, que lu tenía metíu en boxes incluso cuando la carrera yá taba entamada. El pilotu australianu terminó saliendo na vuelta cuarta, pero nun sedría quién a terminar, quedando tiráu en pista con dalgún problema nel motor na segunda parte de la carrera.

Nun hebo munchos problemes en pista, quitando l’incidente de la primer vuelta ente Magnussen y Ericsson onde dambos acabaron na grava, pero que nun tuvo más consecuencies que la perda ritmu de dambos pilotos. Al final, dempués d’un bon ratu rodando, los dos tendríen de retirase pesie pesia a la vista al garaxe. Por contra, nun fueron los primeros retiraos: Romain Grosjean, dempués d’una gran sesión de calificación el sábadu, foi la primer víctima de problemas col motor, y a elli xuniríase al pocu Jolyon Palmer, tres d’un fin de selmana bastante difícil nel so llau del garaxe. Amás d’ellos dos tamién terminaron retirándose Ericsson, Stroll, Magnussen y Alonso.

Los pilotos de McLaren tuvieron un gran premiu irregular: Vandoorne empezó con problemas na pantalla del volante de la que nun recibía información, y tamién sufrió perdes de potencia que terminaron iguándose pero que sólo lu dexaron acabar décimoterceru, l’últimu de los coches que vieron la bandera a cuadros. Pel so llau, Alonso rodó bona parte dientro los puntos, en décimu llugar, hasta que na última parte de la carrera, problemas cola suspensión fuerciaron la so retirada. Sauber acabó xusto per delantre del pilotu de McLaren, nel debut de Giovinazzi. Quiciás esti resultáu nun sepa tan amargu en McLares ente les duldes sobre si acabaríen la carrera siquiera.

En cuantes a Williams, Massa consiguió terminar nos puntos mientres que’l so compañeru, el debutante Stroll, nun podría llevar el coche hasta meta. El pilotu canadiense tuvo un fin de selmana bastante accidentáu y tien tolos güeyos puestos enriba d’elli pola so mocedá. Renault nun algamó los puntos, anque Hülkenberg tuvo oportunidá pa ello. Palmer, como diximos, tará deseyando olvidase rápido d’esti gran premiu. Force India pel so llau consiguió metese nos puntos con dambos pilotos.

Unu de los aspeutos más llamatibles de la carrera foi la cantidá d’adelantamientos que víemos, n’un circuitu onde se diz que ye complicao y coles nueves dimensiones de los coches como puntu negativu pa ello. Ensin embargu, y dende bien temprano, víemos a Sergio Pérez adelantar a Kvyat y a Nico Hülkenberg aprovechase d’un adelantamientu d’Ocon a Alonso pa ponese en paralelo y adelantar tamién. Tres coches n’un mesmu adelantamientu.

Empieza la temporada y empieza con dominiu rosso. Mercedes y los sos pilotos reconocieron que Ferrari foi más rápido güei demientres la carrera, y los optimistes nun dulden en dicir que tamos énte la torna de la llucha ente equipos pol campeonatu de pilotos. Abúltanos pronto p’aventuranos a falar del futuru, pero ta claro que’l público agradez el cambiu y, si ye verdá que va haber llucha ente equipos, taremos énte una temporada perinteresante.

Estos son los resultaos que nos dexó’l fin de selmana:

Clasificación

Carrera

Paez que namás va unos díes escribíemos sobre lo que pasara na carrera d’Abu Dhabi 2016 y yá tamos sentándonos pa escribir la previa d’un gran premiu nuevu. Como ye vezu, la temporada de F1 empieza n’Australia, nel circuitu d’Albert Park, un clásicu que presta a tol mundo y, como bien diz la xente que sabe d’esto, una carrera namás que pa esfrutar ensin lleer muncho nos resultaos, polo obvio de que ye la primer carrera y que nun diz muncho col restu circuitos.

Si lleistis los resumes de los test, taréis igual que nós a la espeutativa, deseyando ver si lo que Ferrari amosó ye real, si Mercedes va volver a pasar perriba tol mundo, si McLaren taba meyor faciendo otra cosa y si lo que víemos esos díes en Montmeló sirven pa facenos una idea d’esti 2017 que ta a piques d’empezar dende un puntu vista formuleru.

Salimos del pigazu bien ceo, alcordáivos qu’Australia ta nel otru llau del mundu y eso significa que toca madrugar: los entrenos el vienres vamos poder velos a partir de les dos de la mañana y a les seis, el sábadu a partir de les cuatro y la sesión de calificación a les siete, y la carrera’l domingu va ser a les siete.

Equí podéis atopar dellos datos sobre’l circuitu d’Albert Park.

Por aquello de dir faciendo memoria, estos fueron los últimos ganadores en Australia: