Author: Asturies F1

Interlagos ye siempre un circuitu al que presta llegar. Esti 2017 va ser el de la despidía de Massa (por segunda vegada) y col campeonatu yá decidíu pela parte arriba a favor de Mercedes, toca esperar y ver qué pasa nel restu la tabla.

Como davezu, hai predicción de lluvia pal fin de selmana, anque nun ta claro que vaiga apaecer el domingu demientres el gran premiu. Sí ye verdá que ye dalgo que los pilotos esperen, porque suel da-yos oportunidaes de consiguir puntos ya incluso’l podiu. Tando a 800 metros d’altor, nun ye tán desixente como México, pero les sos calterístiques ya’l so trazáu faen que tanto pilotos como inxenieros tengan de trabayar duro pa consiguir el punto óptimu de los sos monoplaces.

En Mercedes, colos deberes pa 2017 yá fechos, tán pensando en 2018. De fechu, estes dos carreres que nos queden piensen dedicales a probar coses de cara a la temporada qu’entra. Siempre se diz que cuando ta decidíu un campeonatu, los pilotos empiecen a conducir pa esfrutar, ensin presiones, asina que tenemos ganes de ver de qué son capaces los pilotos de Mercedes nesa situación. Bottas entavía pue ser segundu nel campeonatu, lo que zarraría una temporada d’aplausu (otra más) pa la escudería alemana.

Ferrari yá formuló la so amenaza añal de dexar la Fórmula Uno, dalgo que yá dexó de llamar l’atención hai tiempu. Munchos medios critiquen la so postura con respeutu a los cambios proyeutaos pa 2020, demientres qu’otros falen de que tienen razón y otros más ignoren yá lo que dicen por considerar que ye más una pataleta que daqué fundamentao. Muncho más se fala del so baxón de forma na segunda parte del campeonatu yá incluso de cómo “fallaron” a Vettel. Ensin más que consiguir, si cuenten con consiguir los más puntos posibles, sobre too pensando que Vettel entá puede perder la so segunda posición nel mundial de pilotos.

Red Bull tán n’un perbón estáu de forma, sobre too dende Hungría. Nes últimes carreres Verstappen desfízose de la so mala suerte, anque tal paez que-y la pasara a Ricciardo nes dos últimes. Nun ye un circuitu que-yos preste especialmente, pero sí ún onde puen consiguir coses importantes, como’l podiu col que se fizo Verstappen l’añu pasáu.

Force India yá tienen aseguráu’l cuartu puestu nel mundial, polo que lleguen a Brasil con ganes d’arriesgar y probar nueves estratexes cola seguridá de que nun van vese penalizaos por ello y cola posibilidá de deprender y ameyorar. El vienres vamos ver a George Russell, campeón de GP3, a los mandos del monoplaza, entá nun sabemos en llugar de quién. Los pilotos esperen que’l domingu llueva pa poder tener oportunidaes d’alcanzar un podiu que se-yos resiste.

Williams yeren noticia esta selmana pol anunciu, esperáu per otru llau, de que Massa va a retirase al final d’esta temporada. Ye dalgo que vivimos l’añu pasáu pero que, por circunstancies inesperaes (la despedía de Rosberg de Mercedes ya’l cambiu de Bottas pa ocupar el so asientu) quedó cancelao. Nun creyemos qu’esti añu vaiga pasar lo mesmo. De toles formes, entá nun se sabe quién va pilotar xunto a Stroll en 2018, por ello tol enfotu ta puestu nes dos carreres que queden y n’asegurase’l quintu puestu nel mundial, que cada vegada tienen más cerca.

Toro Rosso tien nes sos files al nuevu campeón de WEC. Brendon Hartley y los sos compañeros de Porsche convertíense nos nuevos campeones del campeonatu de resistencia’l domingu pasáu, amosando que’l pilotu qu’agora ocupa l’asientu en Toro Rosso nun ye poca cosa. Na so tercer carrera en F1 va dando pasinos alantre, garrando confianza col coche y ameyorando como yá pudimos ver hai dos selmanes. Gasly pel so lláu llega equí a competir per primer vegada, anque ensin nengún mieu. Dambos pilotos, como’l restu de la parrilla, esperen que l’agua los ayuda dalgo pa consiguir esos puntos tán necesarios pa siguir sumando nel mundial.

Renault tán intentando recuperase de la deceición de México, onde dambos pilotos tuvieron d’abandonar y toca-yos siguir bregando pol so oxetivu, qu’agora yá ta más centráu en ser sextos. Hülkenberg suel facer bones carreres en Brasil (de fechu, equí consiguió la so primer pole siendo rookie, en 2010 con Williams) y almite que siempre vien extra-motiváu a Brasil polo que-y presta’l circuitu y l’ambiente. Amás, dempués de los dos abandonos siguíos en Austin y México, tien más razón entá pa intentar tener un bon fin de selmana. Sáinz quier repitir la so carrera del añu pasáu, que foi n’agua. L’equipu ye optimista sobre les sos oportunidaes equí sobre too pensando n’incorporar dalgunes meyores, pequenes, pero que quiciábes los ayuden a consiguir puntos el domingu.

Haas lleguen con munches ganes de correr n’Interlagos y más sabiendo que tienen a Renault a un puntu y a Toro Rosso a seis, colo qu’una bona carrera podría facer que llegaren a ser sextos nel mundial de constructores dalgo que sedría un perbón llogru pa la escudería norteamericana. Giovinazzi va volver tar n’unos llibres, en sustitución de Magnussen, pero en cuenta ser los primeros, como suel ser vezu, va tar nos segundos.

McLaren anunciaben esta selmana que Lando Norris ye’l so nuevu pilotu reserva y probador, desvinculando d’esi papel a Jenson Button de forma definitiva. Amás, Alonso yá tuvo en Toyota pa entrar en contautu colos LMP1 y pa les midíes del so asientu de cara a Le Mans en 2018. Equí lleguen con confianza de poder facer les coses bien, especialmente si clasifiquen bien el sábadu. La última victoria de McLaren foi precisamente equí, en 2012 cuando Jenson Button ganaba la última carrera de McLaren hasta la fecha, con motores Mercedes. Nesti 2017, sedrá la última con motores Honda, hasta nuevu avisu.

Sauber esperen ameyorar un poco con respeutu a carreres anteriores equí, aprovechar les circunstancies cambiantes y consiguir dalgún puntu. En México pudimos ver a Ericsson con bon ritmu, cerca de los puntos enantes d’abandona, polo qu’esperen siguir nesa llínia equí pero cuntando con poder ver la bandera a cuadros con dambos coches esta vegada. Amás, vamos ver a Charles Leclerc nel monoplaza demientres la primer sesión de llibres, con halo incluyíu.

Llega la penúltima carrera de la temporada, con horariu de tarde:

VIENRES 10/11/2017

LLIBRES 1: 13:00
LLIBRES 2: 17:00

SÁBADU 11/11/2017

LLIBRES 3: 14:00
CLASIFICACIÓN: 17:00

DOMINGU 12/11/2017

CARRERA: 17:00

Equí vos dexamos más información sobre’l circuitu y les gomes escoyíes polos pilotos pa esti gran premiu:

 

A 2200 metros d’altura y dempués de hora y media llarga de carrera, yá conocemos al campeón d’esti 2017 de Fórmula Uno: pesie a nun ganar y nin siquiera subir al podiu esti fin de selmana, Lewis Hamilton proclamose’l domingu campión del mundo por cuarta vegada, sumando’l so éxitu al que yá consiguiera Mercedes la selmana pasada n’Austin. Cola pole de Vettel del sábadu, que sorprendió a munchos, entrábennos les duldes de si l’alemán podría retrasar hasta Brasil la coronación de Hamilton. Y casi lo creyimos dempués de dellos metros tres la salida.

El pilotu de Ferrari salió bien, como tamién lo ficieron los sos persiguidores, Max Verstappen que salía segundu y Lewis Hamilton, en tercer puestu. Ensin embargu, el pilotu de Red Bull ensiguida amosó la superioridá del so coche y pasó a Vettel, non ensin qu’esti presentare batalla. Hamilton quiso aprovechase d’esi momentu de debilidá del pilotu de Ferrari p’adelantalu elli tamién pero, n’una maniobra que munchos califiquen de dalgo agresiva, Vettel zarrolu y terminaton tocándose y resultando’l morru de Vettel dañáu y la rueda trasera drecha de Hamilton pinchada. Dambos pilotos tendríen d’entrar en boxes enantes de tiempu, cola idea de nun volver parar más. La carrera de dambos quedaría condicionada dende esi momentu, anque Ferrari tuvo muncho más ritmu que’l Mercedes, dalgo que yá s’esperaba.

Pela parte d’arriba, Verstappen nun tardó en facese col control de la carrera, per delantre de Bottas y Räikkönen, a bastante distancia l’ún del otru y del pilotu holandés. Ensin embargu, y pesie a la so superioridá en pista, nun foi too tranquilidá pa Red Bull. Ricciardo convirtióse nel primer abandonu de la carrera por un problema col turbo. Poques vueltes dempués, sería’l Renault de Hülkenberg el que quedara fuera, por un problema cola batería. Yá son cuatro de cinco les carreres abandonaes pol pilotu alemán de Renault. Delles vueltes más allá, el Toro Rosso de Brendon Hartley tamién tinía problemes, provocando un coche de seguridá virtual que faría que casi tolos pilotos entraren a boxes p’aprovechar la situación y cambiar gomes. Hasta esti momentu diben tres coches con motor Renault retiraos del gran premiu, lo que metía la medrana nel cuerpu de la xente de Red Bull. Pero nun diba ser el motor de Verstappen el que parara, si non el de Carlos Sáinz, un nuevu abandonu y deceición máxima nel equipu.

Nes últimes vueltes de carrera, y dempués de ver a Hamilton batallar con coches inferiores pa intentar ganar posiciones, diba siendo más obvio que Vettel tinía too perdío nel mundial. Anque nun dexaba de subir na tabla, tamién lo facía Hamilton, dalgo que nun-y convenía pa los sos intereses. Si’l inglés puntuaba, Vettel tinía de ser, a lo menos, segundu, y nesi puestu taba un Valtteri Bottas que de xuru nun diba vender fácilmente la so posición.

Pudimos ver delles batalles en pista que pagaron muncho la pena, como la que protagonizaron Magnussen y Alonso, a la que llueu se sumaba Hamilton y que beneficiaba al pilotu de Haas, que mientres los otros dos pilotos s’engarriaben, consiguía mete-yos distancia, terminando octavu. Tamién ficieron un perbon trabayu los dos pilotos de Force India, sobre too Ocon, que llegó a rodar terceru. L’equipu yá consiguió amarrar el cuartu puestu nel mundial de constructores.

Ericsson foi l’últimu abandonu de la carrera, dempués de que’l so Sauber nun pudiera controlar la calor xenerada en carrera y prendiera. El suecu tuvo bona parte del gran premiu dientro de los puntos.

En xeneral vimos bastante acción en pista y la tensión foi alta hasta les últimes vueltes onde yá entendimos que la misión de Vettel yera imposible. Ensin embargu, les batalles que vimos ente pilotos, ficieron qu’esti gran premiu de México pueda considerase una carrera entretenida.

Mercedes algamó’l domingu l’oxetivu que se marcaran pa esti 2017 y que supón que lleven cuatro años consecutivos ganando dambos campeonatos. Anque nun tuvieron una carrera cenciella nel lláu de Hamilton, Bottas sí completó una carrera tranquila ensin problemes pero a muncha distancia de Verstappen, pal que nunca foi un problema.

Podemos dicir que Ferrari viéronse na mesma situación que Mercedes, por tener a ún de los sos pilotos na cola de pilotos y otru corriendo no más alto. Kimi Räikkönen terminó siendo terceru dempués de pasar parte de la carrera detrás de Force India. Nun taba contentu cola salida, pero consiguió facese col puestu más altu de los disponibles yá que Bottas taba mui lloñe como pa ser quién a alcanzalu enantes del final. Vettel entá nun pue confiase, pues tien a quince puntos a Bottas nel campionatu de pilotos.

La victoria de Verstappen quedó un poco desllucida pol fechu de producise xusto coincidiendo cola proclamación de Hamilton como campeón d’esta temporada. Pero’l pilotu holandés de Red Bull fexo una carrera sólida, ensin errores, poniendo de los nervios a los sos inxenieros intentando consiguir la vuelta rápida de carrera y, en xeneral, ensin duldar de les sos posibilidaes. Ye síntoma de que ye una carrera controlada’l fechu de que malpenes lu vimos en pantalla. Nel otru lláu del garaxe, Ricciardo volvía a repitir abandonu por problemes col coche. Salía con penalización y el turbo nun dexó que terminara.

Los Force India, otra vuelta más, completaron una carrera perbona. Ocon, como yá comentábemos enantes, llegó a rodar terceru, anque la lóxica impúsose y terminó per detrás de los Ferrari. El pilotu francés tuvo a raya al so compañeru demientres tol gran premiu, clasificando per delantre d’elli’l sábadu, y consiguiendo ser quintu’l domingu. Pérez, pela so parte, tuvo una carrera entretenida, con batalles con pilotos como Räikkönen o Stroll, per detrás del que terminaría. Consiguió acabar séptimu, sumando xunto al so compañeru otra carrera con dambos coches dientro de los puntos y sellando’l cuartu puestu pa Force India nel mundial de constructores.

Williams consiguieron puntuar con Stroll y beneficiáronse de los problemas de Renault y Toro Rosso. El pilotu canadiense fexo una bona carrera, llegando a tar quintu en dellos momentos de la carrera y celebrando’l so cumpleaños con un séptimu puestu y un bon puñáu de puntos importantes pa los intereses del equipu nel campionatu. Massa namás pudo ser undécimu.

Haas tamién consiguió sumar puntos con Magnussen. El pilotu danés foi amás protagonista de dellos de los momentos más entreteníos de la carrera na so batalla con Alonso pol octavu puestu, col que terminaría la carrera. Grosjean nun entró en puntos, y tuvo un incidente con Alonso que dañó’l so coche y condicionó’l restu de la so carrera. Haas sigui per detrás de Toro Rosso y Renault nel mundial, pero namás a ún puntu de distancia de los segundos y a seis de los primeros.

McLaren nun corría n’un circuitu favorable, pero a lo menos consiguió sumar un puntu col coche d’Alonso y amás pudimos ver a dambos pilotos plantar batalla en dellos momentos de la carrera. Nunca nun abandonaron los puestos averaos a los puntos ya incluso paecía que dambos diben poder puntuar, pero finalmente diba ser Alonso’l que sumare un puntu terminando décimu con Vandoorne acabando nel puestu doce.

A dambos pilotos de Toro Rosso nun-yos sorrió la suerte esti fin de selmana: Pierre Gasly diba a la carrera ensin malpenes tener fecho vueltes nel circuitu por una montonera de problemes que-y fueron asocediendo demientres el fin de selmana. Anque consiguió terminar décimoterceru, víase que nun diba cola confianza necesaria que da’l conocer una migayina’l circuitu. Amás, la solombra del abandonu del so compañeru y d’otros tantos pilotos con motor Renault persiguíalu, pero finalmente consiguió ver la bander a cuadros.

Sauber sumó otru gran premiu con problemes: Ericsson abandonó y Wehrlein namás pudo ser décimocuartu, namás per delantre del Haas de Grosjean. Otra carrera pa olvidar y un pasín más cerca del final d’una temporada desastrosa pal equipu.

En Renault saltaron toles alarmes cuando cuatro de los seis coches que lleven el so motor quedaben fuera del gran premiu de México. Saltaron más entá cuando nengún de los sos coches pudieron terminar la carrera. Nel casu de Hülkenberg, el problema foi llétricu, pero supón el cuartu abandonu en cinco carreres del alemán. Nel casu de Sáinz, una mala salida y un trompu yá torgaron la so carrera y nun diba ser quién a terminar dempués.

Anque tán decidíos yá los campiones de cada categoría, nun ta too resuelto entá. De fechu, queden batalles perinteresantes nel mundial de pilotos (por exemplu, pol segundu puestu) y na parte media de la tabla nel mundial de constructores.

La prósima cita ye Brasil dientro de dos selmanes.

Ensin tiempu pa dixerir el Gran Premiu d’Austin, yá tamos en México, nel Autódromo Hermanos Rodríguez. Por tercer añu, la Fórmula Uno aterriza nel circuitu mexicanu cola solombra esta vegada de los terribles terremotos sufríos ellí hai unos meses. Munchos de los equipos quixeron amosar la so solidariedá cola población y busquen que’l domingu se vea una bona carrera en homenaxe a les víctimes.

Llegamos a ún de los circuitos más complexos del calendariu pola so ubicación: los 2200 metros d’altura dan más d’un dolor de cabeza a los inxenieros yá que la densidá del aire ye inferior y eso nun ayuda al sistema d’enfriamientu de los coches. Amás, necesiten correr con muncha aerodinámica pa compensar la lixereza del coche. En resume, una de les carreres onde los pilotos van tener más dificultaes.

Mercedes yá son campiones del mundu, por cuartu añu consecutivu. Ellos mesmos almiten qu’entá tán a la mitá de los sos oxetivos, yá que cuenten con ganar tamién el mundial de pilotos. Nun pinta mal: Hamilton pue ser campión esti fin de selmana incluso quedando quintu anque Vettel gane la carrera. Echando un güeyu a la temporada del pilotu británicu, nun suma nengún abandonu nin carrera ensin puntuar, polo que paez lóxico que’l campionatu seya pa elli. Ensin embargu, si miramos a cómo taben les coses enantes de Singapur y pensamos na mala suerte de Vettel en tres carreres siguíes que dieron la vuelta al campionatu, yé tamién lóxico dir con calma. Ye lo que dicen nel equipu: México nun ye’l meyor circuitu pa ellos, siempre suelen tener problemes nesti tipu de circuitos, polo que, anque ye fácil y mui probable que Hamilton seya campión equí, nun quieren dalo por fecho enantes de correr.

A Ferrari sólo-yos queda lluchar, sobre too confiando en que la suerte puea ayudalos d’una vegada nes tres carreres que queden nesti 2017. Vettel va buscar ganar los grandes premios que queden y cuenta cola ventaxa de qu’esti circuitu pue ser beneficiosu pa Ferrari en comparanza con Mercedes. Con Räikkönen buscarán sumar otru bon puñáu de puntos y, de xuru, subir al podiu.

Red Bull entá rumien la decisión de penalizar a Verstappen n’Austin pol so adelantamientu per fuera del trazáu, y lleguen a México entá colos ecos de lo que pasó. Ensin embargu, ponen tol enfotu nesta nueva carrera, onde Verstappen foi penalizáu l’añu pasáu y tamién quedó fuera del podiu por un adelantamientu por fuera, nel estilu del d’Austin. Tanto elli como Ricciardo tán confiaos de que puen facer dalgo curioso y metese nel podiu, pesie a lo difícil que ye consiguir una vuelta bona poles condiciones del circuitu.

Force India cuerren en casa. Pa la primer sesión d’entrenamientos llibres, en cuenta Ocon vamos tener a Alfonso Celis nel coche, ya’l pilotu francés tornará pa la segunda tanda. Anque nada nun ta zarrao entá, l’equipu tien mui fácil quedase col cuartu llugar nel campionatu de constructores y col bonus extra pa Sergio Pérez por correr en casa. Dambos pilotos falaben de lo prestosu que ye esti trazáu de correr y tamién de la so situación a nivel personal, dempués de les engarradielles del pasáu. Paez que les agues tornen a tar calmes nel equipu.

Williams entá nun tomaron la decisión sobre los sos pilotos pa 2018 y nun van facelo hasta dempués de que termine la temporada. Asina lo dixeron a principios d’esta selmana. Los puntos siguen siendo vitales pa ellos porque los dos equipos que tienen por detrás entá puen facese con esi quintu puestu nel que lleven anclaos dende casi l’empiezu la temporada. Na mesma llínia que’l restu de pilotos ya equipos, comenten lo difícil que va ser esti circuitu pa consiguir vueltes que seyan perfectes.

Toro Rosso confirmaron a Hartley y Gasly como pilotos pa esti gran premiu, dando una nueva patadina a Daniil Kvyat, que yá se ve más fuera que dientro de la Fórmula Uno pal añu que vien. De fechu, son munches les voces qu’afirmen que van ser estos los pilotos que compitan en 2018 cola escudería. Gasly llega a México cola deceición de nun poder competir na Súper Fórmula (la última carrera foi cancelada por amenaza de tifón, quedando’l pilotu francés a mediu puntu del llíder) y teniendo que perdese’l gran premiu d’Austin. Dambos pilotos namás busquen siguir ameyorando y buscar los puntos, dalgo que paez complicao pola so condición de “novatos”.

Renault, con dos pilotos bien potentes agora a los mandos de los sos monoplaces tienen munches posibilidaes de sumar un bon puñáu de puntos d’equí al final de la temporada. Vimos lo que podía facer Sáinz nel so debut, que permitió a Renault pasar a Haas, polo que si dambos pilotos tán en bona forma, puen incluso competir por sacar a Williams de la comodidá del quintu puestu.

Grosjean expresaba la so preocupación pol sistema d’enfriamientu de los frenos en México yá que ye un aspeutu, los frenos, col que lleva peleándose tola temporada. Haas van intentar dar una meyor imaxe que la que dieron hai una selmana en casa siempre teniendo en cuenta la cantidá d’aspeutos que tienen de tener en cuenta pa competir equí con garantíes de puntuar. El so consuelu ye que les dificultaes afeuten a tolos equipos na mesma midía.

McLaren yá parten con penalizaciones (55) pal domingu pol cambiu de pieces d’Alonso derivaes de los problemes que tuviera n’Austin. De momentu, Vandoorne paez tar salváu, anque dende l’equipu nun taben convencíos al 100%. Ensin embargu, el pilotu asturianu almitió que dellos nuevos componentes que montaron n’Austin dieren bon resultáu ya esperen consiguir lo mesmo equí. Vandoorne, pel so lláu, va debutar nesti circuitu. Dende l’equipu son sinceros y nun cuentan con puntuar equí, anque nun pierden la esperanza de que dalguna circunstancia-yos lo permita.

Sauber siguen xenerando poques noticies, salvo quiciás una entrevista a Ericsson, asoleyada a principios de selmana onde’l pilotu suecu defendía que se merecía tener un sitiu na Fórmula Uno l’añu que vien. Ye lóxico que, cola cantidá de pilotos a la espera de dar el saltu que hai agora mesmo (Leclerc siendo’l que más posibilidaes tien nesti casu concretu) los qu’esti añu tán amosando un rendimientu baxu necesiten lexitimase cara al públicu. Nun sabemos en qué situación s’atopen les negociaciones de pilotos en Sauber pero nun tenemos mui claro que vaigamos a ver el mesmu par na prósima temporada.

En México repitimos horariu nocturnu:

VIENRES 27/10/2017
Llibres 1: 17:00
Llibres 2: 21:00

SÁBADU 28/10/2017
Llibres 3: 17:00
Clasificación: 20:00

DOMINGU 29/10/2017 (alcordaivos que retrasamos la hora, a les 3:00 van ser les 2:00)
Carrera: 20:00

Equí podéis atopar tolos datos sobre’l circuitu y más abaxo les gomes escoyíes por Pirelli pa esta carrera, con debut del ultrasoft:

Anque un par de hores enantes de que los coches se punxeren en marcha n’Austin abriéronse los cielos y cayó un bon bastiazu, la carrera del domingu desendolcóse embaxo un sol bien brillante y ensin nengún restu d’agua en pista. Dempués d’unes preparaciones al más puru estilu estaoxunidense, los veinte coches alliniábense en pista pa tomar la salida.

En más d’una ocasión esti añu tuvimos perbones salides que llueu tornábense en carreres más bien tirando a aburríes. Nesti casu tuvimos la suerte de tener dambes coses. Na salida, Hamilton víase relegáu al segundu puestu na primer curva dempués de que Vettel ficiera un perbón adelantamientu que lu colocaba llíder. Yera dalgo que necesitaba porque tener a Hamilton per delantre significaba tar más lloñe del oxetivu de siguir lluchando pol campeonatu. A los pocos metros yá-y metía una distancia curiosa al pilotu británicu de Mercedes qu’en nengún momentu se punxo nerviosu, consciente de que la so batalla tinía de ser calma ya ensin riesgos. Tampoco nun tuvo qu’esperar muncho pa ponerse otra vuelta per delantre, seis xiros y yá taba llíder, porque Vettel nun consiguió cuidar les gomes ya’l so rendimientu empecipió a baxar.

Aparte de los dos d’alantre, tamién vimos actividá pel mediu la parrilla: Alonso pasó a Sáinz y varios pilotos consiguieron sumar posiciones, como Verstappen que salía nel puestu dieciséis dempués de la so penalización. Magnussen salíase nesa batalla de la primer curva, lo que lu obligaba a parar más llueu de lo que cuntaben. Otru que paraba enantes de tiempu y pal restu de la carrera foi Hülkenberg, que tres la so penalización del sábadu, quedaba fuera na vuelta cuatro. Wehrlein, víctima de les lluches de la primer parte de la carrera, precisamente con Magnussen, quedaba fuera tamién na vuelta siete.

A midía que diben pasando les vueltes fuimos viendo’l papel perimportante que xugaba la bona xestión de les gomes demientres la carrera. Munchos pilotos terminaron por adelantar les sos paraes porque los Pirelli nun aguantaben el ritmu.

Ún de los pilotos que más espectáculu dio hasta que’l so coche decidió que valió foi Ricciardo. Siguiendo l’estilu al que nos tien avezaos, foi protagonista de dellos adelantamientos d’aplausu na so batalla por pasar a Bottas pa ponese terceru. Ensin embargu, na vuelta dieciséis, el so motor Renault callaba y dexábalu tiráu. Lo mesmo fadría na vuelta venticinco el Honda d’Alonso, que tamién tuvo de retirase.

Otros que tamién tuvieron llucha en pista fueron Ocon y Sáinz. El pilotu madrileñu, na so primer carrera con Renault, plantó cara al Force India, regalándonos dellos momentos emocionantes en pista.

Les últimes vueltes foron una sucesión de lluches perriba, con Verstappen intentando algamar el podiu y Vettel buscando consiguir la victoria que Hamilton tinía nes manes dende que recuperara’l llideralgu de la carrera. Pela parte d’atrás, Ericsson chocó con Magnussen, dempués de que’l danés ficiera una maniobra pa dexar pasar a Vettel ya’l suecu nun fuera capaz de reaccionar a tiempu. Llevó una penalización de cinco segundos.

El ritmu d’estes últimes vueltes foi más baxu, lóxicamente, que’l del restu de la carrera, menos pa Verstappen. A falta de namás unes curves pa ver la bandera a cuadros adelantaba a Räikkönen pa facese col tercer caxón del podiu. Ensin embargu, el pilotu de Red Bull yera inmediatamente investigáu y los comisarios decidíen penalizalu con cinco segundos por considerar que l’adelantamientu a Räikkönen foi per fuera la pista. La inconsistencia de los comisarios pa penalizar esti tipu d’acciones (penalizando a unos y non a otros) fexo que la xente de Red Bull se quexara al altu la lleva pola decisión de los comisarios.

Mercedes son campeones del mundo de Fórmula 1 por cuarta vegada consecutiva. Naide dulda que, pesie a dellos momentos de duldes, son merecíos campeones tamién nesta ocasión. N’Austin, Hamilton yá yera casi ganaor el vienres, por tolo que supón pa elli esti gran premiu, l’ambiente y les ganes de consiguir la victoria. Asina lu vimos el domingu, salvo eses vueltes nes que Vettel foi llíder, sin duldar en nengún momentu que la carrera diba ser pa elli. Bottas bregó muncho demientres la carrera, pero decepcionó al final a la hora d’aguantar a los sos persiguidores (Verstappen y Räikkönen) y terminó siendo quintu.

Ferrari ficieron tolo posible por ganar, pero hai tiempu que perdieron esa maxa que los acompañaba la primer mitá de la temporada. Vettel fexo tolo que tuvo na so mano pa vencer pero nun foi suficiente. Räikkönen, una vegada más, cumplió’l so papel de compañeru d’equipu dexando pasar a Vettel nes últimes vueltes de la carrera, y vióse superáu por Verstappen a última hora, pero pudo subir al podiu dempués de la penalización d’esti. Necesitaben superar a Mercedes por diecisiete puntos y anque sumaron más qu’ellos, nun valió pa poder siguir lluchando pol campeonatu.

Red Bull podía tener consiguío un perbón resultáu n’Austin y de fechu llegaron a tar nel podiu demientres dellos minutos. Ricciardo yá diba al llímite col so motor asina que tampoco nun sorprendió velu fuera, pesie a que paecía inxusto dempués de lo visto en pista. Nel casu de Verstappen nun queremos quedanos sólo col so adelantamientu si non tamién col fechu de que salía décimosextu y consiguió terminar cuartu, dalgo que tamién paga la pena mentar.

Force India siguen siendo los meyores de los equipos medianos. Ocon fexo una carrera perbona, sobre too si tenemos en cuenta que tuvo malu gran parte del fin de selmana, y terminó sextu. Amás regalonos dellos momentos en pista que nun faen más que confirmar el so talentu como pilotu. Pérez pel so llau, dalgo más floxu pero dientro de los puntos de toles formes, terminaba octavu.

Renault cambiaben de pilotu y anque nun foi una carrera completamente satisfactoria a nivel d’equipu, sí lo fue pa Sáinz. Debutaba col equipu francés y la verdá que naide nun diría que yera la so primer carrera y que hai dos selmanes taba corriendo con Toro Rosso. El sábadu fexo una perbona sesión de clasificación volviendo a tar dientro los diez primeros, ya’l domingu terminó siendo séptimu, al nun ser quien a pasar a Ocon. Hülkenberg, como yá comentamos, convirtíase nel primer abandonu por un fallu nel coche. L’equipu francés supera agora a Haas nel campeonatu y son séptimos.

Williams tuvo una sesión de clasificación bastante normalina, que consiguieron compensar un pocu en carrera con Massa, que terminó octavu. Stroll nun entró en puntos, quedando undécimu. Anque nun ye matemático, paez que nun van poder alcanzar a Force India nel campeonatu de pilotos. Lo que sí tienen que tener en cuenta ye que Toro Rosso tán a quince puntos y Renault a venti, polo que cualquier despiste pue dexálos entá fuera del quintu puestu nel que lleven estancaos dende hai tiempu.

Toro Rosso tamién estrenaba pilotu, con Brendon Hartley al volante con penalización incluyida. Al otru garaxe tornaba Kvyat, que consiguió puntuar nesta carrera. Llegó a rodar octavu, faciendo un trabayu bastante decente pero dalgo insuficiente pa devolvelu al equipu. Toro Rosso confirmó que diben ser Gasly y Hartley quienes corrieran en México. El neozelandés taba bien contentu cola so carrera pol cambiu que suponía con respectu a les otres categoríes au compitió y lo importante del manexu de gomes, dalgo que foi clave pa elli demientres tol fin de selmana. Terminó nel puestu trece.

McLaren paecía que podíen puntuar y de fechu Alonso clasificó ente los diez primeros, pero nun valió pa terminar cola poca fiabilidá del motor Honda. Na vuelta venticinco l’asturianu abandonaba ya’l so compañeru namás pudo terminar duodécimu.

Haas corríen en casa, pero tuvieron una gran premiu bastante desastrosu. L’accidente na primer vuelta torgó la carrera de Magnussen, y Grosjean, anque pudo terminar ente los diez primeros, desinflóse nes últimes vueltes. Una carrera decepcionante pal equipu estaoxunidense, con Grosjean catorce y Magnussen dieciséis. Amás pierden el so puestu nel mundial de pilotos en favor de Renault.

Sauber sumó otra carrera ensin brillu y con abandonu incluyíu. Wehrlein yera’l pior paráu del accidente ente elli y Magnussen y quedaba fuera na vuelta siete. Ericsson pel so lláu tamién se les vía con Magnussen, escontra’l que chocaba, anque consiguía terminar la carrera, nel puestu quince y per delantre del danés.

Enantes de poner la vista en México, au vamos nel prósimu fin de selmana, equí vos dexamos tolos númberos del sábadu y del domingu:

Clasificación

Carrera

Dempués de los madrugones asiáticos, lleguen les tardes formuleres del otru llau del planeta. Aterrizamos n’Austin pal Gran Premiu de los Estaos Xuníos d’esti 2017 que yá va viendo’l so final. Y llegamos con milenta novedaes y cambios.

Toro Rosso va correr esti finde con novedaes: a l’ausencia de Sáinz qu’a partir d’agora va correr con Renault, súmase la de Gasly que va correr la última carrera de Súper Fórmula onde tien posibilidaes de ser campión (ta a mediu puntu del llíder). Kvyat torna a la parrilla dempués de dos carreres a la solombra y la escudería elixó a Brendon Hartley (pilotu de Porsche en WEC) como sustitutu de Gasly pa esta carrera. Anque’l so nome yera ún de los que sonaba, sorprendió a muncha xente, pesie a los bonos númberos que tien na so hestoria deportiva.

McLaren confirmaba ayeri qu’Alonso va siguir nel equipu, a lo menos, otru añu más, cola posibilidá de participar n’otres competiciones demientres la temporada (por exemplu Daytona o Le Mans). El cambiu a Renault supunxo, ensin duldes, un pasu alantre n’anovación del asturianu, qu’espera poder trunfar l’añu que vien, repitiendo carreres del pasáu, anque con equipu distintu.

Como vos dicíemos, Sáinz va formar parte del equipu Renault dende esta carrera d’Austin. Esto xuega en contra del pilotu británicu Palmer, que queda ensin asientu a cuatro carreres del final de la temporada lo cual nun dexa de ser daqué negativu pal so futuru. Cada vegada paez más claro que nun va haber asientu pa elli na parrilla de 2018.

Austin yá se convirtió por méritos propios n’una de les cites preferíes de los aficionaos al motor. Pesie a tar n’un país au la Fórmula Uno nun tien nada que facer entá en comparanza con otres competiciones como Indy, ye verdá que los sos númberos van ameyorando y paez lóxico que sigan medrando de la mano de Liberty agora qu’ellos tán al cargu del negociu.

Mercedes nun aceuten les pallabres d’aquellos que yá los ponen como campeones en dambos campeonatos. Pesie a que lo tienen mui cenciello ya incluso pueden zarralo esti fin de selmana, siguen na so llínia de trabayar y nun dar les coses por sentaes enantes de faceles. Conscientes de que, dientro de lo bien que lo tán faciendo, entá tienen marxe de meyora, lleguen a Austin cola esperanza de nun tener nenguna preocupación no que cinca al rendimientu de dambos coches. Paez que pue ser esta una carrera que-yos venga a ellos meyor qu’a Ferrari, pero yá deprendimos esta temporada qu’eses coses nun se cumplen en delles ocasiones.

Ferrari lleven tres carreres contracorriente: a les sos desgracies súmase la bona suerte del so principal rival en dambos campeonatos. Anque Vettel siga afirmando qu’entá hai una migayina d’esperanza, la realidá paeznos bien distinta. Ensin descartalos del too, paeznos complicao que vaigan ser quien a compensar pola perda de puntos de les tres carreres pasaes, sobre too si pensamos qu’Austin suel ser un bon circuitu pa Mercedes. Nun duldamos que la Scuderia nun va dexar de lluchar hasta Abu Dhabi, ya entendemos que necesiten dosis extra d’optimismu pa consiguir afrontar la última parte del campeonatu con fuercia dempués de les deceiciones de carreres pasaes.

Dambos pilotos de Red Bull tán encantaos d’aterrizar n’Austin. Ricciardo puntualiza que ye un bon circuitu p’adelantar, y dempués de lo que tenemos visto en pista esti añu, nun podemos dexar d’emocionanos por ver de lo que ye capaz el pilotu australianu. La clave pa Verstappen, y realmente pa tolos pilotos, ta en consiguir el puntu correctu del coche a la hora de garrar les curves y frenar pa sacar lo meyor de cada vuelta.

Force India tán siendo unu de los meyores equipos esti añu, amosando carrera tres carrera que superaron los momentos de baxón que solíen acompañalos na segunda mitá de la temporada y que víemos n’años pasaos. Esti 2017, ensin embargu, siguen puntuando regularmente, a vegaes incluso con dambos pilotos, lo que fai que’l cuartu puestu yá casi seya pa ellos si les coses siguen como hasta agora. Sergio Pérez fala d’Austin como casi la segunda carrera de casa, pola gran cantidá de fans mexicanos que s’axunten ellí. Dambos pilotos amas destaquen un circuitu qu’anque ye técnicu y complicau en dellos sectores, ye mui prestosu ya entreteníu pa ellos.

Williams entá nun revelaron quién va ser el compañeru de Stroll pa 2017. Ayeri supimos que Di Resta va competir nes 24 hores de Daytona, lo cual nun zarra’l so futuru na escudería inglesa pero pue ser indicativo de que’l pilotu escocés anda buscándose la vida en casu de que nun tenga sitiu nel equipu del que ye pilotu reserva. Tanto elli como Kubiça tuvieron faciendo test demientres esta selmana, ensin que los comentarios del equipu permitieran albidrar si yá escoyeran a dalgún de los dos pa pilotar en 2018. Al marxe d’esto, l’equipu cuenta con puntuar con los dos coches nesta carrera, n’un intentu desesperáu por alcanzar a Force India y sobre too por poner distancia per detrás con Toro Rosso.

Toro Rosso lleven delles carreres nel puntu de mira polos cambios nos sos pilotos. Yá vos diximos más arriba que p’Austin van cuntar con Brendon Hartley y Daniil Kvyat, pero entá nun sabemos quién va correr na carrera del domingu 29, n’una selmana. Esta incertidume paeznos que pudiera xugar encontra l’equipu, anque tamién confiamos na capacidá que pue tener Hartley pa sorprender na so primer carrera na Fórmula Uno. Nun sabemos l’estáu nel que llegará Kvyat, nin como llega de confianza, dempués de ser apartáu del equipu pa dexar sitiu a Gasly.

De momentu sabemos que Hartley va penalizar por cambiu de la unidá de potencia, y saldrá nos puestos d’atrás, ensin duldes una bona prueba p’amosar de lo que ye capaz pero una torga nel so debut formuleru.

Haas cuerren en casa, col puxu qu’eso suel dar a los equipos. Tán completando una temporada bastante curiosa, anque lloñe de los oxetivos que se tienen marcao ellos mesmos. Ensin embargu, siendo’l so segundu añu na competición, lo que tán consiguiendo ye bastante almirable. Dambos pilotos son conscientes de que van tener de lluchar y trabayar muncho pa consiguir bonos resultaos nes carreres que queden, y sobre too nesta que tenemos delantre, onde van querer facelo bien delantre de los sos fans. Amás, traen meyores equí, polo que van ser unu de los equipos de los que tar pendientes en pista.

Renault lleguen a Austin con novedaes nos sos pilotos. Anque nun s’espera que faiga grandes coses col so nuevu equipu no que queda de temporada, sí que ye verdá que los fans tán a la espera de ver de lo que ye capaz Sáinz a bordo del Renault. Cola deceición de nun puntuar nes dos carreres pasaes yá olvidada, lleguen equí con ganes de facer funcionar les meyores qu’entá tienen pendientes de probar nel coche. Sólo los separa un puntu de Haas y diez de Toro Rosso, que tán agora mesmo sextos nel mundial de constructores, polo qu’entá puen consiguir facese con esi puestu.

Los planes de McLaren pa esti fin de selmana ye ameyorar con respeutu a Suzuka. Anque les carreres asiátiques nun fueron necesariamente negatives, yá que Vandoorne consiguió bonos resultaos, nun se puede dicir lo mesmo d’Alonso, polo qu’un bon resultáu a nivel d’equipu n’Austin ye l’oxetivu. Dempués d’asegurar motorista y pilotos, McLaren busca terminar la temporada de la meyor forma posible y dexar atrás tres años de fracasos y poques razones pa sorrir.

Anque sorprenda, Sauber siguen experimentando con cambios nel coche, suponemos que de cara a 2018 yá que poco-yos queda por consiguir nesta temporada. En díes pasaos víemos cambios no que se conoz como “aleta de tiburón” y cola que munchos equipos lleven meses experimentando, llegando a soluciones bastante creatives (por exemplu, el casu de Force India, que paez un serruchu). Dambos pilotos, na llínia del restu de la parrilla, tienen ganes de ponese al volante porque consideren esti circuitu como ún de los meyores y más entreteníos pa conducir.

Los horarios p’Austin nun incluin madrugón:

VIENRES, 20 d’ochobre
– Llibres 1: 17:00
– Llibres 2: 21:00

SÁBADU, 21 d’ochobre
– Llibres 3: 18:00
– Clasificación: 23:00

DOMINGU, 22 d’ochobre
– Carrera: 21:00

Equí podéis atopar más información sobre’l circuitu y les gomes escoyíes por Pirelli pa esti gran premiu:

Los horarios complicaos de los últimos grandes premios n’Asia, facíennos deseyar el ver bones carreres y anque sí podemos dicir que tuvimos aspectos importantes y cásique determinantes pal campeonatu, la verdá ye que Suzuka nun foi una de les carreres más vistoses de lo que llevamos de temporada.

Podemos destacar el llabor de Red Bull, Haas y Force India ya’l trabayu de Hamilton pa facese cola victoria. El tiempu acompañó, nun hebo lluvia que permitiera ver grandes llocures nel trazáu y la estratexa en los más de los casos axustóse a lo esperao, una parada.

Y por supuesto, tenemos que falar del abandonu de Vettel. Llevamos tres carreres siguíes nes que paez que la suerte se despidiera de la Scudería. Alcanzar a Mercedes en puntos nel campeonatu de constructores yá paecía abegoso, pero dempués de la carrera de Suzuka, tamién podemos dicir lo mesmo del campeonatu de pilotos. Vettel pudo comenzar la carrera, nun-y pasó como a Kimi en Malasia, pero duró en pista lo xusto pa vese adelantáu por hasta cinco coches. Cuando escuchemos el mesaxe por radio de que teníen de retirar el coche, munchos pensamos en Singapur y nel cambiu que supunxo pal campeonatu ya en como Ferrari nun dexa d’acumular desgracies dende esi momentu.

El empiezu de la carrera foi mui interesante. Vimos a pilotos como Ocon remontando posiciones y a Vettel poniéndose en plan pa lluchar pol primer puestu frente a Hamilton. Nun duró muncho. En cuestión de metros vimos cómo lu adelantaben los Red Bull, dempués Bottas y llueu Ocon. Tres d’esto, el mesaxe de radio y l’abandonu. A los pocos minutos, Sáinz acababa escontra’l muru, provocando’l primer coche de seguridá del día y despidiéndose de forma amarga de la escudería Toro Rosso. Nun sedría l’únicu n’abandonar. Delles vueltes más alantre Ericsson tamién acabaría escontra’l muru y con elli vendría un coche de seguridá virtual que diba repitise casi na recta final de la carrera con Stroll.

Hamilton tuvo de currase la victoria yá que Red Bull amenazaben con repitir lo visto en Malasia. Los doblaos tuvieron otra vez un pocu de protagonismu pero ensin condicionar el resultáu col que cuntábamos diba terminar la carrera nes últimes vueltes. Nun foi una carrera de grandes coses, como dicíemos, pero hai cosines que sí resultaron interesantes.

En Mercedes puen tar contentos colo visto’l domingu. Pesie a les duldes de los grandes premios pasaos, Hamilton fízose cola pole’l sábadu con bastante facilidá (yá tien una pole en caún de los circuitos nos que se cuerre na F1 agora mesmo) ya’l domingu, anque trabayada, la victoria foi suya dende’l principiu. Bottas nun tuvo tan finu y cargaba cola penalización pol cambiu de caxa de cambios. La so carrera nun foi brillante pero solventóla de la meyor manera posible, quedando cuartu. El so trabayu d’equipu cuando hai necesidá d’echar un gabitu a Hamilton sigui cumpliéndolu a la perfeición como vimos el domingu.

Red Bull, como diximos más arriba, completaron otra bona carrera, con Verstappen esta vez segundu y Ricciardo repitiendo nel tercer escalón del podiu. El pilotu holandés tuvo a Hamilton preocupáu por elli demientres tola carrera, especialmente al final, y cásique llegó a suañar con repitir una victoria en Xapón, pero nun pudo ser. La verdá que dempués de tanta mala suerte acumulao casi paez de xusticia qu’agora Verstappen tea subiendo al podiu de siguío. Ricciardo agarrose al tercer llugar na primer parte de la carrera y nun se vio amenazáu por Bottas en nengún momentu. L’australianu yá suma nueve podios esta temporada, batiendo’l so propiu récord lo que nos diz un pocu l’estáu de forma nel que s’atopa y nos fai reflexonar sobre lo que sedría capaz con un coche con más potencial.

Nel casu de Ferrari, Vettel nun terminó y Kimi namás pudo ser quintu y sin tener una carrera tranquila. Un accidente na tercer tanda d’entrenamientos lu obligaba a cambiar la caxa de cambios y penalizar la so clasificación, que tampoco nun fue brillante. En carrera perdió posiciones nos primeros metros, batallando con Hülkenberg y llegó a salise. Consiguió recuperar dellos puestos pero non lo suficientes como p’alcanzar el podiu.

En parrilla, cuando los coches diben garrando posición y los inxenieros daben los toques finales a los monoplazas, en Ferrari había nerviosismu y priesa, una imaxe que nos recordó a lo que vimos en Malasia enantes de que retirasen a Räikkönen. Esta vez yera nel coche de Vettel y foi quien a participar na salida, pero’l so segundu puestu nun duró nada cuando’l coche empezó a perder potencia y finalmente tuvo de retirase. En Ferrari anunciaron que’l problema foi un buxía que rompió. La diferencia ente’l pilotu alemán y Hamilton ye de 59 puntos, con 100 entavía por disputase. Nun ye matemáticamente imposible que Vettel seya campión, pero la realidá ye que’l so rival podría selo yá n’Austin dientro dos selmanes.

Force India suma y sigui. Yá son trece de dieciséis les carreres onde puntuaron con dambos coches. Nesta ocasión foi Ocon quien tomó la midía a Pérez, anque hebo un momentu na carrera na que’l pilotu mexicanu pidió que lu dexaran lluchar por posición porque creyía que yera más rápidu que’l so compañeru. Lóxicamente, dende la radio dexaron claro qu’esa nun yera una posibilidá dempués de lo vivío en carreres pasaes y Pérez tuvo de conformase con ser séptimu xusto per detrás del so compañeru, qu’en dellos momentos llegó a tar terceru en pista. Amosaron mui bon ritmu de carrera y paeznos cásique seguro que van ser cuartos nel campeonatu de constructores.

Otru equipu que tien motivos pa tar contentu ye Haas. Puntuaron colos dos pilotos, dalgo que nun facíen va tiempu y que faen por segunda vez esta temporada. Dambos pilotos taben contentos con cómo-yos fuera la carrera y cómo respondiera’l coche. Amás, fueron protagonistes de dellos adelantamientos, sobre too nel casu de Magnussen, que se mantién la so llínia de nun ponese coloráu énte nengún pilotu cuando ta al volante del so coche.

Williams sumó un abandonu con Stroll, el primeru de la temporada pal pilotu canadiense, y un puntu con Massa, que sabe a poco en xeneral, pero que compensa sabiendo que nin Toro Rosso nin Renault pudieron sumar. Los Williams tuvieron un par d’incidentes con Magnussen: nel casu de Stroll viose obligáu a salise de pista y terminó por parar enantes de tiempu, nel de Massa pa intentar ser novenos, dalgo que terminaría llevándose’l danés. Stroll terminaría retirándose por un fallu na suspensión del coche que provocó un pinchazu que lu dexó fuera.

McLaren nun brilló como fexo nes dos carreres pasaes: Alonso nun pudo pasar del undécimu puestu, torgáu pola penalización pol cambiu d’unidá de potencia y volviendo a ser protagonista poles banderes azules qu’ignoró, según los comisarios, cuando Hamilton y Verstappen lluchaben por facese cola victoria. Alonso taba na so batalla con Massa pol décimu puestu. El pilotu asturianu recibió una penalización de dos puntos na so llicencia. Vandoorne pel so lláu nun tuvo una carrera cómoda nin tranquila, sobre too si la comparamos coles dos anteriores.

Renault anunciaben esti fin de selmana que Palmer diba correr la so última carrera col equipu en Xapón y que Sáinz diba ponese a los mandos del so coche a partir d’Austin. Nengún de los dos equipos tuvo una actuación bona en Xapón, y de fechu Palmer foi’l que más arriba quedó na clasificación. Hülkenberg tuvo un problema col DRS que lu dexó fuera ya’l pilotu inglés nun tuvo a gusto en tola carrera. Renault mostrábense mui deceicionaos col resultáu de les dos últimes carreres onde cuntaben dir meyor y que fueron bastante males.

Nun sabemos si van camudar muncho les coses agora con Sáinz nel equipu, pero la verdá ye que paeznos que Palmer nun marcha de la meyor manera posible. Ta claro que’l so rendimientu foi mui probe y que tien al llaú un pilotu que ye capaz de dexalu mal con poco que faga en pista, pero tamién nos paez que nun teníen necesidá de facer esti cambiu enantes de terminar la temporada, a lo menos pensando un pocu no que va ser de Palmer pa 2018. Paez complicao que tenga sitiu na F1 y agora, dempués d’esti despidu aceleráu, más entavía.

Toro Rosso tampoco nun sumó, p’aliviu de Williams. Gasly tuvo una meyor carrera, más seguru en pista y con más confianza, pero tovía-y falta tiempu pa entender el manexu de les gomes, lo que fexo que tuviera que parar dos vegaes, en cuenta d’una, en carrera. Sáinz nin siquiera completó una vuelta como dicíemos más arriba.

Sauber nun terminó’l gran premiu con dambos coches: Ericsson acabó estrelláu escontra’l muru. Wehrlein tampoco nun tuvo una carrera prestosa, yá que tuvo problemes col agarre de les gomes y problemes en xeneral col equilibru del coche. De xuru que tán deseyando que llegue Abu Dhabi pa poner fin a una temporada que ta siendo más dura de lo que cuntaben.

Debaxo podéis atopar tolos datos de la clasificación del sábadu y los resultaos del domingu. En dos selmanes volvemos cola previa del gran premiu d’Austin.

Clasificación

Carrera

Ensin pausa yá tamos equí cola previa pa un nuevu gran premiu d’esta temporada 2017. Y llegamos a ún de los circuitos más esperaos por aficionaos y pilotos en xeneral y ún d’esos que tol mundo rápidamente describi como un clásicu. Ensin duldes, Suzuka ye ún de los circuitos favoritos de los pilotos de la parrilla y la so hestoria axunta un bon puñáu de momentos inolvidables. Tamién nun podemos evitar alcordanos de Jules Bianchi, que sufrió equí l’accidente que terminaría cola so vida.

Col güeyu puestu nel cielu poles predicciones de lluvia pal sábadu de sesión de clasificación, los equipos yá tán en Xapón poniéndose a puntu pa una nueva carrera.

En Mercedes, anque podríemos dicir que nun deberíen preocupase muncho pola gran ventaxa que tienen en dambos campeonatos, anden pendientes d’entender por qué últimamente nun consiguen amosar el rendimientu que se-yos presupón. Nel puntu mira ta sobre too Bottas, qu’ensin facer carreres desastroses, sí que ye verdá que nun tuvo al altor de lo que s’esperaba d’elli. Amás, dende l’equipu almiten que la suerte, qu’otres vegaes se-yos negó, xugó un papel importante nes últimes carreres. En Suzuka deberíen dir meyor que nos circuitos pasaos pero, como siempre faen, nun quieren confiase.

Ferrari, pel so llau, confirmó que la caxa de cambios de Vettel nun sufrió nengún dañu dempués del accidente con Stroll al terminar la carrera y que dexó el monoplaza coloráu con tres ruedes en pista. Tres dos carreres pa olvidar, lleguen a Suzuka cola necesidá de ganar y complicar les coses a Mercedes, por muncho que paeza que ta complicao que se-yos escapen los mundiales a les fleches platiaes.

Red Bull lleguen a Xapón cola motivación recibida de la victoria y doble podiu en Malasia, y de xuru van intentar repitir los resultaos de Sepang. Pa ello, la puesta a puntu del coche ye vital y nel equipu de Milton Keynes tienen claro que, si quieren volver a pasar perriba Mercedes y Ferrari, amás de dalgo de suerte, van necesitar un coche cásique perfeutu.

Na mesma llínia s’espresaben en Force India: n’un circuitu complicáu como esti onde hasta los errores más pequeños se paguen, tanto’l pilotu como’l coche tienen de tar al 100% si se quier consiguir un bon resultáu. Nun ye sólo un circuitu desixente colos pilotos si non tamién colos inxenieros. Nel equipu confíen en siguir ampliando la so distancia col quintu clasificáu que ye Williams.

En Williams anden a vueltes cola decisión de quién va tar de compañeru d’equipu de Stroll pa 2018. Siguen na mesa los que yá comentábemos (Di Resta, Kubiça y Massa) y comentóse demientres esta selmana que Kubiça diba participar, supuestamente, n’un test con Williams dientro de poco. Pente medies de tola especulación una carrera más onde dambos pilotos necesiten siguir sumando puntos yá que l’amenacia de Toro Rosso y Renault per detrás sigui siendo real.

De fechu, Toro Rosso lleguen mui confiaos de qu’en Suzuka nun va repitise lo vivío en Malasia. Per un lláu porque Pierre Gasly conoz la pista xaponesa muncho meyor de lo que conocía Sepang, yá que compite equí dientro de la Superfórmula. El domingu pasáu nun fexo una carrera deslumbrante, pero’l terminar la carrera n’un circuitu nuevu pa elli y dempués de pegar el saltu a la F1 de forma inesperada, ye un aliciente pa tar pendientes de lo que faga. Al so llau, Carlos Sáinz, ensin duldes con ganes de compensar pol so abandonu na carrera pasada.

Renault destaquen lo importante d’esfrutar esti circuitu y esperen poder siguir cola bona racha de los sos pilotos equí. A Hülkenberg suel dase-y bien correr equí y Palmer nun lo fexo mal l’añu pasáu. Amás, dende l’equipu almiten que’l trazáu xaponés-yos vien meyor y van poder compensar el baxón del gran premiu en Malasia.

McLaren cuerren en “casa”. Pesie a la ruptura del contratu con Honda pa 2018, dambos llaos lleguen a Suzuka cola esperanza de facer un bon trabayu delantre los sos fans. Les dos perbones carreres de Vandoorne ayudaron a relaxar un pocu la situación, anque Alonso nun fuera quien a puntuar en nenguna d’elles, pero apréciase un ambiente más tranquilu, sobre too dende l’anuncia de la separación de dambes compañíes. Cásique podríemos dicir que ye dalgo que vieno bien pa calmar los ánimos y dexar de convirtir cada situación complicada en llímite.

Nes previes y nos resúmenes de les carreres suel costar facer comentarios alloñaos de lo negativo cuando falamos de Sauber, y ye que la temporada tan descafeinada que ta faciendo l’equipu paez que dexa ensin argumentos nin coses que dicir que nun seya que van siguir intentando facer nesta carrera lo que nun consiguieron nes pasaes: sumar puntos que los averen a McLaren, cada vegada más lloñe na clasificación.

En Xapón repitimos madrugón, un pocu más complicáu quiciás. Esti ye’l horariu pal fin de selmana:

VIENRES
FP1 – 03:00AM
FP2 – 07:00AM

SÁBADU
FP3 – 05:00AM
Quali – 08:00AM

DOMINGU
Carrera – 07:00AM

Equí vos dexamos tola información que necesitáis conocer sobre Suzuka y embaxo podéis atopar la llista de gomes que van tar disponibles pa esti gran premiu:

Dicía Niki Lauda esti domingu que Mercedes agotaba esti fin de selmana la so suerte pal restu de la temporada. Dicíalo dempués de ver que Vettel nun podía pasar de Q1 el sábadu por un problema nel turbu. Eso condergaba al alemán a tener que salir últimu’l domingu. La esperanza del equipu Ferrari yera Kimi Räikkönen que por mui poco nun consiguió la pole, que foi pa Hamilton. Cuidaben na Scuderia que’l finlandés podría poner n’aprietos a Hamilton mientres Vettel intentaba escalar puestos pa ponese a batallar nos puestos d’arriba. Pero non, nun diba ser tampoco asina y, sin nin siquiera poder facer la vuelta de formación, Räikkönen tinía de retirase por un problema asemeyáu, a priori, al de Vettel. Si l’alemán quería consiguir dalgo, diba tener de ser pola so propia cuenta.

El sábadu, dempués de la FP3, Ferrari atopó un problema nel motor de Vettel que fizo que decidieren cambiar la unidá de potencia completamente ya en tiempu récord (lo normal suelen ser alredor de cuatro hores, y l’equipu emplegó namás dos hores). Tolos aplausos pola rapidez ya eficacia, quedaron apagaos cuando’l turbu del coche de Vettel empezó a dar guerra, faciendo que tuviera que metese en boxes. Intentaron volver a sacalu, a lo menos pa poder metese na Q2, pero nun fueron quien. Sabiamente, cuntando con salir últimos el domingu, cambiaron otra vez d’unidá de potencia, de forma qu’agora tienen dos d’elles pa les cinco carreres que queden.

Con Vettel mui atrás na parrilla y Räikkönen fuera de la ecuación, too paecía dicir que diba ser un paséu pa Hamilton. Pero Verstappen encargóse bien ceo de que nun fuera asina. Anque nes primeres vueltes l’inglés lideró la carrera, nunca foi quien a abrir güecu col holandés y un ratu más tarde, viose superáu por él. Dempués del gran premiu, Hamilton almitió que nun quixo arriesgase a recuperar el llideratu con Vettel tan atrás na parrilla. Conociendo a Verstappen y cómo se les gasta en pista, nun nos paez que fuera a vender la so posición barato.

Nel otru llau de los garaxes de dambos equipos, Bottas consiguió plantar cara a Ricciardo y demientres les primeres vueltes rodó a bon ritmu. Ensin embargu, pronto l’australianu diba ponese per delantre, ya’l finlandés tendría de conformase col cuartu puestu que-y quitaba Vettel a delles vueltes del final. El pilotu de Mercedes reconoció que nun entendía por qué la so carrera fuera tan floxa. De fechu, dambos pilotos manifestaron que tuvieron problemes cola batería, lo que fizo que’l so rendimientu nun fuera óptimu y que Red Bull pasara perriba d’ellos.

El focu d’atención de la carrera foi, ente otros, la capacidá de Vettel pa dir escalando posiciones y salvar tolos puntos posibles dempués del desastre del sábadu. Pudo llegar a ponese terceru, pero pronto abandonó la batalla con Ricciardo, pa tristeza del australianu que tenía ganes d’un pocu de competición con elli, porque les gomes del so Ferrari nun daben más de sí.

Como dicíemos, Mercedes taben preocupaos al terminar el gran premiu polos problemes cola batería en dambos coches, más acentuao nel casu de Bottas. Col campeonatu en la cabeza, Hamilton optó pola solución más segura y Bottas peleóse col coche pa consiguir acabar quintu. Amás, paez ser que les meyores que s’incorporaron al so coche nun funcionaron como s’esperaba, polo que, de cara a esti fin de selmana que vien, van tener que trabayar nesi aspectu.

Red Bull y Verstappen veníen necesitando una victoria nesti 2017. Anque ganar un gran premiu nun compensa tola mala suerte del pasáu, el pilotu holandés merecióse esta victoria. Ye mucha la xente qu’opina que nesta segunda ocasión, tien más méritu que la primer vez que ganó en Barcelona del añu pasáu, porque Rosberg y Hamilton taben fuera de carrera y foi cásique una victoria heriedada. Pero en Malasia 2017, la victoria foi too mérito d’una cabeza bien amueblada ya’l máximu de concentración pa nun cometer errores. El doble podiu con Ricciardo terceru nun lu veíamos dende l’añu pasáu, tamién equí en Malasia. Ricciardo defendióse bien de Vettel y anque la batalla foi curtia, regalónos dellos momentos emocionantes.

Ferrari consiguió un resultáu bastante decente pa la pinta que tinía al empiezu la carrera. Anque nun ye ideal, y cásique puen dicir adiós al campeonatu de constructores, el cuartu puestu de Vettel foi lo menos malo de tol fin de selmana. Nun olvidamos mencionar que nin siquiera al final tuvo l’alemán dalgo de tranquilidá. Y ye que nos momentos finales, dempués de ver la bandera a cuadros, Vettel atopóse con Stroll en pista. El pilotu canadiense de Williams taba garrando un pocu goma cuando, a la so drecha apaecía Vettel faciendo lo mesmo. L’encontronazu terminó con un choque ente dambos que dexó a Vettel con tres ruedes y teniendo qu’usar a Pascal Wehrlein de taxi. Curiosamente, el pilotu de Ferrari llevó con elli’l volante del coche, dalgo que la FIA nun permiti.

McLaren y, especialmente Vandoorne, mostraron un rendimientu inesperáu en Malasia. Singapur yera un circuitu que-yos beneficiaba, pero Malasia nun tenía fama d’ello. Ensin embargu, el pilotu belga clasificó sétimu (con Alonso décimu) y en carrera tamién consiguió terminar nesi puestu. Ensin ayudes en forma de lluvia, lo que vimos foi un bon coche con un pilotu que cada vegada ta más inspiráu en pista. Nel llau d’Alonso, que nun entró en puntos, vimoslu na so llínia esti añu de quexase por radio, especialmente de Magnussen nesta ocasión, ya estorbando a Vettel cuando esti taba lluchando con Ricciardo pol podiu. Nel mundial de constructores, Stoffel Vandoorne saca-y tres puntos al so compañeru d’equipu.

Force India volvió a tener a los dos pilotos dientro de los puntos y yá van doce carreres. Anque nun foi una carrera plácida pa nengún de los dos, la importancia d’esta regularidá ye evidente: tienen casi nes sos manes el cuartu puestu del mundial. Sergio Pérez corrió tando malu, lo que fai que la so sexta posición tenga más méritu entá. Ocon pel so llau tuvo un gran premiu bastante accidentáu, siendo protagonista en dellos incidentes, como na salida, onde chocó contra Massa, llevándose un pinchazu, y más tarde con Sáinz, que chocaría contra elli y faciéndolu trompear. El francés terminó siendo décimu pero nun taba nada contentu col resultáu.

Williams por fin consiguieron puntuar con dambos coches, anque fuera nos puestos octavu y novenu. Stroll salía mui atrás na parrilla, pero con una bona carrera y mostrándose seguru en pista a la hora de frenar los adelantamientos d’otros, consiguiría amás terminar per delantre de Massa, que tamién tuvo más problemes con otros coches. La suerte pa Williams continuó gracies a que nengún de los sos persiguidores, Renault y Toro Rosso, consiguieron puntuar, lo que-yos da un respiru de cara al final de la temporada.

Haas nun pudieron puntuar nesta ocasión, anque’l director d’equipu Guenther Steiner nun taba esmolecíu por ello, pues opina que dambos pilotos ficieron una bona carrera. Grosjean nun compartía esa opinión, yá qu’amás viose últimu n’un momentu de la carrera n’un intentu por evitar choques na salida. Magnussen siguió sumando amigos en pista, esta vegada con Alonso, y trabayando la so fama de pilotu suciu. Ta claro que’l danés nun se corta a la hora de lluchar en pista y quiciás dellos pilotos, avezaos a que los dexen pasar, nun con capaces d’entender qu’un Haas-yos plante cara.

Toro Rosso, col debut de Gasly, nun pudo entrar en puntos. Sáinz, dempués del incidente con Ocon, terminaría retirándose con un problema llétricu nel coche. Gasly fexo una bona carrera, conservadora, pero segura. Almitió qu’entá tenía munches coses qu’ameyorar, sobre too nel manexu de les gomes. Amás, paez que demientres la carrera tuvo dalgún problema col suministru de llíquidu del coche, dalgo vital en carreres como Malasia.

Renault tuvo una carrera basta probe, con dambos pilotos terminando nos puestos quince y dieciséis. Hülkenberg tuvo una mala salida que yá llueu lu condicionó pal restu de la carrera. Palmer tuvo dalgún encuentru con Magnussen en pista y llegó a trompear dos vegaes, pero en regla xeneral, los xefes de Renault taben bastante enfadaos colo que vieron en pista pues esperaben muncho más del rendimientu del coche. Amás, la estratexa de paraes tampoco nun foi la meyor. Un fin de selmana pa olvidar.

Los pilotos de Sauber tuvieron suertes distintes en pista: Wehrlein opinaba que la so carrera fuera buena, dientro lo que cabe cuando termines nos puestos más baxos de la tabla. Ericsson pel so llau taba lloñe de tar contentu cola so carrera. Vasseur tamién opinaba que la carrera fuera relativamente bona pa ellos. En términos d’estratexa, foi quiciás no que más destacaron, pesie a nun ser quien a amortizalo en carrera.

Clasificación

Carrera

Acabose l’horariu européu pa dexar pasu a los madrugones asiáticos. Singapur tratónos bien y dexonos siguir viendo Fórmula Uno a unes hores decentes, pero nun vamos poder dicir lo mesmo de Malasia. El circuitu de Sepang verá’l domingu la so última carrera, a lo menos nel futuru prósimu, dempués de que’l so contratu pa celebrar un gran premiu nun viese l’anovamientu tres de diecinueve años nel calendariu formuleru. Son munches les voces que se xunieron pa llamentase por que nun tengamos una carrera en Malasia en 2018, tanto ente los pilotos como dientro los equipos.

Llegamos asina a Malasia y con ello a ún de los circuitos más duros no que cinca a les condiciones a les que se somenten los pilotos. Naide nunca va escaecer la visita de Kimi Räikkönen tiempu ha pa garrar un xeláu, dexando claro que en Sepang fai munchu calor. Y ye que les altes temperatures (l’añu pasáu hasta 60ºC en pista), la humedá y la climatoloxía cambiante, faen d’esti gran premiu una caxa de sorpreses. A too esto, tenemos d’añader rectes llargues y curves complicaes, que convierten a esti circuitu n’ún de los favoritos de munchos na parrilla.

El fin de selmana en Singapur dexó munchos aspeutos llamatibles, ente ellos, el bon rendimientu de Mercedes el domingu. L’equipu alemán, siguiendo’l so criteriu d’amosase enfotaos dientro de la prudencia, nun cuntaba con la victoria que llevaron na carrera pasada, y tienen razones pa sintise optimistes en Malasia. Como dicimos, siempre dientro de la prudencia yá que naide nun olvida la escena del pasáu 2016 na que se vía a Hamilton abandonando esta mesma carrera por un problema col motor. Munchos dirán qu’esto mesmo vivióse con Vettel en Singapur, esi puntu d’inflexón onde la temporada s’inclina pa ún o otru llau, pero paeznos que nun podemos dar por zarráu esti campeonatu entá. Y de xuru que Hamilton va tener eso en mente cuando monte en coche’l próximu vienres.

Yá por partes, Ferrari, dempués del so primer doble abandonu en dellos años, punxeron procuru en pasar rápido de páxina y pensar nesti gran premiu. 28 son munchos puntos y ocho paecen poques carreres, pero como comentábemos n’anterior crónica, Vettel yá foi quien a ser campeón superando distancies más abultaes. Lo que ta claro ye que la Scuderia nun pue permitise otru fin de selmana como’l pasáu, especialmente pensando en que Mercedes cada vegada ta más cerca de volver a facese col campeonatu de constructores por cuartu añu consecutivu.

En Red Bull conserven bones alcordances del añu pasáu cuando los sos dos pilotos, aprovechando la desgracia de Hamilton, llucharon pol primer puestu del podiu. Al final, diba ser Ricciardo quien se fadría cola victoria, y lleguen nesta ocasión coles mesmes ganes ya intención de repetir lo que se vivió hai doce meses. Amás, esta selmana supimos qu’Aston Martin va facer la so entrada na F1 de mano de la escudería de Milton Keynes como sponsor, na llínia de lo que ficiera Infiniti hai unos cuantos años.

Force India confirmaba nel gran premiu anterior que va cuntar con los sos dos pilotos actuales pa 2018, zarrando asina la puerta a les especulaciones propies d’esta época del añu. Insisten na importancia de dar esta noticia con tiempu suficiente pa centrase nes carreres que queden, onde cásique tienen aseguráu el cuartu puestu nel campeonatu de constructores, y pa dir pensando nel proyeutu del añu que vien sabiendo con qué pilotos van cuntar. Sergio Pérez consiguió’l so primer podiu en 2012 nesti circuitu y, anque nun ye un trazáu que-yos beneficie especialmente, les meyores que van incorporando deberíen ayudalos a ser competitivos.

Y ye que detrás vien Williams, un equipu qu’esti añu ta dexando bastante que deseyar pa lo qu’esperábamos d’ellos. Agora mesmo, casi podríemos dicir que se fala más d’ellos pol tema de los sos pilotos pa 2018 que poles carreres que tán faciendo. Son tres los pilotos qu’opten a esi asientu: per un lláu Robert Kubiça, que dende que volvió al mundu formuleru nun dexa de salir en les quinieles de casi tolos equipos con un güecu qu’ocupar; el propiu Felipe Massa, que dempués d’anunciar la so retirada l’añu pasáu, agora paez que yá nun tien tantes ganes de marchar, y Paul Di Resta, que yá tuvo la so oportunidá de mostrar que ta más que preparáu pa ponese al volante dempués de la so decente actuación en Hungría. Unu d’estos tres pilotos podría convirtise en compañeru de Lance Stroll.

Toro Rosso tovía ta saborguiando’l cuartu puestu de Sáinz en Singapur y que tan importante foi pa los sos intereses na clasificación de constructores. Ensin embargu, la noticia nun ye esa si non que, d’equí a final de temporada, Daniil Kvyat va dexar de ser pilotu nel equipu pa dexar el so asientu al francés Pierre Gasly, firme candidatu a ocupar esi asientu pa…2018. Y ye que’l miércoles la escudería hermana de Red Bull anunciaba esti cambiu alegando que Gasly taba listu pa dar el pasu y que Kvyat nun taba dando la talla. Especúlase con que, de fechu, el rusu sedría compañeru de Gasly en 2018, pero esti desplante públicu paez insinuar lo contrario. El pilotu francés va llevar el númberu 10.

En Renault, dempués de tar nel puntu mira en Singapur por toles anuncies que protagonizó, paez que les agues yá tán más calmes y puen centrase nes carreres que queden y que, en teoría, podríen se-yos favorables. Col futuru de Palmer nel aire, la escudería francesa llega a Malasia col convencimientu de que puen entrar en puntos si consiguen estrayer el máximu rendimientu al so monoplaza y si llogren xestionar bien la degradación de les gomes. El pilotu inglés de Renault, que consiguió los sos primeros puntos en Fórmula Uno nel últimu gran premiu, mostróse confiáu de poder facer bien les coses equí tamién. Como se suel dicir nesti mundu del motor, ta corriendo por consiguir un asientu pal añu que vien.

Nel equipu Haas lleguen con ganes, sobre too nel llau de Grosjean que faló d’esti circuitu como ún de los sos favoritos nel calendariu. Na mesma llínia que’l restu d’equipos, en Haas tán preparaos pa les condiciones cambiantes y dures con que los puea sorprender Sepang.

McLaren lleven dos selmanes intentando olvidar lo que pudo ser y nun foi en Singapur nel garaxe d’Alonso pa centrase en consiguir sacar lo máximo del coche pa esta carrera. Anque sobre’l papel nun ye Sepang un circuitu nel que puean brillar, son conscientes de que les circunstancies cambiantes puen ayudalos nesi intentu. Amás, Honda comentó que’l motor d’Alonso nun paecía tar dañáu dempués del incidente en Singapur, polo que van poder usalu otra vuelta equí y ensin penalización.

Sauber anunciaba va unos díes que Charles Lèclerc, pilotu de F2 y actual llíder de la categoría, va participar en dalgunos entrenamientos llibres en Malasia, Estaos Xuníos, México y Brasil. Vemos nesta decisión un pasu alantre nel intentu de Ferrari de meter a los sos pupilos en Sauber, al estilu Red Bull-Toro Rosso. El futuru de Wehrlein y Ericsson ye una incógnita, sobre too si tenemos en cuenta que la mano de la Scuderia ye mui allargada y los pilotos esperando la so oportunidá, mui numberosos.
Equí podéis atopar tola información sobre’l circuitu de Sepang. Los horarios pal fin de selmana son los siguientes:

• vienres: primer tanda d’entrenamientos llibres a les 5:00 de la mañana y la segunda a les 9:00 de la mañana.
• sábadu: tercer tanta d’entrenamientos llibres a les 8:00 de la mañana y la sesión de clasificación a les 11:00 de la mañana.
• domingu: la carrera ye a les 9:00 de la mañana.

Debaxo, tola información sobre les gomes elexíes por Pirelli pa esti gran premiu: