Author: Asturies F1

Previa del Gran Premiu de Baḥréin 2018

Damos un saltu al desiertu y aterrizamos nel gran premiu de Baḥréin, un d’esos grandes premios de grades vacíes y lluces rellumantes a la hora del atapecer. Tornen los horarios asumibles y siguen les entrugues, reformulaes, que tiníemos al empezar la temporada.

Dempués de lo que vimos n’Australia, muncho se tien falao del problema que tuvo Mercedes col software que los fexo fallar nos sos cálculos demientres la parada de Vettel y que fexo que l’alemán terminare ganando la carrera. De xuru que nun ye un erru que vaigamos a ver repitíu, conociendo al equipu de Brackley, pero foi suficiente pa qu’empezaren la temporada un pasu per detrás del so máximu rival pa esta temporada.

Como yá se dixo, Australia nun ye sinónimu de nada y les más de les coses que víemos ellí de xuru nun dieron rempuesta a les munches entrugues coles que díbemos a Albert Park. Baḥréin debiera ayudanos a entender meyor en qué puntu vienen los equipos. Tenemos de tener bien de coses en cuenta, como les temperatures, el sable del desiertu que nun dexa de ser un engorru pa los coches y tamién les posibles duldes que tengan surdío dende hai dos selmanes.

Anque ellos nun quieren falar d’ello, Mercedes sábense dominaores (pesie a lo que diga la clasificación) y anque la pole nun seya mui útil de cara al domingu (sólo ún de los cinco grandes premios del pasáu se ganó dende ehí) nun creyemos que naide nun vaiga pensar nello cuando llegue la hora de la sesión de clasificación del sábadu. Y como vien siendo vezu, toles miraes tán puestes enriba Hamilton y nel so potencial a una vuelta. Quiciás llueu nun valga pa nada’l domingu pero la tranquilidá qu’aporta ye importante.

Ferrari ganaron un gran premiu col que, de primeres, nun cuntaben y eso fai que llegue equí cola ventaxa d’esa victoria y cola calma de que seya esti un circuitu que se-yos da bastante bien. Vettel foi bastante coherente colo que pasó n’Australia y sabe que ganar ellí nun quier dicir nada nin que tean en meyor momentu que’l so rival direutu, anque repitir victoria nel desiertu quiciabes ayudara a perfilalo meyor.

El debate Mercedes-Ferrari ta básicamente centráu nos sos dos primeros pilotos, pero nun podemos escaecer a los dos finlandeses que, munches vegaes na solombra, nun dixeron entá la so última pallabra. Bottas tuvo un gran premiu bastante deceicionante n’Australia, y nun creyemos que vaiga a salir a conformase colo que caiga equí en Sakhir, y Räikkönen nun suel facer munchu ruíu, sobre too cuando l’atención ta puesta nel so compañeru d’equipu y ye ehí d’au elli suel sacar les sos bones actuaciones. Nun hai falta que miréis pa elli he knows what he’s doing…

Red Bull destapáronse un pocu nos llibres del vienres n’Albert Park, pero deceicionaron un pocu’l domingu y sábenlo. La so meta ye recuperase y poder poner n’apuros a los d’enriba, faciéndose con una victoria que los metería dafechu nos puestos más altos. Ricciardo sigui necesitáu de bones actuaciones de cara a la firma d’un contratu con dalgún equipu de la parrilla, entá nun sabemos si quedará en Red Bull o ta mirando otres opciones, asina que de xuru va salir equí con esi oxetivu en mente. Y pa complica-y la tarea, ensin duldes, tará Verstappen, a la gueta d’una victoria que sumar a la so llista.

Pela parte media de la tabla hai munches coses que rescamplar. Demientres estes dos selmanes de descansu, hebo equipos que punxeron en dulda l’actuación de Haas n’Australia (alcordaivos que, enantes de quedar fuera con dambos coches, taben los dos pilotos en puntos y Magnussen yera cuartu) y suxiriendo que se tuvieran convertío n’un equipu B de Ferrari. Yá se sabe como funciona la Fórmula Uno, y los xuegos que se fai d’usar los medios pa criticar a otros equipos y asina desestabilizalos, pero paeznos que nesti casu nun se ta faciendo xusticia col equipu norteamericanu. Sí que ye verdá que foi sorprendente velos ehí enriba, sobre too nel casu de Magnussen que l’añu pasáu foi bastante irregular, pero la Fórmula Uno yá nos dio milenta exemplos d’equipos qu’empiecen temporaes con un rendimientu mui positivu y que ye inesperáu: tenemos el casu de Force India n’años pasaos, y quiciás el más obviu de la hestoria recién de la Fórmula Uno: Brawn GP.

Llegaos a Sakhir, Haas vien col enfotu de repitir lo vivío n’Australia y de metese nesa llucha pol cuartu puestu del campeonatu que l’añu pasáu nin siquiera pudo suañar. Pero nun van tenelo fácil. Anque Force India y Williams tuvieron un gran premiu d’Australia bastante probe, nun son pa nada descartables, y a ellos tenemos de sumar Renault, que cada vegada tien meyor pinta, y McLaren, que va despertando pasín ente pasu del so lletargu con Honda. Ye pronto p’anunciar si Toro Rosso y Sauber van tar ehí dando guerra, y sobre too dempués de lo visto hai dos selmanes.

Cuidamos que Force India puen volver al sitiu que nun dexaron en temporaes pasaes nesti gran premiu, pero nun tamos tán seguros nel casu de Williams. La dupla Stroll-Sirotkin sigui paeciéndonos demasiao arriesgada y nun tenemos claro que vaiga dar los resultaos esperaos. Pero como na Fórmula Uno delles vegaes pasen coses inesperaes, sedrá cuestión de dexar pasar les carreres pa ver hacia qué direición evoluciona l’equipu.

Nel casu de Toro Rosso, los problemes col motor Honda ficieron salta l’alarma nel equipu: esti añu les escuderíes namás disponen de tres motores pa tola temporada y qu’ún d’ellos funda na primer carrera nun ye la situación más conveniente. Anque caltienen l’optimismu, les sorrises tán lloñe de ser tan brillantes como yeren demientres los test de Catalunya hai un mes.

Sauber nun tuvo una carrera brillante n’Australia, pero les sensaciones paez que fueron positives y, como diximos nel pasáu, ye dalgo que necesiten, tornar a creyer nes sos posibilidaes de facer coses. Quiciás pensar en puntos agora mesmo seya daqué aventurao, pero los pasinos alantre son los únicos que garanticen que puean llegar ehí. Tienen munchu llabor per delantre, pero la pinta ye bastante meyor que la del añu pasáu.

Nun queremos dexar de comentar que, demientres esti gran premiu, diremos conociendo novedaes acerca del futuru al que camina la Fórmula Uno de la mano de los sos nuevos dueños. Pocu a pocu vamos sintiendo y viendo la fuelga de Liberty Media nes decisiones que se tomen alrodiu’l funcionamientu internu de la máxima categoría del deporte de motor, y esti gran premiu va dexanos más información sobre lo que nos espera pa dientro unos años. Vos diremos informando sobre ello a midía que vaigamos conociendo más coses.

De momentu, equí vos dexamos los horarios pa esti fin de selmana, nel que nun toca madrugar:

VIENRES 06/04/2018

LLIBRES 1: 13:00
LLIBRES 2: 17:00

SÁBADU 07/04/2018

LLIBRES 3: 14:00
CLASIFICACIÓN: 17:00

DOMINGU 08/04/2018

CARRERA: 17:10

Y si queréis más información sobre’l circuitu de Sakhir, podéis atopala equí.

Gran Premiu d’Australia 2018

Nos primeros minutos enantes de que s’apaguen les lluces colloraes na primer carrera del añu, empiecen tamién a volar les predicciones y los deseyos de que ún o l’otru pilotu ganen o terminen bien la so carrera. Cuando les lluces s’apagaron n’Albert Park pal primer gran premiu de la temporada 2018, yeren munchos los que cuntaben con una carrera na que Mercedes diba triunfar.

Y ye que na clasificación del sábadu, pesie al accidente de Bottas que lu dexó ensin posibilidá d’intentar lluchar pola pole, Hamilton foi mui superior a los Ferrari y los Red Bull nun tuvieron al altor de lo que s’esperaba d’ellos dempués d’unos llibres bien curiosos. Nun hebo grandes sorpreses nesa sesión: los Sauber nos últimos puestos xunto colos Toro Rosso y Sirotkin. La deceición vieno cuando Force India nun pudo metese na Q3 pero compensó cola sorpresa de ver a dambos Haas dientro, dempués de que l’añu pasáu-yos costara un mundu clasificar siquiera pa la Q2. Con toles pieces nel tableru, empecipió la carrera.

Y como yera d’esperar, Hamilton marcó’l ritmu de les primeres vueltes. Lo más interesante venía per detrás: Räikkönen tuvo a Vettel detrás y un pocu más lloñe Magnussen consiguía adelantar a Verstappen na salida y nun dexó nenguna puerta abierta pa que’l pilotu holandés pudiera pasalu y llanzase a polos Ferrari. De fechu, el pilotu de Red Bull cometió un erru que llevó a un trompu y a la perda de posiciones col so compañeru d’equipu, con Grosjean y col Renault de Hülkenberg al que terminaría adelantando.

L’aplausu mayor demientres la primer parte de la carrera ye, ensin duldes, pa los dos pilotos de Haas ya’l so llabor pa mantener controlaos a los dos Red Bull ya incluso facelos cometer errores. Paecía qu’Haas diba consiguir unu de los sos meyores resultaos en conxuntu nesti gran premiu y que diben a facelo amás plantando cara a ún de los aspirantes al títulu. Demientres esto pasaba, tuvimos el primer retiráu de la temporada: Sergei Sirotkin yera’l primer pilotu n’acabar la carrera por un problema colos frenos del so Williams. Al pocu, veríemos a Marcus Ericsson dexar el so coche nel garaxe y un pocu más tarde, sedría Gasly el que tuviera que parar con problema nel motor. Males noticies pa Honda (otra vez).

Foi cuando empezaron les paraes cuando l’orde normal de les coses empezó a cambiar: Magnussen foi’l primeru de los Haas en parar. N’una parada que foi aparentemente llimpia y rápida, el pilotu danés reincorporábase en pista pa siguir lluchando pol cuartu puestu que dexara enantes de parar. Pero al pocu tiempu de dexar el carril de pitlane, víemoslu dir mui despacio y terminar dexando paráu el coche: un problema con una de les ruedes izquierdes lu obligaba a aparcar el so Haas. Imaxes posteriores amosaben como los mecánicos discutíen por dalgo que nun quedara bien puesto demientres la parada del so pilotu. Les esperances d’Haas quedaben puestes en Grosjean, que paraba al pocu tiempu. Y si l’equipu americanu nun tuviera bastante cola deceición de perder a Magnussen, ésta aumentó cuando yera Grosjean el que tinía qu’aparcar el so coche por otru problema coles ruedes, nesti casu la delantera izquierda. Otru error na parada que costaba la carrera al pilotu francés y facía desapaecer toles sorrises de les cares del equipu Haas.

La parada en pista de Grosjean fexo que s’activara’l VSC (coche de seguridá virtual) fechu qu’aprovechó Vettel pa parar y que terminó determinando’l resultáu final de la carrera. Hamilton parara siete vueltes primero, mesmo que Räikkönen, que respondió a la parada de Mercedes. Vettel aguantó y viose beneficiáu pol incidente de Grosjean y les circunstancies del VSC terminaron por facelu salir delantre d’Hamilton. Un erru de comunicación ente’l muru ya’l pilotu inglés paez que condicionaron la so forma de reaicionar énte’l VSC, facilitando’l llabor a Ferrari que, pa variar, vieron como-yos funcionaba una estratexa. El VSC terminaría siendo un coche de seguridá y Maylander sedría llíder de carrera demientres unes cuantes vueltes.

Dende esi puntu, Vettel diba dominar la carrera pa frustración d’Hamilton que vía como la so oportunidá d’empezar el campeonatu como llíder desapaecía por dalgo qu’entá nun yera a entender. La comunicación por radio col equipu fexo obvio que’l pilotu de Mercedes nun terminaba de creyese que fuera a quedar segundu dempués de dominar la primer parte de la carrera ensin problema. Pela parte d’atrás, Räikkönen tuvo de defendese hasta’l final de les ansies de Ricciardo de subise al podiu nel gran premiu de casa, dalgo qu’al final el pilotu australianu (afeutáu por una penalización de tres posiciones por rebasar la velocidá permitida con bandera colorada na clasificación del sábadu) nun consiguiría. A lo menos, féxose col troféu pola vuelta rápida de carrera.

Verstappen terminó la carrera lluchando con Fernando Alonso pol quintu llugar na clasificación. El pilotu McLaren defendió la so posición y consiguió sumar un bon puñáu de puntos vitales pal equipu y sobre too pa’l so ánimu, especialmente viendo que los Toro Rosso tuvieron un gran premiu especialmente desastrosu (Gasly retiráu y Hartley últimu). P’añader a l’allegría, Vandoorne tamién puntuó, siendo novenu. El restu de puestos dientro de los diez primeros ocupáronlos los pilotos Renault, Hülkenberg séptimu y Sáinz décimu, y Valtteri Bottas, que dempués del accidente del sábadu y la penalización pol cambiu de caxa cambios, namás pudo terminar octavu.

Force India quedaron a les puertes de los puntos con dambos pilotos. La verdá que l’equipu de Silverstone nun tuvo’l meyor de los empiezos de temporada: como dicíemos, na clasificación del sábadu nun consiguieron entrar en Q3 y na carrera nun pudieron puntuar. Siempre dicimos que lo que pasa n’Australia nun suel ser espeyu de lo que va pasar el restu la temporada, y ye dalgo qu’ensin duldes esperen nel equipu británicu.

Hai que rescamplar el décimotercer puestu de Charles Leclerc col Sauber que permitió al pilotu francés facer un debú bastante curiosu. El so compañeru d’equipu tuvo de conformase con ver terminar la carrera dende’l paddock. Nun pinta que Sauber vaigan a dar guerra esta temporada, pero paez que van tener como compañía a Williams y Toro Rosso na parte baxo dalgo de lo que quiciás puedan beneficiase. Williams tampoco nun dio señales positives nesti gran premiu: con Sirotkin fuera de carrera y Stroll décimocuartu, la verdá que nun pinta bien pa los de Grove. Pero insistimos, esto nun ye namás que l’empiezu la temporada.

Con too fecho n’Australia, ponemos rumbu a Baréin pa dientro de dos selmanes, pero enantes vos dexamos tolos númberos que nos dexó la clasificación del sábadu y la carrera del domingu. Amás del resume n’imáxenes de la clasificación y de la carrera

Pos Pilotu Q1 Q2 Q3
1 Lewis Hamilton 1:22.824 1:22.051 1:21.164
2 Kimi Räikkönen 1:23.096 1:22.507 1:21.828
3 Sebastian Vettel 1:23.348 1:21.944 1:21.838
4 Max Verstappen 1:23.483 1:22.416 1:21.879
5 Daniel Ricciardo 1:23.494 1:22.897 1:22.152
6 Kevin Magnussen 1:23.909 1:23.300 1:23.187
7 Romain Grosjean 1:23.671 1:23.468 1:23.339
8 Nico Hulkenberg 1:23.782 1:23.544 1:23.532
9 Carlos Sainz 1:23.529 1:23.061 1:23.577
10 Valtteri Bottas 1:23.686 1:22.089 DNF
11 Fernando Alonso 1:23.597 1:23.692
12 Stoffel Vandoorne 1:24.073 1:23.853
13 Sergio Perez 1:24.344 1:24.005
14 Lance Stroll 1:24.464 1:24.230
15 Esteban Ocon 1:24.503 1:24.786
16 Brendon Hartley 1:24.532
17 Marcus Ericsson 1:24.556
18 Charles Leclerc 1:24.636
19 Sergey Sirotkin 1:24.922
20 Pierre Gasly 1:25.295

Carrera

Pos Pilotu Tiempu Vueltes
1 Sebastian Vettel 1:29:33.283 58
2 Lewis Hamilton +5.036 58
3 Kimi Räikkönen +6.309 58
4 Daniel Ricciardo +7.069 58
5 Fernando Alonso +27.886 58
6 Max Verstappen +28.945 58
7 Nico Hulkenberg +32.671 58
8 Valtteri Bottas +34.339 58
9 Stoffel Vandoorne +34.921 58
10 Carlos Sainz +45.722 58
11 Sergio Perez +46.817 58
12 Esteban Ocon +60.278 58
13 Charles Leclerc +75.759 58
14 Lance Stroll +78.288 58
15 Brendon Hartley +1 vuelta 57
NC Romain Grosjean NT 24
NC Kevin Magnussen NT 22
NC Pierre Gasly NT 13
NC Marcus Ericsson NT 5
NC Sergey Sirotkin NT 4

Previa del Gran Premiu d’Australia 2018

Dicir Australia na Fórmula Uno ye lo mesmo que dicir principiu de temporada. Yá ta too en marcha n’Albert Park pal primer gran premiu d’esti 2018. Sumamos esperances de ver un bon espectáculu, con espectatives sobre lo que darán de sí los nuevos monoplaces y les ganes de los pilotos de facese col campeonatu cuando llegue payares.

Anque ye ún de los grandes premios favoritos de pilotos y fans, la verdá ye que ye quiciás nel que menos enfotu se puede poner pa sacar conclusiones sobre la temporada. Esti añu, n’un intentu por facilitar l’adelantamientu n’un trazáu onde ye bastante complicao, habilitáronse tres zones de DRS.

N’una temporada que va sumar ventiún carreres, con selmanes nes que vamos encadenar hasta tres grandes premios siguíos, llegamos a Albert Park con milenta interrogantes en tolos aspeutos: ¿Volverá Mercedes a dominar como n’años pasaos? ¿Ganará Hamilton el so quintu campeonatu? ¿Sedrá Vettel? ¿Dará guerra Red Bull? ¿Funcionará bien la xunión McLaren-Renault? ¿Y la Toro Rosso-Honda? Podríemos tar asina hasta que llegue’l domingu porque son milenta los frentes qu’entavía tenemos abiertos y qu’esperamos dir zarrando col pasu les selmanes y les carreres.

La realidá ye que tenemos énte nós un campeonatu nel que hai dos pilotos qu’opten a ponese al altor de Fangio en númberu de campeonatos consiguíos. Tanto Hamilton como Vettel sumen cuatro, ya esti añu podríen igualar al pilotu arxentinu. P’alcanzar los siete de Schumacher entá-yos queda camín qu’andar. Y anque nengún de los dos paez da-y importancia a esti tema, ye verdá que sedría un éxitu importante.

Los sos equipos respeutivos tán nel puntu de mira, con Ferrari especialmente necesitáu d’amosar que sí, qu’esti añu puen facese con dambos campeonatos como en delles vegaes creyimos la temporada pasada. La verdá ye que cuesta pensar que naide que nun seya Mercedes puea facese col campeonatu de constructores y más si pensamos que la combinación Hamilton-Bottas ta dando más resultáu que la Vettel-Räikkönen. Nun queremos tampoco escaecer que Red Bull tamién puen tar ehí arriba si consiguen dir fuerte dende’l principiu. El duelu nes altures pue tar interesante.

Baxando a la parte media de la tabla, hai munchos candidatos a facer un bon trabayu esta temporada. Los favoritos, por méritos propios, son Force India. Después d’una temporada perbona l’añu pasáu nel qu’en nengún momentu se vieron cuestionaos polos equipos d’atrás, esti añu esperen repitir resultáu empezando equí n’Australia. Tienen una de les combinaciones de pilotos más potentes pa consiguilo.

Pa complica-yos la vida van tar Williams, que lleguen n’un mar de duldes a Albert Park. Tamién McLaren, que crucien los deos pa que nesti primer gran premiu, anque irrelevante hasta ciertu puntu por nun ser espeyu de lo que pue dir pasando nel futuru, consigan bones sensaciones y, sobre too, un bon resultáu. Renault pel so lláu paez que dieron un pasu alantre esti añu y hai munchu enfotu en ver lo que puen facer. Toro Rosso ta deseyando ponese en marcha nesti primer gran premiu pa confirmar que sí, que’l cambiu a Honda foi bonu y que puen aspirar a munchos puntos nesta nueva temporada. Nel casu de Sauber, cualquier avance va ser positivu si lu comparamos col desastre de 2017. Tenemos munches ganes de ver de lo que ye capaz Charles Leclerc a los mandos del nuevu fórmula del equipu suizu.

Tamos a piques de ver apagase les lluces colloraes por primer vegada esti añu y yá toca dir garrando sitiu y madrugar pa la primer carrera de la temporada. Equí vos dexamos los horarios pa ver les sesiones de llibres, la clasificación y la carrera:

VIENRES 23/03/2018
LLIBRES 1 – 02:00
LLIBRES 2 – 06:00

SÁBADU 24/03/2018
LLIBRES 3 – 04:00
CLASIFICACIÓN – 07:00

DOMINGU 25/03/2018
CARRERA – 07:10

Y pa que nun se vos escape nengún detalle, equí podéis atopar tola información sobre’l circuitu d’Albert Park, en Melbourne, escenariu del primer gran premiu de la temporada 2018 que yá tenemos enriba nós.

Temporada 2018 – Segunda tanda de test

Con pocos díes p’asimilar lo que víemos na primer tanda de test, llegó la segunda. La climatoloxía respetó bastante y los equipos por fin pudieron rodar ensin tener que mirar pal cielu. Ye verdá que siguimos en test, y ye verdá que los test en sí mesmos nun dicen nada de lo que va ser la temporada, pero podemos dir confirmando delles sospeches que surdíen na primer parte d’estos ensayos.

Una d’eses sospeches ye que Mercedes sigui fuerte. Mui fuerte. Les tandes llargues y los resultaos que salieron d’elles nun ficieron más que confirmar el fechu de que tamos énte otru gran monoplaza salíu de Brackley. Nun sabemos si llueu, na temporada, sedrá too positivo, si’l coche siguirá comportándose como una “diva”, pero lo que ta claro ye que la base cola qu’entamen ye la meyor. Nun sorprendería a naide ver a ún de los pilotos Mercedes no cimero del podio n’Australia. Nin nos siguientes.

De toles formes, Ferrari nun paez que tean dormíos, y de fechu fueron los más rápidos en dos de los cuatro díes de test. N’esencia los test nun son más qu’una oportunidá pa los equipos pa dir confirmando que lo que ficieron demientres el parón ente temporaes ta dando los resultaos esperaos pero non necesarimente representen les carreres porque los intereses equí nun son esos y les condiciones de los coches nun son pa nada lo que vamos dir viendo. Ensin embargu, tener resultaos positivos, como ye’l casu de Ferrari, permítete marchar del circuitu de Montmeló cola esperanza de qu’esti añu puedan tar ehí poniendo a Mercedes n’apuros. Más entá pensando que, como dicíemos, les fleches platiaes pinten perbien.

Otros colos que cuntamos pa la cabeza son Red Bull. Entá ye temprano pa predicir hasta qué puntu van ser una amenaza, pero sabemos de lo que son capaces tanto Ricciardo como Verstappen, porque yá lo amosaron la temporada pasada con un motor inferior al de Mercedes y Ferrari. Si esti añu consiguen dar esi pasu alantre que necesiten, de xuru vamos tener carreres entreteníes na llucha polos puestos del podiu.

Pela parte templada de la tabla, McLaren suma problemes ya entamen a apaecer les duldes sobre si lo que pasó con Honda nun foi tanto culpa d’ellos como una falta d’entendimientu ente dambes partes onde tamién McLaren tuvo bien de culpa. Siguen los problemes de refrixeración pal equipu de Woking, y anque’l xueves consiguió axuntar 141 vueltes, los otros díes nun fueron tan positivos y de fechu el coche tuvo de quedar paráu en boxes varies vegaes. El vienres, Alonso marcó’l segundu meyor tiempu, ensin duldes una motivación de cara al entamu de la temporada, pero non lo suficiente pensando en tolos problemes acumulaos.

Ye interesante observar los pasos que va dando Honda con Toro Rosso y nun sorprende la insistencia sobre’l bon entendimientu y sobre cómo les coses nesta nueva rellación van perbien. Dambos pilotos paecen tar a gusto col coche, l’equipu con Honda y Honda col equipu. La ecuación paez tar dando los frutos que toos esperaben y sólo queda que lleguen les carreres pa confirmar que nun ye sólo una impresión distorsionada si non que realmente les coses tán funcionando.

Williams son quiciás los que más interrogantes sumen, non tanto a nivel téunicu como polos sos pilotos. Stroll namás tien un añu na Fórmula Uno y pa Sirotkin esti va ser el so debú. Entendemos que nun ye la situación ideal pa un equipu qu’aspira a sumar puntos regularmente, como sedría’l casu de Williams, pero pensando n’un plan a llargu plazu, quiciás ye lo que necesiten. Ta claro que nun tener un pilotu esperimentáu llimita les posibilidaes del equipu, pero al tiempu ufre una mirada distinta a la que se suma les ganes qu’acumulen estos pilotos que tán empezando. Williams nun necesita otru añu de duldes, anque paez inevitable qu’esti lu seya tamién. Namás nos queda esperar a ver lo que dicen les carreres pa confirmar si les duldes son fundaes o non. Tocante al coche, paez que presenta una evolución ponderatible respecto al añu pasáu, queda ver si ye suficiente pa devolvelos al so llugar.

Sauber avanza a poquitinos, ensin facer munchu ruíu. Con Ericsson y Lèclerc completaron una xornada de test bastante decente que-yos da un puxu estra de cara a una nueva temporada enllena d’esperances de la mano d’Alfa Romeo. Renault pel so llau empieza a configurase como ún de los equipos a siguir de cerca polos bonos resultaos que se vieron nos test. Con una de les pareyes de pilotos más prometedores de la parrilla y con un coche fiable puen disputar a Force India esi cuartu puestu tan deseyáu polos equipos de la mitá de la tabla.

La collaboración ente Ferrari y Haas paez que sigue dando los sos frutos y polo que viemos nestes primeres vueltes de la temporada presenten un coche que puede vali-yos pa incorporase al pelotón de metá de parrilla. Pinta que son otros que se van xunir a la folixa.

Ye Force India precisamente otru de los equipos a siguir, dalgo que yá nun ye novedá dempués de lo fecho n’años pasaos y la so evolución clara y casi confirmación de ser el cuartu meyor equipu na parrilla. Sedrá “el cuartu a batir” nuna engarradiella que s’albidra una de les competíes del campeonatu.

Llegó la hora de ponese a echar cuentes nos equipos y a nós de dir marcando los díes nel calendariu pa una nueva temporada qu’esperamos seya interesante y nos dea carreres buenes como dalgunes de les que vimos l’añu pasáu. Hasta que llegue esa primer carrera del 25 de marzu n’Albert Park (Australia) embaxo vos dexamos tolos datos de la segunda de test y equí podéis atopar lo que dio de sí la primera.

La temporada 2018 de Fórmula Uno yá ta equí. De momento quedamos colos resultaos d’estos últimos test de pretemporada:

Primer día: llunes, 6 de marzu

Pos.  Pilotu Equipu Tiempu Neu. Vueltes
1 Vettel Ferrari 1:20.396 M 171
2 Bottas Mercedes 1:20.596 S 86
3 Verstappen Red Bull Racing 1:20.649 M 130
4 Hamilton Mercedes 1:20.808 S 91
5 Gasly Toro Rosso 1:20.973 S 54
6 Magnussen Haas F1 1:21.298 S 96
7 Hülkenberg Renault 1:21.432 M 48
8 Sainz jr Renault 1:21.455 S 91
9 Sirotkin Williams 1:21.588 S 42
10 Perez Force India 1:21.643 S 93
11 Ericsson Sauber 1:21.706 SS 120
12 Vandoorne McLaren 1:21.946 SS 38
13 Stroll Williams 1:22.937 H 86
14 Hartley Toro Rosso 0

Segundu día: martes, 7 de marzu

Pos.  Pilotu Equipu Tiempu Neu. Vueltes
1 Ricciardo Red Bull Racing 1:18.047 H 165
2 Hamilton Mercedes 1:18.400 U 90
3 Bottas Mercedes 1:18.560 U 85
4 Vettel Ferrari 1:19.541 S 66
5 Hartley Toro Rosso 1:19.823 H 119
6 Alonso McLaren 1:19.856 H 57
7 Sainz jr Renault 1:20.042 M 88
8 Grosjean Haas F1 1:20.237 S 78
9 Räikkönen Ferrari 1:20.242 S 49
10 Stroll Williams 1:20.349 S 63
11 Hülkenberg Renault 1:20.758 SS 102
12 Ocon Force India 1:20.805 S 130
13 Leclerc Sauber 1:20.918 SS 160
14 Sirotkin Williams 1:22.350 S 80

Tercer día: miércoles, 8 de marzu

Pos.  Pilotu Equipu Tiempu Neu.  Vueltes
1 Vettel Ferrari 1:17.182 H 188
2 Magnussen Haas F1 1:18.360 SS 153
3 Gasly Toro Rosso 1:18.363 H 169
4 Hülkenberg Renault 1:18.675 H 79
5 Sainz jr Renault 1:18.725 H 69
6 Vandoorne McLaren 1:18.855 H 151
7 Ericsson Sauber 1:19.244 H 148
8 Hamilton Mercedes 1:19.296 M 84
9 Bottas Mercedes 1:19.532 M 97
10 Kubica Williams 1:19.629 SS 73
11 Perez Force India 1:19.634 H 159
12 Verstappen Red Bull Racing 1:19.842 S 187
13 Stroll Williams 1:20.262 U 67

Cuartu día: xueves, 9 de marzu

Pos.  Pilotu Equipu Tiempu  Neu. Vueltes
1 Räikkönen Ferrari 1:17.221 H 157
2 Alonso McLaren 1:17.784 H 93
3 Sainz jr Renault 1:18.092 H 45
4 Ricciardo Red Bull Racing 1:18.327 SS 92
5 Grosjean Haas F1 1:18.412 U 181
6 Bottas Mercedes 1:18.825 M 104
7 Hartley Toro Rosso 1:18.949 H 156
8 Ocon Force India 1:18.967 H 163
9 Leclerc Sauber 1:19.118 H 75
10 Sirotkin Williams 1:19.189 S 105
11 Hamilton Mercedes 1:19.464 SS 97
12 Stroll Williams 1:19.954 S 27
13 Hülkenberg Renault 0
14 Kubica Williams 0

Temporada 2018 – Primer tanda de test

Suel dicise que sacar conclusiones a partir de lo que se vea nos test de pre-temporada ye inútil porque nada nun va ser lo mesmo dende que los coches se pongan en parrilla n’Australia. Si a esta creyencia-y sumamos qu’ún de los díes de test nun se pudo rodar malpenes a cuenta’l tiempu, lo que nos queda ye tres díes onde quedemos como tábemos al principiu.

Namás quedaben dos presentaciones oficiales de coche, la de Force India, que sigue col so rosa y la de Toro Rosso, que nun camuda muncho del diseñu del añu pasáu. En xeneral, hai una parrilla bastante vistosa, col naranxa papaya de McLaren marcando’l tonu del restu, y col halo intentando congraciase cola xente dende un puntu de vista estéticu. Hai que reconocer que los equipos ficieron un trabayu perbonu pa facer qu’esti nuevu elementu de lós coches nun llame muncho l’atención. A esto hai qu’añader que los pilotos nun tienen mayor quexa sobre la visibilidá, anque sí comentaron que nun con conscientes de les gotes de lluvia como lo yeren enantes porque l’halo nun les dexa cayer nes viseres del cascu.

En llínies xenerales, tolos equipos dieron de sí lo que s’esperaba. Quiciabes ye importante rescamplar la regularidá de Toro Rosso col so nuevu motor Honda, centru d’atención de los test. Anque’l soníu del motor nun ye de los meyores nin de los más limpios qu’hai na parrilla, sí que ye verdá que respondió muncho meyor de lo que s’esperaba. Ye pronto pa valorar l’aciertu o non de Toro Rosso, pero polo menos hasta agora, puen respirar con tranquilidá.

El mal tiempu nun dexó ver munches de les promeses que s’escondíen n’aerodinámica de los coches, con dellos siendo lóxicamente conservadores enfotaos más na segunda tanda de test qu’empiecen el martes 6 que no que pudieran faer nestos primeros. Sábese que los motores Renault nun tán diendo al 100% por precaución del equipu, que nun quier arriesgase muncho diendo a tolo que da yá dende’l principiu.

Nun podemos escaecer qu’esti añu los equipos namás disponen de tres motores pa tola temporada, dalgo que viendo lo visto hasta agora (sobre too con dellos equipos) paeznos mui complicao de consiguir. De toles formes, nun tenemos de comentar nengún fallu bultable nestos test nesi sen. Mercedes sigue alantre, siguíu de cerca por Ferrari y Red Bull. Hasta equí nun camuda nada. Como siempres, la mitá de la tabla ye onde más movimientu vamos ver, y quiciábes dalgún de los equipos qu’hasta agora nun aspiraben a podiu, casu de McLaren o Renault, pudieren tar presentando la so candidatura. Hai que ver tamién si lo de Toro Rosso y Honda nun queda namás que na maxa del primer test.

Anque Ericsson protagonizó dalguna bandera colorada y cree qu’entá-yos queda muncho que bregar, la verdá que la temporada empieza con esperances renovaes en Sauber. Cola entrada d’Alfa-Romeo y una cara nueva, el pilotu Charles Leclerc, l’equipu suizu tien munches bones razones pa confiar en que puen facer daqué bono esta temporada pa dexar atrás les pasaes y, d’una vegada, recuperase y ponese al altor que tuvieron nun hai tanto.

Polo xeneral, los comentarios de los pilotos fueron n’una direición bastante neutra, lo que fai albidrar qu’entá nun tienen claro, nin tampoco quieren falar enantes de tar seguros y de probar el coche otra vuelta más. Cuidamos que’l tiempu va ser meyor nesta segunda parte, pa que podamos ver muncho más y sacar conclusiones más precises. De toles maneres, hai que rescamplar tamién que, cuando’l tiempu lo permitió, los equipos sumaron un bon puñáu de vueltes nos sos coches, dalgo qu’ensin duldes ye positivo pa una primer sesión de test.

Embaxo vos dexamos tolos númberos de los primeros test. Nun hebo un únicu dominaor no que cinca a los primeros puestos pero más o menos repítese lo que fuimos viendo la temporada pasada.

Primer día: llunes, 26 de febreru

Pos.  Pilotu Equipu Tiempu Neu. Vueltes
1 Daniel Ricciardo Red Bull Racing 1:20.179 M 105
2 Valtteri Bottas Mercedes 1:20.349 M 58
3 Kimi Räikkönen Ferrari 1:20.506 S 80
4 Nico Hülkenberg Renault 1:20.547 M 73
5 Carlos Sainz jr Renault 1:22.168 SS 26
6 Lewis Hamilton Mercedes 1:22.327 S 25
7 Fernando Alonso McLaren 1:22.354 M 51
8 Brendon Hartley Toro Rosso 1:22.371 S 93
9 Lance Stroll Williams 1:22.452 S 46
10 Romain Grosjean Haas F1 1:22.578 S 55
11 Marcus Ericsson Sauber 1:23.408 S 63
12 Nikita Mazepin Force India 1:25.628 M 22
13 Sergey Sirotkin Williams 1:44.148 S 28

Segundu día: martes, 27 de febreru

Pos.  Pilotu Equipu Tiempu Neu. Vueltes
1 Sebastian Vettel Ferrari 1:19.673 S 98
2 Valtteri Bottas Mercedes 1:19.976 M 94
3 Stoffel Vandoorne McLaren 1:20.325 H 37
4 Max Verstappen Red Bull Racing 1:20.326 M 67
5 Carlos Sainz jr Renault 1:21.212 S 65
6 Pierre Gasly Toro Rosso 1:21.318 S 82
7 Robert Kubica Williams 1:21.495 S 48
8 Sergey Sirotkin Williams 1:21.822 S 52
9 Esteban Ocon Force India 1:21.841 S 79
10 Charles Leclerc Sauber 1:22.721 S 81
11 Kevin Magnussen Haas F1 1:22.727 S 36
12 Nico Hülkenberg Renault 0

Tercer día: miércoles, 28 de febreru

Pos.  Pilotu Equipu Tiempu Neu.  Vueltes
1 Fernando Alonso McLaren 2:18.545 W 11
2 Daniel Ricciardo Red Bull Racing 2
3 Brendon Hartley Toro Rosso 2
4 Marcus Ericsson Sauber 1
5 Robert Kubica Williams 1
6 Romain Grosjean Haas F1 0
7 Lewis Hamilton Mercedes 0
8 Kimi Räikkönen Ferrari 0
9 Sergio Perez Force India 0
10 Nico Hülkenberg Renault 0
11 Lance Stroll Williams 0

Cuartu día: xueves, 1 de marzu

Pos.  Pilotu Equipu Tiempu  Neu. Vueltes
1 Lewis Hamilton Mercedes 1:19.333 M 69
2 Stoffel Vandoorne McLaren 1:19.854 H 110
3 Sebastian Vettel Ferrari 1:20.241 S 120
4 Kevin Magnussen Haas F1 1:20.317 SS 96
5 Fernando Alonso McLaren 1:20.929 SS 51
6 Carlos Sainz jr Renault 1:20.940 M 60
7 Lance Stroll Williams 1:21.142 S 54
8 Sergio Perez Force India 1:21.973 S 65
9 Max Verstappen Red Bull Racing 1:22.058 S 35
10 Pierre Gasly Toro Rosso 1:22.134 SS 147
11 Nico Hülkenberg Renault 1:22.507 S 49
12 Valtteri Bottas Mercedes 1:22.789 M 60
13 Charles Leclerc Sauber 1:22.808 S 59
14 Marcus Ericsson Sauber 1:23.825 SS 79
15 Sergey Sirotkin Williams 1:31.979 I 47

A partir del martes 6 y hasta’l vienres 9, vamos tener otra vuelta los monoplaces nel Circuitu de Montmeló na so última cita enantes de tirar p’Australia pal primer gran premiu de la temporada 2018. Tai sollertes a la nuestra crónica d’esa segunda tanda de test. Quiciás yá vos podamos dar un pocu d’información más concluyente que lo que nos ufrió la primer sesión.

Arranca la temporada 2018

Cuando termines una temporada de Fórmula Uno p’allá pa payares, siempre paez que queda una eternidá pa empezar a ver los coches otra vegada en pista. Pero equí tamos otra vuelta más, a piques d’entamar una temporada nueva y a pocos díes de que los coches arranquen motores nos test de pre-temporada.

Y ye que cásique paez que la Fórmula Uno nun terminara pues tuvimos noticies cada pocu, que los equipos diben dando como a cuentagotes. Tenemos la parrilla de pilotos y d’equipos yá zarrada (nun siendo que dalguién cambie a última hora) y tamién calendariu de test y de carreres. Y, pa nun variar, tenemos polémiques. Sí, ye verdá, yá arranca la Fórmula Uno.

Vamos empecipiar polos equipos y pilotos qu’esti añu vamos ver nos circuitos. Nun hai grandes cambios nin nengún nuevu, anque sí dellos cambeos de nome. Podéis atopar tolos datos nesta páxina.

Williams va ser el primeru n’enseñanos el coche col qu’aspiren a ameyorar lo visto la temporada pasada. Al final, l’equipu de Claire Williams decidió subir al coche al rusu Sergei Sirotkin pa facer pareya con Lance Stroll. Una apueste firme pola mocedá que nun sabemos cómo va resultar pal equipu inglés. El fichaxe de Kubiça que tanto s’anunciaba quedóse n’un puestu como pilotu reserva y probador na escudería, dalgo qu’ensin duldes sabe a pocu dempués de tolo que se faló del so retornu a la competición formulera.

Tolos focos tán puestos enriba de dos equipos principalmente: al marxe de Mercedes y Ferrari, qu’albidramos van tar no cimero de les clasificaciones dende bien ceo, l’atención tamién ta puesta en Toro Rosso (agora Red Bull por petición d’Honda) y, cómo non, en McLaren. Les razones son obvies: los cambios de motorista pa dambos equipos ya’l resultáu que puean tener. Si nos fiamos de lo que vimos en temporaes pasaes, lo suyo yera qu’en Toro Rosso tuvieren de tar más preocupaos porque Honda tuvo lloñe d’amosar un bon rendimientu. Ensin embargu, hai tiempu que les suposiciones dexaron de funcionar y nun queda más qu’esperar a velo en pista pa confirmalo. ¿Sedrá quién Honda a facer un bon papel con otru equipu? ¿Sedrá Renault quién a devolver a McLaren a los puestos qu’opten a podiu? ¿Sedrá too un desastre? Nun queda muncho pa dir respondiendo a estes entrugues.

Otru equipu d’interés ye Force India (de momentu vamos nomalos asina anque anden a la gueta d’un nome nuevu), que nes pasaes temporaes fexo un perbón trabayu y que tienen una de les pareyes de pilotos más interesantes de la parrilla. Tamién tenemos ganes de ver a Charles Leclerc conduciendo un Fórmula Uno como pilotu oficial, de la mano d’Alfa Romeo-Sauber, otra combinación d’equipos míticos qu’esperamos funcione meyor de lo que l’añu pasáu funcionó Sauber.

Col aniciu d’una temporada, la verdá ye que tolos equipos más o menos creen interés pa la xente qu’intenta ver, n’unos test que munches vegaes nun dicen nada anque otres falen por sí mesmos, per onde va dir la temporada. Pa nós les apuestes son clares hasta que pase lo contrario: los principales candidatos al títulu van ser los Mercedes y los Ferrari. En cuantes a los pilotos…la opción cenciella ye pensar en Hamilton como máximu aspirante a ganar el so quintu campeonatu, pero nun dar creitu a Vettel paeznos un erru. De la mesma forma, anque con menos convencimientu, paeznos que Bottas podría tener dalgo que dicir.

Nun queremos escaecer a los pilotos Red Bull. Con un bon coche Ricciardo y Verstappen opten a too, asina que nun sería d’estrañar que tuvieren tamién no cimero. Pela parte media la cosa va tar más reñida y esti añu nun tenemos tan claro qué equipu va tar na última posición.

El calendariu d’esti añu ye intensu (podéis consultalu equí) con munches carreres siguíes qu’ensin duldes son un prestu pa la xente que les ve dende casa o que va al circuitu. Amás de los clásicos (Silverstone, Monza, Suzuka…) tenemos ganes de ver si Baku nos sorprende con otra carrera como la del 2017 onde pasó de too. El retornu d’Alemaña y Francia al calendariu ye siempre una bona noticia anque sigue ensin convencenos el zarrar con Abu Dhabi.

Pa rematar esti primer post de la temporada, nun queríemos dexar fuera una de les noticies de la temporada: Fernando Alonso, pilotu McLaren, va competir nel WEC, el campeonatu de resistencia qu’inclúi les 24 hores de Le mans y qu’esti añu fai una supertemporada de transición qu’empieza y acaba con dambes cites de la épica prueba francesa. Lo que nun pasaría de ser una noticia más y la obviedá de qu’a Alonso yá nun-y val sólo cola F1 como antaño, convirtióse en polémica cuando los organizaores del GP de Fuji (de los mesmos propietarios que l’equipu Toyota), que ta dientro del WEC, decidíen cambiar la fecha de cellebración del so eventu pa que nun-y coincidiera al pilotu asturianu col calendariu de F1. Y ye que la condición principal pa qu’Alonso combine dambes categoríes per parte de McLaren ye que la Fórmula Uno seya lo primero y Fuji coincidía en feches col GP de los Estaos Xuníos.

Como ye lóxico, munches persones manifestaron el so maltar por esta decisión que nun ye cosa del pilotu pero que dexa claro l’interés que mueve al WEC que ta n’hores baxes tres la marcha de Porche con Toyota como únicu constructor dientro la categoría reina, los LMP1, a la espera de confirmación d’equipos privaos. Ensin embargu, paeznos que’l fechu de cuntar con un reclamu como ye Fernando Alonso nun debiera facer que los organizaores o quienes decidan estes coses dexen de pensar en los milenta pilotos que tamién compiten n’otres tantes categoríes y que se vieron afeutaos d’una forma o otra por esti cambeu. Alonso nun ye un pilotu que necesite de favores pa demostrar nada a estes altures de la carrera y hai munchos corredores que lleven apostando per bastante tiempo nestes series. Nun hai qu’olvidar tampoco l’efectu en cadena que provoquen estos movimientos, forzando el cambiu de fecha del eventu correspondiente de Super GT y una colisión del WEC con DTM y The Petit Le mans.

De toles formes nun somos ayenos a los poderes que mueven estes coses y como dicimos, el WEC ta n’hores baxes y paez que cualquier cosa ye válido pa que se fale d’ello. Nun sabemos l’efeutu que pue tener, nin l’ésitu que va tener Alonso col equipu Toyota, favoritos a priori, pero viendo tolo que s’entamó, más-yos val que pague la pena si nun se quier perder credibilidá y atractivu.

Zarramos comentando que dientro unos díes, el llunes que vien más concretamente, empiecen los test en Barcelona, la primer toma de contautu con esta nueva temporada. N’AsturiesF1 taremos sollertes pa traevos la información más importante de lo que vaiga pasando nesos díes.

Estes son les feches y llugares de presentación de cada equipu:

Equipu Coche Presentación Llugar
Williams FW41 15 Febreru London
Red Bull RB14 19 Febreru
Sauber C37 20 Febreru Online
Renault RS18 20 Febreru Online
Ferrari 22 Febreru Online
Mercedes W09 22 Febreru Silverstone
McLaren MCL33 23 Febreru
Toro Rosso STR13 26 Febreru Barcelona

Resume 2017 (Segunda parte)

Na primer parte d’esti resume (que podéis lleer equí por si entá nun lo ficistis) falábemos de ganadores y perdedores, refiriéndonos a equipos y pilotos. Pero tamién hai que falar de les carreres, de les sorpreses que llevemos y de les coses que nun nos cuadraron demasiao.

2017 foi un añu de dir y vinir na parrilla: Kvyat, que yá entamaba l’añu cola confianza tocada, quedaba tocáu y fundíu dempués de que Toro Rosso decidiera prescindir d’elli pa meter a Gasly en nómina. El baille de pilotos tamién afeutó a Renault, que nun aguantó con Palmer tola temporada (nun podemos culpalos) y terminó por sustituyilu por Carlos Sáinz, que na segunda mitá de la temporada camudó los collores del so coche. Esi movimientu facía que Toro Rosso quedare con un pilotu de menos y cuando tol mundo pensaba que Kvyat diba volver tener la so oportunidá, llegó directamente del WEC el neozelandés Brendon Hartley.

Si falamos de la meyor carrera del añu, ye mui posible que coincidamos munchos en qu’esa foi Baku por too lo que se vio esi día y que naide nun esperaba: la victoria de Ricciardo, el momentu Vettel-Hamilton, les batalles y adelantamientos…La verdá que foi una d’eses carreres que nun dexen descansar a la xente nin un segundu.

Y si mentamos la meyor, hai que dicir cuala ye la pior, y paeznos qu’esi duldosu honor tien de llevalu Abu Dhabi. Muncha xente del mundu formuleru falaba de la gran capacidá loxística de los organizadores del eventu nel circuitu de Yas Marina. Ensin embargu, esi despliegue nun foi sinónimu de bona carrera si no más bien tolo contrario. La pallabra más repitida pa describila foi aburrimientu, y tamos mui d’alcuerdu.

México lleva un par d’años llevando’l reconocimientu por ser el meyor eventu formuleru del calendariu y con motivu. Esti añu amás, col estra de lo que pasara un tiempu enantes de que llegaren los coches, y esi terremotu terrible que tanta tristeza dexó nel país, pudimos velos entamar una fiesta bien guapa como pa sorrir al futuru dempués de pasalo tan mal. Bien por México.

Escoyer ún de los meyores momentos de 2017 pue ser una de les coses más complicaes pola cantidá de bones hestories que vimos nesta temporada. Por quedanos con una quiciás el gran premiu de Mónaco ya’l diálogu previu a la carrera ente dos campeones del mundo como son Jenson Button y Fernando Alonso, que si vos alcordáis esi día compitió nes 500 milles d’Indianápolis.

Tampoco nun queremos olvidanos de la primer victoria de Valtteri Bottas que llegó esti añu nel gran premiu de Rusia. La llegada del finlandés a Mercedes paecía ser un parche pa cubrir l’ausencia inesperada del que yera vixente campeón del mundu Nico Rosberg, pero Bottas supo trabayar por facese un güecu nel equipu y cuenta cola aprobación d’Hamilton.

La mayor decepción d’esti 2017 paeznos que foi Williams. Yá falemos de Stroll como ún de los perdedores, pero la verdá ye que l’equipu nun tuvo a l’altura de lo qu’esperábemos d’ellos. A estes altures de 2017 entavía nun sabemos quién va pilotar xunto al pilotu canadiense en 2018 pero sólo esperamos que, seya quien seya, sirva pa que Williams despierte y nun repita los errores d’esta temporada.

Y como nun pue ser d’otra manera, cuando un añu empieza siempre se fala d’esos deseyos que se tienen pa esos 365 días que tán pa estrenar. La temporada 2018 nun entama hasta finales de marzu pero podemos dexar equí lo que deseyamos pa ella:

– Que dalgún equipu (y si puen ser dos meyor que ún) faga solombra a Mercedes en dambos campeonatos. Nun pidimos más que volver a tener batalles como nesta primer parte de la temporada.

– Que los circuitos que retornen dexen un bon tastiu y que motiven a la xente a enllenar les grades p’amosar, una vuelta más, que la Fórmula Uno ta mui viva y tien en munchos trazaos europeos entá hestoria qu’escribir.

– Que cada gran premiu seya un gran espectáculu au la xente, los pilotos y los equipos esfruten al máximu y nos fagan esfrutar a los y les que tamos al otru llau la pantalla.

Nun nos queda más, dende Asturies F1, deseyavos un añu enllenu de felicidá y muncho, munchísimo motor y carreres de les qu’esfrutar. ¡FELIZ TEMPORADA!

Resume 2017 (Primer parte)

Tamos a piques de rematar el 2017 pero nun podíemos facelo ensin enantes echar los güeyos atrás pa repasar lo que foi esti añu na Fórmula Uno. Milenta blogues, podcasts y páxines dedicaes a esti deporte yá dieron tolos datos y toles estadístiques ya nosotros queremos sumar una migayina con esti puntu final a una temporada que dio pa bastante más de lo que paecía.

En xeneral, foi una temporada entretenida. Ye verdá qu’al final, y sobre too les últimes carreres con too decidío foi bastante aburrío, pero la primer parte de la temporada, onde Vettel y Hamilton, y Ferrari y Mercedes lluchaben por ser los meyores esti añu, foi bien emocionante. Fuimos testigos del pasu alantre nel desarrollu d’estos coches, con récords de circuitos gran premiu tres gran premiu, con adelantamientos perinteresantes (pa silenciar asina a los que duldaben que con coches más anchos eso fuera posible) y bastantes batalles inesperaes que punxeron munches veces la guinda a carreres menos vistoses.

Si tenemos que falar de ganadores y perdedores, paeznos qu’hai bastante alcuerdu: ye indudable que nel apartáu de los ganadores tenemos de meter a Mercedes por otru añu más siendo campeones y por facelo superando torgues qu’otros quiciabes nun podríen. Al marxe d’esta opción obvia, tamién queremos destacar lo fecho por Force India, un añu más, ensin duldes el meyor equipu de la parte media de la tabla y de fechu’l cuartu meyor equipu de la temporada. La combinación de pilotos y el trabayu continuu de la escudería viose recompensada con un campeonatu perbonu y esi cuartu llugar. N’años anteriores siempre los víemos empezar mui bien y dir desapaeciendo col pasu les carreres. Esti añu consiguieron mantenese a flote y dientro los puntos en prácticamente tolos grandes premios. L’únicu puntu negru de la so temporada fueron, quiciás, los incidentes en pista ente dambos pilotos, que l’equipu consiguió resolver con más o menos fortuna.

En cuantes a los perdedores, equí tamién paez qu’hai consensu: Ferrari tien de tar nesti llau, pesie a que non tola temporada foi un desastre. Paez inxusto calificalos de perdedores pero la verdá ye que fueron ellos mesmos los que dinamitaron toles sos posibilidaes de ser campeones en dambos campeonatos: la xira asiática de la Fórmula Uno foi terrible pal equipu y los sos intereses, y cuando quixeron recuperase yera tarde. Otru añu más, otra deceición más, anque esta vegada hai qu’almitir que hebo más esperances y les evoluciones ya’l trabayu nel coche dieron resultaos más visibles que n’años pasaos.

Pa facer compañía a Ferrari tenemos otru par d’equipos: Sauber y McLaren. Los primeros pol rendimientu amosáu, sabemos qu’afectaos por milenta circunstancies que nun tienen muncho que ver colo que pasa en pista pero que sí lo condicionen. Cuidamos que 2018 seya un añu munchu más positivu pa ellos cola llegada de Leclerc y les agües más calmes. Los segundos por otru añu más de falta d’entendimientu con Honda. Vamos llamalo asina porque nun creyemos que nengún de los dos llaos olvidara como facer el so trabayu. Nel 2018 dambes partes tomen caminos separtaos dientro del mesmu mundu formuleru y col optimismu propiu de los nuevos entamos. Honda con Toro Rosso, McLaren con Renault. ¿El resultáu de dambes combinaciones? D’equí a un añu vos lo cuntamos.

No que cinca a ganadores y perdedores na parrilla de pilotos, una vuelta más, Hamilton tien por fuercia de tar ente los primeros. Pesie a tener dellos momentos de vese cuestionáu poles sos formes alloñaes de los circuitos (y que sabemos que siempre foi ún de los puntos febles del pilotu británicu) la verdá qu’esti añu vímoslu bastante más capaz de controlar esti tipu de coses ya xestionar les sos emociones y nun dexar qu’estes lu afectaren en pista.

Otru “ganador” pa nosotros ye Esteban Ocon. Na so primer temporada completa como primer pilotu, esta vegada en Force India, malpenes lu vimos fuera de los puntos, lo cual nun dexa de ser almirable. Cuidamos que 2018 seya l’añu nel que confirme qu’esti 2017 nun foi una ilusión y que tamos énte ún de los pilotos de referencia pal futuru.

Nel otru llau, dientro de los perdedores, anque con matices, metemos a Vettel. Esti añu vimos coses nel alemán a les que nun nos tien avezaos y que quiciás yeren espeyu de falta de confianza ya incapacidá de sobreponese a los problemes. La so actitú en Baku, l’erru en Singapur…son sólo exemplos de situaciones que nun tamos avezaos a vivir con un pilotu como Vettel que suel controlar meyor esti tipu de circunstancies. Hamilton ganó por méritos propios de la mesma forma que Vettel perdió polo mesmo.

A Vettel sumamos Stroll y Ericsson. Stroll tuvo dellos momentos brillantes que maquillen un pocu la so actuación en xeneral pero, xunto a Williams, el so añu foi bastante deceicionante. Ericsson, pel so lláu, tampoco nun dio pa muncho: nun sumó puntos pal so equipu, tuvo más d’un accidente inxustificáu y, sinceramente, nun amosó la razón pola qu’en Sauber siguen confiando n’elli. Tuvo la suerte de tener al llau a Pascar Wehrlein que tampoco nun pudo dar muncho más de sí cola ferramienta de la que disponía.

Y hasta equí la primer parte de les reflexones d’esti 2017. Pal caberu día del añu volvemos cola segunda parte.

Gran Premiu d’Abu Dhabi 2017

Llega la última crónica del 2017 y failo con una carrera aburrida embaxo’l brazu. Con too decidío en dambos campeonatos ya un circuitu que nun ye que dea pa muncho en tema adelantamientos, la verdá que nun ye sorpresa que varios pilotos ya fans comentaren que la carrera foi poco vistosa. Abu Dhabi nun suel dar munchu espectáculu, anque sí que ye verdá que l’añu pasáu tuvimos una carrera entretenida ensin tar el campeonatu de pilotos decidíu.

Seya como fuere, dalgunes coses puen destacase, como les batalles ente Bottas y Hamilton o la de Massa con Alonso. Renault consiguía’l so oxetivu de terminar sextu nel mundial de constructores gracies al sextu puestu algamáu por Hülkenberg, non ensin polémica, anque Sáinz nun terminaría tan contentu la so carrera. Ferrari nun dio pa muncho nin con Vettel nin con Räikkönen y Haas tuvieron carreres más entreteníes que’l restu anque ensin el premiu de los puntos esta vegada.

Bottas fízose con una victoria bien merecida pa Mercedes, teniendo a Hamilton pegáu en gran parte de la carrera pero ensin que realmente fuera una amenaza pa elli. Cola pole del sábadu, una bona salida prometía una posibilidá de victoria que se fexo real pal finlandés. Ensin embargu, nun sirvió pa ponese segundu nel campeonatu de pilotos perriba Vettel por terminar esti terceru en carrera. Foron mui superiores a Ferrari esti fin de selmana. Agora, como nun pue ser d’otra manera, yá tán pensando nel coche de 2018.

Ferrari nun dieron pa muncho n’Abu Dhabi: Kimi Räikkönen foi ún de los pilotos que faló d’aburrimientu en pista, con poques coses que facer sacante l’aforrar combustible, dalgo que disgusta a tolos pilotos pues nun los dexa sacar el máximu al coche. Tuvo la primer parte de la carrera batallando con Ricciardo hasta qu’esti abandonó ya dempués d’eso nun tuvo realmente muncho más que facer que nun fuera terminar la carrera en cuartu llugar. Verstappen, que terminó quintu per detrás d’elli, nunca nun foi un peligru pa elli.

En Red Bull, pa esti últimu períodu de la temporada, paez que cambiaren les tornes y la mala suerte de Verstappen pasara a Ricciardo. El pilotu australianu nun terminó tres de les últimes cuatro carreres y Abu Dhabi foi una d’elles. Diba cuartu cuando paró en pits pensando que tinía un pinchazu pero en realidá yera un problema hidráulicu que lu dexó fuera na vuelta 19. Verstappen foi otru de los que comentó l’aburrimientu que pasó demientres la carrera (de fechu dicía que si tuviera tinío una almohada, tuviera dormío gran parte del gran premiu). De toles formes, el pilotu holandés nun tuvo cómodu nin nes sesiones del vienres, nin el sábadu, asina que’l quintu puestu nun sorprende.

Renault aterrizaben n’Abu Dhabi col oxetivu de terminar sextos nel mundial constructores pa empatar con Toro Rosso ya consiguieron ocho con Hülkenberg, que terminó sextu precisamente. Ensin embargu, nun foi una posición ganada ensin polémica yá que’l pilotu alemán foi penalizáu con cinco segundos por adelantar posición a Sergio Pérez pel exterior del circuitu. L’equipu Force India nun taba conforme cola penalización porque consideraben que yera necesario que Hülkenberg, además, devolviera la posición a Pérez, dalgo que los comisarios nun consideraron que ficiera falta.

Nel otru llau del garaxe, Carlos Sáinz taba faciendo una bona carrera hasta qu’una parada pa cambiar gomes diba dexalu fuera. Una de les ruedes, la delantera drecha, quedó mal afixada y provocó que’l pilotu madrilanu nun pudiera controlar el coche y tuviera d’abandonar al pocu de salir del pitlane. Amás, l’equipu recibió una multa de 5000€ por dexar a Sáinz salir cola rueda mal puesta.

Force India remató esti domingu la so meyor temporada hasta la fecha ya féxolo como bien siendo vezu: con dambos pilotos en puntos. Al marxe de la polémica yá comentada de Pérez con Hülkenberg, tanto elli como Ocon ficieron una bona carrera na llínia de les que vienen faciendo demientres tola temporada. El pilotu francés tuvo una carrera bastante solitaria ya nunca nun pudo siquiera poner n’apuros al so compañeru d’equipu, que terminó séptimu. Elli sedría octavu.

McLaren terminaron la temporada ya’l so periplu con Honda dientro los puntos, dalgo que nun dexa de ser positivo pa dambes partes. De fechu, el pilotu asturianu foi ún de los que más espectáculu dio xunto a Massa, n’una repitición de lo que víemos en carreres pasaes ente dambos. Vandoorne pel so lláu completó una carrera pa olvidar, na que nunca nun tuvo cómodu y onde nun pudo facer funcionar les gomes. Terminó nel puestu doce, con Alonso nel octavu.

Williams nun cumplieron les expectatives que tol mundo tenía puestes nellos, anque pudieron terminar el campeonatu dientro los puntos col décimu puestu de Massa. El pilotu brasileñu perdió’l novenu llugar con Alonso en pits. L’actuación de Stroll foi bien probe, con milenta problemes coles gomes, munches irregularidaes ya inseguridá en pista. Nun tuvo cómodo en nengún momentu del fin de selmana.

Magnussen abrió la carrera con un trompu, dalgo qu’ensin duldes nun ye lo meyor pa llegar a puntuar n’una carrera. De toles formes, el gran premiu de dambos pilotos foi más entreteníu que la media, pues tuvieron batalles en pista con pilotos como Stroll o Wehrlein qu’amás ganaron. Anque nun puntuaron, Haas puen tar contentos con esti gran premiu ya en xeneral cola temporada, la so segunda na máxima competición del motorsport. Grosjean terminó undécimu y Magnussen décimoterceru.

Sauber taben bastante contentos col resultáu y sobre too cola puesta n’escena de Wehrlein, qu’en dellos momentos llegó a tar décimoterceru. Anque ye verdá que l’equipu ta sufriendo pa poder facer carreres decentes, a lo menos vénse dellos pasos alantre, cosa qu’ensin dulda ye positivo de cara a 2018, onde necesiten un bon puxu que-yos devuelva la ilusión y la capacidá de competir n’igualdá de condiciones col restu la parrilla.

Cola temporada yá terminada, nun termina l’actividá yá que martes y miércoles van cellebrase los test Pirelli n’Abu Dhabi de cara a 2018. Demientres, equí vos dexamos tolos datos d’esti finde y nos ponemos manes a la obra pa facer el resume d’esta temporada 2017 que yá despidimos.

Pos Pilotu Q1 Q2 Q3
1 Valtteri Bottas 1:37.356 1:36.822 1:36.231
2 Lewis Hamilton 1:37.391 1:36.742 1:36.403
3 Sebastian Vettel 1:37.817 1:37.023 1:36.777
4 Daniel Ricciardo 1:38.016 1:37.583 1:36.959
5 Kimi Räikkönen 1:37.453 1:37.302 1:36.985
6 Max Verstappen 1:38.021 1:37.777 1:37.328
7 Nico Hulkenberg 1:38.781 1:38.138 1:38.282
8 Sergio Perez 1:38.601 1:38.359 1:38.374
9 Esteban Ocon 1:38.896 1:38.392 1:38.397
10 Felipe Massa 1:38.629 1:38.565 1:38.550
11 Fernando Alonso 1:38.820 1:38.636
12 Carlos Sainz 1:38.810 1:38.725
13 Stoffel Vandoorne 1:38.777 1:38.808
14 Kevin Magnussen 1:39.395 1:39.298
15 Lance Stroll 1:39.503 1:39.646
16 Romain Grosjean 1:39.516
17 Pierre Gasly 1:39.724
18 Pascal Wehrlein 1:39.930
19 Marcus Ericsson 1:39.994
20 Brendon Hartley 1:40.471

Carrera

Pos Pilotu Tiempu Vueltes
1 Valtteri Bottas 1:34:14.062 55
2 Lewis Hamilton +3.899 55
3 Sebastian Vettel +19.330 55
4 Kimi Räikkönen +45.386 55
5 Max Verstappen +46.269 55
6 Nico Hulkenberg +85.713 55
7 Sergio Perez +92.062 55
8 Esteban Ocon +98.911 55
9 Fernando Alonso +1 vuelta 54
10 Felipe Massa +1 vuelta 54
11 Romain Grosjean +1 vuelta 54
12 Stoffel Vandoorne +1 vuelta 54
13 Kevin Magnussen +1 vuelta 54
14 Pascal Wehrlein +1 vuelta 54
15 Brendon Hartley +1 vuelta 54
16 Pierre Gasly +1 vuelta 54
17 Marcus Ericsson +1 vuelta 54
18 Lance Stroll +1 vuelta 54
NC Carlos Sainz NT 31
NC Daniel Ricciardo NT 20

Previa del Gran Premiu d’Abu Dhabi 2017

Paez mentira que yá pasaran ocho meses y qu’esti domingu vaigamos a ver la última carrera d’esta temporada 2017. Una carrera au los dos principales puestos yá tán decidíos pero onde tovía tenemos cosines poles que mirar, como los puestos medios de la tabla. Amás, llegamos a Abu Dhabi inda col futuru de Williams en dulda, anque coles noticies de que Kubiça y Sirotkin van ser los pilotos que participen nel test de Pirelli namás terminar la temporada. Y como nun podía ser d’otra manera, sigui falándose de 2018 y de les pruebes que dellos pilotos tán faciendo n’otres categoríes del deporte de motor.

Mercedes siguen cellebrando otru añu d’éxitu incuestionable. Con otru doblete embaxo’l brazu, lleguen a Abu Dhabi con más ganas d’esfrutar y probar coses pa 2018 qu’otra cosa, dalgo que ye un pocu la llínia que tán siguiendo’l restu d’equipos.

Ferrari consiguieron ganar n’anterior carrera y de xuru que, anque nun valga pa nada nes sos aspiraciones, van querer repitilo equí. Siempre surdirán les voces quexones que dirán, con razón, qu’agora nun val pa nada, pero la necesidá de terminar la temporada con bona carrera paeznos vital pa la Scuderia de cara a 2018.

En Red Bull, si por ellos fuera, nun terminaben la temporada. Verstappen vien a Abu Dhabi con ganes de siguir faciendo bones carreres ensin casi baxase del podiu. Ricciardo va mas allá y fala de victoria pa rematar les coses bien. Lo que ta claro ye qu’esti ye un circuitu que-yos puede ayudar nesa xera y conociéndolos en pista nun ye dalgo que nos paeza imposible.

Force India tamién miren a 2018 y aprovechen esta última carrera pa probar coses nueves y pa dar oportunidá a George Russell de siguir curtiéndose nel coche. Va tar presente na FP1 el vienres. Tanto Pérez como Ocon resalten d’Abu Dhabi l’espectáculu que ye’l circuitu en sí, coles lluces, col atapecer, pero tamién que se pue adelantar y eso da vida a les carreres. Amás, Ocon tien bones alcordances de Yas Marina porque foi equí onde se convirtió en campeón de GP3 y au probó per primera vegada un F1 n’una sesión de llibres.

Williams siguen nel puntu mira dempués de milenta selmanes. Siguen ensin confirmar nada sobre’l pilotu que va acompañar a Stroll nel 2018, pero yá cebaron los rumores diciendo que Kubiça va ser, xunto a Sirotkin, el pilotu que participe nos test de la selmana qu’entra n’Abu Dhabi con Pirelli. Nesta decisión munchos vieron la confirmación non oficial de que Kubiça va ser pilotu de Williams en 2018 y ye cuestión de tiempu que se faga oficial. El restu, siguen especulando con otros pilotos como Di Resta o incluso Kvyat.

Toro Rosso confirmó hai unos díes que Pierre Gasly y Brendon Hartley diben ser los sos pilotos pa 2018. Lo qu’empezó como una solución a curtiu plazu, terminó convirtiéndose n’una alliniación de pilotos que paez que convence nel equipu. Anque entá nun puntuaron, lleguen a Abu Dhabi con ganes de consiguir un bon resultáu que los motive pa siguir trabayando de cara a 2018 onde van empezar el so camín xunto a Honda. Cada vegada paecen tar más cómodos nel coche y amás Gasly tien bones razones pa querer correr equí yá que foi onde se proclamó campeón de GP2.

Renault deberíen brillar más equí de lo que lo ficieron n’Interlagos porque esti ye un circuitu que, en teoría, los beneficia más. Ensin embargu, eso ye namás la teoría, y l’equipu francés llega con ganes y l’oxetivu de puntuar pa facese col sextu puestu nel mundial. Pa eso tienen que sumar cinco puntos más que Toro Rosso y que Haas nun los supere (tiénenlos a dos puntos). Nun paez que vaiga ser cenciello pero ganes nun-yos falten.

Haas lleguen relaxaos a Abu Dhabi. Saben que tienen complicao ser sextos nel mundial y que la séptima plaza va tar disputada, pero eso nun paez que los preocupe demasiao. Namás piensen en sacar el mayor partíu posible al coche n’un circuitu complicáu y onde ye importante que’l coche tea lo más equilibráu posible. Si amás d’eso puen atropar puntos, meyor que meyor.

McLaren disputen n’Abu Dhabi’l so últimu gran premiu con Honda, pol momentu. Un períodu de tiempu que prometía ser perbonu pa dambos llaos y terminó siendo más bien una pesadiella. Alonso anduvo estos díes faciendo pruebes en Toyota con un LMP1 y en United Autosports con un LMP2 de cara a les carreres que tien pensao disputar en 2018 con dambos equipos. Sabemos de xuru qu’una d’elles va ser les 24 hores de Daytona, con United Autosports, pero entá quedaba por saber si con Toyota va correr Le Mans. No que cinca al gran premiu de F1, va ser complicao pa ellos algamar puntos pero van intentalo, poniendo tamién l’enfotu en deprender tolo que puean de cara a la temporada viniente.

Sauber nun tuvo una bona temporada y anque fueron progresando demientres la temporada, tán deseyando facer un parón, recalcular les coses y ponese manes a la obra col coche de 2017. Entá nun sabemos qué pilotos van tar nel equipu pa 2018. Paez probable qu’ún d’ellos seya Leclerc pero’l futuru d’Ericsson y Wehrlein tovía ye desconocíu.

Los horarios n’Abu Dhabi tornen a ser “normales”:

VIENRES 25/11/2017

LLIBRES 1: 10:00
LLIBRES 2: 14:00

SÁBADU 26/11/2017

LLIBRES 3: 11:00
CLASIFICACIÓN: 14:00

DOMINGU 27/11/2017

CARRERA: 14:00

Equí podéis atopar más información sobre’l circuitu de Yas Marina y más abaxo les gomes escoyíes pal gran premiu: