Author: Asturies F1

Paecía complicao algamalo pero sí: n’Hungría tuvimos otra bona carrera. Nun foi tan intensa como la d’hai siete díes pero tuvo lo suficiente pa ser un gran premiu de los que presten. Munchos destaquen sobremanera la sesión de clasificación del sábadu, una de les meyores que tenemos visto en tiempu.

SÁBADU

Y ye que’l sábadu fuimos testigos de la primer pole de la carrera de Max Verstappen. Paez mentira que col ésitu que vien teniendo esti añu y n’años pasaos, tovía nun algamara una. El sábadu, nuna actuación perfeuta onde los cinco primeros teníen posibilidaes de facese con esi primer puestu, l’holandés pasó perriba de los sos rivales.

Depués d’un vienres ensin muncha actividá por cuenta del agua, el sábadu presentóse secu pa la sesión de clasificación. Ensin grandes sorpreses, la Q1 vio fuera a dellos protagonistes davezu: Stroll y Pérez, nun pasaron d’esa sesión. El pilotu mexicanu echó un pocu de la culpa a Ricciardo a cuenta d’una maniobra d’intentu d’adelantamientu que fixo que dambos perdieran la oportunidá de pasar a la sesión siguiente. Russell tuvo a piques d’entrar nella amosando qu’en verdá Williams ta progresando y, sobremanera’l pilotu inglés, ta esprimiendo’l coche al másimu.

Pela mitá de la tabla, deceición p’Alfa Romeo con Giovinazzi y Haas con Magnussen, que clasificaron bien abaxo y sábadu mui positivu pa McLaren, que vio a dambos pilotos na Q3 otra vegada más. Toro Rosso nun dio pa muncho, asumiendo dende l’entamu de la fin de selmana qu’esti gran premiu nun diba tener nada que ver con Alemaña.

Nos primeros llugares, la deceición ye quiciás Gasly. Clasificó sestu a 0.9 del so compañeru d’equipu na pole. Tamién tenemos de mentar a Ferrari, que nun pasaron de cuartu y quintu, dempués de que Leclerc casi quedara fuera de Q1 por un choque contra’l muru de recta de meta nun erru del pilotu monegascu que l’equipu pudo iguar a tiempu.

Con estes blimes, llegó’l domingu.

DOMINGU

Pesie a les amenacies de tormenta de tol fin de selmana, el domingu alboreció soleyero nel Hungaroring y asina quedó pa tol gran premiu, dalgo que de primeres facía albidrar que la carrera podía ufrir pocu espectáculu.

La salida foi limpia: Verstappen escapó rápido con Hamilton y Bottas apegaos a él nos primeros metros. Dambos pilotos de Mercedes ficieron por nun dexar a Verstappen escapar y por imponese l’ún al otru na segunda posición, batalla que terminó ganando Hamilton. De fechu, pasín ente pasu y depués d’un toque con Leclerc qu’afeutó al so alerón delanteru, el finlandés perdió posiciones que nun foi quien a recuperar más tarde. Vettel nun tardó n’adelantalu tamién y pronto vimos al alemán peleando con Sáinz por el quintu llugar.

Na vuelta dieciocho vivimos una de les munches batalles en pista que calterizaron el gran premiu y que nos tuvieron entreteníos. Los dos pilotos de Toro Rosso que, pesie a dir con desventaya nun dexaron de facer por metese en puntos, fueron protagonistes d’una d’eses lluches ideales nes que dambos pilotos respeten al otru y sólo el más rápidu consigui ganar, ensin choques nin momentos más tensos de lo normal pero compitiendo ensin vergoña. Los dos pilotos de Haas tendríen muncho de deprender viéndolo.

La vuelta venticinco foi la escoyida por Red Bull pa parar, mientres qu’en Mercedes pidíen a Hamilton que entrara en mou hammertime. Na treinta y dos, para Hamilton y la situación sigui igual, con Verstappen lliderando y l’inglés detrás. Los dos pilotos de Ferrari yeren terceru y cuartu y diben alternando posiciones ente ellos. Na vuelta treinta y ocho, el tráficu entama a ser un problema con coches doblaos y fuera de sitiu poles paraes. Verstappen pierde ritmu y distancia con Hamilton y ye esti ún de los momentos qu’aprovecha l’inglés pa pasar al holandés, pero ensin ésitu. Hamilton llega a salise de pista nel intentu, dando a Verstappen la oportunidá de tornar a recuperar la distancia que perdiera.

Con nada que perder y la segunda posición protexida de los Ferrari, Mercedes decide parar a Hamilton pa montar medios na vuelta cuarenta y nueve. El pilotu cuestionó la decisión, considerando que yera un erru que fadría que perdieran la carrera dafechu. Ensin embargu, delles vueltes más tarde, na sesenta y tres, Verstappen fexo saber per radio al so equipu que tinía les gomes desfeches dempués de treinta y ocho vueltes rodando con elles. Un pocu más tarde, na sesenta y siete, Hamilton adelántalu pa ponese llíder y nun abandonar esi puestu hasta la bandera a cuadros. Per detrás Vettel adelanta tamién a Leclerc, que pasa la carrera tamién con problemes de gomes, pa facese col tercer puestu del podiu.

Asina pues, nueva victoria pa Hamilton que lu alluga con sesenta y dos puntos de ventaya col segundu nel mundial de pilotos. Verstappen fexo vuelta rápida y acabo segundu dempués d’un gran fin de selmana que lu vio consiguir la so primer pole. Vettel foi terceru, nuna carrera onde Ferrari nun foi’l centru d’atención.

Per detrás de Leclerc, que foi cuartu, Sáinz terminó quintu. McLaren tornó a sumar con dambos pilotos, dempués de que Norris, que nun tuvo una carrera tan bona como la clasificación del sábadu, acabara novenu. La escudería inglesa amarra’l cuartu llugar, del que paez que naide va ser quien a baxalos. Nel puestu sestu llegó Gasly, otra vegada cuestionáu per tolos llaos pola so probe actuación en comparanza col so compañeru. Col parón de branu taremos sollertes pa ver qué pasa col so futuru. Los Alfa Romeo nun brillaron demasiao: Kimi sumó otra vegada los puntos pal equipu nel puestu sétimu. Giovinazzi namás pudo ver la bandera a cuadros en décimooctavu llugar.

Bottas tuvo de ver como’l so compañeru d’equipu sumaba otra victoria dende l’octavu llugar. Tuvo problemes dende’l vienres asina que lo visto’l domingu igual ye un pocu la continuación dellos treslladada a la carrera. Per detrás d’él y de Norris, en décimu llugar, tenemos a Alexander Albon, que consiguió l’últimu puntu en disputa. Kvyat, depués de l’allegría de xubir al podiu n’Alemaña, tuvo de conformase con acabar décimoquintu equí.

Fuera de puntos tenemos tamién a dambos Racing Point, con Pérez nel puestu once. El pilotu mexicanu perdió la so batalla personal con Albon por esi últimu puntu del décimu llugar y dambos llegaron a chocar, pero ensin consecuencies. Stroll tuvo una carrera bastante más probe, acabando nel puestu dieciesiete.

Renault tampoco nun tuvieron una carrera brillante. Hülkenberg tuvo problemes col coche que nun pudo rendir al máximo por quedase atascáu no que llamen mou seguru, que restaba al coche hasta 0.3 por vuelta. Terminó nel puestu doce. Ricciardo nun lo tuvo muncho meyor, y acabo nel puestu catorce. Haas acabó’l gran premiu nel puestu trece con Magnussen y Grosjean como únicu abandonu de la carrera con un problema de presión d’agua. L’equipu estauxunidense entavía nun tien rempuestes a les milenta entrugues que surden gran premiu tres gran premiu. Por exemplu, el rendimientu del coche de Magnussen que lu fai ser cuartu na Q1 y décimoquintu na Q2. O’l de Grosjean, que ye bonu pa clasificar novenu pero lu dexa perdíu en carrera.

Williams zarró la clasificación con Kubiça nel últimu llugar pero con Russell nel puestu dieciséis. Marchen de vacaciones col optimismu de saber que tán ameyorando y que, nun tardando, van poder averase a los equipos que pior lo tán pasando nestos momentos. Ye casi esperable que si tenemos otra carrera n’agua puedan suañar con sumar puntos otra vegada.

La Fórmula Ún para agora demientres tres selmanes hasta l’últimu fin de selmana d’agostu col gran premiu de Bélxica en Spa, ún de los míticos. Ye tiempu de silly season, de reflexón y meyores. Nós siguiremos asoleyando coses estes selmanes pa compensar esti vacíu de carreres.

Demientres, equí vos dexamos tolos númberos del fin de selmana n’Hungría:

Clasificación

Carrera

Tovía cola resaca del últimu gran premiu de la temporada na que vimos a Max Verstappen coronase otra vegada como’l más rápidu y a Williams ganar el so primer puntu de la temporada, llegamos al circuitu de Hungaroring, última cita enantes del parón braniegu.

Hungría ye un escenariu de contrastes: el calor y l’agua suelen ser protagonistes, mesmo que les tormentes, les más de les vegaes nel mesmu gran premiu y a lo llargo de la fin de selmana, suponiendo esto un retu pa los pilotos que tienen de dir adautándose a lo que la climatoloxía dicte. Tenemos visto un bon númberu de grandes premios perinteresantes, na llínia de los últimos trés d’esti 2019, pero tamién otros con muncha menos intensidá y que naide nun recuerda. La realidá d’esti añu ye que, pesie a qu’a Hamilton se-y da bien esti circuitu y amás ye ún de los que-y presta competir, Max Verstappen vien enchipáu depués de ganar dos de les últimes trés carreres y Valtteri Bottas tampoco nun quier descolgase. Amás, Sebastian Vettel pegó un puñetazu enriba la mesa n’Alemaña pa recordar a la xente que sigui siendo cuatro vegaes campeón del mundu y que cuerre con ún de los meyores equipos de la parriella. Con estes blimes, y si’l tiempu acompaña (esto ye, si l’agua asoma) paez que tenemos otra vuelta énte nós un gran premiu bien interesante.

Pa esta carrera, tenemos ganes de ver lo que dan de sí los Toro Rosso. Dambos pilotos tuvieron un rendimientu perbonu n’Alemaña, anque Kvyat foi quien sacó más premiu d’ello. Dempués del tuit con dedicatoria d’Honda pa cellebrar esti resultáu, quedamos con ganes de siguir viendo lo que pueden facer non sólo Red Bull si non tamién los dos “guaḥes”, que naguen por dar el saltu al primer equipu. Pierre Gasly tien motivos pa tar preocupáu: avérase’l parón de branu, que suel ser momentu de movimientos y confirmaciones, y los dos pilotos de Toro Rosso tán faciendo méritos pa sustituyilu. Anque ye verdá que nos últimos grandes premios el pilotu francés tuvo un rendimientu más positivu, entavía nun ta al altor de lo que se demanda d’él en Red Bull, y tanto Kvyat como Albon yá tán llamando a la so puerta.

Alfa Romeo fueron protagonistes n’Alemaña por ser descalificaos cuando dambos pilotos entraren nos puntos. Tres d’esa deceición, Hungría ye una oportunidá nueva pa dir xubiendo na clasificación. McLaren paez que tienen aseguráu’l cuartu puestu del mundial de constructores, mesmo que Renault lo tuviera l’añu pasáu, con un colchón bastante folgáu de puntos. Sicasí, el retu de la escudería de Woking ye acabar carreres con dambos coches, faciendo por iguar los problemes de fiabilidá que tán atopando los sos pilotos. Lo mesmo podríemos dicir de Renault, a un nivel mayor, porque yá son munches les carreres nes qu’a lo menos ún de los sos pilotos queda fuera, cuando non dambos, como vimos n’Alemaña. La promesa de ser competitivos nesta temporada entavía nun ta cumplida y muncho tienen qu’ameyorar les coses pa que lo faga esti añu.

Repasando tolos equipos de la parte medio de la tabla decatámosnos de que nun hai nengún qu’a estes altures de la temporada tea destacando dafechu nin que tea llibre de problemes nin faciendo les coses muncho meyor que’l restu. McLaren, como diximos, nun son quien a meter a dambos pilotos en puntos davezu, mesmo que Renault. Alfa Romeo tampoco nun son regulares nesi sen, siendo casi n’esclusiva Räikkönen l’encargáu de sumar pal equipu. Pero si pensamos nos otros equipos (con Toro Rosso agora nun momentu más dulce) toos lleguen con dalgún tipu de mancadura. Racing Point sumó un perbón resultáu con Stroll n’Alemaña, qu’amás por fin foi quien a pasar a Q2. Sicasí, Sergio Pérez nun pasó de la vuelta dos en carrera. Haas cuayaron un bon resultáu, con dambos pilotos en los puntos. Ensin embargu, otra vegada tuvieron un momentu en carrera que punxo nerviosos a los miembros del equipu y que de xuru motivó otra charra del so xefe. Hungría va suponer otra oportunidá pa toos estos equipos d’axustar, aplicar meyores a los sos coches y facer por apretar entavía más la distancia en puntos que los separa.

Williams merez capítulu aparte porque, dientro de les sos miseries, continúa rematando los grandes premios colos dos coches, con una diferencia bultable col restu, sí, pero con garantíes de fiabilidá. De xuru que nel equipu preferiríen menos fiabilidá y más velocidá y rendimientu, pero a lo menos agora yá pueden dicir que consiguieron sumar un puntu, anque fuera por descalificación d’otros, y nun van acabar la temporada en blancu. Si llueve n’Hungría, tornaremos a tar sollertes pa ver si esta vegada son quien a ponese en puntos por méritu propiu.

Tamos preparaos pues pa vivir l’últimu gran premiu d’esta primer parte de la temporada, ún d’esos grandes premios polos que siempre naguamos puesto que suelen regalanos eventos intensos. Abaxo podéis atopar tola información sobre ún de los circuitos míticos del calendariu y los horarios pa esta fin de selmana:

Les gomes escoyíes pa esti gran premiu son les siguientes:

La llei de Murphy trabaya en niveles insospechaos. Basta que dalguién diga que la F1 ye aburrida, qu’hai que camudala, que’l so final ta cerca pa que les carreres empiecen a ser de lo meyor que tenemos visto en tiempu. Porque sí, Alemaña va pasar a la historia como una d’eses carreres. Austria y Silverstone yá ganaran esi nome, pero nun cuntábemos que Hockenheim diba merecéselu tamién. La teoría fala de qu’esti va ser l’últimu gran premiu d’Alemaña nesti circuitu pero dempués de lo que vimos el domingu igual les coses empiecen a camudar.

SÁBADU

La sesión de clasificación nun traxo sorpreses na pole, anque sí nos pilotos que la disputaron. Vettel y Leclerc, los dos pilotos Ferrari, nun pudieron siquier competila: l’alemán, con un fallu nel turbo del coche, quedó fuera na Q1, fechu qu’aprovechó Stroll pa colase na Q2 per primer vegada esta temporada. El so compañeru, pudo llegar a Q3 pero ensin posibilidá de dar siquier una vuelta pa ponese na pole. Los entrenamientos fueron bien positivos pa dambos y Ferrari tinía razones pa ser optimista’l domingu, pero les sos miseries tornaron esti sábadu. Al final, pole pa Hamilton, siguíu de Verstappen y de Bottas.

Rescampla la presencia de Pérez y Grosjean en bones posiciones ente los diez primeros y tamién de Hülkenberg nel so gran premiu de casa. Deceición nun llau del garaxe de McLaren porque Sáinz sí pudo entrar en Q3 pero Norris nun pasó de Q2.

Con estes blimes, que situaben el focu de l’atención no que pudiera facer Vettel p’adelantar dende l’últimu llugar, llegó’l domingu.

DOMINGU

Y col domingu llegó…l’agua. Dempués de ver lo que foi la carrera, entiéndese muncho meyor la emoción de munches de les persones que vieron que’l gran premiu diba ser en moyao. El coche de seguridá fexo a los coches dar delles vueltes de formación hasta asegurase de que la so presencia nun yera necesaria. La salida foi en parriella, anque falóse de la posibilidá de facela en marcha, al estilu WEC. Tolos pilotos partieron con gomes d’agua y dempués d’un par de vueltes detrás del coche de seguridá yeren munchos los que pidíen qu’entamara la carrera.

Pa tol agua que taba acumulao y lo que taba cayendo, hai que dicir que foi una salida bastante limpia ensin mayor problema. Sí ye verdá que fueron munchos los pilotos que perdieron trazada y terminaron esplorando les escapatories, pero ensin consecuencies. El respetu al pilotu y al agua fueron protagonistes. La salida de Verstappen foi un pocu una copia de lo que vimos n’Austria. Cuando tolos pilotos que lu arrodiaben yá se poníen en marcha, él nun avanzaba, perdiendo tola ventaya que ganara’l sábadu. Bottas rápidamente se colocó segundu, pesie a salise un pocu del trazáu y Kimi Räikkönen, terceru.

Nestos primeros momentos de carrera llegamos a ver a tres coches en paralelo, buscando l’adelantamientu, nun momentu del gran premiu nel que’l DRS nun taba permitíu. Vettel, na vuelta dos, yá taba nel puestu catorce. L’alemán supo aprovechase de la prudencia de los coches de la cola de la parriella pa dir adelantándolos y acortando distancies cola cabeza, qu’ocupaba Hamilton. Nesti momentu la carrera empezaba a ponese emocionante y víemos batalles ente dellos pilotos como Pérez y Magnussen.

El mexicanu foi’l primer protagonista negativu de la carrera: fexo un trompu que lu acabó llevando contra’l muru, ensin posibilidá de continuar. Foi’l primer abandonu de la carrera y provocó’l primer coche de seguridá, situación qu’aprovecharon pilotos como Vettel y Albon, que fueron de los primeros en parar pa poner gomes intermedies, dalgo que copiaron el restu de pilotos, cola esceición de Magnussen y Stroll, que decidieron siguir en pista. El cambiu de gomes supunxo que viéramos entavía más salides de pista ya errores de tolos pilotos. Vettel, na vuelta ocho, yá taba nel sétimu llugar, y pasaría nesos puestos gran parte del restu de la carrera. L’alemán foi ún de los pilotos que dexó momentos más vistosos, protagonizando un intentu d’adelantamientu a Räikkönen que’l finlandés aprovechó pa, a so vez, adelantar a Magnussen. La carrera, dende bien ceo, foi mui dinámica.

Magnussen acabó almitiendo que l’apuesta de nun parar a cambiar gomes fuera una mala decisión, y entró na vuelta nueve. Hamilton, mientres, marcaba vuelta rápida tres vuelta rápida y tinía la carrera totalmente controlada. Amás, la pista diba secando mui rápido, anque los equipos tiníen un güeyu puestu nel radar de lluvia, qu’anunciaba agua a cada pocu. Sicasí, pesie a que la pista diba ameyorando, los puntos nos que quedaba agua estancao tornáronse en pistes de patinaxe pa los pilotos que pasaben perriba d’ello.

Na vuelta quince, llegó l’abandonu de Daniel Ricciardo. L’australianu rodaba en puntos cuando’l so motor dixo basta y tuvo de parar el so coche. Esto provocó un coche de seguridá virtual qu’aprovecharon dellos pilotos como Leclerc y Hülkenberg, al que llamaron a pits col tiempu xustu pa pasar pel llau drechu del bolardo d’entrada al carril de boxes, dalgo a lo que tán obligaos los pilotos.

Foi na vuelta dieciséis cuando los equipos entamaron a considerar les gomes más blandes como una opción, anque naide paró pa intentalo. De fechu, Leclerc rodaba a mui bon ritmu con intermedios nuevos. Na vuelta diecisiete activóse, por fin, el DRS.. Dos vueltes más tarde, Sáinz salíase de pista, pero cola bona suerte de nun quedar engancháu na gravilla nin contra’l muru. El pilotu madrilanu pudo tornar a pista y continuar col so gran premiu. Podemos dicir que nesti momentu, los pilotos entamaben a quexase del estáu de les gomes, sobremanera Verstappen, que vía como Leclerc, qu’entrara unes vueltes enantes, diba amenorgando la distancia ente ellos.

La vuelta ventidós marcó’l momentu nel que los equipos entamaron a montar blandes: Magnussen foi’l primer pilotu, tornáu en coneyu d’Indies pal restu. Tolos equipos taben pendientes del rendimientu del pilotu danés pa tomar una decisión colos sos propios pilotos. L’agua nun pasaba de ser orbayu pero los pilotos tiníen problemes p’atopar adherencia. Na vuelta venticuatro, Vettel, ensin nada que perder, entró pa montar gomes blandes y dos vueltes más tarde fexo lo mesmo Verstappen, que punxo medios, dalgo que copió Bottas na siguiente vuelta. El pilotu holandés fexo un trompu al pocu tiempu de facer la so parada y yera evidente que nun taba conforme cola decisión.

El tercer abandonu llegó na vuelta ventisiete. Lando Norris, que tuviera hasta’l momentu una carrera discreta, abandonó’l trazáu pa sacase del medio al ver que’l coche perdía potencia y quedaba paráu nuna de les escapatories. El so incidente provocó otru coche de seguridá virtual, qu’aprovechó Leclerc pa parar, mesmo que Hamilton, que montó gomes blandes nuna parada demasiao llarga pa los intereses del británicu.

Tábemos pendientes de cómo sacaben el coche de Norris de pista cuando la imaxe nos devolvía a Leclerc escontra’l muru. Na vuelta ventinueve, el pilotu monegascu perdió’l control del coche, nuna maniobra mui asemeyada a la que l’añu pasáu protagonizó’l so compañeru d’equipu cuando amás taba nuna bona posición pa ponese a tiru de victoria. El coche de seguridá tuvo de volver a ponese en pista y los pilotos, otra vegada más, aprovecharon pa facer paraes. Vettel, montó intermedios. Mientres, Hamilton salíase de pista chocando contra’l muru y frayando l’alerón delanteru, anque pudo siguir. L’inglés aprovechó pa entrar en pits pero non siguiendo les regles d’entrada, lo que-y valió, más tarde, una penalización de cinco segundos. Pa enriba, la so parada pilló al equipu ensin preparar, ensin les gomes correutes y el morru nuevu, lo qu’alargó tol procesu muncho más de lo necesario y dexó a Hamilton lloñe del llideralgu qu’unes vueltes primero taba nes sos manes. Tamién Bottas tuvo problemes a la hora d’entrar en boxes, anque ensin penalización.

Nestos momentos, el primer llugar yera pa Verstappen, que replicaba un pocu lo visto n’Austria: una salida mui probe pero que terminaba pagando la pena. Rescamplaba tamién la posición de Hülkenberg y d’Albon na vuelta treinta y cuatro, que yeren segundu y cuartu respeutivamente. L’alemán aguantó tolo posible a los Mercedes, pero dambos recuperaron les sos posiciones y na vuelta treinta y ocho yá taben segundu (Bottas) y terceru (Hamilton). L’inglés foi investigáu tamién por dir demasiao despacio demientres ún de los coches de seguridá, pero nun llevó penalización dala.

Na vuelta cuarenta, Räikkönen tamién facía una visita a les alredores del trazáu, ensin más consecuencies que la perda de posiciones, dalgo que viendo lo visto yera un mal menor. De fechu, una vuelta más tarde llegó’l quintu abandonu de la carrera. Nico Hülkenberg, que rodaba a un pasu del podiu acabó tamién de visitante del muru, provocando otru coche de seguridá que fexo que Verstappen parara pa montar intermedios mesmo que Vettel, qu’echó más tiempu del deseyau na so parada.

Na vuelta cuarenta y cinco Racing Point dio’l pasu que los llevaría a ún de los meyores resultaos de la temporada. Lance Stroll montó gomes blandes cuando’l restu entavía miraba al cielu a ver si cayía agua. Foi una decisión valiente, que rápido entamó a dar resultaos provocando una visita casi masiva a los garaxes pa copiar lo que ficiera’l pilotu canadiense, que gracies a esto pasó a lliderar la carrera. Kvyat, tamién en gomes blandes y ensin nada que perder, taba nel puestu terceru y marcando vuelta rápida tres vuelta rápida.

Con once vueltes pa terminar la carrera, Hamilton cometió’l so segundu erru de la carrera, faciendo un trompu que cásique lu dexa fuera de puntos (recuperólos gracies a la penalización que sufrieron los Alfa Romeo). Entró en pits a cambiar gomes pero nun hebo muncho que facer. Nesti momentu, Stroll taba a piques d’alcanzar el podiu, rodando en cuartu llugar, con Sáinz per detrás en quintu. Creyíemos que la carrera yá diba estabilizar, pero na vuelta cincuenta y siete foi Bottas quien visitó’l muru, estrozando l’alerón delanteru y provocando otru coche de seguridá, que diba ser yá l’últimu del gran premiu pesie qu’entavía tuvimos otru abandonu. Gasly calculó mal la so frenada cuando diba adelantar a Albon y acabó col so alerón delanteru rotu y fuera del gran premiu.

Verstappen vio otra vegada la bandera a cuadros, siguíu por Vettel que remontó dieciocho posiciones pa colocase segundu y Daniil Kvyat sumó’l so tercer podiu, el segundu na hestoria de Toro Rosso y doblete pa Honda na so nueva era na F1. Cuartu foi Stroll, nuna bona actuación del canadiense que suel aprovechar bastante les condiciones cambiantes de carrera y quintu Sáinz, que pesie a la salida de pista tuvo un bon rendimientu y sumó otru puñáu de puntos pa McLaren, qu’asienta na cuarta posición del mundial. Per detrás, en sestu atopamos a Albon, que mesmo que Kvyat fexo un gran trabayu anque perxudicáu poles decisiones estratéxiques que, nesta ocasión, beneficiaron un pocu más al so compañeru. Nel sétimu y octavu llugar atopamos a los dos Haas, qu’otra vegada tuvieron el so momentu en pista, anque ensin consecuencies. Aprovecháronse de la penalización de los dos Alfa Romeo, que foron penalizaos con treinta segundos por recibir ayuda dende’l muru nes vueltes de formación. Esto fexo que Hamilton y Kubiça, que taben fuera de los puntos, xubieran posiciones pa quedar novenu y décimu, sumando asina Williams el so primer puntu nesta temporada. Fuera de los puntos, xunto a los Alfa, quedó Russell nel puestu once.

Agua. Siete abandonos. Cuatro coches de seguridá y dos virtuales. Dieciocho posiciones remontaes por un pilotu que’l sábadu nin siquier pudo competir en clasificación. Tercer podiu de la so carrera pa ún de los tres primeros. Quiciábes estos seyan los aspeutos más llamatibles del gran premiu pero ye verdá que ye difícil quedase con ún solu. Lo que ta claro ye qu’esta foi una de les meyores carreres en munchu tiempu y que paez que la F1 nun taba tan muerta como paecía.

Dientro d’unos díes llega’l gran premiu d’Hungría, l’últimu enantes del parón de branu y escenariu, en munches ocasiones, de grandes premios memorables. Mientres esperamos a que llegue’l domingu pa esfrutalo, equí vos dexamos tolos númberos del gran premiu d’Alemaña:

Clasificación

Carrera

L’añu pasáu, el gran premiu d’Alemaña marcó’l principiu del final de les oportunidaes de Ferrari y Sebastian Vettel de ser otra vegada campeones del mundu na F1. Cola so victoria en Silverstone de 2018, paecía que nada podía dir mal a los coches coloraos. Sicasí, Hockenheim y un erru incomprensible del pilotu alemán que lu acabó mandando fuera del circuitu y contra les barreres, condergaron la temporada y la victoria de Hamilton nun foi más qu’una amuesa de lo que diba ser el restu de carreres.

Esti fin de selmana tornamos a Alemaña, con Mercedes d’aniversariu y corriendo en casa dempués de la so victoria en Silverstone. Nun sabemos si la carrera alemana va ser igual de vistosa que foron les dos pasaes, y sobre too si pensamos que’l campeonatu cada vegada paez tener menos emoción no que cinca a los primeros puestos, pero como siempre dicimos, hai bien de coses a les que mirar nel restu de la parriella.

Non sólo Mercedes cuerre en casa. Tamién Sebastian Vettel, necesitáu d’una victoria que, anque nun paez que vaiga camudar muncho les coses, de xuru va valer pa zarrar les boques que yá lu quieren sacar de Ferrari. Tamién ta en casa Nico Hülkenberg, qu’esta selmana almitía que Renault nun taba dando lo que s’esperaba y que la so primer parte de la temporada taba siendo bastante deceicionante.

El rendimientu de McLaren esti añu ta siendo una de les coses más llamatibles, non sólo pol fechu de que tán cuartos na clasificación y ye evidente que recuperaron parte de la forma que llevaba años perdida, si non tamién pol fechu de que los sos dos pilotos tán ufriendo una imaxe muncho meyor de la que s’esperaba d’ellos, sobre manera nel casu de Norris siendo’l so primer añu na F1.

Nel trazáu de Hockenheim cuntamos col potencial de Mercedes pa marcar el ritmu pero tamién cola necesidá per parte de los sos dos rivales inmediatos d’arrancai la victoria al llíder del campeonatu. Nun esperamos grandes sorpreses y la lóxica lleva a pensar que va ser Mercedes quien xuba a lo cimero del podiu, pero yá sabemos lo que pasa cola lóxica nes carreres de F1 en munches ocasiones.

Munchos equipos lleguen con delles meyores, buscando amenorgar les distancies. Haas y Racing Point tán faltos de rempuestes, y siguen siendo quiciabes los más febles nel campeonatu, xunto a Williams, qu’al so ritmu continúen dando pasos alantre. El resultáu de Russell en Silverstone, que sedría negativu pa otros pilotos, nun dexa de ser positivu nel casu del pilotu británicu.

Preparámosnos pa otru gran premiu emocionante, colos güeyos puestos non sólo no que pase nos primeros puestos si non, y cásique con más razón por tolo que se ta xugando ehí, na mitá de la tabla.

Estos son los horarios pa esti fin de selmana n’Alemaña y la información del circuitu:

Y equí tenéis la información sobre les gomes pa esti fin de selmana en Hockenheim:

A vegaes paez que la F1 nun tien términu mediu. D’unes cuantes carreres siguíes qu’aburren a quien les ve a otru par que nun te dexen despegar los güeyos de la pista. Austria yá nos ficiera pasalo bien y Silverstone vieno a danos la razón, sí que ye facía falta, de por qué ye ún de los eventos del añu nel calendariu.

Coles condiciones cambiantes demientres la fin de selmana, como ye vezu nes tierres de Northamptonshire, lleguemos al gran premiu sabiendo que taba anováu pa cinco años más dempués d’un alcuerdu que, en pallabres de los xestores del eventu, ye beneficiosu pa ellos y bloquia cualquier competencia per parte d’un supuestu gran premiu en Londres nun futuru. Yá dende’l vienres tuvimos coses interesantes y el sábadu nos entrenos llibres siguíemos cola dulda de quién diba coronase na pole y facese cola victoria’l sábadu. Asina lo viemos.

SÁBADU

Ye mui frecuente que si Lewis Hamilton nun queda primeru nes sesiones de llibres, sobremanera na última, pero tien una distancia curtia con quien llidera acabe consiguiendo la pole. Albidrábemos que yera lo que diba pasar nesta ocasión pero Valtteri Bottas apaeció pa quitanos la razón y pa dexar a los fans del inglés cola miel nos llabios. 0,006 separaron al finlandés del so compañeru d’equipu, abondo pa sumar una pole más a la so cuenta y da-y un estra de motivación pal domingu.

Per detrás de dambos Mercedes clasificó Charles Leclerc que tampoco nun tuvo mui lloñe d’esa pole. El pilotu monegascu tuvo tol fin de selmana bastante más inspiráu que’l so compañeru Sebastian Vettel que namás pudo ponese sestu, per detrás de dambos Red Bull, y que tuvo a piques de quedar fuera de Q3. Hai que rescamplar la fin de selmana de selmana de Pierre Gasly, siempre dientro de los cinco primeros tanto en llibres como na clasificación. El pilotu francés amosó nesti gran premiu un gran rendimientu, perriba de lo que nos tien fechos a ver esta temporada. El restu del grupu de los diez primeros foi pa los dos Renault, con Ricciardo superando a Hülkenberg (sétimu y décimu), Lando Norris, qu’otra vegada tuvo una sesión de clasificación al altor de pilotos muncho más esperimentaos qu’él y Alexander Albon, del que podemos dicir casi lo mesmo que Norris.

Nel apartáu de deceiciones atopamos a los Haas. Tanto Magnussen como Grosjean tuvieron una clasificación probe. Anque’l francés a lo menos foi quien a entrar na Q2, Magnussen clasificó nel puestu dieceséis, mui perbaxo de lo que vimos, por exemplu, n’Austria onde foi quintu. La confusión continua nel garaxe estauxunidense. Los dos Alfa quedaron a les puertes d’entrar en Q2 con bones opciones pa la carrera, siguíos de Sáinz, que nesta ocasión nun pudo colase ente los diez primeros p’acompañar al so compañeru Norris. Racing Point, como ye vezu, nun pudo clasificar más arriba que nel puestu quince con Sergio Pérez. Stroll, na so llínia, nun pasó de Q1.

DOMINGU

Pesie al resultáu del sábadu daqué facía pensar que Hamilton diba salir victoriosu de Silverstone. De xuru nun salió como él creyía de mano. Bottas defendióse mui bien en pista, evitando que l’inglés se punxera en nengún momentu en primer posición y tuvo de ser la suerte la que decidiera y diera al campeón del mundu’l primer puestu que nun diba dexar hasta ver la bandera a cuadros.

La salida del gran premiu de Silverstone foi limpia nos puestos cabezaleros. Per detrás, los dos Haas tuvieron un incidente ente ellos que terminó dexándolos fuera, primero a Magnussen y llueu a Grosjean. Bottas salió bien mesmo que Hamilton, pero’l finlandés nun dexó en nengún momentu que l’inglés-y quitara la posición que ganara’l sábadu. Sí ye verdá que les primeres vueltes, Hamilton nun dexó d’atacar al so compañeru y llegó a adelantalu en dalgún momentu pero la maniobra-y foi devuelta rápido y Bottas siguió primeru. Hamilton relaxó entóncenes la presión y dexó que’l so compañeru amarrare la so primer posición.

El baille de paraes entamó con Gasly que rodaba ente los seis primeros y buscaba la reaición de Ferrari. Consiguióla nel llau de Leclerc y de Verstappen. Dambos pilotos, con historia yá dende Austria, pararon al tiempu y foi nesi momentu nel que vivimos otru de los momentos de la carrera, con los dos coches rueda con rueda nel carril de pitlane hasta la salida. Verstappen púnxose per delantre faciendo valer el trabayu del so equipu, pero’l pilotu monegascu terminó adelantándolu al pocu dempués d’un erru del pilotu holandés.

Bottas taba primeru cuando fexo la so primer parada na vuelta 17. Hamilton escoyó continuar en pista, optando por una estratexa a una parada, confiando quiciás n’un coche de seguridá. Nun tuvo d’esperar muncho porque na vuelta 20, Antonio Giovinazzi perdía’l control del so coche y acaba na gravilla, provocando’l coche de seguridá y dando la oportunidá a munchos de los pilotos qu’entá nun pararan de tener una parada de baldre. Asina, Bottas siguió en pista, Hamilton montó gomes más dures y pudo asegurase’l siguir en pista’l restu de la carrera. Demientres el coche de seguridá taba en pista, tamién aprovecharon pa parar Verstappen (que yá parara) y Vettel. Ferrari escoyó parar al pilotu alemán y dexar a Leclerc fuera pa paralu una vuelta más tarde, decisión que lu fexo perder la so posición y quedar per detrás de Vettel, que taba terceru, y dambos Red Bull, cuartu y quintu.

Dende la marcha del coche de seguridá, tuvimos varios focos d’atención en pista: per un llau, la vieya llucha Leclerc y Verstappen, con movimientos que tuvieron nel llímite del reglamentu y que trayíen a la cabeza posibles penalizaciones que nun vimos. Pero tamién vimos batalles ente Norris y Ricciardo, y más tarde ente Leclerc y Gasly. Nun podemos tampocu escaecer lo que vimos un pocu más abaxo ente Albon y Räikkönen. Los rookies d’esti añu tán dexando claru’l motivu pol que los escoyeron pa tar pilotando na F1.

Por si nos abultaba pocu lo que teníemos visto hasta’l momentu, na vuelta 36, díbemos a sumar otru eventu más. La batalla ente Ferrari y Red Bull taba agora instalada en Vettel y Verstappen. Colo que nun cuntábemos yera col erru del pilotu alemán que calculó mal la maniobra del so rival, frenó tarde y acabó dando col so morru na trasera del Red Bull, mandándolos a dambos fuera de pista. Anque col fondu dañáu, Verstappen pudo continuar, pero perdiendo la so posición con Gasly y Leclerc. Vettel túvolo pior y tocó-y entrar a cambiar el morru, quedando dafechu la so carrera terminada ehí. Amás, tuvo de sumar diez segundos de penalización por causar el coche, con lo que terminó nel puestu dieciseis. A los espectadores esti incidente féxonos alcordanos de lo que vimos en Baku hai un par d’años ente Ricciardo y Verstappen, na que’l pilotu holandés pasó pol mesmu momentu anque nesa ocasión con menos suerte pues quedó fuera de carrera.

Les últimes vueltes de carrera fueron tenses nel garaxe de Mercedes. Les gomes de Hamilton entamaben a dar señales d’agotamientu y Bottas taba averándose al pilotu inglés, baxando la distancia ente ellos a menos de lo que dura una parada. El finlandés paró na vuelta 26 y al pocu informó de que sintía unes vibraciones estrañes nel coche, polo que l’equipu dexó d’insistir a Hamilton pa que parara. Sicasí, la insistencia tornó cuando Bottas se desfizo de los problemes y volvió a recortar distancia. Les últimes vueltes de Hamilton tuvieron dedicaes a protexer les sos gomes pa poder llegar primeru a la bandera a cuadros.

El pilotu inglés tuvo’l sangre frío de, coles gomes gastaes y sabiendo que diba ganar la carrera, facer la vuelta rápida de carrera pa redondear un domingu perfeutu. Ye la so sesta victoria en Silverstone, y otru doble podiu pa Mercedes. Leclerc foi terceru, faciendo un pocu menos amarga la tarde de Ferrari.

Como comentábemos del sábadu, Gasly tuvo un gran rendimientu tamién esti domingu, siendo cuartu y aprovechando les desgracies del so compañeru, que terminó quintu, y de Vettel. Per detrás de dambos, Carlos Sáinz llevó’l so McLaren al puestu sestu, depués de que Norris se desinflara y namás pudiera terminar nel puestu once, perxudicáu pola estratexa escoyida. Nel puestu siete, el Renault de Ricciardo qu’anque nun tuvo una carrera brillante pero atropó bonos puntos pal equipu xunto a Hülkenberg qu’acabó décimu. Entavía nun son quien a ponese per delantre de McLaren, pero dir sumando con dambos pilotos ye ensin duldes una bona noticia pa la escudería francesa.

Kimi Räikkönen dio un pocu de brillu al fin de selmana d’Alfa Romeo que col abandonu de Giovinazzi namás pudo sumar col finlandés. Kvyat, pesie a tener una clasificación bien probe, consiguió dos puntos mui valiosos pa él y pal so equipu. Albon clasificó nel puestu doce y tuvo dalgún problema que torgó la so parada por riesgu llétricu.

Racing Point tuvo otru fin de selmana pal escaezu. Sergio Pérez tuvo un accidente que lu dexó ensin alerón delanteru y tuvo que parar, viendo asina toles sos oportunidaes desapaecer y terminando nel puesto diecisiete. Stroll nun lo fexo muncho meyor y namás pudo ser décimoterceru. Sicasí, nun son too cares llargues na parte baxo de la tabla. Williams consiguió la so meyor clasificación hasta’l momentu gracies a George Russell, que llevó al so monoplaza hasta la décimocuarta posición, otra vegada per delantre de Kubiça. Bona carrera del inglés na so primer visita a Silverstone nun F1.

Son munches les coses que pasaron en Silverstone, munches les reflexones y conclusiones que podemos dir sacando, y tamién munchos los númberos que nos dexó. Mientres nos preparamos pa viaxar a Hockenheim, equí vos dexamos tolo que dio en cifres el gran premiu de Gran Bretaña:

Clasificación

Carrera

Hai carreres que tán tocaes cola maxa de la F1 y que, anque nun seyan interesantes, siempre son una de les cites más esperaes del calendariu. Podemos dicir que Silverstone ye una d’elles. Ún de los circuitos míticos con una historia detrás que desplica tola emoción que despierta añu tres añu. Tanto da si non toles carreres fueron interesantes, si’l pilotu de casa nun gana o si llueve, Silverstone va enllenase de xuru y los güeyos de quienes nun pueden más que velo dende casa nun van perder detalle.

Nun llegamos nun momentu emocionante nel campeonatu. Hai delles carreres que paez que la xente yá asumió que ta too vendío y que mal se tien de dar pa que Hamilton nun seya campeón per sesta vegada. Sicasí, depués de lo que vimos n’Austria les ganes d’otru gran premiu d’eses calterístiques aterricen en Silverstone. Descritu como ún de los meyores circuitos del calendariu polos más de los pilotos, ye ensin duldes una cita de les que tán bien marcaes y que tolos equipos naguen por vivir. Pero non toos van col mesmu enfotu: Ferrari yá almitió que Ferrari en Silverstone nun suele ser sinónimu d’ésitu y tal paez que lleguen equí con resignación. O quiciás cola prudencia de nun vender una victoria que llueu nun va llegar, como ta siendo vezu esta temporada. Nun podemos escaecer que l’añu pasáu foi Vettel quien se punxo no cimero del podiu.

La silly season entavía nun ta dando muncho que falar, anque yá tenemos el so primer titular oficial: McLaren para los rumores sobre’l futuru de los sos pilotos confirmando a dambos pa 2020. Y ye qu’estos díes lleíemos en prensa que Red Bull comentara qu’Alonso, el bicampeón y pilotu de McLaren hasta l’añu pasáu, contautara con ellos col enfotu de competir de la so mano. Sicasí, nun paez que vaiga ser too tan cenciello y l’equipu almitía que, tando Honda con ellos, el retornu d’Alonso a la F1 nes files de los toros coloraos nun diba ser posible. Paez qu’Honda nun quier volver a trabayar col asturianu. Munchos ven nel movimientu de McLaren una manera d’asegurase a dos pilotos que tán amosando la so calidá y bon trabayu xuntos pero tamién una puerta zarrada a Alonso por si quixera tornar.

Esti añu en Silverstone van debutar dos ingleses que tán faciendo un perbón trabayu coles ferramientes coles que cuenten. Lando Norris y George Russell. Ye cenciello falar de lo bien que lo ta faciendo Norris con un McLaren qu’esti añu sí que ta rindiendo y dando a los sos pilotos la oportunidá de competir. Russell, ensin embargu, ta peleando col coche más lentu de la parriella, xunto a un compañeru qu’aterrizó nel equipu con una espeutación que ponía tolos güeyos enriba d’él dexando a Russell nun segundu planu del qu’agora ta saliendo. Nun son poques les vegaes qu’esta temporada’l pilotu inglés quedó per delantre del so compañeru mesmo’l sábadu que’l domingu nun coche que nun ta al altor del restu. Cuidamos qu’en Silverstone nun seya mui distinto a lo que vimos hasta agora, pero la motivación estra de correr en casa puede ayudar a que Williams y Russell brillen un pocu más de lo que ye avezao esta temporada.

Tamién cuerre en casa’l llíder del campeonatu, Lewis Hamilton. En teoría, Mercedes tendría na so mano poder facese cola victoria’l domingu anque yá comentemos que l’añu pasáu la teoría nun terminó tornándose práutica. La victoria de Vettel garró col pasu cambiau a Hamilton y a los sos fans y cuidamos qu’esti añu nun van querer repitir. Al llau, Bottas tendrá ente manes la tarea complicada de poner sombra al so compañeru nun intentu por caltener vives les sos opciones al campeonatu.

La parte medio de la tabla sigue bastante apertada, anque con McLaren con daqué distancia col quintu clasificáu. Los de Woking van pasu ente pasu amarrando esi cuartu puestu pol que tanto naguaben n’años pasaos. Les meyores que lleven dende Montmeló tán funcionando-yos a ellos bastante meyor qu’a los sos rivales. Yá falemos abondo de les miseries de varios de los equipos d’esta zona: les de Renault, que nun consiguen tener dos grandes premios siguíos colos sos dos pilotos contentos, les de Haas, que siguen ensin entender qué pasa los domingos con un coche que ye capaz de clasificar quintu los sábados y les de Racing Point que cada vegada ven menos davezu los puntos. Carrera a carrera, les declaraciones y espeutatives d’estos tres equipos son menores o quiciábes más prudentes, pa suavizar les deceiciones de los domingos.

Nel otru llau podemos situar a Alfa Romeo, que tres pasar delles selmanes perdíos fuera de puntos, paez que dieron cola clave nel coche y agora son equipu a tener en cuenta nestos puestos. Ellos y Toro Rosso son dos de los competidores colos que cuntar nesti gran premiu.

Paez que Silverstone tien el futuru aseguráu nel calendariu hasta 2024, con una cláusula que lu protexe d’un prosible GP en llondres.

Equí podéis atopar tola información y horarios sobre’l circuitu y más abaxo les gomes que se van usar en tol fin de selmana:

Nun hai perda. La F1, añu tres añu, repiti’l mesmu patrón: un equipu domina perriba’l restu y paez que’l campeonatu va decidise nes primeres carreres del añu. Los equipos rivales nun son a tar al altor. Les carreres tan entreteníes pero’l momentu clave llega cuando hai una d’elles que ye especialmente aburrida y, dacuando, vien precedida d’una decisión de los comisarios que xenera bien de polémica. El mundu del motor entama dende ehí a criticar la competición, a dicir que nun hai futuru, que la F1 ta morriendo si nun lo fexo yá…y un llargu llistáu de llamentos. Añu tres añu vemos estes premises repitise. Cuando paez que yá nun hai forma d’igualo, ye entonces cuando la maxa de la F1 retorna. Esti añu tocó en Spielberg, pente los montes austriacos y en territoriu Red Bull. La meyor carrera de lo que llevamos de temporada (sí, esto tamién se repiti en dalgún momentu del añu) llegó n’Austria, nel novenu gran premiu del campeonatu 2019.

SÁBADU

Yá’l sábadu nos preparemos pa un gran premiu que nun siguía los patrones de los caberos. Mercedes diben mui fuerte, sí, pero nun taben rindiendo como davezu. Hamilton tuvo dellos alcuentros colos pianos que nun lu dexaron mui contentu y Bottas, nos llibres, tuvo un accidente que lu dexó fuera de la segunda sesión d’entrenamientos. Nun fueron los únicos, tamién Ferrari y sobre too’l Red Bull de Verstappen prebaron dello.

Hai que dicir que Ferrari tampoco nun s’escondió’l fin de selmana, pero la lóxica facía albidrar que diba tar ente los dos pilotos Mercedes el facese cola pole. Nuna sesión de clasificación enllena d’incidentes pero cásique colos mesmos protagonistes nes tres partes, Leclerc consiguió pasar perriba’l restu de pilotos p’algamar la so segunda pole de la temporada. El so compañeru Sebastian Vettel nun pudo facer una vuelta na Q3 siquiera por un problema nel coche, poníase pindia la carrera dende bien ceo pal pilotu alemán. Los dos Mercedes, mui blandos en clasificación, nun pudieron col pilotu monegascu. Hamilton quedó en segundu puestu pero tuvo penalización de tres posiciones por zarrar a Räikkönen na primer sesión de clasificación. Bottas sólo pudo ser cuartu y Verstappen quedó ente medies de dambos.

Per detrás, otra perbona sesión pa McLaren. Sáinz tenía penalización, asina que diba salir últimu de toles formes, pero dambos pilotos amosaron bon rendimientu na clasificación y Lando Norris dexó’l so coche sestu, per detrás de Kevin Magnussen que tamién tenía penalización. Bon sábadu tamién pa los Alfa Romeo. Dambos pilotos entraron ente los diez primeros y clasificaron per delantre del Red Bull de Pierre Gasly, que foi novenu xusto per delantre d’un Vettel que nin salió a facer tiempu.

Más abaxo, Racing Point suma y sigue. Nengún de los dos pilotos pasó a Q2, anque Pérez quedó per delantre de Stroll. Renault tuvieron mui floxos, nun pudieron nin averase a los diez primeros namás qu’hasta’l puestu doce con Hülkenberg. Albon partía con penalización el domingu, polo que la so sesión foi más bien conservadora. Kvyat tinía na so mano pasar a la siguiente tanda pero atopóse con tráficu y una salida de pista torgó la so vuelta.

Con estes blimes, llegó la carrera del domingu.

DOMINGU

En Francia tuvimos una salida a tonu col restu del gran premiu: tranquila y daqué aburrida. N’Austria tamién fuimos en sintonía. Leclerc reaicionó bien y caltuvo la so posición d’iniciu. Verstappen quedó clavau, circunstancia qu’aprovecharon el restu de pilotos. L’holandés, al llegar la primer curva perdiera seis posiciones. El más beneficiau del incidente foi Lando Norris, que llegó a colocase terceru per delantre del Mercedes de Hamilton, pero nun duró muncho y les coses tornaron a la normalidá. Sicasí, nun lo punxo fácil y Hamilton tuvo de pelear la posición. El rendimientu de McLaren esti añu ameyoró tanto que pueden permitise hasta lluchar en pista con Mercedes. De fechu, tamién lu vimos llueu pone-y les coses complicaes a Vettel p’adelantalu y bonos momentos en pista con Kimi Räikkönen que tamién se benefició del problema de Verstappen y peleó con Norris pol tercer puestu hasta que Hamilton los pasó a dambos.

Darréu, los pilotos fueron garrando posiciones y paecía que víemos un pocu l’esquema de lo que diba ser el restu de la carrera: Leclerc a bon ritmu perseguíu por Mercedes, Vettel adelantando y Verstappen intentando iguar el problema de salida. El primer eventu de carrera protagonizólu Kevin Magnussen que recibió penalización por asitiase mal na parriella de salida. El pilotu danés pagólo con un drive through que desfizo la so carrera dafechu. De toles formes, nel momentu de la penalización rodaba fuera de los puntos, asina nun fexo más qu’afondar la llaceria. Grosjean nun diba muncho meyor y les miseries de Haas siguieron repitiéndose n’Austria.

El baille de paraes nun tardó en llegar. Ferrari tomó la decisión de parar a Vettel inmediatamente dempués de Bottas, dambos pilotos entraron al tiempu. De mano la decisión foi perbona, porque tando dambos equipos ún al llau del otru en los pits, la llegada de Vettel torgaba una salida rápida del pilotu finlandés de Mercedes, dalgo que l’alemán podía aprovechar pa recortar la distancia ente ellos en pista. La teoría yera esa, pero sabemos que Ferrari nun suel llevar bien la práutica, y nesti casu amosólo una vegada más. Cuando Vettel llegó a facer la so parada, los mecánicos nun taben preparaos pa ello. Les gomes llegaron tarde col retrasu consiguiente. Bottas, con una parada un poco más llarga de lo que quería, escapó sicasí más rápido de lo que Ferrari planeaben mientres el so pilotu quedaba atrulláu nuna parada eterna por falta de preparación del so equipu.

Hamilton y Leclerc siguieron en pista pero nun tardaron en parar. L’inglés nun taba contentu col coche, anque paecía talo coles gomes, dalgo que tenía a munchos pilotos preocupaos. L’alerón delanteru centró l’atención del equipu demientres la parada y tuvieron de facer un cambiu, pero nun sirvió p’ameyorar el rendimientu del coche, que siguió rodando nos puestos altos pero non al altor de lo que nos tien avezaos. Mientres esto pasaba, Verstappen, diba escalando posiciones y poniéndose cada vegada más cerca de Bottas.

Con unes grades enllenes de naranxa n’honor d’él, el pilotu holandés recuperó rápido del problema de la salida y la so carrera nun dexó d’ameyorar. Rodaba terceru dempués de toles paraes con Bottas mui cerca. El so adelantamientu al pilotu finlandés fexo ruxir a les grades y nun había quien parara al holandés. Pero nun foi cenciello, ello ye qu’enantes del adelantamientu un mesaxe de radio facía aguantar la respiración al sintir al pilotu dicir que taba perdiendo potencia. Sicasí, la suerte acompañó al toru coloráu. El problema quedó iguáu llueu y nun tuvo problema pa pasar al pilotu de Mercedes, xenerando otra fola d’allegría nes grades.

El siguiente yera un Leclerc que nun cometía erru dalu dende la salida y que caltenía un bon ritmu. Dende esti momentu l’oxetivu de Verstappen púnxose en ganar la carrera, daqué impensable nel momentu de la salida dempués de vese octavu adelantáu polos sos rivales. Leclerc foi pasín ente pasu viendo como Verstappen recortaba la distancia cómoda que tinía y nun tardó en llegar el momentu más intensu del gran premiu y que llueu llevaría a dambos pilotos a ver a los comisarios.

Les maniobres de Verstappen fixeron que Leclerc tuviera de salise del trazau pa evitar males mayores ensin sitiu pa salir de la curva. Dambos pilotos llegaron a tocase, anque ensin consecuencies, y lóxicamente Leclerc nun quedó conforme con ello. Anque paecía que nun había nada que parare a Verstappen, el pilotu de Ferrari vendió caru’l llideralgu que tanto trabayara dende que les lluces s’apagaren un ratu primero. Pero la suerte taba del llau de Verstappen nesti intre y nun hebo nada que lu parara. Si la grada ruxera fuerte col adelantamientu a Bottas pol segundu puestu, l’estruendu del adelantamientu a Leclerc fexo tremar los montes austriacos qu’arrodien al circuitu. Con menos de dos vueltes pal final, Verstappen garró’l primer puestu que nun soltó hasta ver la bandera a cuadros delantre d’un Leclerc fondamente enfadáu.

Dambos pilotos tuvieron que dir a ver a los comisarios n’acabando la carrera y dempués d’atender a los medios, pero éstos nun sancionaron l’incidente y Verstappen confirmó asina la so victoria. Nel podiu, el más mózu de la F1, acompañolos Valtteri Bottas, el meyor Mercedes n’Austria. Hai que rescamplar, amás, que ye la primer victoria de Honda dende 2006, cuando venciera n’Hungría con Jenson Button al volante. Trece años y munchos problemes dempués, tornaron a lo cimero del podiu.

Vettel tuvo una carrera más discreta que’l so compañeru y foi quien a acabar per delantre de Hamilton, que foi quintu. Per detrás, Lando Norris n’otra gran carrera del rookie inglés qu’esta vegada pudo rendir al máximu hasta’l final. Sáinz que partía dende atrás acabó octavu nuna fantástica carrera del pilotu madrilanu qu’almitió que les meyores qu’incorporaron nel gran premiu de Catalunya tán dando bonos resultaos. Nel sétimu llugar quedó Pierre Gasly que llegó a ser dobláu pol so compañeru d’equipu. Nos puestos novenu y décimu atopamos a los dos Alfa Romeo, amuesa de que l’equipu despertó del lletargu nel que llevaba somorguiau delles carreres.

A piques d’entrar en puntos atopamos al Racing Point de Sergio Pérez. Lance Stroll, el so compañeru d’equipu terminó décimocuartu, sumando otra carrera deceicionante pa la escudería. Otros que nun pueden tar contentos col resultáu son Renault. Dambos pilotos tuvieron perdíos bona parte de la carrera, ensin dar muncho de sí y acabando nos puestos doce (Ricciardo) y trece (Hülkenberg). Mal momentu p’amosar debilidá col puxu d’Alfa Romeo ya’l bon rendimientu de McLaren que nun para de meter distancia col quintu clasificáu nel mundial de constructores.

Toro Rosso y Haas tampoco nun tienen motivos d’allegría. Pesie al bon resultáu del sábadu, nengún de los pilotos de Haas tuvo siquier oportunidá d’averase a los puntos y nel casu de Toro Rosso, nun vimos muncho d’ellos en pista. Magnussen acabó penúltimu, con Grosjean nel puestu dieciséis mientres qu’Albon foi décimoquintu y Kvyat décimosetimu.

Hai rumores de Kubiça podría nun acabar la temporada con Williams. Nun hai motivu de sorpresa nesa información, si se confirma. N’Austria, Russell volvió a quedar perriba del so compañeru d’equipu, y de fechu tamién del Haas de Magnussen, pero’l pilotu polacu quedó atrapáu nesa última posición otru gran premiu más. Caltienen la regularidá pero’l rendimientu sigui dando pasos alantre muncho más pequeños.

Dexamos atrás los montes austriacos pa ponenos en marcha hacia la campiña inglesa pal Gran Premiu de Gran Bretaña, nel circuitu de Silverstone, en dos selmanes. Ente que llega la fecha, equí vos dexamos tolos númberos d’esti gran premiu n’Austria:

Clasificación

Carrera

Ensin casi dar respiru al gran premiu de Francia yá tamos perdíos pel monte austríacu camín del Red Bull Ring. Llegamos a territoriu Red Bull, ún de los circuitos más pequeños del calendariu y, quiciábes, más pintorescu pol llugar nel que lu atopamos. Nun llevamos acumulaos munchos grandes premios equí pero los suficientes como pa naguar por que llegue esta fecha. Tovía cola resaca del octavu éxitu de Mercedes nesti 2019, damos un pasu alantre pa ver si esti va ser otru suma y sigui de les fleches platiaes, si va despertar el toru coloráu corriendo en casa o si La Scuderia va por fin a poder xubise a lo cimero del podiu.

Mercedes insiste cada gran premiu que, anque paeza lo contrario, les sos victories tán siendo trabayaes y que los sos dos pilotos tienen que bregar demientres toles vueltes con gomes o situaciones varies que torguen el so ritmu y que, anque pasen desapercibíes, condicionen el so rendimientu. De fechu, p’Austria lleguen con tola prudencia del mundu tres de dos grandes premios nos que’l coche de Hamilton, anque victoriosu, sufría dellos problemes hidráulicos o col sistema de combustibles  que punxo al equipu n’aprietos. La so mayestría ta nel fechu de que la xente que vemos la F1 nin siquier nos diéremos cuenta de qu’estes coses taben pasando demientres la carrera. Sicasí, la escudería alemana llega a Austria con precaución y un güeyu puesto na fiabilidá del coche, daqué a lo que tamos poco avezaos con Mercedes.

Ferrari pela so parte, dempués del refugu de la FIA a revisar les nueves pruebes qu’ufrieron pa eliminar la penalización de Canadá y retornar a Vettel la so victoria, son optimistes col futuru. Quiciás nun va dar pa superar a Mercedes, pero sí consideren que les prósimes carreres pueden ser bones pa ellos gracies a los anovamientos que van incorporando.

Pa Red Bull, con sede en Milton Keynes, esta ye la carrera llariega; hasta’l circuitu lleva’l so nome. Sicasí, nun ta siendo una temporada cenciella pal equipu en conxuntu. Onde Verstappen ta destacando y casi faciendo tol trabayu d’atropar puntos, Gasly sigui desinfláu, ensin ver la manera de ser quien a ponese al altor del so compañeru. Yá de mano sabíemos que’l retu diba ser complicáu, enfrentase a Verstappen nel mesmu coche y llevando namás dos años na máxima categoría del motor nun ye fácil pa naide, pero espérase más a estos niveles, y Red Bull nun ye precisamente’l meyor equipu pa tener un rendimientu baxu, pues la facilidá con que disponen de los sos pilotos yá la tenemos vista cuantayá. El pilotu francés precisa meyorar el so rendimientu mui urxentemente a si nun quier tornar pa Toro Rosso a la vuelta les vacaciones de branu.

Renault, McLaren y Alfa Romeo, con matices, fueron los tres meyores equipos de la parte medio de la tabla. L’equipu francés, sicasí, nun ve más que medrar la diferencia con McLaren, que ta cuartu na clasificación de constructores y una bona actuación n’Austria podría camudar eses sensaciones. Pel so llau, los de Woking van querer desquitase un pocu del tastu amargu que dexó’l final de la carrera pa Lando Norris dempués d’amosar un bon rendimientu demientres tol fin de selmana. Si dambos pilotos son quien a clasificar como’l sábadu pasáu en Francia y caltener el ritmu de la carrera pasada, paez que puen dar un guelpe d’autoridá énte’l restu d’equipos. Alfa Romeo tán siendo irregulares pero paez qu’en Francia pudieron dar un pasu alantre colos anovamientos que llevaron. Veremos si n’Austria repiten en puntos.

Toro Rosso lleva un puñáu de carreres desapaecíu y nun ayuden los cambios de pieces, motor y demás procedimientos que son típicos en grandes premios col pasar de les carreres. De toles formes, l’enfotu en dambos pilotos y na fiabilidá del motor Honda ye total polo que pesie a tar un pocu desinflaos nestes selmanes, la nueva oportunidá qu’ufre Austria con motor nuevu y un coche que nun rinde mal, da motivos pa pensar que podemos velos otra vuelta en puntos.

La gran dulda que nos llega cada gran premiu cuando toca escribir la previa ye qué dicir de Haas. Sábese qu’a una vuelta son mui potentes, pero que piérdenlo too en carrera. D’un tiempu a esta parte nin siquier la clasificación ta siendo’l so fuerte y paez que ye too por cuenta les gomes, daqué que yá nel pasáu dió guerra al equipu estauxunidense. La diferencia agora ye saber que tienen un coche mui bonu, que podría tar poniendo n’apuros a McLaren y que, pol contrariu, ta viéndoseles pa poder siquier entrar en puntos. Entavía queda tiempu de reaición pero la frustración ta entamando a facese cada vegada más grande nel equipu.

Con Racing Point pasa un pocu asemeyao. Anque’l so rendimientu ye meyor en carrera, de momentu, les sesiones de clasificación tán siendo bastante probes. Nun dexamos de repitir que Stroll nun ve forma de tener un sábadu que pueda calificar de bonu, anque seya por consiguir entrar en Q2. El so compañeru suel tener más éxitu pero en global l’equipu nun ta teniendo una temporada fácil hasta agora.

Williams sigui pasín a pasu. En munches publicaciones de F1 yá falen de que Russell y Kubiça tán disputando’l so mundial internu, pa ver quien de los dos suma más o queda perriba del otru. La verdá ye que conformase con eso paez probe, pero viendo que l’equipu acaba carreres y que’l rendimientu va ameyorando, quiciábes seya una manera de motivase. Russell pel momentu ta faciendo una temporada bastante curiosa pa ser el so primer añu y tar acompañáu d’un veteranu como ye Kubiça.

Siguimos n’Europa asina que nun camuden los horarios. Na tabla podéis atopar tola información sobre’l circuitu y los horarios pa esti fin de selmana n’Austria:

Y equí podéis atopar la información de les gomes que se van usar nesti gran premiu:

Munches vegaes esperamos (o quiciás naguamos) que circuitos clásicos nos regalen carreres intenses de les que pasen a la historia, ye como si lo mítico tuviera de dir de la mano de lo interesante nesti mundu del motor. Sicasí, nun foi’l casu nesti segundu gran premiu de Francia nun de los circuitos más atractivos del calendariu, el Circuit Paul Ricard: Mercedes amosó otra vegada más, nesta ocasión quiciás ensin muncha sorpresa, que tienen tomada la midida al restu de rivales y Hamilton sigui nel so picu de forma, ensin duldes y sumando victoria tres victoria, camín del sestu títulu na so carrera deportiva.

SÁBADU

Tenemos el vezu de fixanos nos resultaos del domingu, si acasu del sábadu, pa vallorar lo bien o mal que foi un equipu nun gran premiu. Los vienres dicen muncho tamién y si dalgo dixo’l pasáu ye que Mercedes yeren claros dominadores del circuitu. Nun concedieron nenguna sesión, alternando ente dambos pilotos pero ensin dexar siquier a Ferrari averase a ellos. Nun sorprendió por ello ver a Hamilton na pole’l sábadu, anque quiciábes cuntábemos con ver al so compañeru por aquello de caltener la emoción que, col pasu de los díes, ye cada vegada menor na llucha pol campeonatu no cimero.

El restu d’equipos recoyeron lo que Mercedes dexó. Pa Ferrari, mecigayu de sensaciones: Leclerc fexo’l so trabayu y clasificó terceru, daqué esperable de Vettel que namás pudo ser sétimu dempués de dellos problemes na tercer sesión de clasificación. Ensin rendir bien el sábadu, complícase poder siquier poner n’apuru a Mercedes el domingu. Ferrari tien d’entamar, si ye que nun ye tarde yá, a sacar más de los sábados pa que los domingos nun queden fuera del so alcance dende enantes de ver les lluces coloraes.

Verstappen sigui siendo un reló, calificando tolo arriba que lu dexen Mercedes y Ferrari y faciendo tol trabayu en Red Bull. Gasly nun termina d’apaecer, y anque suel tener meyores sábados que domingos, nesta ocasión quedar per detrás d’equipos como McLaren o Alfa Romeo nun puede ser una opción. Nuna escudería que tanta demanda pon nos sos pilotos y con Kvyat rindiendo bastante bien en Toro Rosso, la presión nun dexa de crecer pal pilotu francés.

Renault quedó ente los diez primeros con Ricciardo y tuviera podío tar tamién con Hülkenberg pero un erru na vuelta torgó esa posibilidá. Alfa Romeo nun tuvo una mala sesión de calificación. Giovinazzi ta avezándose a clasificar perriba de Räikkönen y foi novenu nesta ocasión. Haas nun levanta cabeza y Grosjean quedó fuera en Q1 con Magnussen clasificando pocu más arriba nel puestu quince. Stroll, como davezu, quedó fuera tamién na primer sesión.

Y con estes blimes, llegó’l domingu.

DOMINGU

Yá lo dicíemos al empiezu: esti gran premiu de Francia nun foi lo más entretenío que vivimos hasta agora nesta temporada. Foi, en xeneral, una carrera llimpia con pocos adelantamientos y non munchos erros. El coche de seguridá nun salió más que nel so formatu virtual y foi por cuenta un bolardu qu’Albon arrancó del so sitiu y acabó nel mediu de la pista. Ensin incidentes destacaos na salida, el restu de la carrera foi cásique una procesión, tolos pilotos intentando averase a Hamilton ya esti metiendo distancia con ellos. Los tres primeros puestos caltuviéronse y lo interesante, como vien siendo vezu nes últimes selmanes, tuvo per detrás.

Sicasí, hai coses que destacar. Per un llau, McLaren: la salida de Sáinz foi un de los meyores momentos de la carrera y nengún de los dos pilotos diba abandonar los puestos que dan puntos en tola carrera. Norris tuvo problemes col DRS y el sistema hidráulicu y terminó perdiendo posiciones na última vuelta con Ricciardo, Hülkenberg ya’l so compañeru d’equipu, anque recuperó la que perdió con Ricciardo por doble penalización d’esti (por salir del trazáu y tornar de forma peligrosa y por ganar ventaya dempués de volver a dexar el trazáu n’otra maniobra). Sáinz terminó sextu y Norris, novenu. Paga la pena destacar tamién a Renault, que cásique dexa dambos pilotos tamién dientro de los puntos si nun fuere poles penalizaciones de Ricciardo. El pilotu australianu acabó nel puestu once mientres que Hülkenberg foi octavu, sumando otru bon puñáu de puntos pa siguir sumando y a la gueta’l cuartu puestu qu’agora mesmo sigui ocupando McLaren.

Alfa Romeo tuvo una bona sesión de clasificación con Giovinazzi dientro de los diez primeros y Räikkönen a les puertes. En carrera, el finlandés tuvo meyor suerte y consiguió acabar sétimu, con bon ritmu y aprovechando los problemes de Norris pa pasalu na última vuelta. El so compañeru con una carrera bastante más probe, namás pudo ser décimosextu. Zarrando los puntos, Gasly. Como comentábemos del sábadu, el pilotu francés ta nel puntu de mirar ya’l so rendimientu cuestionáu por nun tar al altor de lo que vemos a Verstappen. L’holandés foi cuartu, per delantre de Vettel, mientres que’l francés acabó décimu, gracies a la penalización de Ricciardo. Probe resultáu pa lo que se demanda d’elli dende Red Bull.

Fuera de puntos, amás de Ricciardo nel puestu once, atopamos a los dos Racing Point. Pérez foi penalizáu nos primeros momentos de carrera por abandonar el trazáu y ganar ventaya con ello pesie a que’l pilotu reclamaba tener fecho lo que les regles manden. Seya como fuere, nengún de los dos pilotos tuvo un bon gran premiu y’l fechu de que nun puntúen ye bona prueba d’ello. Pérez acabó nel puestu doce y Stroll, dempués de l’alegría de Canadá, nel trece. Per detrás, atopamos a los dos pilotos de Toro Rosso. Kvyat partía más retrasáu por cuenta la so penalización por camudar pieces del motor y, nun circuitu nel qu’adelantar ye complicao, eso ye una bona torga. Dambos pilotos tuvieron carreres discretes y, anque nun puntuaron, siguin dexando ver un bon rendimientu que pon en peligru’l puestu de Gasly en Red Bull. Kvyat acabó nel puestu catorce y Albon, xusto per detrás nel quince.

De Giovinazzi yá comentemos que nun tuvo una carrera brillante pesie a tener un bon sábadu. Acabó nel puestu dieciséis mui per detrás del so compañeru d’equipu. Pero la deceición más grande del fin de selmana vien de Haas. Grosjean nun pudo terminar el gran premiu y’l pilotu francés yá calificara’l so vienres como’l pior de la so vida na F1. Pa rematalo, el domingu nun vio la bandera a cuadros. A Magnussen nun-y foi muncho meyor y anque tuvo momentos nel fin de selmana nos qu’entró en zona de puntos, la realidá del domingu y la so pelea por facer funcionar unes gomes que namás rinden a una vuelta, dexólu nel puestu dieciesiete, mui lloñe de les aspiraciones del equipu estauxunidense.

Nengún fin de selmana ye cenciellu pa Williams, pero esti nun lo foi especialmente. El vienres Latifi, actual llíder de la F2, tuvo a los mandos del monoplaza en llugar de Russell que nes siguientes sesiones tuvo problemes col motor. El rendimientu de dambos coches nun ameyoró entá como pa ponese al nivel del restu pero la so regularidá caltiénse. Lo que pa otros equipos sedríen meyores mínimes, pal de Gove tán siendo pasos de xigante hacia la suañada vuelta a ser competitivos. De momentu, zarren la clasificación con Kubiça per delantre de Russell.

Ensin muncho descansu, ponemos rumbu a Austria, al circuitu de Spielberg, el Red Bull Ring, territoriu de los toros coloraos. Ente que pasen estos pocos díes ente carrera y carrera, equí vos dexamos los númberos del gran premiu de Francia 2019:

Clasificación

Carrera