Author: Asturies F1

Y asina foi como la temporada 2019 llegó al so términu. Nun foi con una carrera especialmente intensa pero sí con cosines interesantes que pasamos a analizar dende’l sábadu.

SÁBADU

Ferrari tornaron a ser protagonistes negativos nuna xornada de sábadu. Nel trescursu de la última parte de la clasificación, un mal cálculu del tiempu restante pa facer vuelta fexo que Vettel pasare mui xustu, ensin tiempu de sobra pa facer una vuelta curiosa y que’l so compañeru nin siquier llegara a tiempu. Nengún de los dos pudo poner n’apuros a Lewis Hamilton, que consiguió la pole. Bottas amosó tamién un bon rendimientu pero siempre cola solombra de saber que’l domingu tinía penalización y diba partir dende l’últimu llugar.

Destacamos el puestu de Lando Norris, el meyor del restu, n’otra perbona actuación del británicu que vien un pocu de la mano del bon rendimientu del equipu, con Sáinz tamién dientro de los diez primeros y la oportunidá de ser sextu nel campeonatu.

DOMINGU

Cuando se cuerre n’Abu Dhabi y col campeonatu decidíu pueden pasar dos coses: tener un carrerón que nun nos dexe despeganos de la pantalla (o del asientu si tamos viviéndolu en direutu) o pol contrariu tener cincuenta y cinco vueltes d’aburrimientu absolutu. La suerte tuvo del nuestru llau nesta ocasión y atopemos un términu mediu, con delles batalles intenses en pista, entreteníes sobre manera, anque con un Lewis Hamilton al que naide pudo averase dende que les lluces coloraes s’apagaron faciéndose amás cola vuelta rápida.

Y ye que’l británicu nun cedió nin un segundu al restu, de forma que remató la carrera con una ventaya de casi dieciocho segundos sobre Verstappen, que llogró terminar segundu. El tercer puestu foi pa Leclerc, pesie a tar suxetu a investigación polos comisarios por irregularidaes col combustible. Leclerc pudo incluso ser segundu, posición na que rodó bona parte de la carrera, pero’l pilotu holandés de Red Bull acabó imponiéndose.

Vettel nun tuvo una mala carrera, y bona parte d’ella tuvo cuartu, pero nun se puede falar d’un gran premiu al altor del restu, cásique más d’un intentu de rematar la temporada de la forma más decente posible. Los momentos más interesantes tuvímoslos, como davezu nes últimes carreres, nos puestos medios de la tabla. Norris, Sáinz, Pérez y los dos Renault fueron protagonistes demientres gran parte de la carrera de les batalles más intenses. Norris terminó siendo octavu depués d’alredor de diez vueltes peleando con Pérez, que lu adelantó na última vuelta. Sáinz entró en puntos tamién nesa vuelta cincuenta y cinco, dexando a dambos Renault fuera y amarrando la sexta posición del campeonatu. La suerte yá lu acompañara nos primeros momentos del gran premiu cuando Gasly salió perxudicáu d’un incidente colos dos Racing Point que lu obligó a parar y cambiar el morru del coche. La so carrera quedó dende esi momentu sentenciada.

Albon corría sabiendo que podía tamién conseguir ser sextu nel campeonatu de pilotos, pero nun-y valió el so quintu puestu depués de que Sáinz entrara en puntos. Cuarto foi Bottas, nuna perbona actuación saliendo últimu. Un bon remate pal finlandés tres una temporada positiva pa él pero entá insuficiente.

Kvyat tamién pudo puntuar, un discretu novenu puestu que val pa poner el broche a una bona temporada de vuelta na F1. Los dos pilotos Renault, fuera de puntos na última vuelta, rematen un añu nel que s’esperaba más d’ellos y sobre manera del coche. Nico Hülkenberg diz adiós a la F1 (de momentu) con un sabor amargu pero col consuelu de ser nomáu meyor pilotu del gran premiu. Alfa Romeo y Haas tampoco nun entraron nos puntos y zarren una temporada qu’entamó meyor de lo que remató, sobre manera nel casu de los estaoxunidenses.

Mientres tastiamos lo que dio de sí esti gran premiu y nos ponemos en marcha pa dir preparando lo que va ser la temporada 2020, vos dexamos tolos númberos d’esti fin de selmana y vos encamentamos que teais sollertes a esti blogue nel que diremos rematando la temporada 2019, repasando lo que nos espera en 2020 y faciendo por qu’estos ciento y picu díes que falten hasta que llegue Australia seyan más fáciles de pasar:

Clasificación

Carrera

Cuando empecipia una temporada nueva de F1 siempre nos abulta llarga, munchos meses de país a país, d’horariu n’horariu y coles ganes de ver quien va coronase campeón. En llegando esta época del añu, los meses de la seronda, yá col mundial resueltu, vivimos carreres qu’a lo meyor paecen sobrar pero qu’aporten esi puntín que nos dexa bon sabor hasta que los coches se pongan otra vegada en pista pa los test d’iviernu. Abu Dhabi poques veces foi escenariu de campeonatu. Sicasí, la última vegada foi cuando Nico Rosberg cumplió’l so suañu de ser campeón, derrotando a Lewis Hamilton, dalgo que mui pocos pueden dicir.

Nesti 2019 que ta a piques de rematar, llegamos al circuitu de Yas Marina colos deberes fechos pero coles mesmes ganes de ver un bon espectáculu en pista. Brasil amosó hai un par de selmanes que tal cosa ye posible, agora ye turnu pal desiertu. El lluxu y la ostentación de los Emiratos yá nun sorprende a naide. El propiu circuitu en sí, la so ubicación ye un cantu eso. Les semeyes que dexa, col tapecer y los coches embaxo les lluces artificiales ayuda un pocu a esa postal sacada de Las mil y una noches que paez que tien pocu que ver cola teunoloxía y la modernidá de la F1. Pero de dalguna manera, ye un eventu qu’engancha a munches persones anque nun ufra carreres mui intenses.

De les noticies qu’abren el fin de selmana nel ermu tenemos un par bien interesantes. Williams confirmó al so pilotu reserva Nicolas Latifi como sustitutu de Robert Kubiça pa la temporada viniente. Latifi compite agora mesmo na F2 onde ta segundu. El canadiense va acompañar a George Russell na so segunda temporada col equipu inglés. Nel nuestru post sobre la Silly Season 2019 podéis atopar tola información actualizada del mercáu de pilotos, agora que paez que yá ta zarrau dafechu.

Per otru llau, tamién tuvimos confirmación per parte d’Honda y Red Bull de que la so rellación va continuar más allá de 2020 a lo menos hasta 2021. Nun ye dalgo esclusivo de Red Bull, lóxicamente, si non que Toro Rosso tamién va siguir col xigante xaponés. Viendo los bonos resultaos d’esta temporada y el rendimientu que dambes escuderíes tán amosando, paeznos una decisión lóxica y que beneficia a dambos.

Por centranos un pocu no que ye la carrera, poques coses yá nos queden pa tar pendientes. Con too decidío perriba, casi lo más interesante ye ver lo que faen los pilotos de Ferrari y cómo xestiona l’equipu la carrera depués del incidente de Brasil. Con pocu marxe de tiempu yá pa iguar les males sensaciones que tal eventu dexa nel equipu y nos sos dos principales protagonistes, la Scuderia ta más que necesitada d’un bon remate de temporada pa enfocar l’iviernu con más optimismu.

Tamién va ser Abu Dhabi escenariu de la que, de momentu, va ser la última carrera de Nico Hülkenberg na F1. El pilotu alemán quedó ensin asientu depués de les últimes confirmaciones y paez que’l so futuru nel motor de lloñe de la máxima competición. Falábase de que diría pa Indy, y nun descartamos que se tire a competir en resistencia, sobre manera sabiendo que nun se-y da nada mal (foi campeón en Le Mans hai unos años). En Renault nun dexaron d’alabar el llabor del pilotu alemán demientres el tiempu que tuvo con ellos, dalgo que paez que nun valió pa muncho viendo que nun ye l’escoyíu pa 2020. Ello ye que taremos sollertes a la so última carrera, esperando que seya una bona despidida.

Como adelantábemos, poques coses queden yá por decidise, lo que quiciás ye dalgo bono pa que los pilotos cuerran pensando namás n’esfrutar y non en posiciones nel campeonatu. Sí ye verdá qu’hai diez puntos ente Alfa Romeo y Racing Point, pero nun nos paez que esa distancia vaiga amenorgar tanto como pa qu’Alfa pase al equipu canadiense nesta última carrera. Lo mesmo podemos dicir de Toro Rosso y Renault. Hai ocho puntos ente ellos y anque nun ye una distancia mui abultada y ye verdá que Gasly namás hai dos selmanes foi segundu, tien pinta de que nun va movese muncho la clasificación.

No que cinca a pilotos, les distancies ente Verstappen y Leclerc y ésti col so compañeru d’equipu nun son mui grandes pero sí lo suficiente como pa creyer que tamién nesi aspeutu ta too decidío. Queda por ver quién ocupa’l sextu llugar, onde tenemos a Gasly y Sáinz empataos a puntos y con Albon a once de dambos. Tamié les posiciones de Stroll y Magnussen podríen camudar si’l pilotu danés saca dos puntos al canadiense. Ye verdá que pela parte más baxo, onde les coses tán un pocu más apretaes entavía pudiera haber cambios, dalgo a lo que taremos sollertes.

Llegamos pues a la última cita del añu. Tornamos al ermu, a les lluces artificiales y a los tapeceres de cuentu pa rematar esti 2019. Embaxo vos dexamos tola información que precisáis pa nun perder nengún detalle:

Y estes son les últimes gomes de Pirelli pa esta temporada:

¿Quién diz que nun podemos tener carreres emocionantes en decidiéndose’l campeón del mundu na F1? Si dalguien duldaba de que fuera posible paeznos que quedaría conforme depués de lo que vimos el domingu nel circuitu d’Interlagos, una de les cites mítiques del calendariu. Averándonse yá la final de la temporada, con una sensación de cierta satisfaición en xeneral pol espectáculu que fuimos viendo, la carrera en Brasil sumó otru broche.

Dende’l sábadu, con Max Verstappen na pole, yá nos quedó claro que nun diba ser una carrera aburrida. Mercedes nun pudo allegase a esi primer puestu y Ferrari, con Leclerc penalizáu, diba cola intención de facer tolo posible por vencer pero sabiendo que la so batalla nun yera’l sábadu. Nun hebo grandes sorpreses nes sesiones de clasificación, quiciás los Haas, en bones posiciones, pero pocu más.

El domingu, tres una salida relativamente llimpia y au Hamilton rápido se puso a la gueta de Verstappen, pasemos unes primeres vueltes bastante tranquiles. De fechu, podríemos dicir que fue una carrera bien tranquila en gran parte, centrada tola atención en ver si Hamilton yera quien a pelear pola victoria con Verstappen, con Ferrari bastante alloñaos d’esa llucha.

Allegándose yá la última parte de la competición foi precisamente Bottas quien abriría la veda pa la llocura que fue les últimes vueltes: el so coche dixo “hasta equí” y provocó un coche de seguridá que rompió toles estratexes y esquemes hasta esi momentu y foi un balón d’osíxenu pa Hamilton que taba peliándose coles gomes. Hubo convidaos nos puestos cimeros colos que naide nun cuntaba. De fechu, Hamilton quedó fuera del podiu precisamente por cuenta d’ún dellos. Un choque con Albon cuando dambos peliaben por posición depués de la llocura de paraes, dexolos a dambos fuera del podiu: a Albon pol choque y a Hamilton pola penalización posterior al ser quien lu provocó.

Verstappen ganó’l domingu, pero quiciás quienes más ganaron foron Pierre Gasly, que cola carambola de les últimes vueltes atopóse segundu y capaz de defender esa posición hasta’l final, y McLaren que terminó cuartu con Carlos Sáinz pero gracies a la penalización de Hamilton, subió al podiu. Cuantayá que nun víemos a un pilotu de McLaren nel podiu.

Los grandes perdedores del domingu, aparte de Mercedes, fueron los dos pilotos de Ferrari. Otra vegada s’encontraron en pista y otra vegada hebo problemes. Una maniobra fuera de sitiu de Vettel cuando taben lluchando por posición acabó con dambos fuera de carrera. Suma y sigui’l desastre en Ferrari. Por suerte, namás queda una carrera d’esti 2019 y yá pueden respirar y centrase nel añu que vien.

La F1 prepárase pa la so última carrera n’Abu Dhabi pa zarrar un campeonatu que, anque nun sorprendió colos sos ganadores, sí que dexó bones sensaciones. Mientres que llega la última cita de la temporada, equí tenéis los númberos de la carrera en Brasil:

Namás queden dos. Paez mentira pero yá agotemos casi tola temporada y plantámonos en Brasil, nel circuitu José Carlos Pace, pa la penúltima carrera d’esti 2019. La selmana empecipió con delles novedaes, como la confirmación de Red Bull y Toro Rosso de que nun va haber cambios nos sos pilotos pa 2020. Sigui Albon con Verstappen en Red Bull, y Kvyat con Gasly en Toro Rosso. D’un tiempu a esta parte observamos cierta necesidá d’estabilidá no que cinca a les alliniaciones de pilotos nel equipu del toru coloráu, alloñándose un pocu de la pulsión de camudar los sos escoyíos casi d’añu n’añu. O quiciás ye que les sos opciones son cada vegada más pequeñes. Seya como seya, l’añu que vien Red Bull y Toro Rosso opten por repitir pa 2020 (podéis siguir la información sobre la silly season nel nuestru post).

Brasil yera la carrera que zarraba’l campeonatu y escenariu de proclamación de campeones. Col cambiu nel orde de les carreres y la dominación de Hamilton nos años pasaos, el so atractivu queda no mítico del trazáu, el puxu de la xente dende la grada y lo qu’entá pueda camudar pela parte medio de la tabla. Ello ye qu’entavía hai cosines pendientes de resolvese. El campeonatu puede tar decidíu no cimero, pero los tres pilotos que siguen a Hamilton y Bottas tovía nun tienen seguru’l so puestu. Leclerc ye agora mesmo terceru, pero tien detrás a poca distancia a Verstappen y Vettel, dambos separtaos ente ellos namás por cinco puntos. Conociendo a estos tres, de xuru que les dos carreres vinientes van ser pa ellos como finales. Si amás cuntamos con que Leclerc carga con penalización de diez posiciones nesta carrera, nun paez que precisemos más ingredientes.

Tamién ta interesante la disputa ente McLaren y Red Bull-Toro Rosso pol sextu puestu nel mundial de pilotos. Albon ta perriba de Sáinz y Gasly, pero estos dos tán bastante cerca y a tiru de poder facese con esi puestu. McLaren como equipu tien aseguráo ser cuartos nel mundial de constructores, anque tenemos ganes de ver qué faen en Brasil, sobre manera pensando en que puede llover. Sáinz suma delles carreres mereciendo dalgo más qu’un cuartu o un quintu, y sedría interesante velu competir siquier por un puestu nel podiu.

Renault tamién paez tener nes sos manes el quintu puestu del mundial de constructores, pero nun ta decidíu entá’l sextu. Racing Point foi recuperándo a lo llargo de la temporada, sobre manera depués del parón braniegu, tres entamar col pie cambiau y milenta problemes. Agora tán namás un puntu perriba de Toro Rosso. Otra batalla importante pa la que tar sollertes en Brasil. Lo mesmo podemos dicir de la competencia ente Alfa y Haas, un pocu más abaxo, pero igual d’interesante si pensamos que dambos equipos lleguen nel mesmu puntu, anque Alfa con una ventaya de siete puntos. Por cierto, Alfa confirmó qu’Antonio Giovinazzi va siguir otru añu más con ellos.

Anque paeza mentira, la llucha pola pole tamién ye importante equí. Lloñe yá de valer pa dar ventaya nel campeonatu, sí que ta en disputa’l pilotu con más poles na temporada. Y non, Hamilton nun ye ún de los candidatos. Esti añu son Bottas y Leclerc los que más atropen. El de Ferrari tien dos más que’l finlandés, que precisa les dos poles que queden pa ponese al altor de Leclerc. Tamién les vueltes rápides tán en competencia. Hamilton ye llíder nesti casu, per delantre de Leclerc con una menos, anque nun podemos descartar a Verstappen, que tien dos menos.

Decidío too en Brasil paez que lo que pega ye esfrutar l’ambiente y les cosines qu’entá queden por ver. Quiciás nun ye lo que tol mundu espera, ta claro que la emoción de ganar un campeonatu nun puede comparase cola de ganar el sextu puestu, pero cada batalla ye interesante na midida que va dando forma a lo que va ser el remate final d’esti 2019. Entavía nun ta too dicho.

Equí vos dexamos tola información del circuitu y los horarios. Sigui l’horariu de tarde:

Y estes son les gomes que vamos ver demientres el fin de selmana: