Author: Asturies F1

Nesti post vais atopar la información actualizada de la temporada 2020 que cómo sabéis ta viéndose afeutada pol andanciu de coronavirus.

19 de marzu: Hasta esti momentu, confírmase que la F1 nun va entamar polo menos hasta xunu y que los cambios de regles que diben entrar en 2021 muévense pa 2022. El gran premiu d’Australia foi canceláu, mesmo que Mónaco, y Barcelona y Zandvoort tán aplazaos, xuniéndose asina a los yá movíos Baḥréin, China y Vietnam.

23 de marzu: Confírmase l’aplazamientu del gran premiu d’Azerbaixán, moviendo la fecha d’entamu de la temporada, de producise, a mediaos de xunu y dexando a Canadá como la primer carrera. McLaren, pela so parte, confirma que’l so plan de montar motores Mercedes pal 2021 sigui alantre pesie a les circunstancies de la temporada.

7 d’abril: Confírmase l’aplazamientu del gran premiu de Canadá que diba cellebrase’l fin de selmana del 12 al 14 de xunu. Treslládase asina’l puntu d’entamu d’esta temporada nel gran premiu de Francia, del 26 al 28 de xunu.

Al mesmu tiempu, allargase’l períodu de parón de los equipos demientres el que nun pueden trabayar nos sos coches. Esti parón suel tener llugar nel branu, pero colos acontecimientos d’anguaño, los equipos y la F1 tán decidiendo dir allargando en función de como avancen les selmanes.

27 d’abril: Confírmase l’aplazamientu (anque suena a cancelación) del Gran Premiu de Francia, que diba cellebrase del 26 al 28 de xunu. La organización del eventu fala de que yá tán trabayando na carrera de 2021, lo que fai albidrar que nun cunten con correr nesti 2020.

La F1 pon agora l’entamu de temporada nel gran premiu d’Austria, del 3 al 5 de xunetu. En Silverstone, carrera que se cellebra depués d’Austria, correríase ensin públicu. La organización quier correr n’Europa nos meses de xunetu, agostu y setiembre, dexando ochobre y payares pa Eurasia, Asia y Estaos Xuníos y México, y los dos grandes premios de Baḥréin y Abu Dhabi p’avientu. La intención ye correr ente 15 y 18 carreres no que quede de 2020.

12 de mayu: Faise oficial que’l pilotu de Ferrari Sebastian Vettel nun va siguir nel equipu italianu en 2021. Pel momentu nun se sabe quién lu va sustituyir y au va compitir l’añu viniente’l pilotu alemán.

14 de mayu: Depués de la noticia de la marcha de Vettel de Ferrari, confírmase que va sustituyilu Carlos Sáinz, que dexa McLaren. L’asientu del pilotu madrilanu va ocupalu en 2021 l’australianu Daniel Ricciardo.

2 de xunu: Conocemos les primeres ocho feches nes que se van cellebrar carreres. Podéis atopar más información nesti enllaz.

12 de xunu: Confírmase que les carreres n’Azerbaixán, Xapón y Singapur nun se van cellebrar nesti 2020.

8 de xunetu: Renault confirma que Fernando Alonso va competir en 2021 con ellos al llau d’Esteban Ocon, ocupando’l güecu que va dexar Daniel Ricciardo al movese pa McLaren.

Anque quiciás yera dalgo que se prevía, la verdá ye que cuando asoleyamos el nuestru post anterior nun cuntábemos que lo siguiente que díbemos escribir sedría non una crónica d’una carrera sinon un post de reflexón y analís. De xuru que yá tais al tanto de que, como toles otres competiciones deportives a nivel mundial, la F1 ta suspendida. Ente rumores y feches, bones intenciones y munches duldes, tovía nun tenemos claro cuando va entamar esti 2020 na máxima categoría del motor.

El gran premiu d’Australia nun llegó a cellebrase. Depués de que varios miembros de los equipos tuvieren que pasar a tar en cuarentena por sospeches de que podíen tar afeutaos, confirmóse qu’ún de los trabayadores de McLaren taba contaxáu, lo que provocó que l’equipu decidiera nun competir nel eventu. Tres hores d’alderique, de votar si’l gran premiu siguía o non, de valorar la importancia de la carrera frente a los compromisos colos patrocinadores, el vienres 13 de marzu quedó cancelada. Anuncióse un par d’hores primero de que’l circuitu de Melbourne abriera les sos puertes a los milenta fans que taben esperando pa entrar yá y que nun tiníen mui claro si taben esperando pa nada o si de verdá diben poder entrar.

Nun vamos a entrar a valorar la xestión de tou esti procesu yá que naide nun taba preparao pa lo que ta suponiendo esta situación a nivel mundial y porque creyemos que caún puede facese una idea y formase una opinión propia lleendo ya informándose de los pasos daos polos diferentes protagonistes dientro de la competición. Podemos comentar, sicasí, que pa nosotros foi una decisión acertada.

Agora toca esperar. Les previsiones falaben de que Zandvoort diba ser el primer gran premiu d’esti 2020. Ensin embargu, un comunicáu de la F1 asoleyau esti xueves confirmó que tanto Zandvoort como Barcelona y Mónaco nun van cellebrase nes sos feches previstes, ello ye nel mes de mayu. Tamién se fala d’un parón nes evoluciones de coches. Amás, la implantación de les nueves regles muévese pa 2022. Ye posible que lleguemos a branu ensin tener tovía un escenariu claru de lo que va pasar cola temporada.

Demientres les coses tornen a la normalidá, tentaremos de dir ufriéndovos la información que vaigamos recibiendo con actualizaciones selmanales pa dir esclariando un pocu’l panorama. En principiu, repetimos, la F1 nun entamaría la temporada hasta xunu a lo menos.

L’añu pasáu yá ficimos un “De lo meyor…” pa ensalzar lo que nos paeció lo meyor de la temporada. Nesti 2019 que yá muerre, repitimos y equí vos dexamos lo que p’Asturies F1 foi lo más destacable d’estos meses de competición.

MEYOR PILOTU: D’un tiempu a esta parte paez difícil (o inxusto) nun escoyer a Lewis Hamilton como’l meyor pilotu de la temporada. Ser campeón del mundu otra vegada debiera ser xustificación suficiente pa ser el meyor pilotu de la temporada y por tanto quedámonos col inglés. Sicasí, queremos rescamplar el llabor de Charles Leclerc nel so primer añu en Ferrari. El pilotu monegascu foi quien a sacar del so sitiu a Vettel, poniéndolu al llímite y faciendo que tol mundu se cuestionara si l’alemán sigui tando al altor de la competición. Tamién hai que sorrayar lo fecho esta temporada polos rookies. Los tres dientro de les posibilidaes que tuvieron demientres esti añu amosaron que nun tán ehí por nada.

MEYOR EQUIPU: Una vegada más, Mercedes. En conxuntu como equipu son imbatibles. Los plantegamientos que faen de les carreres, que llueu presten más o menos a los sos fans, dexen claro qu’entiende de qué manera hai que lleeles y plantegar les estratexes, dalgo que nun pueden decir otros equipos como Ferrari, qu’esti añu otra vuelta foi protagonista negativu poles sos decisiones.

Nun podemos, sicasí, escaecer a McLaren. L’añu pasáu nun lo ficieron mal pero taben lloñe de suañar colos cuartos puestos y podios qu’algamaron esti añu. Ye verdá qu’entá-yos queda muncho que rodar pa rivalizar colos tres primeros equipos, pero les blimes yá tán ehí ya’l pasáu negativu con Honda yá ta (casi) escaecíu.

MEYOR COCHE: Como yá pasara en 2018, paeznos que Ferrari cuntaba col meyor coche de la parriella pero diverses circunstancies ficieron que nun valiera pa facese col campeonatu. Nos test de pretemporada yera casi imposible nun creyer que diben ganar el mundial, pero la lóxica suel imponese y los errores ya indecisiones nun perdonen.

MEYOR CARRERA: Nesti casu tenemos dos opciones: per un llau Austria, porque foi’l cambiu de torna dende una carrera aburrida como foi Francia a una carrera intensa como foi ésta. Quiciás podemos marcala como’l puntu de partida d’una parte de la temporada muncho más prestosa. Per otru llau Alemaña foi la sorpresa del calendariu puesto que nun solía dexar carreres particularmente interesantes pero la d’esti 2019 foi pa enmarcar.

MEYOR MOMENTU: La victoria de Leclerc llévase esti honor. Los tifosi llevaben cuantayá naguando por ver otra vegada a un pilotu del so equipu no cimero del podiu y Charles Leclerc encargose de facer el suañu realidá. La esplosión de color y ruíu que ye la ceremonia del podiu de normal nel circuitu de Monza triplicose nesti 2019.

MEYOR EVENTU: En rellación colo anterior, tuvimos una carrera bona en Monza y l’ambiente creau en torno a les carreres n’Italia fai qu’esti añu nos mereza el premiu a meyor eventu. Yá dicimos, non sólo polo visto en pista si non tamién pol ambiente, pola atmósfera que crean los tifosi ya’l restu de fans qu’acuden a esti eventu. Otros años ta compitío con Silverstone, qu’esti añu tampoco nun lo fizo mal, pero pa esti 2019 Monza sobresalió.

Equí ponemos el puntu final a esti 2019 d’emociones, aburrimientos y munches esperances puestes nos años futuros pa ver un cambiu real na competición. 2020 va ser un añu de transición polo que taremos sollertes a los pasos que se dean tanto dientro como fuera de la pista. Naguamos por ver munchu espectáculu dende la primer carrera n’Australia y hasta la última allá n’avientu.

La temporada 2019 dio pa bastantes cosines qu’analizar y equí llegamos cola segunda parte de too ello. Na primer parte repasemos l’actuación de los cinco primeros clasificaos y toca agora echar un güeyu a los cinco últimos equipos.

Como yá dicíemos, Renault consiguió ser quintu na clasificación de constructores pero nun lo tuvo fácil. De fechu, Toro Rosso peleó hasta’l final pa poder facese con esi quintu puestu. La primer parte de la temporada con Kvyat y Albon, la escudería hermana de Red Bull rindió bastante bien: el rusu tornó con otra actitú y muncha más seguridá en pista y Albon debutaba dexando bones actuaciones. El cambiu d’Albon por Gasly na segunda parte, lloñe de desestabilizar al equipu, foi un extra pues el francés nun s’arrugó y tuvo meyores carreres que con Red Bull. Sicasí, esi arreón d’última hora nun foi suficiente p’adelantar a Renault na clasificación.

Racing Point tuvo un iniciu de temporada mui probe. Entamar asina una temporada pa un equipu de la parte medio de la tabla pon les coses mui complicaes pal restu del añu. Ye verdá que Racing Point suel medrar muncho col pasu de les selmanes y sacar el másimu rendimientu a les meyores que van llegando, pero esti añu foron insuficientes ya’l so efeutu menor en comparanza col restu de rivales. De toles maneres, ser sétimos na clasificación nun ta mal si cuntamos con tolos aspeutos negativos que tuvieron de dir enfrentando. Cola situación más estable agora que nel pasáu, cuidamos que pa 2020 puedan iguar tolos problemes d’esti añu y tener asina un iniciu de temporada más curiosu.

Alfa Romeo tuvieron l’efeutu contrariu. El so iniciu de temporada foi mui positivu, sumando puntos casi regularmente y con Kimi Räikkönen en puestos altos de la clasificación. Giovinazzi tardó n’arrancar, pero tuvo actuaciones decentes. Ensin embargu, el parón de branu supunxo un baxón de forma del equipu, que poques vegaes tuvo en puntos nesa segunda parte de la temporada. Ello desplica que se fundieran na clasificación y quedaran sólo por delantre de Haas (con milenta y ún problemes en tolos grandes premios) y Williams.

Falando de Haas podemos describir la so temporada como una incertidume continuo. La confusión de nun ser quien a entender el coche nin les gomes foi la tónica de tola temporada y por ello los tenemos penúltimos esti añu. Foron capaces d’actuaciones brillantes el sábadu, nes sesiones de clasificación, pero los domingos (salvo esceiciones) desapaecíen nos puestos baxos. La situación foi tan dramática como pa que llegara un puntu nel que l’equipu tuviera d’optar por reaniciar tol procesu y ponese a trabayar col coche de la primer carrera y entamar tol trabayu dende cero. En temporaes pasaes vímoslos rindiendo a un bon nivel que precisen recuperar, depués de superar toles torgues, pa 2020.

Y zarramos esti repasu a 2019 con Williams. Lleven dos años nel fondu de la tabla ensin munches esperances de recuperación. Esti añu, anque malu en términos de clasificación, el rendimientu nun foi malu y podemos falar de regularidá. La velocidá nun ta pero sí la fiabilidá, dalgo tamién importante pa los equipos. Los abandonos fueron pocos, y cásique se concentraron nes últimes carreres de la temporada, lo cual ye dalgo importante pensando nel desarrollu futuru de los monoplaces. El puntu consiguíu ye muestra de lo insuficiente de la temporada pero nun son too coses negatives. George Russell tuvo un debú bien positivu, casi siempre per delantre del so compañeru, más veteranu, Robert Kubiça. El retornu del polacu a la F1 depués de dellos años fuera y del so accidente nun foi tan bona como cuidábemos que sedría. Anque seguirá venceyáu al deporte, nun va siguir como primer pilotu de Williams pero naide nos quita’l prestu de tornar a velu al volante depués de tantu tiempu.

Esti resume intenta poner un pocu en perspeitiva tolo que foi esti 2019 nunes cuantes ringleres. Foi un añu bastante densu de coses, colos güeyos eternamente puestos nos cambios pa 2021, con un baille de pilotos más tranquilu de lo que tamos avezaos y en xeneral cola intensidá propio de una temporada de F1.

Pal añu que vien, la F1 estiende’l so calendariu otra vegada, y lo que puede suponer una allegría pa la xente que siguimos toos y caún de los eventos, nun lo ye tanto pa los equipos. Hai que rescamplar los esfuercios de tol personal envueltu na competición pa enfrentar la demanda creciente de más carreres. Nel 2020 vamos tener dos circuitos nuevos, Zandvoort y Hanoi y perdemos el gran premiu alemán. Sumamos un total de 22 carreres que van poner, otra vuelta, a los equipos nel llímite de les sos posibilidaes.

Enantes de rematar dafechu esti 2019, tornaremos con un post atropando lo meyor y lo pior del añu na másima competición de motor.

Yá pasaron delles selmanes dende l’últimu gran premiu d’esti 2019 y, a piques de zarrar l’añu, paeznos que toca facer un pocu de resume sobre cómo lu vivimos, les coses que nos prestaron, les que non y les qu’echemos en falta.

Quiciabes la primer parte del añu foi la que más emociones variaes nos traxo. Carreres prestoses pero non hasta’l puntu de ser de les que queden na memoria pa años y años xunto a otres mui mui aburríes. Ye probable que Francia fuera’l puntu altu d’esti sintir, cuando entamaron les voces crítiques cuestionando l’interés de la competición. Y entós sí, entós vinieron les bones carreres, de les que nun dexen despegase del asientu o llevantase cada pocu por cuenta la emoción. Y asina una tres otra, con dalgún descansu, pero práuticamente hasta’l final del añu. Y yá nun hubo más voces crítiques, salvo dalguna qu’otra nes carreres menos interesantes.

Dende hai dellos años, Mercedes tien tomada la midida al restu d’equipos. Anque nesti 2019 partíemos con un Ferrari supuestamente superior a les fleches platiaes, la Scuderia nun foi quien a aprovechar esa superioridá que foi evidente en delles carreres pero que quedó na solombra por cuenta los numberosos errores de pilotos y equipu. La llegada de Leclerc desestabilizó mentalmente a un Vettel avezau a ser el primer pilotu. Anque yá nel pasáu lu vimos sufrir con pilotos como Ricciardo, la realidá ye que Leclerc foi quien a sacalu de la comodidá del tenelo too fecho, dexando n’evidencia la necesidá que tien l’alemán de reconeutar col pilotu que yera nel pasáu. Toes estes debilidaes aprovechóles Mercedes como lleva faciendo nel pasáu. Entamó la temporada con victoria tres victoria, sumando los dos pilotos victories mientres el restu de la parriella facía por entender cómo lo taben faciendo si nun tiníen el meyor coche.

El trabayu de formiga del equipu alemán acabó pagando la pena al final de la temporada, con otra victoria en dambos campeonatos y un Valtteri Bottas más crecíu. El finlandés entá nun pudo ponese al altor de Hamilton (nun sabemos si sedrá quien en dalgún momentu) pero ye verdá qu’esti añu dio un pasu alantre y notose nel so rendimientu en pista. Y asina, otru campeonatu pa Mercedes y el sestu pa Hamilton.

Red Bull apostó por Verstappen y Gasly como pilotos pa esti 2019. Nun sorprendió muncho qu’escoyeran al francés porque, en verdá, nun tiníen munches más opciones. Sí que munches persones cuntaben con un retornu de Kvyat, pero que fuera Gasly l’escoyíu entraba tamién nes quinieles. Pronto se vio, sicasí, que la presión pudo más qu’él y nada de lo que tiníemos visto nel pasáu valió p’asegurar l’asientu, qu’ocupó Albon na segunda parte de la temporada. Verstappen ye un compañeru duru de vencer y ser un recién llegáu al primer equipu de xuru nun foi nada cenciello. Nun hai más que ver que, dende que tornó a Toro Rosso, el so rendimientu ameyoró y consiguió hasta un podiu.

Albon aprovechó la oportunidá que-y dieron en Red Bull y caltién el so asientu pa 2020. Nun yera la elleición más obvia (otra vuelta, tol mundu confiaba más en Kvyat que nun rookie) pero hai qu’almitir que nun lo fizo mal y tuvo actuaciones bien dignes. Insistimos: tener a Verstappen de compañeru d’equipu nun tien de ser cenciello pa quien llega nuevu pesie a qu’Albon nun ye de los que s’achanten.

La temporada del toru coloráu foi de menos a más, pero foi definitivamente bona pa ser el so primer asaltu con Honda. Amosó que la decisión de camudar de Renault al xigante xaponés nun foi mala y mandó dellos mesaxes al garaxe de McLaren, que pela so parte fizo una gran temporada. En Red Bull precisen, en 2020, otru pasu alantre más decidíu y, sobre manera, más temprano. Suelen espabilar muncho na segunda mitá de la temporada, faciendo la primera más floxa y eso fai que Mercedes y Ferrari tengan tiempu d’escapase nel mundial de constructores (el de pilotos suel ser otru asuntu).

Podemos dicir que McLaren foi quien quiciás tuvo una meyor temporada en comparación coles pasaes. La recuperación de forma del equipu inglés, de la mano de dos pilotos tan mozos (nun escaecemos que Norris ye un rookie) nun fai más qu’ayudar a ser optimistes ente les files de Woking. Anque nun tuvieron tola suerte de so parte y hubo demasiaes carreres con abandonos, cuando puntuaben, tanto Sáinz como Norris solíen facelo ente los diez primeros, un gotéu de puntos qu’ayudó a amarrar el cuartu puestu bien ceo na temporada y a nun soltalu hasta’l final.

Renault peleó hasta’l final por amenorgar la distancia con McLaren, pero los numberosos problemes de fiabilidá, la falta de puntos en munches carreres y el meyor rendimientu del equipu inglés nun lo fizo posible. Sicasí, un quintu puestu ye bien meritoriu nuna temporada na que’l mayor interés tuvo pela parte medio de la tabla. L’equipu francés quiciás nun rindió lo que s’esperaba por diverses razones, pero sigue siendo equipu col que cuntar dientro de los puntos. Agora, cola marcha de Hülkenberg y la llegada d’Ocon, diremos viendo si pa 2020 pueden aportar esi puntín de meyora que precisen pa poder pasar a McLaren.

Hasta agora echemos un güeyu a lo que ficieron nesti 2019 los cinco primeros equipos de la tabla. N’otra entrada qu’asoleyaremos estos díes repasaremos a los otros cinco, que tamién dieron coses interesantes qu’analizar.