Author: Asturies F1

Ye sabío por toos que’l gran premiu monegascu nun ye’l más espectacular del calendariu y que, probablmente, habrá que pensar cómo facer del circuitu de Monaco un circuitu nel que les carreres seyan dalgo más que procesiones si queremos al empar que los coches aumenten de tamañu. Pero nun se pue poner la historia de la F1 per delantre d’esperimentos que nun ameyoren la competición nin s’asitien en llugares con tradición nes carreres. Llegamos a Montecarlo col discutiniu abiertu pola continuidá del eventu cuando quiciás el discutiniu tendría que ser más fondu y pensar en qué queremos pa la F1 y actuar en coherencia.

Espérase que lo más interesante nesti gran premiu pase na clasificación. Asina tuviemos una sesión delles banderes coloraes na que brilló Leclerc, intentando ser per una vez profeta na so tierra, cola tercer pole siguiday cola necesidá de rematar la xera en carrera per primer vez. Sedría una primer llinia de Ferrari magar qu’una bandera colorada provocada por Pérez al final de la Q3 dexaría al restu de pilotos ensin posibilidaes d’acabar l’últimu intentu. Mientres Pérez tocaba la barrera, daba con él Sáinz y llegaba xustu Verstappen pa nun llevalos nuna imaxe que se tornó icónica. El mexicanu y l’holandés ocuparíen per esti orde la segunda llinia mientres Norris llega’l primeru del restu siguíu per Russelly per Alonso que protagonizaría otru golpe contra les barerres simultaniamente al de Pérez.

El domingu vieno a visitamos l’agua y’l gran premiu entamó una hora más tarde tres el safety car nun conxuntu de decisiones que nun se llegaron a entender del too (en parte porque nun se tresmitieron tolo claramente que deberíen per parte de dirección de carrera) y que despliquen parcialmente el retrasu por problemes llétricos na salida.  Ello ye qu’asina, la carrera arrancó neutralizada ensin que parare de llover col oxetivu de dir sacando agua de la trazada, pero entendieron qu’habia agua demaisao y pararon la carrera con bandera colorada. Salieron 45 minutos depués cola mesma intención. Una vez se retiró’l coche de seguridá, reanudóse la carrera mientres dalgunos coches esnidiaben, otros probaben los neumáticos intermedios p’acabar como los primeros y otros intentaben calcular el meyor momentu pa poner unes gomes bien intermedies o de seco. Una vez los intermedios empezaben a suponer una ventaya, al pasar la decena de vueltes y dir faciendose’l carril, los coches que se la xugaron empezaron a intentar ganar posiciones al restu, pero nun yera quiciás el meyor escenariu pa ello. Asina fue que tres un cachu intentandolo Gasly foi quien a pasar a Zhou y, postreramente, a Ricciardo. Ello marcaba que yera’l momentu d’abandonar los neumáticos d’agua estremo y entamo’l baille en boxes. Los coches que cambiaben a intermedios teníen que facer por pasar lo enantes posible a los que siguíen en pista colos neumáticos d’agua y asina vieno’l toque ente Hamilton al intentar adelantar a Ocon y vese zarráu por esti. Los comisarios consideraron que’l francés yera merecedor de sanción por esa maniobra.

Y equí foi onde Ferrari garro’l protagonismu en términos d’estratexa y, nun ye la primer vez, non pa bien precisamente… Sáinz decidiría esperar pa pasar directamente a les gomes lises ensin pasar peles intermedies no qu’acabaría demostrándose una decisión bona, por embargu, Leclerc entraría a cambiar a intermedios por indicación del equipu pa entrar darréu a poner les ruedes de seco. Por si nun sonaba mal el plan, topóse col so compañeru en boxes y tuvo qu’esperar por él. Foi inútil l’intentu d’evitalo coles indicaciones del inxenieru que, cuando yá nun había opción de rectificar por parte del pilotu, dicia-y qu’esperare y nun entrase. El restu de la carrera del pilotu monegascu basóse en tragar la rabia pola maniobra que lu dexaba cuartu depués de tar dominando ensin nenguna problema la carrera. Nun s’equivocaron en Red Bull que , tres poner intermedios, entendieron que yera’l momentu precisu pa volver a entrar y asina dexar a Perez primeru y Verstappen terceru con Sáinz en medio. Carlos intentó atacar al pilotu mexicanu, pero una salvada pergrande foi la siñal de que nun yera’l momentu de siguir arriesgando.

Xusto tenía qu’entrar Kevin Magnussen na cochera p’abandonar la carerra cuando’l so compañeru d’equipu sufriría un accidente espectacular que partiría’l coche en dos. Una vez confirmao que Mick taba sanu, comenzaron les operaciones de reparación con otru coche de seguridá a pista.

El restu de la carrera tres la resalida veríase cómo, pesie los intentos per adelantar, el trazáu de Montecarlo nun permitia gran cosa y Perez ganaría una carrera qu’acabaría por tiempu en vez de por vueltes, con Sázin y Verstappen acompañándolu nel podiu. Leclerc habría resignase con ser cuantu y Russell sedría’l primeru del restu tres un adelantamientu a Norris que nun pudimos ver en direuto (y eso que nun tábemos sobraos d’adelantamientos…).  Alonso siguiría detrás faciendo una xestión agresiva de los neumáticos aprovechando que la dificultá d’adelantar yera patente y con un Lewis Hamilton que veríase tamién frustráu detrás del pilotu asturianu, siendo muncho más rápidu que él pero ensin oportunidá d’adelantalu. Siguiríalu Ocon, anque la sanción de 5 segundos qu’arrastraba dexaríalu’l docenu yá fuera de puntos. Bottas y Vettel complateríen la zona de puntos siguíos por Gasly. Posteriormente llegaríen los pilotos que más sufrieron sobre l’asfaltu: Ricciardo, Stroll, Latifi, Zhou y Tsunoda.

En definitiva foi una carrera que nun tuvo muncha historia una vez se normalizaron les posiciones y paró la lluvia y que se vio marcada pol error de Ferrari que tiró una carrera que podía haber ganao Leclerc. Primera carrera que Verstappen acaba y nun gana na estadística.

Anque la vuelta a Europa trayía consigo delles novedaes per parte d’unos cuantos equipos, nun esperábemos una carrera como la que tuvimos nel circuitu catalán. Mercedes paecía que yera quien a dar cola solución al rebote estremu que tenía’l coche nes rectes y amenazaba con axuntase a la fiesta de la cabeza y Aston Martin apaecía colo que se dio en nomar “el Red Bull verde” pol paecíu del chasis nuevu col de la escudería austriaca, llevantando non pocos bilordios y especialmente quexes per parte de Christian Horner.

Nun-yos valió sicasí a Aston Martin pa que nengún de los dos pilotos pasare’l sábadu a Q2. Tampoco pudo pasar a Q2 Fernando Alonso que topó con tráfico cuando intentaba facer la vuelta buena. Aprovecharía esta situación pa camudar el motor y salir na última posición al día siguiente. Nun pudo pasar a Q3 Lando Norris que s’enfrentaba al fin de selmana con amigdalitis lo que foi una torga pal pilotu mesmo en clasificación como en carrera. Sedría Leclerc quien se fadría cola pole con Verstappen segundu que tendría problemes de potencia siguíos per Carlos Sáinz y la pareya de Mercedes qu’empieza a asomase pelos primeros puestos.

Na salida del domingu, el pilotu monegascu llograría aguantar el primer puestu per delantre de Max Verstappen y Russell llograría la tercer posición al adelantar a Sáinz que perdería tamién la posición con Checo Pérez. Hamilton intentaría metese na llucha pola posición pero toparíase con Magnussen qu’intentaba lo propio provocando’l choque ente dambos y que tuvieren que pasar pel garaxe quedando nes últimes posiciones. Hamilton cuestionaría continuar en carrera y pondría sobre la mesa guardar el motor pensando n’esperiencies pasaes, pero los planes del equipu de Grove señalaben posibilidaes de puntos y pidieron al pilotu siguir en pista.

Na vuelta 7, Sáinz perdería la parte d’atrás del coche y con ello unes cuantes posiciones. Dos vueltes más tarde pasaría-y exactamente lo mesmo a Max Verstappen, perdiendo la posición col compañeru d’equipu y con Russell. Esto obligolu a adelantar al pilotu de Mercedes en pista, cuestión que resultaría imposible por mor de los fallos del DRS y del gran manexu del nuevu pilotu de les fleches platiaes qu’empieza a dexar detalles notables como la defensa que fizo de la posición frente al pilotu holandés. La pelea siguiría na vuelta 27, pero tolos güeyos cayeron sobre Charles Leclerc que tenía qu’abandonar una primer posición cómoda al quedar ensin potencia nel Ferrari. Pel so llau, al nun poder facelo en pista, dende Red Bull decidieron llamar a boxes a Verstappen pa cambiar la estratexa de gomes mientres el so compañeru, que sí podía usar el DRS de forma afayadiza atacare a Russell y se ficiera cola primer posición.

Verstappen siguía recuperando posiciones, incluso si ello implicaba pasar a Bottas na vuelta 37 pela parte fuera de la curva. Max volaba coles ruedes más blandes, polo que nun tardó en volver a garrar a Russell, qu’entró a pit lane xusto cuando llegaba a la so altura. Mientres tanto, Hamilton siguía esguilando posiciones na parriella, yera sestu yá. Red Bull tendría que xestionar les posiciones de los sos pilotos primando la posición de Verstappen nel campeonatu de pilotos y pidiendo a Checo que lu dexare pasar, pidimientu al qu’accedería’l mexicanu non ensin dexar claro que nun-y paecía xusto. La escudería austriaca intentaba atar asina el 1-2 y nun arriesgar una llucha ente los dos pilotos o forzar cualquier fallu mecánicu por pidi-y de más al monoplaza.

Nun hai dulda de que’l fechu de la carrera se ficiera a trés paraes ayudó enforma al espectáculu, apurriendo estratexes variaes y distintes aproximaciones en pista. D’esta forma, mesmo Sáinz como Hamilton lograríen facer una recuperación que los fadría superar a Bottas y que fadría que’l pilotu inglés se llegare a poner cuartu adelantando a Sáinz, teniendo que llevantar el pie darréu por problemes mecánicos lo que permitiría al pilotu español recuperar la so posición. Esto fadría que los dos primeros puestos fueren pa Red Bull, que Russell llograre acabar terceru llevando’l mensaxe de que los Mercedes volvieron a la carga. Sáinz sedría cuartu y Hamilton acabaría quintu a pesar de los problemes demostrando un mui bon ritmu que fai entrugamos qué podría tener sio de nun tener l’accidente na primer vuelta.

Siguiríalos Bottas que, anque clasifiquen mui bien col Alfa Romeo nun son quien a aprovechar la estratexa a favor en carrera, llogrando una plaza ponderatible sicasí. Sétimu sedría Esteban Ocon, per delantre de Norris, que llogró acabar en puntos pesie a los problemes médicos y tres d’él Fernando Alonso que tamién fadría una remontada espectacular dende l’últimu puestu de la parrilla y llogrando puntuar tamién. L’últimu puntu sedría pa Tsunoda.

Nun fueron quien a puntuar los Aston Martin pesie a los cambios nel coche acabando oncenu Vettel y decimoquintu Stroll. Ricciardo (12) volvió a vese superáu pol so compañeru, lo mesmo que Gasly (13). Latifi y Albon zarraron la clasificación permediaos per Magnussen que nun llogró recuperase del accidente na primer vuelta de la carrera.

El circuitu de Montmeló, que nun taba siendo precisamente ún de los más emocionantes na F1 moderna acabó regalándonos una de les meyores carreres no que vamos de temporada ensin qu’hubiere ún solu coche de seguridá y col cartelu de “nun hai entraes”. L’afición española naguaba por volver a la F1, anque topóse, eso sí con unos problemes de tráficu y unes masificaciones nel circuitu que siñaló la FIA como punto de meyora de cara al añu que vien. Sicasí, col ánimu tovía caldiu empobinamos a Mónaco ensin descansu.

Estrenábemos circuitu nuevu na F1, el oncenu nos Estaos Xuníos en tola historia, col interés de ver qué espectáculu nos esperaba nuna pista complicada nun circuitu urbanu semipermanente na contorna del Hard Rock Stadium na capital de Florida. Pista nueva implica asfaltu nuevu, cuestión que nun ye fácil de probar nos simuladores al contrario que’l recorríu de la mesma, cuestión que rescampló bien llueu dende les sesiones de práutica al ver cómo los pilotos tardaben en garrar el puntu al trazáu. A midida que se rodadaba pel asfaltu la goma diba faciendo un carril nel que los pilotos llograben que’l coche garrare, pero col peligru de que salise d’esi carril significaba abrise a un camín d’agarre inciertu. Dalgo que condicionaría, xunto colo revirao y estrencho de dalgunes secciones, la posibilidá d’adelantamientu llimitándolo a la capacidá de llograr bona velocidá en recta.

Estes circunstancies condicionaríes les sesiones de clasificación, nes que ganaba importancia tardar en facer l’intentu bonu en pista p’aprovechar la evolución de la mesma. Asina llogró la pole Leclerc al qu’acompañaría na primer llinea’l so compañeru d’equipu y asina perdió la oportunidá de llograla Verstappen al nun ser quien a facer valir l’intentu buenu en Q3, también siguíu pol so compañeru d’equipu. Destacar la quinta posición de Bottas, primeru del restu tres los Red Bull y Ferrari (y  xusto per delantre del so ex-compañeru Hamilton) y que Russel quedare en Q2 ensin enfotu nel coche según palabres d’él. Alonso quedaría oncenu y’l so compañeru nun podría salir a facer tiempu tres un accidente na última sesión llibre.

Yá’l domingu, dambos Aston Martin saldríen dende’l pit lane por cuenta de problemes mecánicos. Yá na carrera, veríamos cómo Max ganaría la segunda posición a Sáinz na primer curva mientres que Hamilton perdería la posición con Gasly y con Fernando Alonso que fadría una salida espectacular pa llograr ponese sétimu. Nun pasaríen más qu’un par de vueltes, sicasí, pa que Lewis lu pasare aprovechándose del usu del DRS.  Anque’l Ferrari calecía bien rápido los neumáticos y los ponía  a funcionar de secute, nel momentu que Red Bull fizo lo propio, Verstappen pudo llanzá-y un ataque y adelantalu sofitáu nel DRS y de la velocidá punta superior del coche na octava vuelta de la carrera.

Bona parte de la carrera siguió ensin munches novedaes hasta’l momentu de cambiu de neumáticos. Anque había duldes de si veríemos una carrera a dos paraes, al final impúsose la lóxica d’una sola parada pa tolos equipos, parada na que lo mesmo Sáinz como Alonso perderíen tiempu y opciones de facer un undercut por fallos nes mesmes. Una vez cambiaes les gomes, la carrera siguiría ensin muncha hestoria.

Una vez que Hamilton pudo desfacese de Gasly y recuperar el so puestu d’aniciu, intentó lo propio Alonso dando-y al coche del pilotu francés al que perxudicaría; por mor d’ello, el pilotu asturianu llevaría una penalización de 5 segundos qu’arrastraría hasta final de carrera. Na vuelta 41 Lando Norris chocaría con Pierre Gasly (nun tuvo’l so día’l francés) nun error de xuiciu al realizar un adelantamientu ensin dexar la distancia afayadiza lo que dexaría a dambos fuera de carrera y un coche de seguridá en pista, virtual en primer llugar y real al final que reaniciaría les distancies. Llevo-y xera a Carlos Sáinz l’aguantar a Sergio Pérez tres la resalida, cosa que llogró hasta ver la bandera a cuadros. Russell, con gomes más blandes, vería xusto detrás del so compañeru d’equipu pasando a Hamilton en cuantes pudo facer usu del DRS. Na maniobra, dambos pilotos de Mercedes adelantaríen al empar a Bottas que perdía la trazada na curva. N’otra de les lluches pela metá del grupu, Mick Schumacher llevaríase puestu a Vettel mientres intentaba ganar la posición dexando al segundu fuera de xuegu.

Ocon qu’aprovechó bien la ventana del coche de seguridá acabó sétimu, siguíu por Alonso y Albon nos puntos. Anque una sanción posterior a Alonso por ganar ventaya al salise de pista costaría-y otros 5 segundos que lu dexaríen oncenu dando-y l’últimu puntu a stroll. Tsunoda, Ricciardo, Latifi y Mick Schumacher completaríen l’orde de carrera. Magnussen tendría de retirase a falta de dos vueltes por daños nel coche.

En dos selmanes, vuelta a Europa pa la cita avezada col circuitu de Montmeló ¿veremos más evoluciones técniques?

Hai circuitos que pola fama que tienen creen expectatives que llueu nun se cumplen. Quiciás podemos dicir esto del circuitu d’Emilia Romaña, au viaxamos esti fin de selmana pasáu. Ye un circuitu, Imola, que trai alcordances tristes al mundu formuleru y au corríen dellos de los pilotos míticos que pasaron a la historia por ser los meyores.

Sicasí, nun foi un fin de selmana brillante no que cinca a la intensidá del gran premiu nin nengún de los eventos. De xuru qu’en Red Bull piensen lo contrario, siendo ellos los grandes trunfadores del fin de selmana. Max Verstappen foi primeru en tolo que tinía de selo, ye dicir, na sesión de clasificación, na carrera al sprint y na del domingu. Nun sabemos si lo de Red Bull va ser cosa d’esti gran premiu namás, viendo los dos abandonos qu’acumulen nel garaxe de Verstappen, pero ta claro qu’esti fin de selmana xugaben n’otra lliga.

Nun ye que Ferrari nun tuvieren ahí nin fueran candidatos a la victoria, que lo yeren, pero complicáronse la vida de más y casi dexaron en bandexa la carrera a los sos rivales. Sáinz, recién renováu col equipu italianu, nun pasó de la primer vuelta por un toque con Ricciardo que lu mandó a la grava y d’ehí al abandonu. El sábadu yá nun fuera brillante. Leclerc tuvo la oportunidá de ganar dambos eventos, pero la degradación na carrera de sprint y un fallu que lu fizo trompear el domingu acabaron con posibilidaes d’incluso podiu.

Aprovecharon les desgracies de Ferrari, como suel ser vezu, Sergio Pérez y Lando Norris, que siempre ta preparáu pa pescar en ríu revueltu. L’inglés foi terceru depués del trompu de Leclerc depués de casi conformase col cuartu puestu que tinía enantes d’esi eventu. Sergio Pérez nun pudo suañar con ganar la carrera, pero tuvo un rendimientu sólidu ya’l segundu puestu na carrera ye mui merecíu.

Anque la salida del gran premiu foi llimpia, pronto vimos los primeros problemes: al yá mentáu accidente de Sáinz con Ricciardo que dexó al madrilanu fuera y a Ricciardo tocáu pal restu de la carrera, sumóse otru de Schumacher con Alonso que diba tener consecuencies bien ceo na carrera. L’alemán chocó contra’l llateral del coche del asturianu, dexándolu dañau. Sicasí, el pilotu d’Alpine siguió rodando hasta que los sos tiempos fueron empeorando por cuenta del dañu nel coche. Cuando taba peleando por evitar más adelantamientos, xunto con Hamilton, un trozu del pontón salió volando, y foi ehí cuando Alpine decidió que yera hora de meter el coche nel garaxe y ponese a pensar nel viniente gran premiu.

Mercedes tuvo un gran premiu, en xeneral, pa olvidar. Ye verdá que Russell foi quien a sacar el máximu a un coche que nun tien velocidá y que nun ye competitivu y foi cuartu en carrera, pero dambos quedaron fuera de los diez primeros na sesión de clasificación pa la carrera al sprint. Hamilton pasó’l domingu tentando d’adelantar a un AlphaTauri, el de Gasly, al que nun pudo pasar y tuvo de conformase con ser décimoterceru. Ta claro que l’inglés nun ta cómodu col coche y mientres el so compañeru paez que s’atopa meyor con esti nuevu monoplaza, Hamilton nun dio entavía col puntu y nótase nel so rendimientu.

Alfa Romeo nun fae munchu ruíu pero va pasín ente pasu puntuando y sumando. Bottas tuvo la oportunidá de luchar en pista col pilotu qu’agora ocupa’l so asientu en Mercedes y de xuru que tinía munches coses na cabeza demientres tentaba de pasalu. Aston Martin a la fin puntuó, con dambos pilotos, un arreón de puntos que los ayuda a abandonar l’últimu puestu del mundial de constructores qu’agora ocupa Williams con un puntu. Tamién Haas sumó, otru par de puntos, y anque agora mesmo son antepenúltimos, namás tienen a un puntu a AlphaTauri, lo que fai que tengan munches posibilidaes de siguir escalando nel mundial. L’equipu foi de los pocos qu’arriesgaron cola estratexa y anque nun pagó la pena tanto como pensaben, a lo menos vese que tienen la posibilidá d’arriesgar sabiendo que dalgo pueden consiguir, cosa que nun pasaban n’años anteriores au sabíen que, ficieren lo que ficieren, nun diben poder facer nada por ameyorar la so posición.

AlphaTauri tamién sumó, pero non con Gasly, que suel ser quien atropa los puntos, si non con Tsunoda, que paez qu’esti añu sí atopó la forma de tar a bien col coche y col equipu.

Ponemos agora rumbu a EEXX au nos espera una novedá nel calendariu: Miami. Tai sollertes a la información sobre los horarios que diremos poniendo estos díes pa nun perder nada d’esti gran premiu que ta a piques de llegar.

La torna a la “normalidá” del mundu del motor ye fácil de pescanciar cuando dellos circuitos tornen al calendariu. Esti fin de selmana tornemos a los madrugones que tanto echábemos en falta (o non) pa ver el gran premiu d’Australia nel circuitu d’Albert Park. El trazáu presentaba novedaes, ente elles una zona menos de DRS, lo que provocaba duldes de si tendríemos un eventu interesante nun circuitu au ye tan complicao adelantar.

Si tuviéramos de resumir la carrera del domingu nuna pallabra sedría dominiu. El de Ferrari sobre’l restu de los sos rivales. Y ye que’l fin de selmana empezaba con Red Bull bastante cerca del equipu italianu, lo que nos facía creyer nun gran premiu apertáu ya entreteníu. Sicasí, Ferrari siempre taba un pasu per delantre. O meyor dicho, Leclerc. Y asina foi na clasificación del sábadu, cuando’l monegascu foi’l poleman ensin que naide nun pudiera ponese a tiru. D’esa clasificación hai que rescamplar, amás, l’accidente de Fernando Alonso cuando rodaba, precisamente, en tiempos de pole ya’l problema de Carlos Sáinz pa facer una vuelta curiosa que-y permitiera, si non salir primeru, a lo menos acompañar al so compañeru na primer llínia de parriella. Nun diba ser.

Del sábadu, tamién nos quedamos cola clasificación de McLaren, que paez que n’Australia sí dieron cola tecla que necesitaben. Sicasí, l’equipu esfuerciose por esclariar que yera probable qu’esti arreón de velocidá del equipu nun fuera más que n’Australia y que nun fuera real, o a lo menos, non real n’otros circuitos.

El domingu Leclerc cásique nun tuvo problemes pa defender la so posición y eso que tuvo varios momentos nos qu’esta paecía peligrar. La salida foi bona pa él y mui bona pa Lewis Hamilton qu’adelantó a Pérez y colocó’l so Mercedes ente los tres primeros. Anque l’inglés nun diba poder caltener esa posición por cuenta la mala suerte d’un coche de seguridá provocáu por Sebastian Vettel, terminó siendo cuartu. Si pensamos que’l so compañeru George Russell ocupó’l tercer llugar nel podiu (el coche de seguridá que torgó la carrera de Hamilton a él lu ayudó) nun podemos negar que la versión “mala” de Mercedes ta atropando bien de puntos nestes hores baxes y que, si sigui asina y ye quien a recuperar, nun podemos descartalos dafechu pal campeonatu como podríemos tener la tentación de facer.

Red Bull tamién subió al podiu, pero nun foi col so, teóricu, númberu ún. Max Verstappen echó gran parte de la so carrera persiguiendo a Leclerc ensin consiguir pasalu. Nin siquiera nes arrancaes depués de los coches de seguridá. Aparte, l’holandés nun yera quien a caltener el ritmu nel momentu nel que se rellanzaba la carrera, ya’l pilotu monegascu recuperaba la distancia col so persiguidor bien rápido. El desgaste de gomes foi una pesadiella tanto pa Verstappen como pa Pérez. El mexicanu, que nun tardó n’adelantar a Hamilton depués de qu’esti lu pasara nos primeros momentos de la carrera, foi quien a abrir güecu, pero pudimos ver como diba perdiéndolu cuando la xestión de les gomes de tornaba más complicada ya empezaben éstes a gastase. A Verstappen pasó-y daqué asomeyao.

L’holandés nun llegaría a ver la bandera a cuadros. Un problema de motor dexolu fuera, sumando asina’l so segundu abandonu en dos carreres, dalgo que nun va bien pa los sos intereses nin pa los del equipu, que namás sumó con Pérez que, como diximos, subió al podiu y foi segundu. La desgracia de Verstappen foi aprovechada por Mercedes, que sumó con Russell y que ta segundu na clasificación de constructores.

Nun foi too felicidá en Ferrari. Leclerc fexo vuelta rápida, pole y foi’l ganador del domingu. Ensin embargu, nel otru llau del garaxe les cares yeren más llargues. Sáinz nun vio la bandera a cuadros del domingu. Lo qu’empezara mal el día anterior, remató mal en carrera yá que, tres un cambiu de volante nel últimu momentu xustu enantes d’arrancar, el pilotu madrilanu tuvo un problema col coche que fizo que la so salida nun fuera bona. Perdió munches posiciones que comprometieron la so carrera y, queriendo recuperales demasiao rápido, acabo faciendo un trompu que lu mandó a la grava. Ehí terminaba’l domingu pa él.

Au tampoco tuvieron munchos motivos pa sorrir ye n’Alpine. Anque Ocon sí que tuvo una bona carrera y atropó dellos puntos Alonso, mesmo que Sáinz, arrastró la mala suerte hasta’l domingu. Con una estratexa distinta por necesidá, l’asturianu rodaba quintu cuando un coche de seguridá, el que provocó l’accidente de Vettel, comprometía la so carrera. Diendo con gomes dures qu’aguantaben más, parar nesi momentu yera un sinsentíu, y Alpine decidió nun facelo. Cuando sí paró, dalgo más tarde, a montar gomes medies, éstes degradáronse rápido fuerciando otra parada y dexando al asturianu ensin nenguna esperanza pa una carrera que pintaba mui bien pa él.

Falemos yá un par de vegaes de Vettel, pues el so accidente (el segundu del fin de selmana) comprometió la carrera de munchos pilotos al tiempu que, ta claro, benefició a otros. Aston Martin nun levanta cabeza y hai munchos comentarios sobre la direición que ta tomando l’equipu, el so rendimientu y, en xeneral, la probe imaxe que ta dando nestes primeres carreres. Ye verdá que, nel casu de Vettel, esti ye’l so primer gran premiu de 2022 depués de perdese los dos primeros por COVID. Pero nun tenemos la sensación de que nin él nin el so compañeru Lance Stroll tean cómodos col coche que manexen. Los resultaos tán ehí pa velos.

Foi un fin de selmana más positivu pa McLaren. A los bonos resultaos del sábadu sumáronse bones actuaciones el domingu, siendo dambos pilotos los meyores depués de los tres grandes equipos y aprovechando tamién les desgracies de Sáinz y Verstappen que, de normal, tendrían quedao per delantre. Tenemos qu’esperar a Imola, sicasí, pa ver si lo de McLaren foi un espeyismu o de verdá atoparon la solución a los problemes que vimos nes dos primeres carreres. Son munchos los equipos que lleven meyores a Imola, asina que va ser interesante ver cómo s’implementen y quién se beneficia más d’elles.

Haas empezó la temporada siendo l’equipu revelación, sumando puntos con Magnussen cuando naide nun cuntaba con ellos. Sicasí, n’Australia tuvieron desapaecíos y nun sumaron nengún puntu. Quien sí sumó foi Alex Albon pa Williams. El tailandés optó por una estratexa a una parada qu’allargó hasta la última vuelta: cincuenta y siete vueltes-y duraron les gomes y rodaba quintu cuando se vio fuerciáu a parar (por reglamentu, los pilotos tienen de facer a lo menos una parada y cambiu de gomes). Acabó siendo décimu, sumando’l primer puntu pa Williams.

Alfa Romeo y AlphaTauri tuvieron la so ración de puntos con Bottas (octavu) y Gasly (novenu) pa sumar a la desgracia d’Aston Martin, que zarra la tabla de clasificación del mundial de constructores.

Los abandonos fueron los yá comentaos: Sáinz, Vettel y Verstappen.

Dende Australia empobinamos a Imola pa un gran premiu que nos va llevar de visita rápida a Europa depués de pegar un saltu a visitar les Amériques.