Author: Asturies F1

Hai circuitos que pola fama que tienen creen expectatives que llueu nun se cumplen. Quiciás podemos dicir esto del circuitu d’Emilia Romaña, au viaxamos esti fin de selmana pasáu. Ye un circuitu, Imola, que trai alcordances tristes al mundu formuleru y au corríen dellos de los pilotos míticos que pasaron a la historia por ser los meyores.

Sicasí, nun foi un fin de selmana brillante no que cinca a la intensidá del gran premiu nin nengún de los eventos. De xuru qu’en Red Bull piensen lo contrario, siendo ellos los grandes trunfadores del fin de selmana. Max Verstappen foi primeru en tolo que tinía de selo, ye dicir, na sesión de clasificación, na carrera al sprint y na del domingu. Nun sabemos si lo de Red Bull va ser cosa d’esti gran premiu namás, viendo los dos abandonos qu’acumulen nel garaxe de Verstappen, pero ta claro qu’esti fin de selmana xugaben n’otra lliga.

Nun ye que Ferrari nun tuvieren ahí nin fueran candidatos a la victoria, que lo yeren, pero complicáronse la vida de más y casi dexaron en bandexa la carrera a los sos rivales. Sáinz, recién renováu col equipu italianu, nun pasó de la primer vuelta por un toque con Ricciardo que lu mandó a la grava y d’ehí al abandonu. El sábadu yá nun fuera brillante. Leclerc tuvo la oportunidá de ganar dambos eventos, pero la degradación na carrera de sprint y un fallu que lu fizo trompear el domingu acabaron con posibilidaes d’incluso podiu.

Aprovecharon les desgracies de Ferrari, como suel ser vezu, Sergio Pérez y Lando Norris, que siempre ta preparáu pa pescar en ríu revueltu. L’inglés foi terceru depués del trompu de Leclerc depués de casi conformase col cuartu puestu que tinía enantes d’esi eventu. Sergio Pérez nun pudo suañar con ganar la carrera, pero tuvo un rendimientu sólidu ya’l segundu puestu na carrera ye mui merecíu.

Anque la salida del gran premiu foi llimpia, pronto vimos los primeros problemes: al yá mentáu accidente de Sáinz con Ricciardo que dexó al madrilanu fuera y a Ricciardo tocáu pal restu de la carrera, sumóse otru de Schumacher con Alonso que diba tener consecuencies bien ceo na carrera. L’alemán chocó contra’l llateral del coche del asturianu, dexándolu dañau. Sicasí, el pilotu d’Alpine siguió rodando hasta que los sos tiempos fueron empeorando por cuenta del dañu nel coche. Cuando taba peleando por evitar más adelantamientos, xunto con Hamilton, un trozu del pontón salió volando, y foi ehí cuando Alpine decidió que yera hora de meter el coche nel garaxe y ponese a pensar nel viniente gran premiu.

Mercedes tuvo un gran premiu, en xeneral, pa olvidar. Ye verdá que Russell foi quien a sacar el máximu a un coche que nun tien velocidá y que nun ye competitivu y foi cuartu en carrera, pero dambos quedaron fuera de los diez primeros na sesión de clasificación pa la carrera al sprint. Hamilton pasó’l domingu tentando d’adelantar a un AlphaTauri, el de Gasly, al que nun pudo pasar y tuvo de conformase con ser décimoterceru. Ta claro que l’inglés nun ta cómodu col coche y mientres el so compañeru paez que s’atopa meyor con esti nuevu monoplaza, Hamilton nun dio entavía col puntu y nótase nel so rendimientu.

Alfa Romeo nun fae munchu ruíu pero va pasín ente pasu puntuando y sumando. Bottas tuvo la oportunidá de luchar en pista col pilotu qu’agora ocupa’l so asientu en Mercedes y de xuru que tinía munches coses na cabeza demientres tentaba de pasalu. Aston Martin a la fin puntuó, con dambos pilotos, un arreón de puntos que los ayuda a abandonar l’últimu puestu del mundial de constructores qu’agora ocupa Williams con un puntu. Tamién Haas sumó, otru par de puntos, y anque agora mesmo son antepenúltimos, namás tienen a un puntu a AlphaTauri, lo que fai que tengan munches posibilidaes de siguir escalando nel mundial. L’equipu foi de los pocos qu’arriesgaron cola estratexa y anque nun pagó la pena tanto como pensaben, a lo menos vese que tienen la posibilidá d’arriesgar sabiendo que dalgo pueden consiguir, cosa que nun pasaban n’años anteriores au sabíen que, ficieren lo que ficieren, nun diben poder facer nada por ameyorar la so posición.

AlphaTauri tamién sumó, pero non con Gasly, que suel ser quien atropa los puntos, si non con Tsunoda, que paez qu’esti añu sí atopó la forma de tar a bien col coche y col equipu.

Ponemos agora rumbu a EEXX au nos espera una novedá nel calendariu: Miami. Tai sollertes a la información sobre los horarios que diremos poniendo estos díes pa nun perder nada d’esti gran premiu que ta a piques de llegar.

La torna a la “normalidá” del mundu del motor ye fácil de pescanciar cuando dellos circuitos tornen al calendariu. Esti fin de selmana tornemos a los madrugones que tanto echábemos en falta (o non) pa ver el gran premiu d’Australia nel circuitu d’Albert Park. El trazáu presentaba novedaes, ente elles una zona menos de DRS, lo que provocaba duldes de si tendríemos un eventu interesante nun circuitu au ye tan complicao adelantar.

Si tuviéramos de resumir la carrera del domingu nuna pallabra sedría dominiu. El de Ferrari sobre’l restu de los sos rivales. Y ye que’l fin de selmana empezaba con Red Bull bastante cerca del equipu italianu, lo que nos facía creyer nun gran premiu apertáu ya entreteníu. Sicasí, Ferrari siempre taba un pasu per delantre. O meyor dicho, Leclerc. Y asina foi na clasificación del sábadu, cuando’l monegascu foi’l poleman ensin que naide nun pudiera ponese a tiru. D’esa clasificación hai que rescamplar, amás, l’accidente de Fernando Alonso cuando rodaba, precisamente, en tiempos de pole ya’l problema de Carlos Sáinz pa facer una vuelta curiosa que-y permitiera, si non salir primeru, a lo menos acompañar al so compañeru na primer llínia de parriella. Nun diba ser.

Del sábadu, tamién nos quedamos cola clasificación de McLaren, que paez que n’Australia sí dieron cola tecla que necesitaben. Sicasí, l’equipu esfuerciose por esclariar que yera probable qu’esti arreón de velocidá del equipu nun fuera más que n’Australia y que nun fuera real, o a lo menos, non real n’otros circuitos.

El domingu Leclerc cásique nun tuvo problemes pa defender la so posición y eso que tuvo varios momentos nos qu’esta paecía peligrar. La salida foi bona pa él y mui bona pa Lewis Hamilton qu’adelantó a Pérez y colocó’l so Mercedes ente los tres primeros. Anque l’inglés nun diba poder caltener esa posición por cuenta la mala suerte d’un coche de seguridá provocáu por Sebastian Vettel, terminó siendo cuartu. Si pensamos que’l so compañeru George Russell ocupó’l tercer llugar nel podiu (el coche de seguridá que torgó la carrera de Hamilton a él lu ayudó) nun podemos negar que la versión “mala” de Mercedes ta atropando bien de puntos nestes hores baxes y que, si sigui asina y ye quien a recuperar, nun podemos descartalos dafechu pal campeonatu como podríemos tener la tentación de facer.

Red Bull tamién subió al podiu, pero nun foi col so, teóricu, númberu ún. Max Verstappen echó gran parte de la so carrera persiguiendo a Leclerc ensin consiguir pasalu. Nin siquiera nes arrancaes depués de los coches de seguridá. Aparte, l’holandés nun yera quien a caltener el ritmu nel momentu nel que se rellanzaba la carrera, ya’l pilotu monegascu recuperaba la distancia col so persiguidor bien rápido. El desgaste de gomes foi una pesadiella tanto pa Verstappen como pa Pérez. El mexicanu, que nun tardó n’adelantar a Hamilton depués de qu’esti lu pasara nos primeros momentos de la carrera, foi quien a abrir güecu, pero pudimos ver como diba perdiéndolu cuando la xestión de les gomes de tornaba más complicada ya empezaben éstes a gastase. A Verstappen pasó-y daqué asomeyao.

L’holandés nun llegaría a ver la bandera a cuadros. Un problema de motor dexolu fuera, sumando asina’l so segundu abandonu en dos carreres, dalgo que nun va bien pa los sos intereses nin pa los del equipu, que namás sumó con Pérez que, como diximos, subió al podiu y foi segundu. La desgracia de Verstappen foi aprovechada por Mercedes, que sumó con Russell y que ta segundu na clasificación de constructores.

Nun foi too felicidá en Ferrari. Leclerc fexo vuelta rápida, pole y foi’l ganador del domingu. Ensin embargu, nel otru llau del garaxe les cares yeren más llargues. Sáinz nun vio la bandera a cuadros del domingu. Lo qu’empezara mal el día anterior, remató mal en carrera yá que, tres un cambiu de volante nel últimu momentu xustu enantes d’arrancar, el pilotu madrilanu tuvo un problema col coche que fizo que la so salida nun fuera bona. Perdió munches posiciones que comprometieron la so carrera y, queriendo recuperales demasiao rápido, acabo faciendo un trompu que lu mandó a la grava. Ehí terminaba’l domingu pa él.

Au tampoco tuvieron munchos motivos pa sorrir ye n’Alpine. Anque Ocon sí que tuvo una bona carrera y atropó dellos puntos Alonso, mesmo que Sáinz, arrastró la mala suerte hasta’l domingu. Con una estratexa distinta por necesidá, l’asturianu rodaba quintu cuando un coche de seguridá, el que provocó l’accidente de Vettel, comprometía la so carrera. Diendo con gomes dures qu’aguantaben más, parar nesi momentu yera un sinsentíu, y Alpine decidió nun facelo. Cuando sí paró, dalgo más tarde, a montar gomes medies, éstes degradáronse rápido fuerciando otra parada y dexando al asturianu ensin nenguna esperanza pa una carrera que pintaba mui bien pa él.

Falemos yá un par de vegaes de Vettel, pues el so accidente (el segundu del fin de selmana) comprometió la carrera de munchos pilotos al tiempu que, ta claro, benefició a otros. Aston Martin nun levanta cabeza y hai munchos comentarios sobre la direición que ta tomando l’equipu, el so rendimientu y, en xeneral, la probe imaxe que ta dando nestes primeres carreres. Ye verdá que, nel casu de Vettel, esti ye’l so primer gran premiu de 2022 depués de perdese los dos primeros por COVID. Pero nun tenemos la sensación de que nin él nin el so compañeru Lance Stroll tean cómodos col coche que manexen. Los resultaos tán ehí pa velos.

Foi un fin de selmana más positivu pa McLaren. A los bonos resultaos del sábadu sumáronse bones actuaciones el domingu, siendo dambos pilotos los meyores depués de los tres grandes equipos y aprovechando tamién les desgracies de Sáinz y Verstappen que, de normal, tendrían quedao per delantre. Tenemos qu’esperar a Imola, sicasí, pa ver si lo de McLaren foi un espeyismu o de verdá atoparon la solución a los problemes que vimos nes dos primeres carreres. Son munchos los equipos que lleven meyores a Imola, asina que va ser interesante ver cómo s’implementen y quién se beneficia más d’elles.

Haas empezó la temporada siendo l’equipu revelación, sumando puntos con Magnussen cuando naide nun cuntaba con ellos. Sicasí, n’Australia tuvieron desapaecíos y nun sumaron nengún puntu. Quien sí sumó foi Alex Albon pa Williams. El tailandés optó por una estratexa a una parada qu’allargó hasta la última vuelta: cincuenta y siete vueltes-y duraron les gomes y rodaba quintu cuando se vio fuerciáu a parar (por reglamentu, los pilotos tienen de facer a lo menos una parada y cambiu de gomes). Acabó siendo décimu, sumando’l primer puntu pa Williams.

Alfa Romeo y AlphaTauri tuvieron la so ración de puntos con Bottas (octavu) y Gasly (novenu) pa sumar a la desgracia d’Aston Martin, que zarra la tabla de clasificación del mundial de constructores.

Los abandonos fueron los yá comentaos: Sáinz, Vettel y Verstappen.

Dende Australia empobinamos a Imola pa un gran premiu que nos va llevar de visita rápida a Europa depués de pegar un saltu a visitar les Amériques.

Esperábemos ver batalles repetíes en Xida, ya’l gran premiu nun defraudó, básicamente vimos una segunda parte de lo que fai unos díes topábemos en Baḥréin.

La Q1 entamó col primer accidente de Latifi nun fin de selmana que nun foi’l suyu y con una imaxe que nun se vía dende fai muncho tiempu como ye la de Lewis Hamilton fuera de Q2 por falta de ritmu. Nun foi nengún error del pilotu, nengún eventu desafortunáu nin nenguna bandera amariella que-y torgare la vuelta; simplemente’l pilotu británicu nun yera quien a sacar un tiempu mínimu del Mercedes, que se ta demostrando muncho más dificil d’entender y de configurar de lo que tábemos avezaos coles fleches platiaes.

Otru accidente marcaría la Q2 y tol eventu al sufrir Mick Schumacher un accidente de 33G contra les barreres que mos fizo esfrecer a toos. Por suerte, el pilotu alemán saldría sanu y salvu del choque, anque la realización de la FIA que s’empeñó en nun dar nenguna imaxe del pilotu hasta bien pasáu un ratu nun transmitiría tranquilidá precisamente. Obviamente nun pidimos que s’emitan imáxenes delicaes, pero siempre ayuda ver de primer mano del pilotu que tán bien y ensin nenguna lesión como foi’l casu. Una vez asegurada la salú del pilotu, la pista tardaría tovía un cachu en llimpiase por mor de tolos restos sólidos y llíquidos que dexara un Haas que quedare desfechu. Segunda bandera colorada.

La presencia de Bottas y Magnussen en Q3 yá nun ye una novedá dende la selmana pasada y, mientres Russell quedaba como únicu representante de Mercedes na clasificación la llucha taba per delantre ente los Red Bull y los Ferrari. Anque la llucha yera dura ente Leclerc y Verstappen, Sáinz enseñó los dientes, pero foi Sergio Pérez el que se fizo col meyor tiempu mientres el so compañeru solo podía ser cuartu.

Yá na carrera del domingu, el primer abandonu vieno per parte de Tsunoda. El pilotu xaponés tuvo problemes nel motor y abandonó la carrera na vuelta de formación primero que los semáforos se prendieren siquiera. Na salida, Verstappen foi quien a ganar el tercer puestu a Sáinz mientres Pérez defendía’l primer puestu. Pero l’espectáculu nes primeres vueltes vendría por parte d’Alpine, el box del equipu contenía l’aliendu mientres Ocon y Alonso lluchaben por posición. El francés defendía la sesta posición con uñes y dientes hasta que’l pilotu asturianu foi quien a adelantalu. Viendo que la llucha s’allargaba, el muru del equipu francés acabaría pidiéndo-y a Ocon que caltuviera la posición. Y ye que, anque mos facía esfrutar abondo esa llucha, nun yera conveniente pal equipu magar que facía que s’acercasen los perseguidores mientres Russell metía tierra per medio.

Una vez que s’abría la ventana d’entrada de cambiu de neumáticos pa los que salieron cola goma media, Ferrari xugó la so baza dio la instrucción de “Box p’adelantar” a Leclerc, qu’implicaba que fadría exactamente lo contrario que’l pilotu que tenía per delantre, nesti casu Pérez, qu’entró a cambiar pa cubrir la posición énte l’amagu de la Scudería ya’l pilotu monegascu siguió en carrera. Pero poco depués Latifi tendría’l so segundu alcuentru col muru, una foto que yá se ta repitiendo más de la cuenta y que, aparte de dexar al pilotu canadiense fuera de xuegu, obligaría a sacar al coche de seguridá y abriría una oportunidá pa facer un cambiu de gomes con baxu coste de tiempu. Tolos que salieron con medios aprovecharon y Pérez cayó a la tercera posición d’una carrera que llideraba agora Charles Leclerc. Nel reaniciu Pérez tuvo que ceder un puestu más a Sáinz magar que’l pilotu español ganaría-y la posición al salir de boxes anque’l mexicanu acabare per delantre, lo que lu obligaría a devolver esa posición.

Nun hebo suerte esta vez pa Fernando Alonso que se vería obligáu a abandonar na vuelta 35 por falta de potencia nel motor dexándolu colo xusto p’allegase a la entrada del pit lane onde quedaría paráu precisando ayuda pa sacar el coche d’ehí. Simultániamente, Ricciardo sufriría un problema asemeyáu quedando xusto a les puertes de la entrada a boxes dando más trabayu tovía a los comisarios p’apartar coches del trazáu. Nun habría qu’apartar el coche de Bottas que retiraríen yá na cochera del equipu Alfa Romeo. Hamilton nun podría entrar nun primer momentu a cambiar neumáticu y nun podría aprovechar la oportunidá que daba’l coche de seguridá virtual al tar zarrada la entrada de boxes pol peligru que suponíen los coches ehí aparaos. Tendría que facer el cambiu posteriormente ensin poder ganar tiempu na maniobra.

A falta d’ocho vueltes pal final, tendríamos la esperada batalla ente Verstappen y Lecerc: el pilotu de Ferrari volvería a aprovechar l’ansia del holandés por pasalu na última curva xusto primero de la zona de detección del DRS devolviéndo-y la xugada na recta al aprovechase d’ello. Na siguiente vuelta, la llucha taría por nun pasar primero pela zona de detección de DRS pa poder usalu na recta, dambos pilotos bloquearíen pa nun pasar primeros, llograría ser segundu Max, pero la maniobra dexaríalu mal colocáu p’atacar al pilotu de Ferrari. Dos vueltes más tarde, trabayando con paciencia, el pilotu de Red Bull sedría quien a ponese primeru esta vez ensin perder la posición hasta final de carrera mostrando la velocidá punta del coche en recta y con una bandera mariella que llimitaba les oportunidaes d’adelantamientu.

Sáinz volvería a subir al podiu per segunda vez consecutiva mientres Pérez vía como acabaría cuartu tres salir dende la pole. Russell aseguraría la quinta posición, que paez ser a tolo que pue aspirar Mercedes hasta qu’igüe los problemes de bote que tien el coche y Ocon llograría un meritoriu sestu puestu. El sétimu puestu de Norris paez facer ver a McLaren dalgo de lluz al final del túnel lo mesmo que l’octavu que llogró Gasly. Magnussen sedría novenu avezándonos a ver a Haas nos puntos y Hamilton llograría avanzar hasta’l décimu garrando los últimos puntos disponibles. Per detrás Zhou, Hülkenberg y Stroll zarraríen la clasificación mientres qu’Albon tampoco pudo ver la bandera a cuadros por problemes mecánicos.

Depués de too esto, quince díes de descansu hasta llegar a Australia onde veremos si too sigue igual o daquién ye a subir el so nivel y apuntase a unes lluches que nos tan entreteniendo enforma.

Había ganes de que llegare’l primer eventu de la temporada y que los equipos y pilotos descubrieren les sos cartes pa conocer con qu’argumentos cuntaba caún, y nun faltaron les sorpreses. Llegaba con problemes Mercedes, l’actual campeón de constructores, por cuenta’l rebote escesivu del coche a final de reuta y asomaba la cabeza Ferrari con mui bones sensaciones. Verstappen paecía enfotáu nel so Red Bull nuna pretemporada ensin complicaciones. Nun hebo noticies nueves nes tres sesiones d’entrenamientos.

La sesión de clasificación yá nos mandó un mensaxe claru de que lo que brilla esti añu en Ferrari nun ye solo’l chasis: Leclerc llevó la pole per delantre de Verstappen con Sáinz y Pérez ocupando les posiciones siguientes. Mercedes buscaría minimizar daños atando’l quintu y el sestu llugar ensin poder aspirar a más. Los equipos con motor italianu tuvieron una actuación destacable con casos como’l de Kevin Magnussen, que pasó de subise per primera vez a esti coche qu’avezaba a zarrar les carreres los últimos años fai unes selmanes pa sustituyir a Mazepin a calcase en Q3 y llograr un sétimu puestu. Solo quedaría per delantre d’él tres los 3 equipos favoritos Bottas na otra gran sorpresa de la sesión. Alpine sigue la so travesía pela parte medio mientres qu’Aston Martin y Mclaren quedaríen en posiciones retrasaes ensin que los de Woking pudieran resolver los problemes col coche tres l’espeyismu de los primeros tests.

Llegó la carrera del doming con ganes de ver si realmente esta nueva especificación de los coches valía pa que pudieren siguise más de cerca y evitar l’aire puerco, y asina lo demostraron dalgunes pelees, anque les dificultaes p’adelantar paez que siguen ehí según manifestaron dalgunos pilotos como Alonso.

Tres una salida na que destacó l’arranque de Hamilton y Magnussen que pasaron a Pérez y na que’l danés intentó presionar al pilotu británicu, Pérez llegaría a recuperar una posición tres un mano a mano col pilotu danés de Haas y recuperaría fácilmente tamién la posición con Hamilton na vuelta 10. Pela so parte, Schumacher vería comprometida la so carrera por un toque con Ocon que lu fadría xirar 360 graos y qu’acabaría con sanción de 5 segundos pal pilotu francés. Leclerc defendería la so posición per delantre de Verstappen y Sáinz siguiríalos con una estratexa de xestión de les gomes distinta que lu facía apartase y averase a ellos en distintes fases. Sicasí na vuelta 17 veríamos una llucha mui guapa ente Leclerc y Verstappen quiciás como trailer de lo que nos espera esti añu, una llucha na que dambos pilotos se diben relevando y na que’l monegascu foi más llistu y llogró defender la primer posición. Max intentaríalo un par de vueltes depués pero un bloquéu na frenada depués de la recta de meta daría-y la ventaya a Charles pa recuperar la posición una vez más.

Foi na vuelta 46 cuando Gasly tendría qu’apartar de la carretera’l so AlphaTauri que prendería de secute pela parte trasera obligando al pilotu a salir apriesa del coche pa evitar el peligru, lo que provocaría un safety car. Nel reaniciu, Leclerc nun dexaría opción a Verstappen que se vería apretáu por Sáinz que se-y tiraba enriba. Esta vez el pilotu de Red Bull defendería la so posición ensin muncho problema.

La cosa siguiría asina hasta que faltaben 3 vueltes p’acabar la carrera y Max Verstappen notaba problemes nel coche que diba vese superáu ún per ún pelos sos perseguidores hasta acabar finalmente retirándose na cochera del equipu austriacu. Pero les coses nun acabaríen ehí pa Red Bull que vería cómo se calaría’l coche de Sergio Pérez na última vuelta mientres Lewis Hamilton intentaba presionalu dexando a la escudería del güe coloráu ensin nengún coche en carrera.

Al final, los dos primeros puestos pa pilotos Ferrari muncho tiempu depués y Hamilton y Russell toparíense con un tercer y cuartu puestu que reconoceríen que taba penriba de lo esperao. Kevin Magnussen acabaría quintu no que sedría una gran vuelta a la F1 del pilotu de Haas y Bottas conservaría’l sestu puestu de salida al compensar los dos abandonos per delantre les dos posiciones perdíes. Ocon y Tsunoda llograríen una recuperación importante ocupando les posiciones sétima y octava.  Llograron entrar nos puntos mesmo Alonso como Zhou Guanyu na so primer carrera en Fórmula Ún. Quedó’l Haas de Mick Schumacher a les puertes de puntuar anque nun llegó a tener nunca’l ritmu del so compañeru.

Lance Stroll acabó docenu nun gran premiu que pasó ensin pena nin gloria, lo mesmo que l’equipu Aston Martin en xeneral, col so compañeru Nico Hülkenberg siendo l’últimu en cruciar la llínia anque col méritu d’acabar un fin de selmana nel que se montó nel coche por primer vez ensin prueba previa pa sustituyir a Vettel, que tien coronavirus. Los Williams y los McLaren zarraríen un gran premiu pa olvidar, especialmente nel casu del equipu de Woking que pasa de lluchar en 2021 por ser el tercer equipu de la parriella a vese ente los últimos.

Ensin descansu, dirixímonos al circuitu de Xida pal segundu gran premiu de la temporada cola esperanza de vivilu cola mesma intensidá qu’en Baḥréin.

2021 taba destináu a ser ún de los meyores años de competición na F1. Con dos pilotos al más altu nivel compitiendo por ser campeones les más de les carreres fueron una sucesión d’eventos que diben aumentando la tensión ente dambos y tamién la desixencia. Nun yera sólo ganar si non les formes y tamién los escenarios.

Abu Dhabi, como yá comentemos na previa d’esta carrera, nun tien fama de ser un circuitu nel que veamos carreres memorables, de fechu, los últimos años cásique yera un trámite de zarru de temporada. Esti 2021 tuvo a bien caltener la emoción hasta lo último, y yá non sólo falamos de l’últimu eventu si non la última vuelta. Y ye que munches son les coses que pasaron nes cincuenta y ocho vueltes d’esti gran premiu.

Empezando pol sábadu. Un sábadu nel que Red Bull y sobremanera Checo Pérez, ficieron un gran llabor d’equipu que facilitó la pole a Max Verstappen, dexando a Lewis Hamilton segundu. Mercedes fueran mui fuertes demientres tola fin de selmana, pero l’holandés aprovechó bien el rebufu del so compañeru pa bordar una vuelta que-y valió una pole, la última de la temporada.

El domingu, col sol a piques de ponese nel horizonte, salíen los coches nel circuitu de Yas Marina. Hamilton salió mui bien y púnxose rápido per delantre de Verstappen que salió bastante mal. Los primeros metros fueron de persecución del holandés hasta llegar a un momentu d’adelantamientu onde Verstappen forzó a Hamilton fuera de pista, dalgo qu’ensin embargo nun supunxo que l’inglés perdiera posición. Entamó equí la polémica pola decisión de los comisarios de nun intervenir y namás pidir a Hamilton que devolviera la ventaya ganada, pero non la posición.

El ritmu de Hamilton foi mui altu demientres cásique tola carrera y el rendimientu de les gomes tamién. Tolos equipos diben monitorizando los tiempos de Fernando Alonso que, nuna estratexa arriesgada, decidiera montar gomes dures y dir a una parada. L’asturianu diba cuadrando bonos tiempos y rodando en puntos, dalgo que valió otros equipos pa copiar esa estratexa, como ye’l casu de Mercedes. Demientres bona parte de la carrera abultaba que Hamilton tinía too nel bolsiellu: bon ritmu, bon rendimientu de les gomes, Verstappen controláu a cierta distancia. Y eso que l’inglés tuvo de batallar con Sergio Pérez que, otra vuelta, fizo un llabor d’equipu excelente torgando l’avance del inglés tolo posible, con gomes más vieyes, y facilitando que Max Verstappen, acabante de parar, pudiera recortar distancia. A la fin Hamilton adelantó a Pérez, pero con menos distancia sobre Verstappen de lo que-y prestaría.

Per detrás les coses taben más bien tranquiles, anque teníemos batalles interesantes de Bottas tentando d’averase al podiu, y de los Ferrari tentando de pasar per delantre d’él. Norris foi terceru na parriella pero una salida de pista nos primeros metros de gran premiu torgaron la so carrera. L’interés cimeru taba, sicasí, no que pasaba ente los dos primeros. Nun sabemos si hai qu’echar la culpa a Mercedes o si daes les circunstancies ficieron lo que creyeron que yera lo meyor y nun hai más que pensar. Ello ye que, con un coche de seguridá virtual en pista por abandonu de Kimi Räikkönen, Hamilton continuó en pista mientres que Verstappen, obligáu a facer daqué distinto al inglés, entró a cambiar gomes. Les del inglés siguíen funcionando bien, pero la distancia diba amenorgando conforme pasaben les vueltes y el desgaste yera mayor. Sicasí, Hamilton seguía dominando a falta de poques vueltes pal final. Abultaba que too diba quedar como taba.

Nicholas Latifi ye un pilotu que pasín ente pasu foi consolidándose nel equipu Williams y va siguir ellí en 2021. Esti domingu convirtióse nel protagonista involuntariu del desenllaz d’esti mundial. Mientres peleaba con Mick Schumacher por posición en pista, tuvo un choque contra les barreres que provocó un coche de seguridá. Quedaben cinco vueltes pal final y Mercedes decidió que Hamilton tinía que seguir en pista. Verstappen, otra vuelta, fizo lo contrario y entró a montar gomes nueves, blandes, más rápides. L’equipu alemán alegó que había la posibilidá de que la carrera terminara col coche de seguridá, yá que Latifi dexara munchos restos na pista qu’había que llimpiar. Tamién que, en casu de parar, perderíen posición con Verstappen. Ello ye que Hamilton siguió con unes gomes de más de treinta vueltes, deseyando que’l coche de seguridá nunca nun colara. Pero coló. Y fízolo depués de que’l director de carrera Michael Masi decidiera nuna decisión polémica permitir a los coches doblaos recolocase en pista, pero sólo a aquellos que taben entre Verstappen y Hamilton y que’l coche de seguridá saliera de pista ensin esperar a que finalizare la vuelta. Asina, na vuelta cincuenta y siete de ciencuenta y ocho relanzose la carrera. Anque l’inglés aguantó lo que pudo, les gomes vieyes y dures de Hamilton nun fueron rival pa les nueves y blandes de Verstappen, qu’ensin muncha dificultá acabó adelantando al inglés y viendo la bandera a cuadros, proclamándose asina campeón del mundu.

En tercer llugar, convidáu discretu a la cellebración y llamentu d’unos y otros, quedó Carlos Sáinz, que con una carrera mui sólida foi quién a subir al podiu y amás facese col quintu puestu nel mundial de pilotos. Bottas nun llegó a alcanzalu depués de tar bien de tiempu per detrás y de fechu acabó per detrás de dambos AlphaTauri, con Tsunoda cuartu y Gasly quintu. Mercedes, sicasí, ye otru añu más campeón del mundu de constructores. Red Bull namás pudo ver la bandera a cuadros con Verstappen yá que’l gran llabor de Pérez nun tuvo recompensa y tuvo de retirar el coche.

Per detrás de Bottas, qu’acabó sextu depués de la decisión de los comisarios de los desdobles selectivos, quedaron Lando Norris, los dos Alpine con Alonso per delantre y Charles Leclerc. Nengún de los Alfa Romeo acabó la carrera, nun amargu final pa dos pilotos que nun van siguir na F1 en 2022. Aston Martin nun puntuó con nengún de los pilotos, mesmo que Ricciardo, qu’acabó duodécimu. Aparte de los yá mentaos, tampoco George Russell pudo ver la bandera a cuadros, la última de so como pilotu de Williams.

Y asina foi. Abu Dhabi punxo’l zarru a una temporada perinteresante como nun podía ser d’otra manera, con una gran carrera na que too acabó decidiéndose nos últimos metros con una polémica que fizo que Mercedes reclamase pola xestión del coche de seguridá nuna quexa que foi refugada polos comisarios, anque paez que la marca alemana quier siguir alegando na sisguiente instancia.  Una llástima qu’una gran temporada tanto de Verstappen como de Hamilton acabare col focu sobre les decisiones que tomó dirección de carrera. Agora toca ponese a pensar na temporada viniente, la 2022, con cambios nes regulaciones y muncha expectación por ver quién se fai col llideralgu d’estos nuevos monoplaces. Mientres tantu, queden noventa y cinco díes de reflexón, llectures, información y, sobre manera, descansu.