Author: Asturies F1

Cuando nos averamos a la fin d’una temporada de F1 siempre hai quien entruga polos motivos pa siguir viendo les carreres cuando los mundiales tán decidíos. Esti añu Max Verstappen y Red Bull Racing reinaron y dominaron perriba del restu, y llegaos a Interlagos, y yá enantes, dambos campeonatos taben decidíos no cimero. Nun hai meyor rempuesta pa esta entruga que l’espectáculu que vivimos yá no sólo’l domingu, si non tol fin de selmana. Debe ser de les poques vegaes nes qu’un eventu de F1 ta interesante, na pista, dende’l mesmu vienres.

Cola última carrera al sprint ya’l penúltimu gran premiu del añu, aterrizamos nel míticu Autodromo Jose Carlos Pace col naguar de quien sabe qu’esti trazáu yá nos dexó carreres memorables nel pasáu. Sicasí, lo que nos ufrió foi bastante más de lo que cuidábemos. El vienres tuvimos, como ye vezu nesti casu, la primer sesión de llibres y la clasificación pa decidir l’orde de la carrera al sprint del sábadu. L’agua quixo ser protagonista y anque nun torgó la sesión de llibres, sí qu’apaeció na de clasificación y con resultaos que punxeron a toles grades (y dalguién tamién en so casa) en pie. La Q1 y la Q2 nun sorprendieron muncho, anque sí foi interesante ver quién s’arriesgaba a montar gomes de secu nun asfaltu que diba secando pocu a pocu. Si dalgo deprendieron los equipos nesti gran premiu foi a ser pacientes enantes d’aventurase a copiar lo que facíen los rivales porque la meyora de la pista col pasu de les vueltes yera evidente. Llegamos a la Q3 con casi tolos pilotos típicos y Kevin Magnussen que consiguiera colase otra vuelta ente los diez primeros. Esti fechu nun ye de por sí sorprendente, lo que sí lo foi vieno depués. L’agua tornó y un equipu Haas mui hábil sacó al so pilotu pronto pa tenelu’l primeru esperando a que se punxera verde la lluz del semáforu del pitlane. Asina, Magnussen foi’l pilotu que meyor atopó l’asfaltu y marcó un tiempu que, ensin ser una maraviella, sí que foi meyor que tolo que ficieron los demás pilotos, condicionaos yá pol empeoramientu de les condiciones.

L’agua empezó a ser cada vegada más hasta que les condiciones pa facer una vuelta competitiva desapaecieron. Y ehí quedó la de Magnussen. Col pasu los minutos, los equipos y los pilotos fueron decatándose que nun diben poder sacar más nada d’esa sesión, y foi entós cuando se confirmó la sorpresa: Kevin Magnussen conseguía la pole, siendo’l primer danés en facelo na historia de la F1. Súmase a esto’l fechu de que Haas tinía falta d’un arreón d’esti tipu que-y permita ser optimistes pa lo que queda d’añu y tamién de cara a 2023. Ye verdá que nun yera una pole al usu, de les que tamos avezaos, pero tamién ye verdá que pa consiguila hai que tar ehí nel momentu necesariu y esta vegada a Haas salió-y bien la xugada. Nun yera realista pensar nuna posible victoria pal sábadu na carrera al sprint, pero l’allegría de facer una pole y metese asina na historia sí que diba quedar.

Nel tiempu que llevamos teniendo carreres al sprint nel calendariu les más de les vegaes, por nun dicir toes, vivimos carreres más bien aburríes au los pilotos, lóxicamente, son más conservadores y piensen más nel domingu que n’otra cosa. Podemos afirmar qu’esti sábadu dexaron el conservadurismu en casa y tuvimos la meyor carrera al sprint de les que vimos hasta’l momentu. Non sólo porque la pole fuera pa un pilotu que nunca nun la tuviera, si non porque non sólo Red Bull tinía posibilidaes de facese cola victoria. Mercedes rindió mui bien tol fin de selmana y anque Ferrari andaba col pasu un pocu cambiáu, tamién tuvieron ehí. Tres equipos con posibilidaes de ganar una carrera al sprint ye dalgo que nun viéramos entavía y sólo un ingrediente más que fizo d’esti un gran eventu. Hubo adelantamientos, hubo pelees y penalizaciones y hubo un ganador, George Russell, que se facía cola so primer victoria nuna competición de F1, viéndose acompañáu nel podiu de Sáinz y Hamilton. ¿Yera posible ameyorar too esto’l domingu? Sí, lo yera.

Nun fizo falta qu’apaeciera l’agua y ye que casi paecía que tábemos ente una de les carreres que decidíen mundiales, como cuantayá ficiera Brasil. Russell salía esta vegada primero depués de vencer el sábadu, con Hamilton d’escuderu y Verstappen per detrás terceru aprovechando la penalización de cinco posiciones a Sáinz que lu reubicó sétimu per detrás de Lando Norris. La salida foi limpia, pero non así’l pasu poles primeres curves au Ricciardo fizo una maniobra que lu llevó a chocar contra Magnussen dexando a dambos fuera. Nun sedríen los únicos en tener encontronazos en pista. A lo que vivimos el sábadu ente los dos pilotos d’Alpine, súmase equí batalles ente Verstappen y Hamilton, mui à la 2021, onde l’holandés foi penalizáu. Dambos pilotos tuvieron llueu que remontar puestos y anque Hamilton tuvo mayor fortuna y pudo ponese segundu gracies al bon rendimientu del coche, cuidamos qu’ensin l’incidente la victoria yera posible. Tamién tuvieron un choque en pista Norris y Leclerc, con penalización pa Norris. Leclerc tuvo tamién de remontar posiciones y hai que destacar el llabor del monegascu que, pesie a nun metese nel podiu, tuvo una carrera bastante complicada y pudo ser cuartu.

Norris nun diba ver tampocu la bandera a cuadros, nun fin de selmana mui negativu pa McLaren. Un problema col motor lu dexó fuera y provocó ún de los dos coches de seguridá del gran premiu. Con dambos pilotos McLaren fuera de carrera y Alpine sumando puntos con Ocon y Alonso (fueron quintu y octavu) la pelea pol cuartu puestu queda yá práuticamente nes manes d’Alpine. Foi un gran premiu con muncha estratexa. El sábadu, Max Verstappen y Latifi fueron los dos únicos pilotos que montaron gomes medies pa la carrera, dalgo que llueu se comprobó nun yera la meyor opción. Mercedes supo deprender de lo que pasó en México y una suma de bones aiciones colocó a los sos dos pilotos no más alto del podiu. Foi una carrera mui bien trabayada pol equipu y por dambos pilotos y testimoñu de que, anque tarde pal campeonatu 2022, Mercedes ta de vuelta y ye candidatu seriu pa 2023.

Ferrari supo esprimir al máximu les sos opciones, con Sáinz siendo terceru y Leclerc xusto per detrás. Sicasí viviéronse dellos momentos tensos col monegascu, que pidió que lu dexaren pasar a Sáinz p’atropar más puntos que Pérez na so llucha pol segundu puestu nel campeonatu dalgo que l’equipu nun permitió por consideralo arriesgao. Y ye que xusto per detrás de Leclerc a pocu más d’un segundu veníen Fernando Alonso, que fizo una carrera excelente, y Max Verstappen. Red Bull tuvieron un momentu asomeyáu, con Pérez solicitando que Verstappen lu dexara pasar pa poder sumar más puntos que Leclerc, pero pesie a les peticiones del equipu, Verstappen nun ayudó al so compañeru, cola consecuente polémica que vendría depués. Quedaron sextu y sétimu.

Nun hubo más abandonos que los yá nomaos. Aston Martin sumó un puntu con Lance Stroll, pesie a que Vettel tinía bona disposición pa tener puntuao esta vegada. L’alemán tuvo dalgo meyor na carrera del sábadu. Nengún de los AlphaTauri entró nos puntos y sólo’l Alfa Romeo de Bottas pudo sumar. El finlandés tuvo muncho meyor rendimientu’l domingu que lo que vimos el restu de díes d’esti fin de selmana nel que paecíen tar desapaecíos. Nengún de los pilotos de Williams sumó puntu dalu.

Abandonamos Interlagos pa poner rumbu al desiertu y a la última carrera del añu. Cuidamos qu’Abu Dhabi nun va tener nada que ver colo que foi 2021, pero esperamos que seya un bon zarru pa una temporada que yá casi toca’l so final. Nun escaezáis que tamos editando’l nuestru post de la silly season tol tiempu pa que tengáis tola información de los cambios de pilotos y equipos pa 2023.

Davezu creyemos qu’un gran premiu, cuntando con bon ambiente y un circuitu interesante, va dar carreres intenses de les que se comenten pasando los díes. México ye ún d’esos eventos, les grades rebosen de xente cásique los tres díes, glayando pol so compatriota Sergio Pérez, pero tamién esfrutando d’un fin de selmana formuleru. Velo dende la distancia mete siempre ganes de tar ellí cellebrando, independientemente de quien gane y enantes de que llegue’l domingu albidramos que la carrera va ser (tien de ser) igual de bona que l’ambiente. Pero non. Esti añu tampocu nun foi de les meyores carreres de la temporada.

Sí que foi interesante ver cómo los equipos tiníen de facese a les condiciones especiales del entornu, con una altura superior a los dos mil metros que complica les coses a les escuderíes a la hora de preparar el coche y un gastu de gomes mui estremáu de lo que ye vezu n’otros trazaos. Tamién foi interesante la sesión de clasificación del domingu anque nun tuviera muncho de novedá: Verstappen consiguió sumar otra pole, pero nun lo tuvo cenciello. Paecía que diba ser un paséu pel asfaltu mexicanu, pero en verdá tuvo de trabayar esa vuelta rápida, depués de que los pilotos de Mercedes amosaran más velocidá’l sábadu que’l vienres. Sicasí, foi Russell quien ocupó la segunda llínia de parriella, siguíu de Hamilton y Checo Pérez. Carlos Sáinz namás pudo ser quintu y Leclerc tuvo de conformase cola sétima posición. La gran novedá d’esti gran premiu foi’l rendimientu de Valtteri Bottas que tuvo una sesión de clasificación fantástica, marcando siempre tiempos como pa tar ente los diez primeros y de fechu clasificando sextu pa esti gran premiu. En carrera namás sumaría un puntu, acabando décimu, pero podemos dicir qu’en xeneral el finlandés tuvo un bon gran premiu. Rescamplamos tamién la posición en clasificación de Daniel Ricciardo que foi oncenu, bon llugar pal pilotu de McLaren, sobre manera si tenemos en cuenta les carreres pasaes.

Dexando’l sábadu atrás, el domingu tola atención taba puesto no que pudiera pasar na recta de salida de más d’ochocientos metros y au taba la posibilidá de frenar a Verstappen per parte de Mercedes. Sicasí, dende bien ceo vimos qu’esto nun diba ser posible, y pesie a tener una bona salida, los pilotos de Mercedes nun fueron quién a superar al holandés, que nun tardó en dir abriendo brecha anque, ye verdá, con más dificultá que davezu. Russell perdió posición con Hamilton y pronto viose que la so batalla diba ser con Checo Pérez, mientres que diba ser Hamilton quien tentara de parar a Verstappen. Magar la estratexa en teoría más rápida yera, según Pirelli, a dos paraes, pronto entendimos que tolos equipos, salvo incidente, diban a tentar de facer funcionar la estratexa a una parada. Por eso vimos distintes escoyetes de gomes na salida, con Verstappen y Checo montando gomes blandes mientres los dos Mercedes montaben les medies.

El pasu les vueltes tamién nos reveló que’l desgaste, como esperábemos quiciás, yera menor de lo que s’esperaba y que les gomes blandes aguantaben más de lo que cuidábemos de primeres. De fechu, el tramu que munchos pilotos ficieron con esti compuestu foi bastante más llargu de lo que se prevía. Viendo los ritmos que marcaben los pilotos abultaba que Verstappen tinía la carrera controlada, pero al dir con estratexa estremada a la de Mercedes, too yera posible. Nun circuitu au, amás, ye complicao adelantar, toles esperances taben puestes no que pudiera pasar nes paraes p’alterar un pocu l’orde de salida. De fechu, previo a les paraes, tuvimos interesantes mesaxes de radio ente equipu y pilotos, nos que Hamilton resaltaba lo bien que taben les sos gomes mientres que Verstappen señalaba que tinía problemes con elles.

Foi na vuelta ventiséis cuando entamó’l baille de paraes na cabeza, cola primer parada de Red Bull a Max Verstappen pa montar gomes medies. Nun diba tardar muncho n’entrar Hamilton, bastante primero de lo qu’esperábemos cuntando con que, como dicía’l pilotu, les sos gomes taben bien. Esa parada temprana apuntaba quiciás a una estratexa a dos paraes, que nun paecía tener munchu xacíu viendo lo que ficiera Red Bull, pero cuando vimos que Hamilton primero y Russell depués montaben gomes dures, entendimos que l’equipu alemán diba tirar hasta’l final con elles. Dende esi momentu sucediéronse mesaxes de disconformidá de dambos pilotos, por nun ser quién a facer funcionar les gomes dures igual de bien que ficieren coles medies, cuestionando asina la escoyeta del equipu. Ye más, depués de que Hamilton entrare, Russell quixo camudar la estratexa y tirase a montar gomes blandes, pero l’equipu nun lo permitió. L’argumentu de Mercedes yera que Red Bull, montando les gomes medies tan pronto, nun diba poder llegar con elles n’óptimes condiciones, que’l desgaste diba facer que tanto Verstappen como Checo fueran perdiendo ritmu y, asina, los dos pilotos de Mercedes diben poder aprovechase d’esi baxón y, con gomes menos gastaes, diben poder pasalos en llegando les últimes vueltes del gran premiu. Colo que nun cuntaben en Mercedes ye cola bona xestión de gomes per parte de Verstappen, que cola distancia que tinía colos sos rivales pudo permitise curiar les gomes pa torgar el so desgaste hacia’l final del gran premiu.

Y asina tuvimos lo que quedó de carrera, dende alredor la vuelta trenta, hasta’l final, esperando esi baxón de forma de les gomes de Red Bull que prometía Mercedes pero que nunca nun llegó. Hai que dicir que Mercedes, l’equipu, creyía firmemente na estratexa y asina fueron repitiendo en mesaxes a los dos pilotos que nun facíen más que comentar que nun taben cómodos col compuestu más duru.

Pola parte medio de la tabla tuvimos tamién actividá, con dellos adelantamientos y lluches intenses por posición y dalgún qu’otru incidente, como’l de Gasly con Stroll, a poques vueltes del empiezu de la carrera, qu’acabó con una penalización pal francés por echar a Stroll de la pista, ya’l de Ricciardo con Tsunoda, qu’acabó col australianu tamién penalizáu. La verdá ye que nun s’entendió mui bien lo que pretendía’l pilotu de McLaren cola maniobra que fizo pero acabó cola carrera del pilotu d’AlphaTauri, que depués del choque tuvo d’abandonar. Quedaben venti vueltes ya’l McLaren tinía más ritmu que l’AlphaTauri. Ricciardo recibió diez segundos de penalización y depués de la so parada fizo funcionar bien les gomes y abrió una brecha de más de diez segundos col siguiente pilotu, lo que lu ayudó a conservar la sétima posición en parriella. Foi un bon fin de selmana pa McLaren porque, anque Norris tuvo dalgo más desapaecíu, tamién puntuó y Alpine namás sumó con Ocon. Fernando Alonso acumuló otru abandonu depués de que’l motor del so monoplaza rompiera a seis vueltes del final provocando un coche de seguridá virtual que nun camudó muncho la situación de carrera. L’asturianu taba teniendo hasta esi momentu una bona carrera, anque ye verdá qu’hacia la vuelta sesenta fuimos viendo como’l rendimientu del so monoplaza diba baxando hasta acabar nel abandonu.

No cimero nun hebo cambios depués de les paraes: Verstappen nun abandonó la primer posición, Hamilton cásique nun recortó distancia con él en segunda, Checo tuvo oportunidá d’arrimase a Hamilton y disputa-y la posición demientres cásique tola carrera pero pocu a pocu foi perdiento tarrén y Russell nunca nun pudo poner n’apuros al mexicanu. Per detrás, tanto Sáinz como Leclerc remataron la carrera quintu y sextu, sin munchu ruíu y tampocu muncho que cellebrar más allá de, nel casu del madrilanu, terminar una carrera ensin incidentes. Ricciardo foi, como yá diximos, sétimu y Ocon octavu. Norris y Bottas zarraron la clasificación de los diez primeros. Pela parte baxo quiciás señalar el probe rendimientu d’Aston Martin equí, mesmo que Haas, que yá veníen comentando que diben tener poques oportunidaes nesti trazáu. Nun hubo más abandonos que los dos señalaos de Tsunoda y Alonso.

Dexamos México y descansamos un par de selmanes hasta poner rumbu a Brasil, escenariu de munchos grandes premios d’esos que sí queden na memoria de la xente formulero. Con entá delles batalles abiertes, Hamilton y Mercedes entá pendientes de ganar una carrera esta temporada y Verstappen queriendo marcar otru récor, en verdá abulta que vamos tener un gran premiu de Brasil bien interesante. Nun escaezáis que, mientres llega’l gran premiu de Brasil, podéis echar un güeyu al nuestru post de la silly season que siguimos editando coles últimes novedaes de pilotos ya equipos pa 2023.

Tenemos por vezu pensar que dende que’l campeonatu de pilotos de F1 ta resueltu la emoción de les carreres y les ganes de competir desapaecen. Pero eso ye porque nun somos pilotos profesionales y nun enfocamos cada carrera como si fuera un campeonatu en sí mesma. El COTA tornó a l’actividá esti fin de selmana y féxolo pola puerta grande: ún de los grandes premios más entreteníos de la temporada. Y ye que, anque’l ganador foi’l de siempre cola superioridá de cásique siempre, esta vegada tuvo más d’un rival pa complica-y la faena.

Foi un fin de selmana de muncha actividá nel COTA, con munchos pilotos debutando’l vienres na F1 y una sesión de clasificación qu’una vegada más confirma lo que yá sabíemos: Ferrari tien un coche mui potente en clasificación pero esi potencial paez tar ausente de les carreres. Y ye que Carlos Sáinz foi’l pilotu más rápidu del sábadu con Leclerc xusto per detrás en segundu llugar. El monegascu sicasí tenía penalización de diez posiciones, polo que Sáinz diba tar solu na so defensa de la pole con Max Verstappen saliendo detrás.
Nun yera Leclerc l’únicu con penalización. A él sumábense Alonso, Pérez, Zhou y Ocon, que saldría del pitlane.

Con una audiencia récor que confirma que la F1 yá ta completamente integrada nos EEXX, entamó un gran premiu’l domingu nel que Red Bull podía sellar tamién el campeonatu de constructores, dalgo que alquiría doble significáu depués de conocese la muerte del fundador de la marca Dietrich Mateschitz. La salida de Verstappen foi bastante meyor que la de Sáinz qu’al llegar a la primer curva yá taba batíu pol holandés, pero les aspiraciones del pilotu madrilanu quedaron ehí depués de que Russell chocara escontra él. El pilotu inglés quexóse pola radio de que’l de Ferrari lu zarrara, pero depués de la carrera disculpose pola so aición y ye que l’inglés salió un pocu descontroláu, cola vista puesto namás en pasar al so compañeru d’equipu, col que diba casi en paralelo na salida (depués de que Hamilton saliera terceru y Russell xusto per detrás gracies a la penalización de Pérez).

La carrera de Russell quedó un pocu tapada pol rendimientu del so compañeru d’equipu y pola penalización de cinco segundos que recibió pol choque con Sáinz. Hamilton convirtióse nel principal rival de Max Verstappen pola victoria, con un Leclerc tentando de remontar posiciones y amosando que’l rendimientu del Ferrari nesti gran premiu yera meyor que n’otros, sobre manera na xestión de les gomes. Pocu consuelu pa Carlos Sáinz que nin siquier pudo pasar de la primer curva y tuvo d’abandonar depués del toque con Russell que-y causó un pinchazu y daños nel radiador. L’ingles, pela so parte, pudo siguir ensin problema col coche pero con penalización. Vimos dalgún qu’otru baile de posiciones ya incidentes menores en pista nos primeros momentos de carrera, como’l que fizo que Pérez perdiera el flap drechu del alerón delanteru nun adelantamientu a Bottas. La suerte pal mexicanu foi que la pieza se soltó rápido y pudo continuar ensin problema.

Tenemos de destacar l’aniciu de carrera de Lance Stroll, que clasificó mui bien el sábadu y tuvo bon ritmu’l domingu, mesmo que’l so compañeru d’equipu. El canadiense, sicasí, diba ser protagonista más tarde d’un accidente que lu diba dexar fuera de carrera. Les primeres vueltes, como dicimos, tuvieron marcaes pol abandonu de Sáinz y pola ventaya que diba garrando Verstappen con respeutu a Hamilton.

Llevábemos cinco años ensin ver coche de seguridá nel gran premiu d’Estaos Xuníos, y abultaba qu’esti diba ser el sextu. Pero como les estadístiques tán pa rompeles, nesti eventu tuvimos non ún si non dos coches de seguridá. El primeru provocolu una salida de pista de Valtteri Bottas, que quedó atascau na graviella ensin posibilidá de salir. Esti coche de seguridá beneficiaría, pa variar, a Ferrari, que pudo montar gomes nel coche de Charles Leclerc ensin tanta penalización de tiempu. La mayoría de los pilotos ya equipos evitaron montar el neumáticu blandu sacante esceiciones como Russell a última hora tentando de sumar la vuelta rápida de carrera. La diferencia de velocidá ente la goma blanda y la media yera mui pequeña, pero’l desgaste de la blanda mui grande, por eso los equipos y pilotos cásique nin se plantegaron usar el neumáticu blandu. Esti primer coche de seguridá tamién propició la parada de Sebastian Vettel, que como diximos enantes, tuvo un bon rendimientu demientres tol domingu.

El segundu coche de seguridá apaecería delles vueltes más alantre, na ventidós concretamente, depués d’un choque ente Fernando Alonso y Lance Stroll. L’asturianu diba adelantar al pilotu d’Aston Martin, futuru compañeru d’equipu, cuando ésti movió’l coche lixeramente a la izquierda, lo suficiente pa que’l coche d’Alonso chocara contra’l d’él, provocando un accidente espectacular pero ensin consecuencies pa los pilotos más allá del abandonu en casu de Stroll. El restu de pilotos tuvieron bien rápidos n’esquivar el coche ensin control del canadiense y nun tuvimos nengún abandonu más por cuenta d’esti incidente. Fernando Alonso entró a cambiar l’alerón delanteru y tal paecía que diba abandonar, pero l’asturianu decidió acabar la carrera y foi protagonista d’una de les remontaes de la carrera, quiciás la más inesperada. Acabó siendo sétimu pero una reclamación por parte de Haas al términu del gran premiu lu acabó sacando de los puntos. La escudería americana reclamó que’l coche d’Alonso nun taba en bones condiciones pa competir y ye verdá que nun momentu del gran premiu’l espeyu retrovisor drechu del asturianu salió volando, pero la FIA nun paeció considerar que yera peligroso demientres se desenvolvía la carrera. Sicasí, como dicimos, n’acabando’l gran premiu decidieron oyer les reclamaciones de Haas, que tamién se quexó de Pérez, y penalizaron al asturianu. Pal pilotu de Red Bull nun hubo consecuencies.

Depués del coche de seguridá llegaríen quiciás los momentos más interesantes no que cinca a la competición en pista ente los pilotos con Leclerc adelantando a Pérez y Hamilton lanzando un undercut (una parada enantes de que lo faga otru pilotu) a Verstappen. L’inglés amás tuvo la suerte de que Red Bull cometió’l so primer erru de tola temporada na parada inmediata de Verstappen, que retuvo al holandés más tiempu del normal en boxes, dalgo que provocó que tamién lu adelantara Leclerc ya l’enfadu del pilotu. Tuvimos unes vueltes mui intenses nes que Verstappen tinía de recuperar al tarrén perdíu y Hamilton tentar d’abrir brecha tolo que pudiera porque sabía que dende que Verstappen lu tuviera a tiru, diba ser imposible que lu aguantara. Y asina foi. L’holandés desfízose rápido, anque con trabayu, primero de Leclerc y llueu de Hamilton. Dambos pilotos vendieron caro la posición y protagonizaron dellos momentos de llucha en pista bien interesantes.

Pero nun teníemos sólo interés no cimero. Per detrás tuvimos bien d’adelantamientos como los protagonizaos por Norris que lu terminaron colocando en sextu lugar, sumando un bon puñáu de puntos qu’amenorguen la distancia con Alpine nel campeonatu de constructores. Sicasí, McLaren tien complicao conseguir esi cuartu llugar nel campeonatu con sólo un pilotu sumando puntos. Ye verdá qu’Alpine namás sumó un puntu col décimu puestu d’Ocon, pero ye insuficiente. L’equipu inglés precisa sumar con dambos pilotos, dalgo que de momentu paez complicao. Ricciardo sólo pudo ser décimosextu.

Otru que destacó foi Kevin Magnussen, qu’aguantó con unes gomes mui vieyes y sumó bonos puntos pa Haas, quedando octavu cola penalización d’Alonso. Falando de penalizaciones, tuvimos un ensinfín d’elles: Gasly tuvo una penalización de cinco segundos que llueu se tornó en diez por nun servila apropiadamente, Latifi tamién sumó cinco segundos de penalización por sacar de pista a otru pilotu, Schumacher otros cinco por superar los límites de pista y Albon otros cinco por salise de pista y ganar ventaya con ello ensin devolver la posición. Los cuatro, aparte d’Alonso, quedaron fuera de puntos.

Nun podemos rematar esti resumen ensin falar de Sebastian Vettel que terminó siendo sétimu y llegó a lliderar la carrera coincidiendo col momentu nel que Hamilton llanzó l’undercut a Verstappen que provocó sucesives paraes. L’alemán despidióse de la F1 nel COTA por tolo alto, alcanzando esi sétimu llugar nos últimos metros del gran premiu enantes de ver la bandera a cuadros.

Victoria pues pa Verstappen y campeonatu pa Red Bull, el primeru depués d’años de dominiu de Mercedes. Entavía queden tres carreres pa rematar esta temporada ya ensin descansu ponemos rumbu a México deseyando ver otra carrera tan intensa como la que tamos acabantes de vivir nel COTA. Nun escaezáis que siguimos actualizando la información sobre la silly season nesti post y qu’al final de la selmana publicamos la información básica del gran premiu de Méxicu 2022.