Arranca la temporada 2018

Cuando termines una temporada de Fórmula Uno p’allá pa payares, siempre paez que queda una eternidá pa empezar a ver los coches otra vegada en pista. Pero equí tamos otra vuelta más, a piques d’entamar una temporada nueva y a pocos díes de que los coches arranquen motores nos test de pre-temporada.

Y ye que cásique paez que la Fórmula Uno nun terminara pues tuvimos noticies cada pocu, que los equipos diben dando como a cuentagotes. Tenemos la parrilla de pilotos y d’equipos yá zarrada (nun siendo que dalguién cambie a última hora) y tamién calendariu de test y de carreres. Y, pa nun variar, tenemos polémiques. Sí, ye verdá, yá arranca la Fórmula Uno.

Vamos empecipiar polos equipos y pilotos qu’esti añu vamos ver nos circuitos. Nun hai grandes cambios nin nengún nuevu, anque sí dellos cambeos de nome. Podéis atopar tolos datos nesta páxina.

Williams va ser el primeru n’enseñanos el coche col qu’aspiren a ameyorar lo visto la temporada pasada. Al final, l’equipu de Claire Williams decidió subir al coche al rusu Sergei Sirotkin pa facer pareya con Lance Stroll. Una apueste firme pola mocedá que nun sabemos cómo va resultar pal equipu inglés. El fichaxe de Kubiça que tanto s’anunciaba quedóse n’un puestu como pilotu reserva y probador na escudería, dalgo qu’ensin duldes sabe a pocu dempués de tolo que se faló del so retornu a la competición formulera.

Tolos focos tán puestos enriba de dos equipos principalmente: al marxe de Mercedes y Ferrari, qu’albidramos van tar no cimero de les clasificaciones dende bien ceo, l’atención tamién ta puesta en Toro Rosso (agora Red Bull por petición d’Honda) y, cómo non, en McLaren. Les razones son obvies: los cambios de motorista pa dambos equipos ya’l resultáu que puean tener. Si nos fiamos de lo que vimos en temporaes pasaes, lo suyo yera qu’en Toro Rosso tuvieren de tar más preocupaos porque Honda tuvo lloñe d’amosar un bon rendimientu. Ensin embargu, hai tiempu que les suposiciones dexaron de funcionar y nun queda más qu’esperar a velo en pista pa confirmalo. ¿Sedrá quién Honda a facer un bon papel con otru equipu? ¿Sedrá Renault quién a devolver a McLaren a los puestos qu’opten a podiu? ¿Sedrá too un desastre? Nun queda muncho pa dir respondiendo a estes entrugues.

Otru equipu d’interés ye Force India (de momentu vamos nomalos asina anque anden a la gueta d’un nome nuevu), que nes pasaes temporaes fexo un perbón trabayu y que tienen una de les pareyes de pilotos más interesantes de la parrilla. Tamién tenemos ganes de ver a Charles Leclerc conduciendo un Fórmula Uno como pilotu oficial, de la mano d’Alfa Romeo-Sauber, otra combinación d’equipos míticos qu’esperamos funcione meyor de lo que l’añu pasáu funcionó Sauber.

Col aniciu d’una temporada, la verdá ye que tolos equipos más o menos creen interés pa la xente qu’intenta ver, n’unos test que munches vegaes nun dicen nada anque otres falen por sí mesmos, per onde va dir la temporada. Pa nós les apuestes son clares hasta que pase lo contrario: los principales candidatos al títulu van ser los Mercedes y los Ferrari. En cuantes a los pilotos…la opción cenciella ye pensar en Hamilton como máximu aspirante a ganar el so quintu campeonatu, pero nun dar creitu a Vettel paeznos un erru. De la mesma forma, anque con menos convencimientu, paeznos que Bottas podría tener dalgo que dicir.

Nun queremos escaecer a los pilotos Red Bull. Con un bon coche Ricciardo y Verstappen opten a too, asina que nun sería d’estrañar que tuvieren tamién no cimero. Pela parte media la cosa va tar más reñida y esti añu nun tenemos tan claro qué equipu va tar na última posición.

El calendariu d’esti añu ye intensu (podéis consultalu equí) con munches carreres siguíes qu’ensin duldes son un prestu pa la xente que les ve dende casa o que va al circuitu. Amás de los clásicos (Silverstone, Monza, Suzuka…) tenemos ganes de ver si Baku nos sorprende con otra carrera como la del 2017 onde pasó de too. El retornu d’Alemaña y Francia al calendariu ye siempre una bona noticia anque sigue ensin convencenos el zarrar con Abu Dhabi.

Pa rematar esti primer post de la temporada, nun queríemos dexar fuera una de les noticies de la temporada: Fernando Alonso, pilotu McLaren, va competir nel WEC, el campeonatu de resistencia qu’inclúi les 24 hores de Le mans y qu’esti añu fai una supertemporada de transición qu’empieza y acaba con dambes cites de la épica prueba francesa. Lo que nun pasaría de ser una noticia más y la obviedá de qu’a Alonso yá nun-y val sólo cola F1 como antaño, convirtióse en polémica cuando los organizaores del GP de Fuji (de los mesmos propietarios que l’equipu Toyota), que ta dientro del WEC, decidíen cambiar la fecha de cellebración del so eventu pa que nun-y coincidiera al pilotu asturianu col calendariu de F1. Y ye que la condición principal pa qu’Alonso combine dambes categoríes per parte de McLaren ye que la Fórmula Uno seya lo primero y Fuji coincidía en feches col GP de los Estaos Xuníos.

Como ye lóxico, munches persones manifestaron el so maltar por esta decisión que nun ye cosa del pilotu pero que dexa claro l’interés que mueve al WEC que ta n’hores baxes tres la marcha de Porche con Toyota como únicu constructor dientro la categoría reina, los LMP1, a la espera de confirmación d’equipos privaos. Ensin embargu, paeznos que’l fechu de cuntar con un reclamu como ye Fernando Alonso nun debiera facer que los organizaores o quienes decidan estes coses dexen de pensar en los milenta pilotos que tamién compiten n’otres tantes categoríes y que se vieron afeutaos d’una forma o otra por esti cambeu. Alonso nun ye un pilotu que necesite de favores pa demostrar nada a estes altures de la carrera y hai munchos corredores que lleven apostando per bastante tiempo nestes series. Nun hai qu’olvidar tampoco l’efectu en cadena que provoquen estos movimientos, forzando el cambiu de fecha del eventu correspondiente de Super GT y una colisión del WEC con DTM y The Petit Le mans.

De toles formes nun somos ayenos a los poderes que mueven estes coses y como dicimos, el WEC ta n’hores baxes y paez que cualquier cosa ye válido pa que se fale d’ello. Nun sabemos l’efeutu que pue tener, nin l’ésitu que va tener Alonso col equipu Toyota, favoritos a priori, pero viendo tolo que s’entamó, más-yos val que pague la pena si nun se quier perder credibilidá y atractivu.

Zarramos comentando que dientro unos díes, el llunes que vien más concretamente, empiecen los test en Barcelona, la primer toma de contautu con esta nueva temporada. N’AsturiesF1 taremos sollertes pa traevos la información más importante de lo que vaiga pasando nesos díes.

Estes son les feches y llugares de presentación de cada equipu: