Previa del Gran Premiu d’Austria 2023

Yá dexamos atrás Canadá y tornamos a Europa, yá en branu, cola vista puesta nel Red Bull Ring ya’l siguiente gran premiu de la temporada, el d’Austria.

Si yá nun nos costaba imaxinar a Red Bull triunfando en cualquier trazáu, menos cuesta imaxinar una victoria nel circuitu de casa, ún que Max Verstappen domina y nel que yá tien ganao. Col públicu de la so parte y un coche que nun falla, ye difícil pensar n’otru pa la victoria. Sicasí, munches voces defenden que la superioridá del equipu de la bébora enerxético yá nun ye tan grande, como vimos en Canadá, y que pasín ente pasu’l restu d’equipos tán averándose a ellos. Abúltanos imposible que seya suficiente pa poner en peligru cualquier de los dos campeonatos, pero quiciás sí pa competir por dalguna victoria esta temporada. ¿Llegará’l día esta temporada nel que veamos a otru que nun seya un pilotu de Red Bull no cimero del podiu? Como dicen los que saben “el tiempu dirá”.

N’Austria taremos sollertes sobre too a dos equipos. Per un llau, Aston Martin, que comenten que pudieran tener dalgo más de ritmu qu’en Canadá hai dos selmanes au Alonso terminó segundu. Per otru, McLaren, que creen que yá ye momentu de que les meyores que tán trayendo al so monoplaza entamen a funcionar y los resultaos a vese. Ye verdá qu’en Canadá la penalización de Norris dexolu fuera de los puntos y a McLaren ensin sumar, pero yá nun ye raro ver a ún o a los dos coches na Q3 y tampocu nos puntos. Partieron dende posiciones mui baxes, entavía tienen muncho que trabayar per delantre, sobre too cola meyora nel estáu de forma d’Alpine que paez que s’afianza nesi quintu llugar del mundial de pilotos. L’equipu francés, pela so parte, aseguróse una inversión d’alrodiu los 200 millones d’euros que de xuru van venir perbién pal desenvolvimientu futuru de la escudería.

Tamién hai interés por ver hasta au puede llegar Williams coles sos nueves meyores agora, en teoría con dambos coches. Yá vimos en Canadá a Albon acabar sétimu, con un coche que llevaba delles actualizaciones. En principiu nun tardaremos en ver eses mesmes meyores nel coche de Sargeant, anque nun sabemos si’l pilotu estauxunidense podrá ponese al altor del rendimientu del so compañeru d’equipu, un retu bastante grande viendo les sos actuaciones hasta’l gran premiu de Canadá. Otru que tamién tien muncho qu’amosar ye Nyck de Vries, del que siguimos falando previa tres previa y carrera tres carrera, ensin poder falar d’una gran actuación como vimos l’añu pasáu en Monza cuando tuvo una única oportunidá de ponese al volante d’un F1 que nun conocía y puntuó. Quiciás punxo’l llistón altu enforma y eses espeutatives que se crearon por cuenta d’esi gran premiu son tan altes que’l pilotu nun ta sabiendo cumpliles con un coche como l’AlphaTauri que, de momentu, zarra la clasificación de constructores.

El Red Bull Ring ta allugau nes montañes austriaques de Spielberg y ye ún de los más curtios y rápidos del calendariu. Como ye lóxico, ye territoriu Red Bull y les grades suelen enllenase de los sos aficionaos que les tiñen de naranxa n’honor a Verstappen. El récor de vuelta del circuitu tienlu Carlos Sáinz con 1:05.619, consiguíu en 2020. L’añu pasáu tuvimos carrera al sprint nesti trazáu, que ganó Max Verstappen. L’holandés fue llueu segundu per detrás de Leclerc na carrera del domingu. Alcordaivos qu’esti añu tamién tenemos carrera al sprint, la segunda de la temporada y que se caltién el plantegamientu nuevu d’aisllar tol eventu de sprint el sábadu. Ello ye, el vienres habrá llibres 1 y la clasificación pal domingu, y llueu’l sábadu la clasificación pa la carrera al sprint y la carrera. Más abaxo vos dexamos los horarios pa que nun perdáis detalle. Amás, hai probabilidá d’agua pal fin de selmana, sobre manera’l sábadu con un 80%, dalgo más baxo’l vienres, un 60 y muncho menos el domingu, con un 20%.

Equí vos dexamos tola información sobre horarios ya’l circuitu pa esti fin de selmana:

Ya estes son les gomes que van usar los equipos pa tol gran premiu: