Previa del Gran Premiu de Canadá 2023

Saltamos l’Atlánticu otra vuelta, pero esta vegada xubimos hasta Canadá, a Montreal, pa un nuevu gran premiu nun de los circuitos míticos del calendariu, el Gilles Villeneuve.

Son munches les voces que yá dan el campeonatu por decidíu no que cinca al primer puestu, Verstappen lliderando con cincuenta y tres puntos de ventaya sobre’l so compañeru Sergio Pérez y l’equipu con ciento treinta y cinco puntos perriba Mercedes. Ta claro que la batalla por ganar los campeonatos nun pinta emocionante si les coses siguen como hasta agora, pero aterrizamos en Canadá y la predición ye d’agua. Nel pasáu yá tuvimos carreres inesperaes con podios sorprendentes gracies a la meteoroloxía, por exemplu, la carrera de 2011 o mesmamente l’añu pasáu con Alonso segundu en clasificación con un Alpine.

Amás, el Gilles Villeneuve ye un circuitu estremáu a Montmeló, polo que lo que vimos hai dos selmanes nun va tener espeyu equí, au les parees tán mui averaes y munchos de los pilotos acaben dexando la so güelga na Muria los Campeones, munches vegaes acabando ehí la so carrera. Ye amás un circuitu nel que davezu vemos munchos adelantamientos y nel que los frenos van sufrir enforma. Veremos de qué forma enfoquen los equipos una de les carreres preferíes del calendariu.

Red Bull lleguen a Montreal, como yá diximos, cola tranquilidá de sabese superiores y cola única dulda de si Sergio Pérez en dalgún momentu va tornar a les victories y va ser quién a poner n’apuros a un Max Verstappen que nesti momentu abulta imbatible. El mexicanu tien nes sos manes una xera complicada con un coche mui rápidu al que nun ta sabiendo sacar tol potencial en delles ocasiones.

Mercedes, pela so parte, vienen de xubir a los dos caxones del podiu en Barcelona, pero cola necesidá de replicar en Canadá lo que se vivió nel circuitu catalán pa confirmar que, en verdá, les sos meyores tán funcionando bien. L’añu pasáu vivieran dalgo asomeyao cuando en Montemló tuvieron una bona carrera que nun pudieron replicar en Canadá y esti añu cuiden nun pasar polo mesmo.

El dueñu d’Aston Martin, Lawrence Stroll, manifestaba’l so suañu de tener un doble podiu de los sos dos pilotos nel gran premiu de casa pa él y pal so fíu, Lance Stroll, pilotu del equipu. Anque Alonso comenta que ye dalgo que ta complicao, ye verdá que si hai una carrera con agua y viendo’l potencial del coche nesti 2023, nun hai razones pa pensar que nun pudiera dase. Lance Stroll va correr cola motivación estra de quien cuerre en casa, polo que nun sedría raro velu compitiendo pol podiu o, tamién, xubiéndose a él.

Ferrari nun ta siendo quién a dar cola tecla pa recuperar el rendimientu que-y vimos l’añu pasáu y del qu’esti añu cásique entavía nun vimos nada. Lo peor d’esti momentu pal equipu ye la frustración que pueden entamar a sintir los dos pilotos que ven como les poques oportunidaes que tienen de xubir al podiu desapaecen pola falta de competividá del so monoplaza en carrera. Yá nun ye que tengan a Red Bull a años lluz ye qu’amás tán pasando Mercedes y Aston Martin perriba d’ellos. En Canadá casi nos abulta que van tener que tar más pendientes de los que vengan per detrás que de lo que pasa per delantre.

N’Alpine son optimistes en Canadá porque van viendo que les sos meyores funcionen y tán consolidando la so quinta posición nel mundial, yá saquen ventitrés puntos a McLaren. Amás, viendo les debilidaes de Ferrari, nun tendrían por qué conformase con ser quintos na clasificación y si l’agua acompaña en Canadá podríen ser otru de los equipos beneficiaos de les condiciones cambiantes p’atropar una bona cantidá de puntos.

Nun sedría raro ver a McLaren otra vuelta no más alto en Canadá si l’agua apaez nel circuitu. El coche del equipu de Woking agradez les temperatures más fresques y una fin de selmana con agua podría ser lo que precisen pa volver a repetir un resultáu como’l d’Australia o incluso aspirar a otres coses más altes si se dieran les circunstancies. Van tenelo complicao pero esti añu l’equipu paez tar sentenciáu a conformase con esti tipu de situaciones y si les saben aprovechar, podríen compensar el baxu rendimientu que tán teniendo en munches carreres.

Haas ta teniendo una temporada que nun termina de definise. Tán faciendo bones sesiones de clasificación con Nico Hülkenberg y los domingos tán teniendo un bon rendimientu, en xeneral, con Kevin Magnussen. Bon llabor d’equipu ensin duldes, pero que sabe a pocu. L’equipu estauxunidense tán sétimos na clasificación pero empataos con Alfa Romeo, qu’entavía tampocu nun dio cola clave p’ameyorar el so rendimientu en carrera. Depués de la primer carrera en Sakhir donde Bottas fizo un bon papel, nun viemos muncho más del equipu hasta la última carrera en Barcelona au Zhou sumó los primeros puntos de la temporada. Ye Alfa Romeo otru equipu de los que precisa un pasu alantre necesariu si quier siguir cerca de McLaren, que marca un pocu la fin de la zona media de la tabla.

Nes pasaes carreres vimos a Yuki Tsunoda sacando partíu a un coche que nun termina de funcionar como s’esperaba. Nyck de Vries sigui atrapáu na so propia batalla por ameyorar y superar al so compañeru, y yá lo fizo en dalguna carrera, pero ensin sumar puntos, abulta insuficiente pa los intereses del pilotu y d’AlphaTauri. Pela so parte Williams suma carrera tres carrera ensin asomase a los puntos, a vegaes por mala suerte otres por errores evitables que los conderguen a zarrar la clasificación. L’equipu inglés llega a Canadá con munches meyores y cola esperanza d’aprovechar qu’esti circuitu s’adauta a les calterístiques del so monoplaza. Amás, si l’agua apaez, podría significar otra oportunidá pa la escudería de sumar dalgún otru puntu.

Too preparao pues pal gran premiu de Canadá d’esti 2023, el novenu del calendariu, nun escenariu qu’encanta a munchos y que nos tien dexaos momentos pa la historia. Ye un circuitu nel que la xestión de gomes y frenos va ser mui importante, y que ye bastante más téunicu de lo qu’abulta polo que pa los rookies que nunca nun compitieron equí, el trabayu nel simulador va ser vital. Nun escaecemos les previsiones d’agua pal fin de selmana que de xuru van tocar los planes de los equipos, les estratexes y, quiciás, el rendimientu de los monoplaces en pista.

Más abaxo vos dexamos tola información que precisáis pa nun perder nada d’esti gran premiu. Alcordaivos que tornamos al horariu de tarde-nueche:

Y equí vos dexamos tola información de les gomes que se van usar nesti gran premiu: