Gran Premiu de Mónaco 2023

Les carreres en Mónaco, yá primero de que pasen, tán arrodiaes d’un dalgo especial, vamos nomalo ser ún de los circuitos míticos del calendariu, que fai que siempre queramos vinir anque sepamos que, quiciás, nun vamos vivir la meyor de les carreres del añu.

Esti añu aterrizábemos en Montecarlo un pocu con esi sintir y la verdá ye que la carrera, anque más entretenida de lo que cuidábemos, quedó na solombra de una sesión de clasificación au casi nun pudimos nin pestañiar. Lo meyor de too foi ver una retafila de pilotos sumando vuelta rápida tres vuelta rápida siempre cola tensión de saber qu’una bandera colorada podía camudalo too. Pero non, esta vegada pudimos esfrutar la última parte de la clasificación ensin torga dala. Eso sí, nun empezó bien pal Red Bull de Sergio Pérez.

SÁBADU

El podiu ocupáronlu estos tres pilotos, vieyos conocíos de les sesiones de clasificación, pero tuvimos un protagonista inesperáu nel Alpine d’Esteban Ocon, que tuvo la pole provisional (y eso a vegaes en Mónaco significa consiguila dafechu si hai bandera colorada) nuna xornada excelente pal pilotu francés y pal so equipu, qu’anda n’hores baxes y con crítiques internes que nun ficieron bien al ánimu xeneral. Sicasí, Ocon nun pudo quedar ente los tres primeros, pero sí clasificaba cuartu, anque una penalización a Charles Leclerc por estorbar a Lando Norris cuando l’inglés taba faciendo la so vuelta llanzada na Q3 acabó col pilotu d’Alpine saliendo en tercer puestu acompañáu de Carlos Sáinz, que tuvo dellos momentos inspiraos pero que nun terminó de cuayar una vuelta competitiva.

La sesión de clasificación prometía cuando, na Q1 víemos a Sergio Pérez acabar escontra’l muru y provocar una bandera colorada. El mexicanu, que n’opinión de munchos taba arriesgando de más cuntando que namás se taba disputando la primer parte de la clasificación, acabó coles sos opciones de victoria dende bien temprano. El mundial púnxose, dende esi momentu, un pocu más de cara pa Verstappen.

El momentu emocionante protagonizáronlu precisamente’l pilotu neerlandés y Fernando Alonso. Aston Martin sólo pasara a Q3 col asturianu, depués de que Stroll nun pasara de Q1. Alonso diba marcando tiempos mui bonos anque nunca nun paecía tar nes sos manes la pole. Una última vuelta, de la que l’asturianu dixo tar “tirando como un animal”, ponía n’apuros a un Verstappen que cola so segunda intentona creyía tener yá aseguráu’l primer puestu. De fechu, tuvo de facer una tercer vuelta perfeuta pa quita-y a Alonso la pole que’l pilotu de Red Bull consiguió con un tercer seutor perfeutu.

Per detrás, destacar el llabor de Yuki Tsunoda entrando na Q3 y tamién del so compañeru Nyck de Vries, qu’anque nun pasó de la Q2, clasificó bastante meyor qu’otres vegaes, nel puestu doce. McLaren pela so parte, tornó a colar un coche na Q3, el de Lando Norris, y Piastri quedó fuera por pocu, clasificando nel puestu once. Hai que rescamplar tamién el puestu algamáu por Lewis Hamilton, que tuvo un accidente na sesión de llibres previa a la clasificación y nun paecía tar cómodu del too, pero foi quien a clasificar sextu y per delantre del so compañeru d’equipu. Mercedes trayíen a Mónaco delles novedaes col enfotu d’atropar dellos datos de xuru importantes pa un desendolcu completu en Barcelona.

DOMINGU

Lo que nun consiguió na clasificación, si foi quien a facelo na carrera. Ún de los grandes protagonistes del domingu foi, ensin duldes, Esteban Ocon. El francés consiguió’l tercer puestu depués de la penalización de Leclerc y yá nun la soltó. Per delantre, Fernando Alonso nun pudo con un Max Verstappen que dominó casi de principiu a final, anque l’agua tuvo a piques d’asolombrar la so victoria.

Y ye que, anque se falaba de que l’agua podía asomar, pocos yeren los que la esperaben, y cuando col pasar de les vueltes, les alertes entamaron a ser más evidentes, entamaron los nervios. Podemos quiciás falar de qu’hebo dos carreres. La primera, na que Max Verstappen nun tuvo problema nengún pa meter distancia con Fernando Alonso dende bien pronto y l’asturianu con Ocon per detrás. Vimos más actividá, como ye vezu, nes posiciones más baxes, au la salida, ensin ser mui problemática, tuvo dellos momentos de roces y toques ente pilotos. Sáinz tentaba de pasar a Ocon y cuntaba con bon ritmu, pero otra vuelta la estratexa de paraes de Ferrari lu condergó. Aparte, el madrilanu tuviera un toque con Ocon nel que perdió parte del alerón delanteru, anque ensin muncha consecuencia. Ente eso, dellos adelantamientos o intentos d’ello ente los Haas, los Williams y Stroll, que tentaba desesperadamente adelantar les posiciones que perdiera, sumáu a un Sergio Pérez que tamién nun vía la forma de xubir de posiciones, pasemos les primeres cincuenta vueltes ensin munchu más eventu.

Sicasí, too diba camudar cuando les primeres gotes entamaron a cayer. Dellos pilotos, como Verstappen o Alonso, nun camudaran les sos gomes y de fechu taben aguantando pa nun facer una parada y montar gomes que llueu diben tener de camudar pol agua. Nuna maniobra que naide nun entendió, cuando cásique tolos pilotos taben montaron gomes intermedies, Aston Martin consideró que tovía se podía montar gomes dures. Quiciás esti momentu supunxo que la posibilidá de victoria d’Alonso desapaeciere pues l’apuesta del equipu, anque valiente, nun valió pa nada. Tuvieron la suerte de que nun arriesgaron posición y pudieron parar a poner intermedies. Otru que tamién arriesgó no que cinca a les gomes foi Kevin Magnussen, y como Alonso, tuvo d’entrar, pero punxo gomes de moyao. El danés tuvo dellos problemes pa mantener el coche en pista, y a la fin acabó abandonando la carrera.

L’agua fexo qu’aparte de nervios viéramos munchos errores. Por exemplu, Yuki Tsunoda, que taba en novenu llugar presionáu por Lando Norris que rodaba décimu, acabó nuna escapatoria qu’acabó coles sos opciones de puntuar y metó a dambos McLaren en puntos. George Russell, recibió una penalización porque, depués de salise tamién a una escapatoria, s’incorporó de forma poco segura y tuvo un incidente con Pérez. Tamién recibió penalización Nico Hülkenberg, de diez segundos, por nun servir bien una penalización previa.

L’agua foi desapaciendo, la carrera estabilizando, y a la fin Max Verstappen consiguió la so segunda victoria en Mónaco, replicando la que consiguiera en 2021. Suma otra victoria, la cuarta de la temporada y abre más distancia col so compañeru d’equipu, que nun puntuó. El mexicanu namás pudo ser décimosextu.

Al podiu yá conocíu, lu siguió Lewis Hamilton en cuartu llugar y George Russell en quintu. Charles Leclerc nun recuperó de la penalización y acabó siendo sextu, siguíu de Pierre Gasly, que tuvo una carrera bastante más discreta que la del so compañeru pero que suma tamién puntos pal equipu, ayudando a qu’Alpine se coloque agora quintu nel mundial per detrás de Ferrari y con ventiocho puntos de ventaya con McLaren, que tamién sumó con dambos pilotos pero nos puestos novenu y décimu. Sáinz ocuparía la octava posición.

Nyck de Vries nun puntuó pero sí quedó per delantre del so compañeru d’equipu y na mesma posición qu’entamara, na doce. Alfa Romeo tampoco nun puntuó, pero Bottas quedó a les puertes del décimu puestu, mientres que Zhou acabó trece. Yá diximos que Haas namás acabó con Hülkenberg, que tres la penalización acabó nel puestu diecisiete, per delantre de Logan Sargeant que recibió una penalización por dir demasiado rápido nel carril de pit. L’equipu Williams, de fechu, tuvo una carrera bastante floxa, yá qu’Albon namás pudo acabar décimocuartu y como dicimos, Sargeant últimu. Nun vieron la bandera a cuadros Magnussen nin Stroll.

Dexamos Mónaco y yá nos ponemos en marcha hacia Barcelona, porque la F1 continúa con un gran premiu nunos díes. Demientres llega esi momentu, equí vos dexamos tolos númberos que dexó’l fin de selmana.