Gran Premiu d’Azerbaixán 2023

Depués de cuatro selmanes d’espera, tornó la F1 a los circuitos y anque esperábemos muncho de lo que pudiera pasar en Bakú la verdá ye que nun dio pa tanto como naguábemos.

Y ye que nel pasáu Azerbaixán dexó mui bones carreres, con resultaos inesperaos, y que nos facíen naguar, añu tres añu por tornar ellí. De fechu vamos siguir faciéndolo hasta 2026 depués de que la F1 firmara colos organizadores del eventu hasta esi añu. Sicasí, 2023 nun va pasar a la historia como la meyor carrera nesta pista. Pesie a los cámbeos na carrera al sprint tentando de facela más interesante ya invitar a los pilotos a arriesgar dalgo más, l’efeutu nun foi l’esperáu.

La gran sorpresa de les sesiones de clasificación foi Charles Leclerc. El pilotu monegascu confirmó lo que yá sabíemos: Ferrari rinde muncho meyor en clasificación, a una vuelta, qu’en carrera. Y anque’l domingu nun foi un desastre, sí que nun pudo colos Red Bull, como yera esperable.

Si hai dalgo que calterizó a les sesiones de clasificación, sobre manera la del vienres, foi les banderes marielles y les coloraes. Nyck De Vries foi protagonista negativu del vienres, xunto con Gasly, ya’l sábadu, Logan Sargeant quedó fuera de la carrera al sprint depués d’un accidente na sesión de clasificación pa esta carrera.

La verdá ye qu’abúltanos que resultó un pocu abrumador tener tantu eventu importante demientres el fin de selmana. Dos sesiones de clasificación, dos carreres, anque una seya más pequeña que la otra, abulta munches coses a les que tar soyertes, ensin casi descansu, yá non sólo pa pilotos si non tamién pa la xente que va a los grandes premios y quien la ve dende casa. Hai quien diz que, a la fin, con tolo malo que pueda tener, les sesiones de llibres ufren más incertidume porque realmente nunca nun sabemos, hasta’l sábadu, au tán los equipos, porque van probando estratexes, gomes, mapes de motor, etc. qu’hasta’l sábadu nun se concreten. Col formatu d’esti fin de selmana, yá’l vienres sabemos au tán los equipos, y anque nel casu de Leclerc, podíemos albidrar que nun diba poder colos Red Bull, yá restaba un pocu d’emoción al restu del fin de selmana.

VIENRES

CLASIFICACIÓN

Como yá dicíemos, la gran sorpresa de la clasificación del vienres, la que decidía l’orde pal gran premiu del domingu, foi Charles Leclerc. Yá tuvo una bona sesión de llibres el mesmu vienres y na clasificación replicó un pocu lo que yá esperábemos. Nin Verstappen nin Pérez pudieron superalu, anque naide nun duldaba que’l resultáu nun diba repetise na carrera. Per detrás de los tres primeros, Carlos Sáinz, que nun tuvo un bon fin de selmana en xeneral, anque salvó los muebles bastante bien, siguíu de Hamilton, l’únicu Mercedes qu’entró na Q3 depués de que Russell quedara fuera por milésimes. La diferencia de rendimientu de dambos Mercedes con respeutu a Australia foi mui evidente demientres tol fin de selmana, anque mesmo que fizo Sáinz, pudieron sacar puntos importantes. Aston Martin tampocu nun brilló como nos anteriores grandes premios: Alonso quedó sextu y Stroll novenu. Dambos tuvieron problemes col DRS. Entraron tamién na Q3 Norris (P8) y Piastri (P10), que confirmen la meyora, anque de momentu insuficiente, de McLaren, y Tsunoda, que continúa siendo muncho meyor que De Vries, sobre manera en clasificación.

SÁBADU

CLASIFICACIÓN PA LA CARRERA AL SPRINT

Nes sesiones de clasificación pal sprint nun hebo grandes sorpreses. Los tres primeros fueron los mesmos, anque Sergio Pérez foi quien a facer una meyor vuelta que Verstappen, y Russell foi cuartu. Destaca’l llabor d’Albon pa clasificar sétimu, per delantre d’Aston Martin ya’l McLaren de Norris, y per detrás de Sáinz y Hamilton.

CARRERA AL SPRINT

Na carrera al sprint nun vimos grandes coses, sacante los movimientos de Verstappen y Russell, que pelearon nos primeros xiros por posición. L’holandés diba terminar quedando per delantre del inglés, pero nun diba poder col so compañeru d’equipu nin tampocu con Leclerc, que partía de la pole pero nun pudo aguantar a Pérez detrás. El mexicanu amosó por qué ye ún de los meyores pilotos en circuitu urbanu faciéndose cola victoria del sábadu ensin casi problema más allá del adelantamientu a Leclerc.

DOMINGU

GRAN PREMIU

El domingu Verstappen nun tuvo los problemes del sábadu, pero tampocu nun pudo superar a Pérez. Ye verdá que’l mexicanu tuvo suerte col coche de seguridá que salió depués d’un accidente de Nyck De Vries, mientres que l’holandés entró cuando entavía nun taba fuera. Dende esi momentu, Pérez nun diba tener rival, anque Verstappen tentaría d’averase a él demientres el restu de la carrera. Sicasí, el mexicanu foi mui superior.

Per detrás, Leclerc aguantó lo que pudo a los dos Red Bull y depués, consciente del rendimientu del so monoplaza, xestionó la carrera poniendo distancia con Alonso, que terminó cuartu y tuvo gran parte de la carrera tentando d’alcanzar al monegascu. Los problemes col DRS nun afeutaron tanto al asturianu, mesmo qu’al so compañeru d’equipu, que terminó sétimu. Dambos tuvieron una carrera bastante sólida, anque Stroll tuvo dellos problemes de xestión de gomes por dalgún toque col muru.

Los Mercedes, como davezu, tuvieron meyor carrera que clasificación, anque Hamilton nun pudo con Sáinz, que terminó quintu per delantre del inglés. Russell compensó un pocu la deceición de la clasificación del vienres, anque namás pudo ser octavu. Norris foi l’únicu McLaren qu’entró nos puntos, quedando novenu per delantre de Tsunoda, que sumó l’últimu puntu. Piastri quedó a les puertes d’otru doblete de puntos de McLaren.

Alfa Romeo nun tuvo’l so fin de selmana tampocu, con dambos pilotos lloñe de los puntos, mesmo que Haas. Nico Hülkenberg apostó por aguantar tola carrera col mesmu xuegu de gomes y parar nes últimes vueltes, pero nun pudo más que ser décimosétimu. El so compañeru, Kevin Magnussen, con otra estratexa, acabó nel puestu trece. Otru que tamién escoyó aguantar cásique tola carrera coles mesmes gomes foi Esteban Ocon, que les cambió na última vuelta. La estratexa tampoco nun valió pa muncho nel so casu, pues acabó décimoquintu, xusto per detrás del so compañeru Pierre Gasly. Fin de selmana deceicionante p’Alpine ensin duldes. Williams tampocu nun puntuó.

Abandonamos les tierres d’Azerbaixán pa embarcanos camín de Miami pal viniente gran premiu na ciudá estauxunidense esta mesma selmana. Equí vos dexamos tolos númberos que dexó esti gran premiu nes cais de Bakú.