Gran Premiu d’Australia 2023

Los madrugones son l’elementu calterísticu de les carreres que se cellebren na otra punta del planeta, pero cuando dexen lo que vivimos nesti domingu de gran premiu, paga la pena’l durmir un pocu menos.

Yera vezu que los grandes premios n’Australia nos valieren pa dir descubriendo con qué llegaba cada equipu al campeonatu, si dalgún diba col pasu cambiáu o si l’otru destacaba perriba los demás. Agora que ta allugáu nel tercer llugar del calendariu, el gran premiu d’Australia presenta otres premises interesantes. El vienres foi pocu lo que pudieron sacar los equipos de los entrenamientos llibres, sobre manera de la segunda sesión por cuenta de la lluvia que quiso xunise al eventu. Llegaba’l sábadu con poques duldes, sicasí, de que Red Bull diba mui fuerte pesie a dellos momentos de Sergio Pérez que nun paecía tar tán cómodu como en Xida.

CLASIFICACIÓN

Depués de lo poco que pudimos ver el vienres nos llibres, les apuestes abultaben cencielles: lo que viéramos nes clasificaciones pasaes tinía pinta de replicase. Pero entós, aportó Mercedes. Naide nun cuntaba con nengún d’ellos pa ocupar ún de los primeros puestos na parriella de salida, menos entá dambos, y asina foi qu’acabaron escoltando a Max Verstappen depués de que l’holandés algamara una pole más trabayada qu’otres vegaes.

Pero la noticia de la sesión de clasificación nun tuvo sólo n’actuación de Mercedes, si non l’incidente de Sergio Pérez que tuvo una tercer sesión de llibres desastrosa y acabó confirmando les sospeches de que dalgo nun diba bien cuando bloquió’l neumáticu delanteru derechu, nun trazó la curva y acabó na grava ensin más que facer, quedando fuera na Q1. El mexicanu diba pasar de ser el primeru en parriella en Xida a salir últimu n’Australia. L’equipu a la fin decidió sacalu dende’l pitlane pa poder romper el parque zarráu y trabayar sobre’l coche tentando de solventar los problemes qu’arrastraba’l mexicanu demientres tol fin de selmana.

Destacamos tamién l’actuación d’Alex Albon col so Williams, que clasificó ente los diez primeros y foi quien a salir octavu na parriella del domingu, per delantre del Alpine de Gasly del Haas de Hülkenberg. Deceición grande de Ferrari que nunca nun paecieron tar cerca de los primeros puestos, sobre manera nel casu de Leclerc que suel ser un bon clasificador los sábados. Sáinz clasificó quintu y Leclerc tuvo de conformase con ser sétimu, xusto per detrás de Stroll. Los Aston Martin siguen siendo convidaos nos primeros puestos y anque esta vegada Alonso nun pudo clasificar más arriba que cuartu, amosaron bon ritmu demientres tola clasificación.

Per detrás, gran deceición d’Alfa Romeo que nun pasó de la Q1 (Bottas, de fechu, acabó últimu) y un pocu de lluz na clasificación de McLaren qu’otra vuelta pasó de Q1 con un coche, esta vegada con Lando Norris que clasificó décimoterceru.

GRAN PREMIU

Podríemos dividir el gran premiu en tres partes: dos pequeñes a los estremos ya una más llarga y menos caótica que les otres dos. Toes elles calterizaes poles banderes coloraes que fueron protagonistes del domingu. Hasta tres salides vivimos, y en dos d’elles Max Verstappen amosó que los campeones del mundu tamién tienen momentos de debilidá. Y ye que por dos veces lu pasaron na salida, primero Russell, llueu Hamilton, anque dambos pilotos de Mercedes diben acabar siendo superaos, d’una forma o d’otra pol holandés. La primer salida foi mui intensa, mui peleada y con Verstappen perdiendo hasta dos posiciones y con Fernando Alonso disputando-y la tercera. Foi pocu depués que tuvimos el primer incidente de carrera cuando Charles Leclerc acabó na grava depués d’un toque de Stroll. Duru castigu pal pilotu de Ferrari que nun termina de llevantar cabeza esti añu y lleva dos abandonos en tres carreres. Equí tendríemos el primer coche de seguridá del día. George Russell diba lliderando y yá taba metiendo daqué de distancia col so compañeru Lewis Hamilton que resistía a Verstappen y agora podía respirar un pocu.

Poques vueltes depués, otru incidente, esta vegada d’un Williams, el d’Alex Albon, que perdió’l coche y acabó dando contra les proteiciones y medio atravesáu ente’l trazáu y la grava, soltando munchu debris qu’acabaría na pista provocando’l segundu coche de seguridá del día y, al pocu, la primer bandera colorada pa permitir que se trabayara nes proteiciones que quedaran dañaes pol golpe d’Albon. Enantes de que saliera la bandera, dellos pilotos como Russell o Sáinz aprovecharon el coche de seguridá pa facer la so primer parada, pero nun pudieron aprovechar esi movimientu al sacase la bandera colorada, lo que permite a tolos pilotos camudar les gomes ensin coste dalu pa ellos. La ventaya que creyíen ganar cola parada con coche de seguridá quedó en nada y dexó a dambos pilotos en posiciones más retrasaes (Russell sétimu y Sáinz undécimu). Pérez, que salía dende’l pitlane mesmo que Bottas, tamién parara cuando salió la bandera colorada y nesi momentu yera décimocuartu.

La segunda salida volvió a ser mala pa Verstappen, dalgo a lo que nun nos tien avezaos, y Hamilton aprovechó la debilidá del holandés pa ponese per delantre. Nun diba durar muncho la ventaya del inglés y yá na vuelta doce, Verstappen lu pasaría y yá nun dexaría’l llideralgu de la carrera. Na vuelta dieciocho volvíemos a tener un incidente, esta vegada nel Mercedes de Russell, qu’empezaría a soltar fueu pol escape, obligando al pilotu inglés a abandonar la carrera por un fallu de la unidá de potencia. El fechu de que lu aparcara fuera de peligru nun provocó que saliera nengún coche de seguridá si non unu virtual demientres los comisarios retiraben el monoplaza. Na vuelta ventidós, Pérez yá taba nos puntos na so cabalgada hacia’l podiu.

Entrábemos equí nun períodu de tranquilidá que diba durar delles vueltes y na que la máxima intensidá díbemos vela ente cinco coches: dende Hamilton que diba segundu hasta Stroll que rodaba sextu, con Alonso, Gasly y Sáinz pel mediu. Foi una batalla intensa, na que finalmente Sáinz pasó a Gasly y se colocó cuartu, pero ensin ser quien a meter distancia col francés, que se mantuvo en distancia de DRS cásique tol tiempu. Los coches d’arriba, Hamilton y Alonso diben apurando y afloxando’l ritmu, faciendo valer el rendimientu de les gomes dures coles que yá cuntaben llegar al final de la carrera. Demientres, Verstappen yá taba a más de diez segundos de Hamilton, anque tendría tiempu pa una excursión pela yerba pola que perdió un par de segundos, ensin más problema pa él.

Nesti períodu tamién vimos batalles polos últimos puestos que dan puntos, ente McLaren y Haas, con Lando Norris esguilando posiciones hasta colocase octavu depués de superar a Hülkenberg qu’otra vuelta tuvo un rendimientu mui altu demientres tol gran premiu y tamién en clasificación.

Na vuelta cincuenta y cuatro, a cuatro del final de la carrera, tendríemos otru incidente: Kevin Magnussen golpeó cola rueda trasera derecha nel muru lo que provocó que la so goma se soltara y quedara en llanta, dexando restos del so coche al so pasu y cola suspensión rota. Esto diba provocar la tercera bandera colorada del día, pa tentar de llimpiar los restos del coche de Magnussen. Con dos vueltes pal final, optose por otra salida en parriella.

Nesta tercera salida Verstappen yá nun diba fallar, y foi quien a imponese a los intentos de Hamilton de volver a pasalu. Ensin embargu, per detrás de dambos, Sáinz diba provocar un incidente que llueu lu diba penalizar con cinco segundos. El pilotu madrilanu tocó a Alonso qu’acabó trompeando y viendo como les sos opciones de podiu desapaecíen. Demientres, los coches avanzaben y Gasly acababa chocando contra’l so compañeru d’equipu, dexando a dambos Alpine fuera. Stroll aprovechaba la circunstancia pa colocase cuartu, anque tuvo una salida de pista un pocu más adelante que lu dexó fuera de puntos.

Tol incidente de los dos Alpine provocó otra bandera colorada, esta sí ya la última, que permitiría a los comisarios recoyer los coches y llimpiar la pista, pero que con una vuelta pal final suponía ya’l final de la carrera. Los coches diben volver salir a pista, pero detrás del coche de seguridá y ensin posibilidá d’adelantamientu, lo que supunxo una nueva victoria pa Max Verstappen, el primer podiu pa Lewis Hamilton en segundu llugar y otru tercer puestu pa Fernando Alonso. Pesie a los incidentes descritos y la perda de posiciones de los pilotos d’Aston Martin, al nun tener pasao nengún pilotu por nengún seutor significativu de la pista, tomáronse como referencia de clasificación les posiciones de la penúltima vuelta, na qu’Alonso y Stroll entraben en puntos, anque colos dos Alpine fuera. Eso supunxo que dambos McLaren sumaren puntos, mesmo que Tsunoda, Zhou y Nico Hülkenberg. Sergio Pérez nun pudo alcanzar el podiu pero a lo menos foi quintu y nuna carrera tan caótica como esta, ye casi un milagru que nun se viera envuelta en nengún incidente partiendo dende posiciones más retrasaes.

Como yá diximos, Sáinz penalizó con cinco segundos pol incidente con Alonso y quedó fuera de puntos, sumando al desastre de Leclerc. Nun entama bien la temporada pal equipu italianu.

Dexamos Australia y descansamos tres selmanes hasta’l prósimu gran premiu que va ser n’Azerbaixán el día 30 d’abril. Demientres llega’l día, equí podéis echar un vistazu a los resultaos de la tercer carrera de la temporada.