Previa del Gran Premiu d’Australia 2023

La F1 nun apara y yá tamos preparaos pal tercer gran premiu de la temporada que se va cellebrar n’Australia, nun de los circuitos ya entornos favoritos pa la mayor parte de los pilotos y los equipos. Tamién de los espeutadores pesie a que les persones que nun tamos ellí tengamos de madrugar enforma. Nun perdáis detalle más abaxo de los horarios pa esti fin de selmana.

Aterrizamos n’Albert Park depués de dos grandes premios de dominiu de Red Bull, anque con resultaos cambiaos. Verstappen dominó en Sakhir, Pérez en Xida. A estes altures abúltanos que ye esta la realidá que nos toca vivir en 2023, pero al mesmu tiempu queda la posibilidá de que Pérez esti añu ponga a Verstappen en más apuros que l’añu pasáu. Nun dexaría de ser interesante ver cómo se defende l’holandés énte la novedá de tener un compañeru d’equipu al so altor. Creyemos qu’al mexicanu entavía-y falta un pocu pa tar nesi puntu, pero viendo cómo rindió en Xida hai dos selmanes, nun sedría tan raro de ver.

Nun podemos dexar de mirar, sicasí, pa lo que pueda facer Aston Martin. De momentu tán amosándose como’l segundu equipu na parriella, pesie al abandonu de Stroll nel últimu gran premiu. La dulda en llegando a Australia ye saber si tamién equí, nun circuitu estremau a los dos anteriores anque con coses en común con Xida, l’equipu va ser quien a replicar los dos podios que yá sumen. Falando d’Aston Martin y enllazando cola penalización d’Alonso’l domingu por colocase mal na parriella, la FIA tomó la decisión d’enanchar les marques au los pilotos tienen de colocar los sos coches depués de qu’en dos grandes premios siguíos dos pilotos recibieran penalizaciones. Ye un tema del que se vien falando tiempu, pero qu’esti añu paez que se complicó coles quexes de munchos pilotos de la dificultá pa ver au coloquen el coche enantes del entamu de la carrera. Ello ye que tres les penalizaciones d’Ocon en Sakhir y d’Alonso en Xida, les marques van ser más grandes tentando asina de facilitar el llabor a los pilotos.

Mercedes y Ferrari lleguen a Australia con necesidaes estremaes: Mercedes entavía nun ta au quier tar, pero si miramos la clasificación tán segundos per detrás de Red Bull. Mesmo que l’añu pasáu, tán sabiendo sacar más del coche de lo qu’esti ta ufriendo, pero van precisar dalgo más si quieren siguir segundos y tentar de derrotar a Ferrari y a Aston Martin. Ferrari, pela so parte, depués de la penalización y los cambios de componentes de Leclerc, va necesitar un gran premiu nel qu’en verdá puedan amosar un bon rendimientu que llegue a ponese siquier cerca de Red Bull y per delantre de Mercedes y Aston Martin. Nestos momentos, Leclerc paez tener la midía tomada a Sáinz, dalgo que yá pasara l’añu pasáu, pero dambos van tener de trabayar por llevar al equipu más alantre de lo que tán agora mesmo.

Nun hai grandes novedaes en xeneral con respeutu al últimu gran premiu, anque sí podemos mentar los cambios na estructura téunica del equipu McLaren, cola partida de James Key. L’equipu de Woking ta últimu na clasificación en dambos campeonatos y entavía dellos pasos per detrás de los sos rivales, cola esperanza, sicasí, de dir recuperando a partir de Bakú. El debú de Piastri nun ta siendo tan positivu como s’esperaba y de xuru que la so primer carrera de F1 en casa nun va ser una de les esperiencies que recuerde si se repiten los resultaos de les dos primeres carreres del campeonatu.

Williams ta siendo ún de los equipos que meyor entamó la temporada, muncho meyor de lo que s’esperaba. Hai razones pa pensar que pueden entrar nos puntos con regularidá esti añu, siempre col permisu de Haas, que tán quiciás na mesma situación del equipu inglés. Dambos tán aprovechando les debilidaes de McLaren y tamién d’AlphaTauri, que nun terminen de consiguir bonos resultaos o, a lo menos, bones sensaciones col coche d’esti añu. Sí que ye verdá que Tsunoda tuvo a piques de puntar en Xida, pero tovía los vemos lloñe de tar nos puntos davezu. Nun queremos dexar fuera a Alfa Romeo, anque si miramos el rendimientu en Sakhir y los problemes de Bottas en Xida, col coche dañáu, hai razones pa pensar que puedan tar otra vuelta nos puntos. No que cinca a Alpine, viendo cómo-yos fue nes carreres pasaes, ye fácil pensar que tamién vaigan a tar nos puntos en Melbourne.

El circuitu d’Albert Park, en Melbourne, yá se tornó un clásicu del calendariu de F1, pasando’l so gran premiu agora a ser el terceru depués de munchu tiempu siendo la carrera qu’abría’l campeonatu. Ye un circuitu urbanu, qu’arrodia’l llagu Albert Park y que vien cellebrando la F1 dende 1996. L’añu pasáu la victoria foi pa Charles Leclerc, y ye interesante señalar que Max Verstappen nunca nun ganó nesti trazáu.

Zarramos la previa echando un güeyu a los horarios pa esti gran premiu y a les gomes que van usar los equipos: