Nel mundu del motor y la velocidá too pasa rápido. Tamién los descansos entre temporaes. Nun hai muncho tábemos poniendo’l ramu a un 2021 bien intensu y equí tamos otra vuelta, preparando pa otra temporada depués de pasar la resaca que dexó la pasada. Yá pudimos ver rodar los coches, tanto nes sesiones de grabación que faen los equipos como, y más importante, nes sesiones de test celebraes en Barcelona y Bahréin en selmanes pasaes. Como davezu, sacar conclusiones de los test ye bien arriesgao y quiciabes absurdo, pero nun tiempu nel qu’hai tantos cambios, bien val pa facese una idea de lo que puede ser esti 2022.
El cambiu de regulaciones promete más emoción, coches con diseños nuevos qu’afronten los cambios necesarios y, eso sí, esperábase dalgo menos de velocidá. Sicasí, una de les coses que señalaben los pilotos demientres los test ye que, de momentu, los coches nun taben siendo más lentos . Analizando les apuestes aerodinámiques de los equipos, fuimos viendo diseños bien estremaos, siendo protagonistes visibles los pontones (o l’ausencia d’ellos como nel casu de Mercedes) y los alerones delanteros muncho más simplificaos de lo que tábemos avezaos. Sicasí, yá sabéis, nestos coches lo importante nun ye sólo lo que se ve, de fecho’l suelu del coche ye una de les partes más crítiques nestes regulaciones nueves. Na busca de la meyor solución aerodinámica son munchos los factores qu’hai que trabayar, y esta pre-temporada nesi sen foi bien abegosa pa los equipos. Nun paez haber un favoritu claru, si ye que puede habelu enantes d’entamar una temporada, anque tolos gueyos tan puestos enriba Ferrari pol bon rendimientu amosáu nes dos sesiones de test. Regularidá, fiabilidá y velocidá. Paez que nun se puede pidir más a un monoplaza y los de Maranello ufrieron eso mesmo. Red Bull y Mercedes son los sospechosos avezaos anque Mercedes ta arriesgando bastante col so diseñu, dalgo que yá nun ye novedá depués de toos estos años, lo que ta faciendo-yos más complicao de lo que tenemos visto topái el puntu al coche, y Red Bull busca dalgo asomeyao, atopar la tecla que-y permita tornar a ser campeón del mundu de constructores. Lo que ye dalgo xeneral ye’l problema del “porposing” (ello ye, movese como un botu nel agua), nome que se-y da al bote violentu al final de reuta que sufren los coches por mor del diseñu nuevu.
Tenemos tamién interés por ver al restu d’equipos, sobre manera McLaren y AlphaTauri, que tiníen bona pinta nes sesiones de test, anque entavía con trabayu per delantre. Aston Martin tamién trabayó bastante nesta pre-temporada, mesmo qu’Alpine, anque dambos tienen entrugues que responder enantes de ponese en marcha nesta temporada. Williams paez tar definitivamente al altor de los equipos de la zona medio de la tabla y queda un pocu p’Alfa Romeo y Haas el nun quedar últimos. Insistimos que, sacar conclusiones de los test ye bien arriesgao, pero dambos equipos paecen tar estancaos, sobre too nel casu de Haas, con cambios de pilotu d’última hora.
Tamién hebo cambios en cuantes a la dirección de carrera, cola sustitución de MIchael Masi por Niels Wittich yEduardo Freitas que se van a alternar nel puestu a lo largo de la temporada y la creación d’un Control de Carrera Virtual asemeyáu al VAR que conocemos n’otros deportes qu’asistirá al control en pista.
En suma, son munches les coses pa les que mirar cuando esti vienres los coches yá se pongan a rodar nos primeros entrenamientos de la temporada. Nengún equipu paez tener la partida ganada a estes altures asina que nun queda otra qu’aguardar a que llegue’l primer gran premiu de la temporada pa dir respondiendo entrugues.