Gran Premiu de Canadá 2019

Munchos son yá los grandes premios de Canadá que van pasar a la memoria de la Fórmula Ún. Por nomar un par d’ellos, 2008 pol accidente tan aparatosu de Robert Kubiça onde quedó claro que la seguridá de los monoplaces yera d’otru planeta con respeutu a años anteriores o 2011 por ser la carrera más llarga y poles condiciones de la victoria de Jenson Button con McLaren. El de 2019 va entrar nesti grupu como la carrera na que Sebastian Vettel foi’l primeru en ver la bandera a cuadros pero onde la victoria foi pa Lewis Hamilton.

SÁBADU

Les predicciones y los entrenamientos llibres permitíen albidrar que Mercedes podía tener nes sos manes otra pole. Esti añu, ta más complicao predicir si sedrá Hamilton o Bottas, pero’l rendimientu de dambos nes sesiones de llibres facíenlos ser optimistes. Sicasí, Ferrari nun s’escondía y col puxu de ser Canadá un bon circuitu pa ellos, aparte de la masa de fans que mueven ellí, tamién amosaben maneres. Los últimos seis grandes premios Ferrari nun foi quien a tornar el bon rendimientu de los llibres en pole, y Mercedes tuvo no cimero’l sábadu en toles ocasiones sacante una, en Bakú. El circuitu Gilles Villeneuve brindó a la Scuderia la so segunda pole y la primera de Sebastian Vettel dempués de diecisiete carreres (la última foi la del gran premiu d’Alemaña de la temporada pasada, puntu d’inflexón de 2018). La vuelta más rápida d’esti sábadu quedó pues nes manes del pilotu alemán al que siguieron Hamilton y Leclerc.

La deceición vieno per un llau de la parte de Bottas que namás pudo ser sextu dempués de facer un trompu na Q3 cuando lluchaba pola pole, y de Verstappen, que nin siquier entró na Q3. Kevin Magnussen tuvo un accidente al chocar escontra’l muru de los campeones llegando a meta nos últimos minutos de la Q2, lo que provocó una bandera colorada ya’l fin de la segunda sesión de clasificación con pilotos como Verstappen o mesmo’l compañeru d’equipu de Magnussen, Romain Grosjean, fuera de la llucha polos diez primeros puestos. Irónicamente, el pilotu danés sí entró na Q3 pesie a nun participar nella.

Sumando deceiciones, Stroll tornó a quedase fuera na primer sesión, esta vegada con un pocu de xustificación por tener un problema col motor na sesión de llibres previa a la clasificación. Sergio Pérez, el so compañeru d’equipu, nun lo fexo muncho meyor. Con ellos, l’Alfa Romeo de Kimi Räikkönen, que lleva varies selmanes de solombra. Williams, como davezu, ocuparon los dos últimos puestos de la clasificación, con Russell una vegada más per delantre de Kubiça.

Nel llau positivu, Renault y McLaren. Los dos pilotos de dambos equipos entraron ente los diez primeros y nel casu de Renault, gracies a l’ausencia d’ún de los Red Bull y de dambos Haas, Ricciardo pudo colocase cuartu, per delantre de Gasly. Hülkenberg conformose col sétimu llugar, siguíu por Sáinz y Norris. El pilotu madrilanu, sicasí, tuvo una penalización de tres posiciones por bloquiar a Albon.

DOMINGU

El circuitu Gilles Villeneuve ye ún d’esos onde, se diz, la pole ye perimportante porque los adelantamientos son enforma complicaos.

La salida del domingu foi llimpia, con malpenes incidentes sacante dellos choques na parte d’atrás de la clasificación onde Albon foi’l principal perxudicáu y nel que Grosjean recibió un regalu en forma de debris nel so coche. El pilotu de Toro Rosso nun podría terminar el so gran premiu por cuenta d’esti incidente de los primeros momentos de carrera.La salida pela parte d’arriba foi bastante más tranquila. Vettel caltuvo la so posición, mesmo que Hamilton y Leclerc, anque Bottas pronto se vio sobrepasáu por pilotos con gomes más rápides (anque de rendimientu más curtiu). Sicasí, varios pilotos que montaron esi tipu de gomes nun tardaron n’entrar a cambiales, una vegada’l ciclu de rendimientu de les mesmes terminó. El primeru en quedar fuera de carrera foi’l pilotu de McLaren Lando Norris. L’inglés tuvo d’aparcar el so coche dempués de que’l fueu provocáu polos sos frenos fundiera la suspensión trasera y lu dexara ensin posibilidá de siguir avanzando. Nel equipu nun entendíen mui bien lo que provocara esa situación, que foi un golpe duru pal pilotu que taba faciendo un bon gran premiu hasta esi momentu.

El ritmu de los d’arriba yera talu que na vuelta 13 Vettel yá taba doblando al Williams de Kubiça. Los pilotos que naguaben por agua o por dalgún incidente en pista que permitiera la salida del coche de seguridá acabaron la carrera deceicionaos. Nin lo uno nin lo otro apaecieron nes casi dos hores de gran premiu. Ferrari aguantó en pista, llegáu’l momentu de les paraes (la estratexa ideal yera una parada) intentando provocar a Mercedes pa qu’entrara Hamilton primero. A la fin, foi Vettel el primeru en parar, y Hamilton recibió la orden de puxar p’abrir güecu y favorecer la so parada. Sicasí, nun foi bastante y l’alemán recuperó’l primer puestu dempués de la parada de tolos d’arriba.

Vimos abondes batalles ente pilotos en pista: Sergio Pérez y Romain Grosjean, con triunfu del primeru; Sáinz con varios pilotos, lo que fexo que terminara fuera de puntos; dambos Renault, onde Ricciardo foi quien quedó perriba y tamién tuvo una batalla interesante con Bottas. Tamién na cabeza vimos movimientu ya esti ye’l momentu clave de la carrera, con alrodiu venti vueltes pa terminar. Hamilton nun yera a adelantar a Vettel, pero la distancia del pilotu de Ferrari foi amenorgando hasta baxar del segundu. Nestes circunstancies, el pilotu inglés presionó al so rival hasta fuerciar un erru que fexo que l’alemán perdiera’l control de la trasera del coche y tuviera de dirpela yerba. Al tornar al trazáu, atopóse con Hamilton pela so drecha que tuvo a piques d’adelantalu pero Vettel foi quien a caltener la so posición. Sicasí, los comisarios interpretaron que la reentrada del pilotu de Ferrari a pista fuera peligrosa, dalgo que rápidamente reclamaron na radio dende Mercedes, y penalizaron a Vettel con cinco segundos.

Dende esi momentu, la carrera resúmese en Vettel intentando meter distancia con Hamilton ensin éxitu ya llueu preocupándose de metela col so compañeru pa poder, siquier, ser segundu. La bandera a cuadros cayó con Vettel, Hamilton y Leclerc, pero l’orde del podiu camudaría, dando la victoria al pilotu de Mercedes. Aparte de los dos Ferrari, que se sumaron a Hamilton, Bottas consiguió ser cuartu con Verstappen quintu. El pilotu holandés consiguió superar al so compañeru d’equipu que’l sábadu clasificó per delantre pero nun tuvo un bon gran premiu y namás pudo ser octavu.

Los pilotos Renault acabaron sextu y sétimu, un emburrión de puntos que los coloca quintos na clasificación de constructores, dos puntos per detrás de McLaren que nun puntuó con Sáinz. Sí puntuó Racing Point, na so primer carrera en casa y con Stroll como pilotu, que pesie a la deceición del sábadu y a un incidente nos primeros metros de carrera con Albon, pudo entrar novenu y puntuar. Zarra la clasificación de los diez primeros Daniil Kvyat, al que vemos muncho más centráuesti gran premiu y siendo protagonista d’adelantamientos d’esos qu’arranquen aplausos.

Fuera de puntos, aparte de Sáinz, nel puestu once, atopamos al Racing Point de Pérez, que nun pudoimitar al so compañeru d’equipu y quedó doce. Alfa Romeo tuvo una carrera igual de deceicionante que la clasificación del sábadu, anque Giovinazzi quedó per delantre de Räikkönen. El pilotu italianu foi décimoterceru col finlandés nel puestu quince.

Haas nun tuvo ún de los sos díes, y yá van unos cuantos. Aparte del accidente del sábadu, nengún delos dos pilotos tuvo ritmu como pa ponese a tiru de puntos. La tensión de la frustración fexo que Magnussen optara por quexase per radio de lo mal que diba’l coche cola posterior bronca del so xefed’equipu. L’equipu estauxunidense ta n’hores baxes como podemos ver cola so clasificación con Grosjean nel puestu catorce y Magnussen nel diecisiete.

Pa rematar, Williams, que sigui sumando grandes premios completaos, anque seya nos puestos caberos. Esta vegada Russell pudo incluso escalar un puestu y quedar per delantre del Haas de Magnussen, siendo décimosextu. Kubiça zarra la clasificación nel dieciocho y hasta tres vueltes perdíes. Hai que dicir, sicasí, que dende Ricciardo, qu’acabó sextu, tolos pilotos acabaron con vueltaperdida.

Dexamos Canadá pa poner rumbu a Francia. Llega una tanda de dos grandes premios siguíos y una nueva oportunidá pa Ferrari p’amenorgar la distancia con Mercedes, que yá entama a ser bultable y cásique insalvable. Pero otru llau, la clasificación de pilotos, con Hamilton a una distancia de más d’un gran premiu pon a Bottas nel puntu de mirar pa ser quien consiga evitar que l’inglés se faga col so sextu campeonatu. Demientres llega’l siguiente gran premiu, equí vos dexamos los númberos d’esti fin de selmana nel circuitu Gilles Villeneuve:

Clasificación

Carrera