Ponemos puntu final al parón braniegu pa retornar a los circuitos ya nun se nos ocurre meyor forma que facelo en Spa, unu de los favoritos (si non el que más) del calendariu pa siguidores ya pilotos. Amás, esti finde conmemórense bien de coses: catorce años de la primer victoria d’Alonso na F1, venticinco de la de Michael Schumacher (pa lo que vamos poder ver al so fíu, Mick Schumacher, conduciendo’l Benetton B194 que lleva a so pa a facese col campeonatu) y l’octoxésimu aniversariu de Bruce McLaren, que la escudería va cellebrar el domingu. Amás, cúmplense cincuenta grandes premios nel circuitu tal como lu conocemos, asina que va ser un fin de selmana cargaín de coses.
Lleendo toles declaraciones de pilotos, xefes y demás miembros de los equipos, queda claro que lleguen a un llugar onde esfruten pero que ye un gran retu tantu físicu pal pilotu, como mecánicu. Los pilotos ponen el güeyu, ensin duldes, n’Eau Rouge, pero son munchos los que menten Pouhon ya Blanchimont como especiales, sobre too nesti añu de cambiu nos coches. Taremos sollertes.
Na mesma llínia, el tiempu meteorolóxicu suel siempre provocar problemes ya resultaos inesperaos, sobre too cuando pensamos nel circuitu más llargu del campeonatu y nel que pue llover n’una curva y salir el sol n’otra. Los pilotos resaltaben esti aspeutu xunto col desgaste de les gomes, yá que Pirelli, como podéis ver más abaxo, lleva les tres más blandes. Fálase d’una estratexa a dos paraes como lo más predecible, pero toos sabemos que si hai dalgo que dicir sobre Spa nun ye precisamente’l que seya predecible.
A mediaos de selmana recibíemos la noticia de que Ferrari decidía anovar el contratu de Kimi Räikkönen por un añu más, pa 2018. El pilotu finlandés dixo que lo facía convencíu de que yera lo que quería y que taba encantáu col so compañeru d’equipu Sebastian Vettel, que llega a Spa como llíder del campeonatu de pilotos.
Nel garaxe de Mercedes lleguen convencíos de les sos posibilidaes nesti circuitu, sobre too dempués del gran premiu de Hungría. Dambos pilotos van montar motores nuevos (cuartu ICE, turbu y MGU-H) ya en teoría eso debiera sumar a la ventaxa que se supón tienen equí. El xefe de la escudería, Toto Wolff, mostrábase confiáu pero, na llínia de lo que siempre fai Mercedes, realista.
Red Bull vuelven coles bateríes cargaes y cola esperanza de dir ameyorando y acortando distancies colos dos equipos de cabeza. Verstappen, holandés, llega a la carrera casi como si tuviera en casa, gracies a la cantidá de siguidores que se desplacen al gran premiu p’animalu. Nel casu de Ricciardo, espera poder repitir lo que vivió en 2014 cuando ganó el so segundu gran premiu de Fórmula Uno. Les condiciones nun son les mismes, pero teniendo en cuenta lo variable que pue ser un gran premiu en Spa, quiciás ye ún de los llugares onde más pue confiar l’australianu.
Pa los pilotos de Force India esti tamién ye un gran premiu importante: Esteban Ocon estrenóse como pilotu de F1 na carrera de Spa del añu pasáu polo que ya pue dicir que cubrió una temporada completa na categoría. Tanto elli como’l so compañeru d’equipu van buscar nesta segunda parte de la temporada’l nun apease del cuartu puestu nel campeonatu, siguir siendo competitivos y nun perder puntos en sitios au nun deberíen, n’alusión a les vegaes nes que tuvieron engarradielles en pista. La escudería cuenta con trayer meyores equí y nes carreres que vienen pa siguir sumando puntos.
Williams recupera la so aliniación de pilotos con Massa yá totalmente restablecíu y listu pa ponese a bordo del so monoplaza. Lance Stroll, que ye mediu belga, llega tamién a Spa casi como si corriera en casa. Suponemos que busque repitir lo que vivió en Canadá, onde consiguía sumar los primeros puntos de la so carrera, p’asina enfocar de la meyor manera posible una segunda parte de la temporada onde seya quien a convencer a los que tovía dulden de la so capacidá como pilotu de la máxima categoría del motor.
En Toro Rosso tamién anden d’anovaciones yá que’l so direutor téunicu, James Key, va siguir la próxima temporada cola escudería. Sáinz enxamás terminó una carrera nel circuitu belga, polo que ta claro que’l so primero oxetivu va ser esi y, dientro lo posible, sumar puntos. Daniil Kvyat, como vien siendo vezu nes últimes carreres, intentará amosar qu’entá ye una bona apuesta pal so equipu, pesie a lo que vien faciendo nos últimos grandes premios. Tien bastante xera per delantre.
Haas ye l’otru equipu que llega a Spa con motores nuevos y con munches ganes de siguir trabayando pa sumar puntos pal campeonatu de constructores. Cuenten tamién con delles meyores coles qu’esperen ponese a l’altura d’equipos como Toro Rosso, a los que tienen a diez puntos.
Pa Renault, colos ánimos yá un pocu más tranquilos dempués de tener a Kubiça a bordu del so coche nos test de Hungría, esti ye un gran premiu mui téunicu pero divertíu y a onde trayen novedaes coles qu’esperen poner n’apuros a los que tán perribe d’ellos nel campeonatu. En cuantes a los pilotos, la so situación ye bien estremada, con un Hülkenberg que ta sumando tolos puntos pal so equipu y un Palmer que cada vegada se ve más fuera d’elli. Cyril Abiteboul, xefe de Renault, almitió que l’oxetivu de la escudería ye ser quintos al final de la temporada. Puen pasar munches coses d’equí allá, pero sumando puntos con un sólu pilotu paeznos que nun ye la forma más afayaiza. Veremos cómo se-yos da Spa.
McLaren tamién foi focu noticies demientres esta selmana. Stoffel Vandoorne cuerri en casa y amás confirmóse que va siguir nel equipu pa 2018. La nota negativa pa elli va ser que tien una penalización de trenta y cinco posiciones na parrilla del domingu por cambiar motor. Anque paecería que’l culebró McLaren-Honda ta nos sos episodios finales, lo cierto ye que l’otru día súpose que l’ayuda que ta recibiendo Honda de Ilmor pal desarrollu de los sos motores ta demostrando ser bien positiva, lo que trai un pocu de lluz a tolo malo que nun dexa de salir de les sos fábriques. Col futuru d’Alonso nel aire, Honda trabaya por consiguir ponese al altor de lo que s’esperaba d’ellos hai dos años. Ensin embargu, nun lleguen al meyor circuitu pa enllenase d’optimismu yá que Spa ye, probablemente, una de les carreres más complicaes pa ellos pola demanda que fai al motor. Sólo queda espera que, a lo menos, seyan quien a terminar la carrera con dambos coches.
Pa terminar, Sauber, que tán necesitaos de bones actuaciones y puntos pa consiguir salir d’esi últimu puestu al que paecen condergaos si siguen repitiendo lo que vienen faciendo en carreres pasaes. Teniendo a McLaren a seis puntos nun paecería mui complicao poder alcanzalos, pero n’una temporada na que tol mundo va evolucionando, los puntos fáense cada vegada más complicaos y más valiosos.
Debaxo, podéis atopar tola información de les gomes seleccionaes por Pirelli pa esti gran premiu y equí, tolos datos sobre’l circuitu de Spa, sede del gran premiu de Bélxica.
