N’una selmana tornarán a tar los coches nes pistes de Spa, pero primero d’ello, queríemos facer un repasu a lo que dieron de sí la primer parte de les carreres d’esta temporada. De momentu, paez que nun podemos quexanos del espectáculu que tamos viendo. Pesie a qu’a daquién que siga la F1 de xuru-y prestaría que tuviéremos un puñáu de pilotos con posibilidaes de ganar el campeonatu, a lo menos esti añu acabemos col monopoliu de victories de Mercedes (d’aplausu pa ellos per otru llau) y tenemos a dos na batalla.
Darréu los test de pre-temporada, como siempres, llegábemos con más duldes de les que resolvíemos, y nun foi hasta’l segundu gran premiu (yá sabéis aquello de qu’Australia nun ye espeyu de nada) qu’empecemos a ver que Ferrari esti añu podía dar guerra. Y neses tamos. El mundial de pilotos tien a Ferrari no más alto, y nel de constructores el premiu ye pa Mercedes.
La escudería alemana partía como favorita nesti 2017 pero cola discreción que siempre los caralteriza y que fai que nunca viendan nada enantes de ver resultaos. La verdá ye que nun nos paez que baxaren el ritmu con respectu al añu pasáu si non que’l trabayu fechu en Manarello foi excepcional pa ponese al altor. Cola llegada de Bottas al equipu dempués de la retirada de Rosberg tres proclamase campión del mundu, albidrábemos que les coses diben ponese mui cencielles pa Hamilton nel so camín a un cuartu mundial. Naide nun cuntaba con Ferrari, nin con que Bottas diba dar tanta guerra ganando dos carreres y siendo visitante del podiu en casi tolos grandes premios disputaos. Hamilton ta faciendo una bona temporada, pero nun podemos dexar d’aplaudir lo que ta faciendo’l finlandés, compitiendo ensin vergoña nenguna a los mandos d’unu de los meyores coches de la parrilla.
Si miramos agora a Ferrari, anque entá tienen coses que pulir, la temporada del equipu italianu ta siendo perbona. El focu ta puestu enriba Vettel por ser el primeru nel mundial pero Räikkönen nun ta quedando atrás, y creyemos que más d’una vegada tuviera de quedar per delantre del so compañeru d’equipu, pero eso son coses que, dende fuera, vense d’otra manera. Nestes selmanes de parón y yá en tiempos anteriores, falábase de la continuidá de Kimi en Ferrari. La verdá ye que hai munches voces que lu quieren retirar y otres munches que falen de que yá habría milenta candidatos pa cubrir el so asientu. A nós paeznos qu’entá queda muncho en Kimi pero yá se sabe que la F1 vívese carrera a carrera, y lo que güei ta siendo una bona temporada con llabor d’equipu incluyida, mañana pue convertise n’escaezu. La silly season esti añu ta siendo más tranquila de lo normal, pero nun descartamos qu’en Monza quiciás tengamos novedaes en Ferrari.
Red Bull batalló estos meses por consiguir alcanzar a Mercedes y Ferrari, y anque van meyorando col pasu les selmanes, entá nun pueden falar d’éxitu nesta temporada. La victoria de Ricciardo y los podios que tienen consiguío alivien un pocu la frustración, pero entá tienen muncho que trabayar si quieren repitir victoria. La mala suerte de Verstappen súmase a esi regustu amargu de ser terceros sabiendo que podíen aspirar a más. De toles formes enfotámonos en que, nesta segunda parte de la temporada, los veamos siguir evolucionando y quiciás facer un pocu solombra a los dos equipos qu’agora mesmo tienen los primeros puestos nes sos manes.
Na mitá la tabla, atopamos a Force India. La escudería inglesa pue sintise arguyosa del bon rendimientu amosáu hasta’l momentu por dambos pilotos. Sabíemos de lo que yera quien Sergio Pérez, pero nun teníemos claro qué podría ufrir Esteban Ocon y la verdá ye que nun podemos más qu’aplaudilu por, na so condición de rookie (anque técnicamente yá compitió la temporada pasada), puntuar en toles carreres menos una y por un incidente col so compañeru d’equipu. Tán siendo eses engarraes en pista les que quiciás tán empañando un pocu’l llabor que ta faciendo l’equipu, que partía cola intención de batallar con Williams por esi cuartu puestu y que ta viendo cómo, cada carrera, afiáncense más nun puestu que nun creyemos vaigan abandonar d’equí al cabu.
Williams acababa la temporada pasada cola noticia de la retirada de Felipe Massa y la llegada de Lance Stroll pa facer compañía a Bottas. Eso yera lo que taba nel papel hasta que la decisión de Rosberg de dexar la competición traxo una reacción en cadena que fexo que Bottas pasare a ser pilotu Mercedes y que Felipe tuviera de repensar la so decisión de retirase. El rendimientu de Williams esti añu ta viéndose condicionáu en parte pola mala suerte ya en parte pola falta d’esperiencia de Stroll. Nes primeres carreres el so rendimientu foi bien baxu, llegando al puntu nel que sólo Massa sumaba puntos pa la escudería. Con Canadá llegaron los puntos y con Baku el primer podiu, dalgo que, creyíamos, diba servir de motivación pal restu de carreres. Ensin embargu, nun tenemos claro en qué puntu atopamos al pilotu canadiense. Esperamos que seya quien a dar un saltu de calidá, sobre too si l’equipu quier siquiera considerar el ponese a l’altura de Force India. En cuantes a Massa, pasó de la decisión de retirase a volver a conducir y agora, dicen, nun paez tar pensando en baxar del coche mui llueu. Precisamente foi por cuenta d’un momentu d’indisposición del pilotu brasileñu nel últimu gran premiu, que pudimos ver otra vuelta n’un F1 a Paul Di Resta, pilotu reserva de Williams y oficial de Mercedes en DTM, y que tuvo de competir en clasificación y carrera pola baxa de Massa. Nun tuvo muncha suerte no que cinca a la carrera pues abandonó por problemes mecánicos pero quiciás valiera p’animar a los pilotos que tán esperando a la solombra pola so oportunidá de que la espera paga la pena a veces.
Toro Rosso empezó la temporada con bones carreres y actuaciones de dambos pilotos, especialmente nel casu de Sáinz. El pilotu español, de fechu, ta faciendo una temporada perbona que lu tiene nel focu les atenciones de periodistes ya equipos sobre’l so futuru inmediatu. Elli diz que’l so oxetivu ye Red Bull, pero nun paez que l’equipu de Horner vaiga camudar la so aliniación de pilotos nel curtiu plazu. Asina que va tocar esperar a ver qué va pasar col pilotu de Toro Rosso. El so compañeru Daniil Kvyat tamién ta na picota pero por razones distintes. Pesie a que’l comienzu de temporada foi bastante aceptable, les últimes carreres nun lo fueron y víemos como’l pilotu rusu cometía errores que costaben carreres a otros pilotos, nuna de les últimes ocasiones al so propiu compañeru d’equipu. Yá vimos a Kvyat nesta situación enantes y consiguió redimise. Nun sabemos si esti añu consiguirá facelo otra vuelta.
Haas debutaben l’añu pasáu con munches duldes pero dexando un bon tastu na boca al terminar la temporada. Nesta ocasión, yá casi consolidaos y anque con dalgo de mala suerte, siguimos viendo a un equipu que nun dexa de dar pasos alantre. Dambos pilotos tán faciendo carreres bastante aceptables, anque dacuando los frenos o problemes col coche los dexen tiraos. Los puntos que tienen hasta agora son bon exemplu de que, nes condiciones afayadices, son quien a puntuar. Tienen entá munchu trabayu per delantre, pero nun duldamos de que van siguir puntuando y quiciás, por qué non, poner n’apuru a Toro Rosso, a los que tienen a diez puntos de distancia.
Ensin embargu, la escudería norteamericana nun pue despistase, porque si tienen cerca a Toro Rosso, más cerca los tien Renault a ellos, a tres puntos. L’equipu francés revolucionó hai poco al mundu formuleru col retornu de Robert Kubiça a un F1, dalgo que munchos fans llevaben naguando por ver bien de tiempu. De momentu nun hai nada confirmao sobre lo que va pasar col equipu ya’l pilotu, pero paeznos que, si fuéramos Jolyon Palmer, tendríemos el mieu metíu nel cuerpu. La temporada del pilotu inglés hasta agora ta siendo más que negativa, onde la mayor alegría vieno de la so clasificación dientro de los diez primeros n’una ocasión, pero ensin puntos nel mundial. Al llau tien a Nico Hülkenberg, colo qu’eso supón pa un pilotu que nun ta teniendo nin suerte nin resultaos, y que ye quien ta llevando tol pesu del equipu agora mesmo, dalgo colo que yá cuntábemos cuando supimos que firmaba por Renault y que’l so compañeru diba ser Palmer. Demientres, l’equipu sigui avanzando nes sos meyores y en consiguir dir, pasu a pasu, subiendo posiciones na tabla pa terminar siendo competitivos les más de les veces.
La hestoria de McLaren esta temporada ye mui asemeyada a la que cuntábemos l’añu pasáu. Anque colos cambios nel reglamentu paecía que quiciás l’alianza McLaren-Honda podía llograr producir un coche competitivu, a estes altures la escudería ye penúltima con once puntos. Abandonó l’últimu puestu del mundial de constructores n’Hungría, tres puntuar los sos dos pilotos. Nun sabemos si d’equí p’alantre van ser too bones noticies, pero lo cierto ye que la paciencia de munchos ta agotada, les expectatives de ver a Alonso l’añu que vien a bordo d’un coche fechu en Woking mengüen y nun tenemos mui claro si la xuntanza ente dambes compañíes va siguir o va estinguise llueu. El retornu de Honda a la máxima competición del motor dista muncho del éxitu del pasáu y nin siquiera los optimistes puen ver qu’eso vaiga cambiar dientro de poco. Alonso ye cada vegada más esplícitu nes sos crítiques y el fechu de que decidiere por correr n’Indianápolis en cuenta correr en Mónaco a bordu’l so McLaren, diz muncho de la emoción que-y producen les carreres. Les promeses d’éxitu de fai tres años hai tiempu que desapaecieron y lo que nun sabemos ye si entá queden argumentos na mesa que fagan que’l pilotu asturianu se quiera quedar. Hai voces que falen d’un posible destinu en Renault, o del pasu por Mercedes, pero ye too especulaciones, porque nin siquiera ta claro que vaiga dexar McLaren. Ye importante recalcar, de toles formes, que la temporada d’Alonso ta siendo, dientro lo negativo, buena nel sen de que, cuando consigue terminar les carreres, saca’l máximu rendimientu a la máquina que tien, lo cual nun dexa de ser almirable. A Vandoorne costó-y bastante más adautase a tolos cambios, a la so condición de rookie y a tener al llau a un bicampeón del mundu, pero carrera tres carrera vémoslu más confiáu y evolucionando col pasu los meses.
Pa terminar, Sauber. La temporada del equipu suizu ta viéndose mui afeutada por tolo que pasa de puertes pa fuera de los circuitos. Cola marcha de Kaltenborn y la llegada de Vasseur hai poco, la situación d’inestabilidá que tresmite l’equipu nun ayuda a la so recuperación y la cancelación del so acuerdu con Honda pa montar los so motores l’añu qu’entra dexó milenta interrogantes abiertos que dieron pasu a otru acuerdu con Ferrari pa que seyan los italianos los que-yos faciliten los motores na temporada viniente. Pero hasta qu’aporte 2018, l’equipu sigue ensin mostrar un rendimientu positivu que permita a la xente creyer que puen dar pasos alantre. El fechu de que McLaren consiguiera pasar per delantre d’ellos na última carrera déxalos arrequexaos n’un últimu puestu que nun ayuda pa nada. Nengún de los pilotos ta faciendo tampoco grandes coses p’ameyorar la imaxe del equipu. Ericsson muéstrase irregular cuando consigue que’l coche nun lu dexe tiráu, y Wehrlein ta pasando ensin pena nin gloria pola parrilla pal enfotu que tenía puestu muncha xente enriba d’elli dempués de lo que viéramos en DTM y Marussia l’añu pasáu. Cuesta creyer que vaigan camudar muncho les coses d’equí a payares, pero Sauber ta mui necesitáu de bonos resultaos pa consiguir recuperar la imaxe d’equipu competitivu que tuvo nel pasáu.
Como yá vos diximos al empiezu d’esti post, dientro una selmana taremos en Spa colos coches otra vez en pista. La F1 retorna del so parón braniegu pa enfrentase a la segunda parte d’una temporada que hasta agora nos dexo carreres per interesantes (de xuru naide escaeció tovía lo que víemos en Bakú) y munches otres nes que la estratexa ya’l llabor d’equipu tamién competíen. Cuidamos que la segunda parte nun va defraudar.
Recordámoste que nesta páxina puedes comprobar cómo van los campeonatos de pilotos y contructores d’esti añu.