Nun hai monoplaces nos circuitos pero eso nun quier dicir que la F1 nun se tea moviendo. Los díes van pasando, van averándose les feches de presentación de coches y tamos a mes y mediu de los test de pre-temporada. Aprovechamos p’atropar dalgunes de les novedaes más importantes d’esta selmana.
Empezamos pola confirmación como pilotu reserva d’Aston Martin de Felipe Drugovich, que yá vinía desenvolviéndose nesi rol nel equipu y de fechu tuvo de competir cuando Lance Stroll nun pudo por cuenta’l so problema nes muñeques. El brasileñu va compartir rol con Stoffel Vandoorne, que sigui tamién n’Aston Martin. Drugovich súmase a la confirmación de Franco Colapinto, Paul Aron y Ryo Hikarawa n’Alpine y de Valtteri Bottas en Mercedes. El restu d’equipos tienen qu’entavía confirmar a los sos pilotos reserva pa 2025.
Anque nun queda munchu tiempu pa entamar la temporada, yá sabéis que’l tiempu vuela nesti deporte, siguimos viendo cambios de plantiella en dellos equipos. Kick Sauber ye ún de los casos, cola salida confirmada d’Alessando Alunni Bravi. Nun ye d’estrañar que la escudería tea reaxustándose sabiendo lo que-y vien nel futuru cuando pase a ser Audi.
No que cinca a circuitos vos podemos comentar los cambios que se tán produciendo nel circuitu d’Hungaroring, ún de los favoritos del calendariu de públicu ya equipos.
Nun queremos escaecer que Williams yá confirmó la fecha na que va presentar el so monoplaza, y va ser el 14 de febreru con un diseñu que namás veremos esi día y que va camudar pa la temporada, como yá vimos que pasaba con munchos equipos en temporaes pasaes. Ello ye que l’equipu de Grove ye’l primeru en confirmar cuando va amosar al mundu el so coche. Taremos sollertes al restu d’escuderíes y diremos, como davezu, editando un post nel qu’atroparemos les feches que vaigamos sabiendo.
