Month: January 2023

Pasín ente pasu vamos averándonos al principiu de la nueva temporada. Con yá munchos de los equipos con feches confirmaes pa les presentaciones de los sos coches (podéis atopar les feches equí) y col calendariu confirmáu asina como los pilotos y equipos, casi nun queden coses pendientes pa poder arrancar. De momentu, equí siguimos atropando les noticies que vamos conociendo demientres la selmana ya informándovos de lo que se ta cociendo na F1 demientres se prepara pa una nueva temporada.

Como tamos acabantes de comentar, yá ta confirmáu’l calendariu pa la temporada, depués de que China confirmara la so ausencia. La F1 tuvo delles selmanes de reflexón, imaxinamos que buscando un sustitutu, pero a la fin decidió que nun va habelu y que la temporada 2023 va ser de ventitrés carreres. Torna Qatar, entra Las Vegas y desapaez Francia. Equí podéis consultar toles feches ya escenarios pa la nueva temporada.

Per otru llau, anque yá tenemos confirmada dafechu la parriella de pilotos y equipos (podéis consultar la llista equí), van confirmándose los pilotos reserva y los que van competir en categoríes inferiores, esto ye la F2 y la F3. Per un llau tenemos los nomes d’Arthur Leclerc y Olive Bearman, nuevos pilotos de F2 con Ferrari. Tamién na Scuderia, confirmaron a Giovinazzi como pilotu reserva mesmo que Shwartzman. Dambos pilotos van compartir esti papel yá que dambos van tar compitiendo. No que cinca a los pilotos de desarrollu, Ferrari va cuntar con Antonio Fuoco y Davide Rigon, zarrando asina la llista de pilotos confirmaos hasta agora pol equipu italianu pa 2023.

En Williams confirmaron que Jamie Chadwick, la piloto inglesa, va continuar col equipu junior demientres se prepara pa entrar na Indy Feeders. En Red Bull tán acabantes de confirmar a los sos pilotos pa les categoríes de F2 y F3. Per un lláu, na F2, Enzo Fittipaldi y Zane Maloney van competir en Carlin pa 2023 ya en Hitech Gran Prix, vamos tener a Isak Hadjar y Jak Crawford. En DAMS va continuar Ayumu Iwasa ya en MP Motorsport vamos poder ver a Dennis Hauger. Na F3, namás Sebastián Montoya va llevar los colores de Red Bull. Como veis, nes categoríes inferiores la representación de Red Bull ya’l so programa de pilotos mozos continua funcionando.

La FIA dio anuncia estos díes de que va haber cambios na so estructura direutiva. El nuevu direutor deportivu va ser Steve Nielsen, qu’hasta agora tinía esi mesmu puestu na F1. Nicholas Tombazis va ser el direutor téunicu de monoplaces. Tim Goss va ser el nuevu direutor téunicu, Federico Lodi direutor financieru y François Sicard direutor d’estratexa. Mohammed Ben Sulayem sigui como presidente de la entidá.

Pa terminar, yá sabéis qu’hai munchos pilotos qu’ente temporaes dedíquense a descansar, a viaxar y a folgar, y otros munchos que busquen otres competiciones pa siguir al volante d’un coche. Ye’l casu de Kevin Magnussen, pilotu de Haas, que diba competir nes 24 hores de Daytona pero que tuvo d’abandonar la idea por una operación d’un quiste na so mano. El pilotu danés ta agora tentando de recuperase al 100% pa la temporada de F1.

Hasta equí tolo que dio de sí la selmana. Yá sabéis que dende que terminó la temporada 2022, vamos atropando noticies los vienres pa dir poniéndovos al día de lo que va pasando. Podéis atopar toles noticies nos siguientes enllaces:

Noticies post-temporada 2022:
Noticies – 2 d’avientu
Noticies – 9 d’avientu
Noticies – 16 d’avientu
Noticies – 23 d’avientu
Noticies – 30 d’avientu

Noticies pre-temporada 2023:
Noticies – 13 de xineru

Yá tamos metíos dafechu na pre-temporada de F1, nun hai más que ver la cantidá de noticies y anuncies que vamos recibiendo de los equipos no que cinca a les presentaciones de los sos coches o a les sos sensaciones de cómo van les coses cola meta del cinco de marzu yá nel horizonte.

Tenemos abondes coses que contavos, empezando por cuatro feches más de presentación de coche: Williams, Mercedes, Alpine y McLaren confirmaron hai unos díes les feches nes que van amosar los sos monoplaces al mundu formuleru. Nel casu de Williams esto va facese dende la web el día 6 de febreru, de momentu la fecha más temprana de toles que tenemos confirmaes. L’equipu ta amás acabante de confirmar que James Vowles, que yera xefe d’estratexa de Mercedes, va ser el so nuevu xefe d’equipu depués de que Jost Capito abandonara’l so puestu n’avientu de 2022.

Mercedes, pela so parte, confirmaron la fecha del 15 de febreru pa que conozamos el so nuevu W14. L’equipu tuvo siendo noticia tamién pol tema les negociaciones del contratu de Hamilton, que terminaría esti 2023. Nun tenemos entavía munchos detalles más allá de la seguranza de que l’inglés va anovar si facemos casu de les pallabres de Toto Wolff. En principiu debiéramos saber daqué nes prósimes selmanes.

McLaren tamién dio anuncia de la fecha na que va enseñar el so nuevu monoplaza, y va ser el día 13 de febreru, nel McLaren Technology Centre. Nel casu d’Alpine, la fecha escoyida ye’l 16 de febreru y yá conocemos el nome del coche, que va ser A523.

Centrándonos n’otros temes, Haas entavía nun confirmó la fecha de presentación del so coche pero sí el so nuevu nome mesmo que’l so nuevu llogu. L’equipu pasa agora a llamase Moneygram Haas F1 Team, cola empresa de transaiciones monetaries como patrocinaor principal.

Tamién tenemos noticies no que cinca a futuros pilotos de F1 o qu’a lo menos tienen en mente esi destín pa sí mesmos. Y ye que’l pilotu Franco Colapinto, que compitió na F3 la temporada pasada, entra nel programa de pilotos mozos de Williams mientres que Sebastian Montoya, fíu del pilotu Juan Pablo Montoya, lo fai nel de Red Bull (Red Bull Junior Team).

Pa rematar, hai dellos díes conocimos el nuevu destín d’Antonio Giovinazzi, que foi pilotu de F1 hai un par d’años con Alfa Romeo y que taba tentando de recuperar un asientu na máxima competición. Paez ser que, de momentu, va tener que conformase con seguir como pilotu Ferrari nel papel de pilotu reserva, pero va competir col equipu nel campeonatu de resistencia.

De momentu estes son les novedaes que vos podemos dir comentando. Nun escaezáis que tamos asoleyando artículos con tola información necesaria pa la temporada 2023 y yá tenéis disponible’l llistáu de pilotos y equipos, ya’l calendariu de la temporada pa que nun perdáis nengún detalle. Podéis atopalo equí:

Pilotos y equipos
Calendariu