Month: December 2022

El camín a la temporada 2023: noticies

Última publicación de noticies del añu que, ensin sorpreses, vien con poca novedá. Esta selmana y la pasada la F1 tuvo esfrutando les fiestes y quiciás nos sos momentos más tranquilos previos al arreón que vien dende xineru. Nun ye raro, poro, que la única noticia que vos podemos ufrir pa esti últimu vienres del añu seya la de la presentación d’un coche.

Y ye qu’AlphaTauri ye’l tercer equipu en confirmar la fecha de presentación del so monoplaza, asina como’l so nome. Como yá sabéis, AlphaTauri va cuntar con Yuki Tsunoda y Nyck de Vries como pilotos, depués de la marcha de Pierre Gasly a Alpine, y tienen muncha falta de dexar atrás el rendimientu amosáu en 2022. Nun ye d’estrañar que tean tan motivaos poles nueves perspeutives qu’ufre’l nuevu coche que van presentar na ciudá de Nueva York el día 11 de febreru. De momentu, ye la fecha más temprana de presentación d’un coche en 2023. Conocemos tamién el nome del monoplaza, que va ser AT04.

Alcordaivos que yá tán confirmaes les feches d’Aston Martin (13 de febreru) y de Ferrari (14 de febreru). Col entamu del añu 2023 diremos poniendo toos estos datos nun post qu’actualizaremos periódicamente dende que se vaigan confirmando les feches del restu d’escuderíes.

Por si nun tais actualizaos coles últimes noticies de la F1, equí vos dexamos los boletinos que tenemos espublizao les últimes selmanes:

Noticies – 2 d’avientu
Noticies – 9 d’avientu
Noticies – 16 d’avientu
Noticies – 23 d’avientu

Tamién vos dexamos los análisis que fuimos faciendo de lo que foi esti 2022 asina como de la silly season por si entavía nun los lleistis:

Silly Season
Análisis de la temporada
Análisis de la temporada por equipos
Análisis de la temporada por pilotos Parte 1
Análisis de la temporada por pilotos Parte 2

Con esto damos por termináu esti 2022, vos agradecemos fonderamente la vuestra atención estos doce meses y ponemos yá la vista nel 2023 nel que deseyamos muncha salú pa toles persones que nos lleéis y tamién muncha F1 y munches bones emociones. ¡Feliz añu 2023!

El camín a la temporada 2023: noticies

Esta selmana tenemos poques coses que cuntavos no que cinca a novedaes nel mundu formuleru. Tando les fiestes tan cerca ye normal qu’haiga un pocu de parón no que cinca a les noticies, pero un par d’elles sí que vos podemos cuntar anque seyan dambes rellacionaes.

En zarrándose la llista de pilotos na parriella y col calendariu completu (a la espera de que se confirme qué circuitu va sustituyir a China pa 2023), lo que nos queda por confirmar son les feches de presentación de los coches que van competir en 2023. Y yá tenemos dos d’elles.

El primer equipu en confirmar que yá tien fecha pa la presentación del so nuevu monoplaza foi Aston Martin, que yá hai unos díes fizo oficial la fecha del llunes, 13 de febreru de 2023 a les ocho de la tarde, en Silverstone. Amás conocemos el nome que-y va dar al coche: AM23.

El segundu equipu foi Ferrari, qu’esti día confirmó que la fecha escoyida pa presentar el so monoplaza pa la temporada de 2023 va ser el 14 de febreru, un día depués d’Aston Martin. El coche tovía nun tien nome oficial, pero de momentu conocémoslu como’l proyeutu 675.

Y esto ye too. Por si nun tais actualizaos coles últimes noticies de la F1, equí vos dexamos los boletinos que tenemos espublizao les últimes selmanes:

Noticies – 2 d’avientu
Noticies – 9 d’avientu
Noticies – 16 d’avientu

Aprovechamos pa deseyavos dende’l blogue AsturiesF1 que paséis unes bones fiestes y una bayurosa Navidá.

Zarrando 2022: la temporada por pilotos (Parte 2)

Vamos allegándonos al final del añu y, como fuistis viendo, faciendo repasu de tolo que foi 2022 na temporada, los equipos y los pilotos. Güei ponemos el ramu a esi repasu cola segunda tanda de pilotos y lo que ficieron esta temporada. Si nun lleistis la primer parte entavía, podéis facelo nos enllaces que vos dexamos al final d’esti artículu:

11. DANIEL RICCIARDO
Cuando Daniel Ricciardo aterrizó en McLaren, toos tiníemos unes espeutatives mui altes puestes n’él, pensando que diba ser el llíder dafechi del equipu con Norris como’l so segundu. En pasando 2021 yá pudimos comprobar que nun tiníemos razón y confirmose too nesti 2022. L’australianu nun pudo nin consolase con un resultáu a l’altor de 2021 na victoria de Monza y vímoslu sufrir cásique toles carreres, con dalguna esceición pero que nun fizo muncho por ameyorar la so situación. La realidá ye que Norris acabó siendo’l primer pilotu dafechu, munches vegaes l’únicu que sumaba puntos al equipu y a naide nun sorprendió l’anuncia de McLaren de que pa 2023 nun diben cuntar con él. L’añu viniente va tener un rol secundariu como reserva en Red Bull, lo que nun lu fai desapaecer dafechu de la F1 pero tampocu nun lu tien en primer fila. Munchos piensen que, en casu de que les coses con Checo Pérez acaben torciéndose, Ricciardo va tar más que dispuestu a ocupar el so sitiu. Viendo como remató la temporada 2022, too puede pasar.

12. SEBASTIAN VETTEL
D’esti 2022 lo que más vamos recordar, ensin duldes, va ser la despidida de Sebastian Vettel. Nun podemos dicir muncho de la so temporada pues foi discreta, anque con dellos momentos bonos. En xeneral l’equipu tuvo una primer parte de la temporada bastante floxa y rexurdió un pocu yá na segunda. Rematar la to vida deportiva con un puntu na to última carrera y col aplausu masivu de tolos fans, pasaos y presentes d’esti deporte vien un pocu a mostrar lo que significa esti pilotu pa esta competición. Ye verdá que dende que dexó Ferrari, y tovía tando ellí, les coses yá fueron baxando, pero creyemos que foi ehí au s’empezó a crear un pilotu nuevu, cola vista puesto n’otres coses, na manera de dexar fuelga gracies a la so posición privilexada. Si dalguién foi quien a ello esti ye Sebastian Vettel. Nun creyemos que vaiga recordar les sos carreres de 2022 pero sí como se despidió del deporte de la so vida pola puerta grande.

13. KEVIN MAGNUSSEN
Cuando Haas fichó a Magnussen otra vuelta pa competir con ellos en F1 depués de la retirada de la escena de Nikita Mazepin, pensose que yera más bien un parche, una solución d’emerxencia, el mal menor. Lo que vimos esti 2022 nun foi eso: foi un pilotu más maduru que’l que dexó la competición, muncho más centráu y que pudo facer coses tan espectaculares como llograr una pole pal so equipu y ser el primer danés en facelo. Nun queremos facer casu de quien diz qu’esi primer puestu foi polo que foi y les condiciones yeren especiales: p’aprovechar oportunidaes como esa tienes de tar nel sitiu adecuáu y Magnussen lo taba. Sicasí, anque batió al so compañeru d’equipu, pudo facer más, creyemos, de lo que vimos, anque ye verdá que tampocu nun tuvo un coche regular nel qu’enfotase. Pa 2023 axúntase a él Nico Hülkenberg y yá se faló muncho de la so rellación nel pasáu y de los munchos piques que tuvieron. La realidá ye que Haas comentó que precisen veteranía y con estos dos pilotos, ensin duldes, van tener lo que deseyan.

14. PIERRE GASLY
Yá comentemos nel repasu a la temporada qu’AlphaTauri foi pa nosotros l’equipu que más deceiciónó de la parriella de 2022. Depués de lo que vimos nos test d’iviernu, abultábanos que diben tar, a lo menos, peliando con McLaren y Alpine, igual non pa superalos pero definitivamente pa incomodalos. Nun foi’l casu nin por asomu. Non sólo nun peliaron colos dos equipos nomaos si non que namás fueron quien a superar a Williams, que tuvo otru añu zarrando la clasificación. Nel casu del francés, esti añu vímoslu nun siendo quien a esprimir tol potencial del coche, que yera menos del que creyíamos al principiu. Tuvo la suerte de tener a Tsunoda al so llau nel sen de que nunca nun diba quedar per delantre suyo, pero la irregulariedá nos puntos d’esti añu y los puestos tan baxos que munches vegaes ocupó, aparte de tar envueltu en milenta incidentes en pista, redondien un añu bastante negativu pa Gasly. Col cambiu a Alpine ábrense nuevos horizontes pa él, pero con un pilotu tan competitivu como Ocon de llau, nun va tenelo fácil pa brillar.

15. LANCE STROLL
El pilotu canadiense lleva yá delles temporaes na F1 y tovía hai la sensación de que nun demostró, en pista, el motivu pol que se sigue apostando por él. Ye verdá que tuvo dalguna actuación mui bona, pero sacante eso, pasa les temporaes ensin aportar muncho. Cola llegada d’Alonso tolos güeyos tán puestos enriba la xestión del equipu nel que paga’l padre de Stroll pero que va cuntar con Alonso como pilotu. Nun creyemos que vaiga pasar, pero en verdá precisa dalgo más de lo que se vio esti 2022, nel que nun pudo superar a Vettel y tuvo sesiones de clasificación desastroses, si quier quedar delantre d’Alonso y xustificar la so presencia na másima competición de motor.

16. MICK SCHUMACHER
Mick Schumacher tuvo la mala suerte nesti 2022 de tener a Kevin Magnussen de compañeru d’equipu. Si les coses tuvieran sío como en 2021, de xuru nun taríamos falando d’él como pilotu reserva en Mercedes, porque nun duldamos que Haas siguiría cuntando con él. Pero, como dicimos, tuvo mala suerte, y la verdá que munchos fallos sobre too na primer parte de la temporada que nun equipu como l’estauxunidense manquen más que n’otros. Tuvo momentos nos que sí paecía que podía reconducir el so añu, pero’l pasu les carreres y sobre too la pole en Brasil de Magnussen terminaron enterrando’l presente de Schumacher na F1. Pero nun foi too malo. El so fichaxe por Mercedes como tercer pilotu ye un futuru más que positivu pal alemán, que va tar situau nel meyor llugar posible pa ver cómo se van moviendo les pieces nos años vinientes.

17. YUKI TSUNODA
El 2021 foi un añu caóticu pal debutante xaponés d’AlphaTauri. Esti 2022 lu vimos muncho más centráu pero entavía con dellos restos d’aquel caos pasáu. Quedó lloñe del so compañeru d’equipu, anque non por tanto como podíemos esperar, y agora que Gasly marcha, va toca-y ser el primer pilotu, o a lo menos en teoría. Con AlphaTauri n’hores baxes nun sorprende tampocu velu tan abaxo na clasificación con un coche que prometía muncho pero dio menos de lo esperao.

18. ZHOU GUANYU
Nun foi un añu fácil pa Zhou nel so debú y pesie a que ta antepenúltimu na clasificación, creyemos que tien más que merecíu l’asientu que tien n’Alfa Romeo pa 2023. Nun fizo grandes coses, más qu’un sustu bien grande en Silverstone, pero creyemos que cumplió cuando tocaba y aunque de xuru l’equipu esperaba que diera dalgo más de sí, tamién ye verdá que nun s’enriedó en problemes y tentó de sacar alantre les carreres de la forma más digna posible. Sí ye verdá que pa 2023 vamos esperar muncho más d’él, y que xunto a Bottas puedan averase a les posiciones d’Alpine y McLaren.

19. ALEXANDER ALBON
Otru añu difícil y deceicionante pa Williams, otru añu difícil y deceicionante p’Albon. El so retornu a la F1 nun foi tan bonu como s’esperaba, anque tampocu nun podíemos cuntar con que Williams recuperara tol tarrén que tien perdío nunos meses. Nun podemos negar, eso sí, que’l tailandés tuvo momentos positivos, sumó puntos, sacó tolo que pudo del coche y, en xeneral, les sos actuaciones foron bones, pero ensin un bon coche, pocu más diba poder facer. Sicasí, como pilotu, esperamos más d’él en 2023, sobre manera col aterrizaxe de Logan Sargeant, debutante l’añu que vien, lo que fai qu’Albon pase a ser el pilotu con más esperiencia nel equipu.

20. NICHOLAS LATIFI
Nun nos paez que sorprenda a naide que Latifi nun vaiga siguir compitiendo na F1 pa 2023 y que, anque él día qu’esti añu foi malu y yera xusto cuando tenía de facelo bien, tampoco nun creyemos que 2021 fuera muncho meyor. Sí podemos dicir que foi más bien protagonista ensin querelo de la última carrera del añu 2021, pero aparte d’eso, pocu más podemos dicir de la so carrera en F1.

Con esti post rematamos l’análisis de la temporada 2022 y zarramos yá’l so capítulu pa ponenos en marcha y cola vista yá puesta totalmente en 2023. Si nun lleistis los demás, vos los dexamos enllazaos debaxo y vos recordamos que tamién vamos actualizando’l de la silly season.

Silly Season
Análisis de la temporada
Análisis de la temporada por equipos
Análisis de la temporada por pilotos Parte 1

Y por si queréis tar al día con noticies de la F1 en xeneral, equí vos dexamos los boletinos que tenemos espublizao les últimes selmanes:

Noticies – 2 d’avientu
Noticies – 9 d’avientu
Noticies – 16 d’avientu

El camín a la temporada 2023: noticies

Un vienres más aterrizamos nel blogue pa resumivos les noticies de la selmana y tamos percontentos güei porque tenemos muncho que compartir con vosotros.

Vamos entamar col baille de xefes d’equipu. Falemos hai unes selmanes de que Binotto marchaba de Ferrari y la consecuencia d’ello llegó esta selmana. Yá comentáramos que sonaba’l nome de Fred Vasseur, xefe d’equipu d’Alfa Romeo y CEO de Sauber, pa sustituyir a Binotto, y confirmemoslo esta selmana col so nomamientu. Marcha Vasseur d’Alfa Romeo y Sauber ya entra Andreas Seidl, que dexa McLaren pa ser xefe executivu de Sauber (non d’Alfa Romeo). La marcha de Seidl significó la promoción d’Andrea Stella a xefe d’equipu en McLaren. Como veis, una socesión d’eventos provocada pola dimisión de Binotto d’hai dellos díes.

Aparte d’esti movimientu de xefes, tamién salieron del equipu Williams Jost Capito y FX Demaison, xefe y direutor téunicu respeutivamente. De momentu nun sabemos qué persones van ocupar los güecos qu’ellos dexen.

Per otru llau, yá conocemos los númberos colos que van competir los pilotos debutantes en 2023. Yá vos cuntemos que Logan Sargeant va llevar el 2 y agora completamos el llistáu colos de Piastri y De Vries. L’australianu que va debutar con McLaren va llevar l’81 mientres que De Vries, nuevu pilotu d’AlphaTauri, va facelo col 21. Esti datu conocímoslu depués de que la FIA confirmara’l llistáu de pilotos, númberos y nomes d’equipu y motoristes pa 2023. Los motores d’Honda que monten Red Bull y AlphaTauri pasen agora a ser HondaRBPT.

Aparte, tamién tenemos yá información completa del calendariu, au podemos destacar la entrada de Las Vegas col so formatu novedosu, porque la carrera nun va cellebrase de domingu si non de sábadu pela nueche. Pero nun va camudar sólo la carrera: los llibres de los vienres pasen al xueves ya’l de los sábados y la clasificación al vienres.

Les más de les carreres vamos viviles, como davezu, ente les dos y les tres dependiendo de la hora llocal, con carreres a la tarde-nueche (Bahréin, Qatar y Abu Dhabi) y otres tres de nueche (Las Vegas, Arabia Saudí y Singapur).

Amás, la competición de motor va cuntar cola F1 Academy series, una categoría d’iniciación, de la que se confirmaron cinco equipos pa los vinientes años. Los equipos que van entrar na competición son ART Grand Prix, Campos Racing, Carlin, MP Motorsport y PREMA Racing, y caún d’ellos va cuntar con tres coches en pista, sumando asina un total de quince na parriella. Estes escuderíes ya compiten n’otres categoríes como la F2 y F3 masculines. Diremos siguiendo mui de cerca les evoluciones d’esti intentu d’abrir pasu a les muyeres a niveles superiores hasta llegar a la F1.

Tamién foi noticia Mick Schumacher. El ex-pilotu de Haas quedara ensin asientu esta temporada al ser sustituyíu por Nico Hülkenberg, y agora sabemos que pa 2023 va emplegase como pilotu reserva nel equipu Mercedes. El xueves anunciárase que Schumacher terminaba la so rellación con Ferrari, au llevaba cuatro años.

Pa rematar esti vienres de noticies, el sábadu pasáu foi la gala d’entrega de los premios de la temporada 2022 a los ganadores del campeonatu de pilotos y constructores, asina como a los sos acompañantes nel podiu. Con esta gala ponemos yá dafechu’l ramu a la temporada 2022.

La selmana que vien tornamos con más artículos pero demientres podéis dir lleendo los nuestros boletinos de noticies pasaos y los resúmenes de la temporada, colos distintos análisis que tamos faciendo de pilotos y equipos.

Zarrando 2022: la temporada por pilotos (Parte 1)

Yá ficimos un análisis de lo que foi la temporada en xeneral y llueu diendo un pocu más al detalle equipu a equipu. Tamos a piques de zarrar l’añu pero nun queríamos facelo ensin valorar l’actuación de los máximos protagonistes d’esti deporte: los pilotos. Como davezu, fueron munches les polémiques que surdieron poles rellaciones ente ellos pero que, tamién como davezu, quedaron arrequexaes en fines de selmana puntuales. Nun ye esti l’espaciu que queremos dedicar a eses polémiques asina que vamos falar, namás, no que vimos d’ellos en pista, qu’a la fin ye lo importante. Pa nun allargar muncho’l post, lu dividimos en dos partes colos diez primeros pilotos equí y los diez siguientes n’otru que va salir la selmana que vien.

1. MAX VERSTAPPEN
Hai poques coses que dicir del pilotu de Red Bull que nun se dixera yá: lleva dos años nun estáu de forma esceicional y con un nivel de competitividá altísimu. Too ello sumao a tener un bon coche son los ingredientes que faen consiguir campeonatos del mundu. Esti 2022 amás la superioridá amosada, sobre manera na segunda parte del campeonatu, foi tan abrumadora qu’hai pocu que dicir sobre si merez o non ser campeón. Ta claro que si continúa asina nos años vinientes y si los coches que diseñe Red Bull tán al altor, tenemos Verstappen pa llargu.

2. CHARLES LECLERC
Al principiu d’esta temporada, Charles Leclerc taba na quiniela de tol mundu como posible campeón del mundu. El pasu les carreres devolviónos a la realidá y poquín a pocu fuimos perdiendo enfotu en que’l monegascu pudiera consiguilo ya incluso siquier ser segundu. Tuvo que ser na última carrera na qu’asegurara esi puestu que ye deceicionante pero que, viendo como foi desenvolviéndose la temporada pa Ferrari, casi sabe a triunfu. Sabemos que Leclerc tien talentu pa ser campeón, pero’l talentu llévate a ciertos llímites que sólo con un bon coche puedes sobrepasar y esti añu Ferrari nun pudo o nun supo proporcionar el monoplaza que’l monegascu precisaba pa ser campeón. Otru añu más, otra deceición más. Col cambiu de xefe d’equipu y l’aterrizaxe, yá confirmáu, de Vasseur, veremos en qué direición avanza.

3. SERGIO PÉREZ
Trabayar nun equipu como Red Bull y ser el segundu pilotu nun ye dalgo cenciello. Sabes que vas tener que tar a la sombra d’un primer pilotu al que l’equipu va apoyar de principiu a fin y que vas a ser el primer sacrificáu nel intentu de que too seya favoratible al to compañeru. Asina resumimos los dos años de Checo en Red Bull. Naide nun puede dicir que’l mexicanu nun supiera lo qu’había cuando firmó pol equipu, pues yá vimos eses formes nel pasáu y la posición de Verstappen nel equipu ta más que consolidada. Pérez fizo un bon trabayu nestos dos años, anque quiciás esperábemos dalgo más d’él. Un pocu menos de resignación o a lo menos nun tener la sensación a vegaes de que se conforma cola situación que-y toca. Esti 2022 tuvo un bon rendimientu, pero perder el campeonatu a última hora con Leclerc, pesie a les causes que podamos dar pa esti fechu, ye dalgo que manca. Nun tenemos claro que vaiga poder ganar un campeonatu con Verstappen como compañeru d’equipu y en Red Bull, pero tenemos ganes de ver a un Checo al qu’eso nun lu condicione (o al menos nun lo paeza).

4. GEORGE RUSSELL
Tiníemos munches ganes de ver a Russell al volante d’un bon coche depués de ver lo que yera quién a facer con un Williams. Nun foi’l meyor añu de Mercedes pero’l fechu de que l’inglés quedara cuartu nel campeonatu, per delantre de Lewis Hamilton, nel so añu de debú col equipu diz muncho del potencial d’esti pilotu y de lo que podemos esperar d’él cuando tenga’l coche pa competir n’igualdá con Red Bull. Cola so primer victoria n’Interlagos selló un bon añu pesie a toles dificultaes que tuvo de dir enfrentando l’equipu dende’l primer gran premiu. En 2023 cuidamos que vamos ver muncho más y muncho meyor del inglés si Mercedes-y da un coche competitivu dende’l principiu.

5. CARLOS SÁINZ
El pilotu madrilanu entamó l’añu un pocu floxu, pero foi pasu ente pasu dando cola tecla y a partir de la segunda parte de la temporada sí podemos dicir que’l so rendimientu foi bonu. Sicasí, nun foi suficiente pa quedar per delantre del so compañeru d’equipu, el retu de tolos pilotos. Pesie a les bones actuaciones que-y tenemos visto esti añu y en pasaos, fáltanos algo. Tenemos la sensación de que tovía nun ye quién a facer, con regularidá, lo que munches vegaes nomamos una vuelta perfeuta o un gran premiu perfeutu. Echamos en falta esi emburrión final que lu ponga al frente de les clasificaciones más vegaes que menos. Creyemos que ye la única manera de que pueda superar al so compañeru. Si Ferrari dexa atrás los problemes de fiabilidá y la debilidá nes paraes, quiciás Sáinz pueda aspirar a muncho más que cuartu en 2023.

6. LEWIS HAMILTON
2022 nun va pasar a la historia por ser el meyor pa Lewis Hamilton no que cinca a resultaos, pero sí tamos seguros de que foi un bon añu no que cinca al so crecimientu como pilotu. Suel dicise que si ún s’aveza a ganar carrera tres carrera ensin pasar apuros, acaba perdiendo la esencia de lo que ye la competición y los dos últimos años fueron una prueba de fueu pa Hamilton, ensin duldes. Esti 2022 tuvo de facer frente, con años d’esperiencia nes sos espaldes, a un añu de debilidá del equipu que-y dio tantos campeonatos mundiales y a un compañeru d’equipu que nun vieno a ser segundu en nada. Sextu ye’l so peor resultáu nuna temporada de F1 na que, amás, nun ganó nenguna carrera, dalgo que nun pasaba dende qu’entró na competición en 2007. Pensamos, sicasí, que’l deprendizaxe que foi garrando pel camín, pesie a que paeza que yá nun hai nada que naide pueda enseña-y, va tener munchu valor pa los vinientes años de la so carrera.

7. LANDO NORRIS
Lando Norris fizo esti 2022 lo que vien faciendo dende que ta na F1: sumar puntos, facer bones carreres, medrar como pilotu y, nesta ocasión amás, echase al equipu a les espaldes. McLaren nun pudo con Alpine nel mundial de pilotos, pero Norris sí pudo colos sos pilotos y nun sorprende, la verdá, velu ehí. Suponíase que, cola llegada de Daniel Ricciardo, diba ser un pocu’l segundu pilotu del equipu, pero’l rendimientu tan baxu del australianu cambió les coses y l’inglés adoutó con naturalidá esi rol nel que naide nun esperaba que se fuera atopar tan pronto. Pa 2023 tóca-y ser veteranu cola llegada de Piastri y, al tiempu, siguir medrando como pilotu y, quién sabe, ganar el so primer gran premiu.

8. ESTEBAN OCON
La posición d’Ocon nesti 2022 foi complicada. Competir de llau d’un doble campeón del mundu y querer quedar per delantre d’él foi una xera na que, finalmente, el francés salió triunfando. Ye verdá qu’Alonso tuvo muncha mala suerte colos abandonos esti añu, pero nun queremos negar a Ocon el bon rendimientu amosáu cuando’l coche dexaba. Cola llegada d’otru francés al equipu, de la so misma edá, hai munches duldes pero tamién munches ganes de ver cómo se desenvuelven dambos pilotos y cómo xestiona Alpine esta nueva rellación.

9. FERNANDO ALONSO
Foi un añu 2022 frustrante y duru pa Fernando Alonso, con munchos abandonos, muncha tensión dientro del equipu y col so compañeru, y dellos errores, pero tamién una temporada que tuvo dellos momentos brillantes y que nos recordaron por qué l’asturianu ye dos vegaes campeón del mundu. Tres dos años n’Alpine nos que nun se cumplieron les promeses del iniciu y que motivaron el so retornu a la competición, Alonso aterriza n’Aston Martin cola mesma mentalidá cola que lo fizo n’Alpine: ganar otru campeonatu.

10. VALTTERI BOTTAS
Depués de varios años en Mercedes onde tinía opciones de ganar carreres y, d’iniciu, aspirar a campeonatos, el 2022 de Bottas de xuru-y supo a pocu: Alfa Romeo nun brilló especialmente, anque ganó la partida a Aston Martin y clasificó como’l meyor equipu de mitá pabaxo de la tabla. Ye pocu consuelo pal finlandés, avezáu a tar n’otres posiciones, pero tamién tenemos de dicir que tuvo momentos nos que foi quién a colocar el so coche en posiciones nes que, en teoría, nun debiera tar por potencial, mesmo que nun tuvo problema de quedar per delantre del so compañeru d’equipu, el debutante Zhou, consolidándose como primer pilotu dafechu. Esperamos más d’él pa 2023.

Zarramos equí esti repasu a lo que ficieron los pilotos nesti 2022 dende la nuestra opinión. Pa la selmana viniente queden los otros diez, asina que nun perdáis detalle. Alcordaivos, amás, que los vienres vamos sacando un resume de les noticies de cada selmana nel mundu formuleru. Podéis echar un güeyu a les pasaes equí y equí, así como al nuestru post de la silly season 2022 que siguimos actualizando colos movimientos de pilotos y xefes d’equipu pa 2023.

El camín a la temporada 2023: noticies

Otru vienres más aterrizamos perequí con un par de novedaes que conocimos demientres esta selmana. Yá sabéis qu’estes primeres selmanes depués de que remate una temporada de F1 hai pocu movimientu y les noticies son relativamente escases.

Sicasí, esta selmana conocimos qué circuitos van acoyer les carreres al sprint del añu 2023. Alcordaivos qu’en cuenta ser tres eventos, l’añu que vien van ser seis y que’l sistema va siguir siendo’l mesmu: la sesión tradicional de clasificación pasa al vienres, y d’ella sal l’orde de la carrera al sprint, que tien un percorríu d’unos cien kilómetros. El resultáu d’esta carrera más pequeña que se cellebra’l sábadu depués de la segunda sesión de llibres decide l’orde de salida pal gran premiu del domingu. Dende l’añu pasáu amás los ocho primeros pilotos reciben puntos (el primer añu namás los tres primeros los recibíen).

Los seis circuitos que van acoyer esti eventu van ser Azerbaixán (Baku City Circuit), Austria (Red Bull Ring), Bélxica (Spa-Francorchamps), Qatar (Lusail Circuit), Estaos Xuníos (COTA) y São Paulo (Interlagos). Repiten Brasil y Austria, que yá acoyeran estes carreres nel pasáu y añádense otres cuatro. Hasta la última gran carrera al sprint nel circuitu d’Interlagos d’esti 2022, nenguna d’elles fuera especialmente interesante. Namás ésta mereció la pena y enganchó al públicu. Queda por ver si doblar les carreres va facer qu’a la fin se consolide como parte de los fines de selmana de F1.

Por otru lláu, el xueves confirmose que’l circuitu de Zandvoort va continuar nel calendariu de la F1 hasta l’añu 2025. Nun hai duldes que la presencia de Max Verstappen en pista ayudó a tomar esta decisión gracies al gran ambiente y la gran acoyida que ta teniendo esti gran premiu dende que tornó al calendariu.

Aparte, tamién se dio anuncia del fichaxe de Zane Maloney pol equipu Red Bull como parte del so programa de pilotos mozos y competidor en F3 en 2022, categoría na que quedó segundu. El pilotu va facer amás llabores de pilotu reserva cuando asina lo precise l’equipu.

Siguimos amás actualizando’l nuestru post sobre la silly season d’esti 2022 con toles noticies que van asomando sobre pilotos pa 2023. Podéis lleelu equí.

Zarrando 2022: la temporada por equipos

Anque yá toles noticies y toles mires tán puestes na temporada 2023, nun podemos dexar de dir zarrando la 2022 con dellos análisis de lo que, pa nosotros foi l’actuación de los equipos y los pilotos de la parriella d’esti añu. Si fuistis siguiendo los nuestros resumes carrera tres carrera y lleistis el resume de la temporada (si non, podéis lleelu equí) yá sabréis la nuestra opinión sobre’l conxuntu del 2022 que, ensin ser un añu brillante, sí nos dexó dellos momentos interesantes y memorables. La solombra de 2021 foi mui allargada y les emociones que vivimos nun se replicaron esta temporada, pero eso nun ye motivu pa nun creyer que nun esfrutemos demientres estos meses.

Güei vamos poner el güeyu nos equipos y lo que fueron faciendo dende qu’en marzu vieron el primer semáforu ponese en verde hasta la bandera a cuadros d’Abu Dhabi:

RED BULL
Naide nun puede ñegar que la temporada del equipu de la bébora enerxético foi mui bona: campeones de dambos mundiales, dizlo too. Anque entamaron col pie cambiáu y les tres primeres carreres semaron munches duldes, la verdá ye que nun tardaron en ponese al altor de Ferrari ya, en pocu tiempu, superar al equipu italianu aprovechando les sos meyores y los erros del rival. Nun podemos escaecer que tuvieron envueltos en delles polémiques primero pol tema’l presupuestu y la penalización que llevaron por sobrepasalu y tamién pola xestión de la carrera en Brasil que llevó a un cruce d’acusaciones, de disculpes y de comunicaos que nun dexaron conforme a naide. Pero esto ye tamién Red Bull. A vegaes sorpréndenos la so forma de xestionar l’equipu y la so imaxe y nun podemos escaecer que nun tienen la tradición que tienen otros equipos en pista y que’l so fundamentu más grande vien de la forma na que les persones ven los sos quefaceres. Nunca nun van dexar de dar que falar y eso ye precisamente lo que, a la fin, los fai esitosos. Ensin erros y con dos bonos pilotos al volante, nun había duldes que tiníen cásique toles papeletes pa triunfar.

FERRARI
La F1 echa en falta a Ferrari. Cuando dicimos esto referímonos a que s’echa en falta que seyan competitivos, que tean peliando toles carreres por ser ganadores, que tean a piques de ganar el mundial o que lu ganen. Esta temporada entamó precisamente con eses sensaciones: bones carreres al iniciu, mala suerte en Red Bull, Mercedes mui atrás…el tableru diba garrando una forma perfeuta pa l’equipu italianu. Quiciás esti añu tocaba. Pero non. Ferrari tornó a ser Ferrari, a lo que yá nos tien avezaos de temporaes pasaes y ente erros, abandonos y estrés, acabaron segundos sí, pero mirando de regüeyu a Mercedes pa que nun los pasara nel mundial de constructores. El consuelo de ver segundu a Leclerc val de pocu si pensamos na ventaya que tinía nes primeres carreres sobre Verstappen ya’l restu de pilotos. Cola marcha de Binotto nun sabemos qué rumbu garrará la Scuderia nos meses vinientes. Nel momentu d’escribir esti artículu desconocemos quién va ocupar esi puestu y cómo va afeutar a la estructura y los quefaceres del equipu, pero cuidamos que, quien vaiga, va tener muncha xera per delantre.

MERCEDES
L’entamu de la temporada 2022 sorprendió a tol mundu yá non sólo porque Ferrari taba no más alto, si non porque Mercedes paecía tar perdíu. Descartalu pal añu yera un erru, col so potencial y ferramientes yera sabío que diba recuperase, la dulda yera si a tiempu pa poder lluchar pol mundial. Lo llamatible d’esta temporada de Mercedes foi que nunca nun tuvieron fundíos del too: ye verdá que nun dieron cola tecla bona a la hora de facer el so coche, pero tampocu nun taben tan lloñe como dalgunos queríen pensar. Ello ye que’l so progresu en pista foi evidente col pasu les carreres, ya’l posible desastre de temporada pudo dir compensándose con dos pilotos que fueron quien a sacar tolo que tinía’l coche qu’ufrir. Falar d’una única victoria (dos si contamos la carrera al sprint) pal equipu en 2022 abulta una deceición pergrande y quiciás ye asina, pero al mesmu tiempu nun podemos más qu’almirar la capacidá de los de Grove de recuperase y d’enfocar un 2023 que pinta muncho meyor qu’esti añu que zarramos.

ALPINE
La temporada del equipu francés foi mui irregular. Podemos afirmar que lo meyor que se lleven ye precisamente’l quedar cuartos nel mundial porque, en verdá, los altibaxos de tola temporada nun facíen cuntar que pudieran ser a ello. Ye cierto que Fernando Alonso y Esteban Ocon tuvieron carreres mui inspiraes nes qu’atroparon una bona cantidá de puntos, pero nun podemos escaecer que tuvieron tamién la fortuna de que McLaren puntuó gran parte de les carreres namás con un coche, dalgo qu’ensin duldes ayudó a dir abriendo esa brecha qu’al final de la temporada separó a dambos equipos. Nun creyemos que l’añu d’Alpine fuera, poro, bona, pero hai qu’almitir que-y sacaron lo máximo. Cola marcha d’Alonso nun sabemos si les agues calmarán daqué o si tener a dos franceses más mozos y con muncha ambición sedrá entá pior, pero ta claro que’l cambiu va vini-yos bien.

McLAREN
Mesmo qu’Alpine, nun podemos falar d’una temporada positiva pa McLaren. Aspiraba a ser, mínimo cuartu, cuntando qu’esti añu Ferrari tornaba a tar en bona forma, pero pesie a, mesmo qu’Alpine, tener carreres bones nes qu’atropar puntos, la realidá foi que Lando Norris yera mayormente quien llevaba los puntos a casa. Si yá 2021 fuera un añu difícil pa Daniel Ricciardo (que compensó un pocu cola victoria en Monza) 2022 foi terrible y nun sorprendió a naide, anque doliera, que colara n’acabando la temporada. L’equipu inglés apuesta pa 2023 pola mocedá, con Lando Norris como pilotu veteranu con namás 23 años acompañáu del australianu Oscar Piastri, que va debutar con 21. Otru añu como 2022 ye dalgo qu’en Woking nun se pueden permitir si quieren tornar a lo que yeren, pero paez complicao velos con esi potencial en 2023.

ALFA ROMEO
El sextu llugar d’Alfa Romeo nel mundial abúltanos un pocu engañosu. Ye verdá que tuvieron delles carreres en puntos y momentos positivos, pero en xeneral paeznos que la so temporada foi floxa. Foi complicao velos con regularidá nos puntos a dambos, sicasí supieron aprovechar les miseries de los sos rivales pa dir, pasín ente pasu, asitiándose nel sextu llugar. De fechu, casi paecía que taben solos nesi sextu puestu, ensin naide que los punxera en pelligru, pero Aston Martin tuvo cerca de quitalos d’esi sextu llugar. Tan cerca que, de fechu, empataron a puntos, pero los meyores resultaos de la temporada d’Alfa Romeo lu colocaron per delantre. Al final, bon debú de Zhou y temporada discreta de Bottas. 2023 puede que seya l’últimu añu d’Alfa Romeo como marca na F1 cola llegada en 2026 d’Audi y la necesaria transición qu’eso supón. Tenemos munchu interés en ver cómo xestionen dende l’equipu esti cambiu y cómo se preparen pa él.

ASTON MARTIN
D’Aston Martin fálase más agora pola llegada de Fernando Alonso y pola despidida de Sebastian Vettel. La temporada d’esti equipu foi peculiar: o facíen carreres mui males o se colaben ente los diez primeros y facíen carreres brillantes. La realidá ye que foron ameyorando col pasu los grandes premios, sobre manera na segunda parte de la temporada. Nun foi suficiente pa pasar a Alfa Romeo pero sí pa empatar a puntos, dalgo qu’a mitá de temporada casi paecía un suañu. Pa 2023 hai munches espeutatives puestes nel equipu, con Alonso nes sos files y con munchos recursos puestos en tentar de facer una bona temporada pa dir medrando y subiendo na parriella y quiciás llegar a ganar dalguna carrera, anque abúltanos qu’entá tienen camín que percorrer pa llegar a esi puntu.

HAAS
Si pensamos nes temporaes pasaes y toles dificultaes que pasó l’equipu Haas pa siquier sobrevivir na F1 podemos afirmar que 2022 pa ellos foi un gran pasu alantre. El retornu de Kevin Magnussen depués d’un añu de tar apartáu de la competición ayudó al equipu a creyese que podíen ser competitivos, mesmo que la meyora pali que pali de Mick Schumacher dalgo que, sicasí, nun-y valió p’asegurar el so asientu pa 2023. Ensin duldes el momentu estelar d’esti 2022 pal equipu y, de xuru, ún de los meyores pa la F1 en xeneral, foi la pole de Magnussen en Brasil. Ye verdá que yera una pole pa una carrera al sprint, ye verdá que se dio poles circunstancies meteorolóxiques, pero naide nun puede ñegar que-y fizo muncho bien al deporte, y que foi difícil nun allegrase pol pilotu, primer danés en facer una pole na historia del deporte, y tamién pol equipu. Pa 2023 escoyeron a Nico Hülkenberg p’acompañar a Magnussen, dalgo que llamó muncho l’atención pol historial de dambos en temporaes pasaes. Nun podemos ñegar qu’al equipu-y va sobrar veteranía al volante, pero nun sabemos si va valer con eso pa dar otru pasu grande alantre en 2023.

ALPHATAURI
Si lleistis el nuestru resume de la temporada y vistis les notes que fuimos dando a pilotos y equipos, sabréis que pa nós la mayor deceición del añu foi, ensin duldes, AlphaTauri. Cuntábemos con ellos pa tar peliando con Alpine y McLaren, y a la fin quedaron penúltimos, a dos puntos de Haas que, en teoría, tiníen muncho menos qu’ufrir. La temporada prometía muncho p’AlphaTauri, veníen d’un 2021 positivu y d’una bona pre-temporada, pero pocu a pocu fueron perdiéndose nes clasificaciones, dexaron de ser vezu nos puntos y asina ye como llegaron a Abu Dhabi en penúltimu llugar. Nun podemos poner la culpa enriba de nengún de los pilotos: Tsunoda tuvo una temporada floxa anque meyor que 2021, y Gasly creyemos que tinía más de lo que foi quien a amosar. Digamos que nun salió como ellos queríen. Ta claro que foi un añu deceicionante y que 2023 tien de ser pa ellos l’añu de recuperase. El potencial de De Vries ye mui altu, como vimos na carrera que disputó con Williams pa sustituyir a Albon en Monza, pero siendo un debutante dafechu nun sabemos hasta au puede llegar. Y nun tenemos claro que Tsunoda seya la persona que precisa AlphaTauri pa lliderar al so equipu. El tiempu nos dirá.

WILLIAMS
Williams tornó a zarrar una clasificación de F1 depués de recuperase en 2021. Sumaron pocos puntos y nun dieron sensación de grandes meyores, pero al mesmu tiempu nun tuvimos énte l’equipu Williams d’hai un par d’años qu’amosaba debilidá perdayuri. Los más de los éxitos del equipu foron d’Albon. Como yá diximos con McLaren, ye complicao escalar puestos na clasificación sumando con un pilotu solu. L’añu que vien Albon va compartir xera con un debutante, Logan Sargeant, dalgo que, en principiu, complica más la cosa pa facelos competitivos, salvo sorpresa.

A vegaes abulta que resumir una temporada mui intensa ye más fácil porque da más qu’escribir qu’una más discreta. Yá almitimos que 2022 nun foi una maraviella de temporada, pero como veis había abondes coses que comentar y nun vos despistar porque entavía tenemos otres más que compartir con vós.

El camín a la temporada 2023: noticies

Anque entavía nun rematemos l’añu oficial, la F1 yá tien puesto la vista na temporada 2023, y yá tamos dando pasos nesa direición. Por eso, vamos dir atropando les noticies más interesantes ya importantes de la pre-temporada hasta que se vaiga averando les feches de test dientro d’un par de meses.

Entamamos con una de les noticies con más impautu dende que terminemos la temporada 2022 y ye la salida, yá anunciada en dellos medios italianos, de Mattia Binotto del equipu Ferrari. Los resultaos nun acompañaron, y una temporada 2022 especialmente frustrante acabó col italianu fuera del equipu. Nel momentu d’escribir estes lletres nun tenemos nome confirmáu pa sustituyilu, pero hai dos que yá salieron: Ross Brawn, que ta acabante d’anunciar la so retirada del so puestu de direutor deportivu de la F1, y Frédéric Vasseur, xefe d’equipu d’Alfa Romeo. Viendo la salida de Brawn del muérganu principal de la F1, paez dexar llibre’l camín pa Vasseur, del que se diz tien perbona rellación con Charles Leclerc, lo que podría influyir quiciás na xestión de los pilotos pa 2023. Pero, como dicimos, nun hai nada confirmao.

Siguimos cola anuncia reciente, d’esti mesmu vienres, de qu’Alex Palou va ser pilotu reserva del equipu McLaren pa 2023. Depués del fichaxe d’Oscar Piastri que tantu revuelu provocó ente Alpine y l’equipu inglés, fichen agora al campeón d’Indy que yá tuvo al volante del McLaren de 2022 n’Austin. El catalán va ser pilotu reserva y va tar presente en tolos grandes premios que nun coincidan cola competición d’IndyCar na que va siguir tomando parte.

Son abondes les cares nueves que vamos tener nel 2023 na parriella, y una d’elles va ser la de Logan Sargeant, que va ocupar un de los asientos del equipu Williams xunto a Alex Albon. L’estauxunidense ta acabante de rematar una bona temporada na F2, na que terminó cuartu. El pilotu anunció esti día que va llevar el númberu 2 nel so coche, númberu que yá llevaba Stoffel Vandoorne nos sos años como pilotu en McLaren.

Por otru llau, el mesmu martes depués de la última carrera de la temporada, volvimos a tener coches en pista pa los test de post-temporada n’Abu Dhabi. Foi un día intensu puesto que dellos pilotos que’l domingu disputaron la última carrera de F1 co los sos equipos, pasaben dende’l llunes a trabayar colos nuevos, como ye’l casu de Fernando Alonso con Aston Martin o Pierre Gasly con Alpine. Los equipos pudieron rodar con dos coches al tiempu, dalgo que nun se ve nos test de pre-temporada que se llimiten a un coche por equipu (anque llueu haiga más d’un pilotu nos horarios de trabayu). La idea ye que los equipos trabayaran con un coche les gomes pa 2023, mientres que l’otru quedaba reserváu a pilotos novatos que tuvieren dando los sos primeros pasos na competición. Asina, vimos el debú d’Oscar Piastri con McLaren, Nyck de Vries con AlphaTauri, Nico Hülkenberg con Haas y los yá mentaos Alonso y Gasly colos sos nuevos equipos. Los tiempos más rápidos marcáronlos los pilotos de Ferrari, con Sáinz lliderando a Leclerc. Los pilotos compartieron sesión de trabayu y foi Robert Shwartzman l’encargáu de facer les llabores de rookie, ocupando’l tercer llugar per detrás de los sos dos compañeros.

Equí vos dexamos la tabla colos tiempos del día:

Pilotu Equipu Tiempu  Vueltes
Carlos Sáinz Ferrari 1:25.245 65
Charles Leclerc Ferrari 1:25:383 56
Robert Shwartzman Ferrari 1:25.400 116
Pierre Gasly Alpine 1:25.689 130
Max Verstappen Red Bull 1:25.485 76
Alex Albon Williams 1:25.959 118
Logan Sargeant Williams 1:26.063 82
Nyck De Vries AlphaTauri 1:26.111 151
Lance Stroll Aston Martin 1:26.263 70
Liam Lawson Red Bull 1:26.281 111
Jack Doohan Alpine 1:26.297 111
Fernando Alonso Aston Martin 1:26.312 97
Sergio Pérez Red Bull 1:26.333 88
Oscar Piastri McLaren 1:26.340 123
Felipe Drugovich Aston Martin 1:26.595 106
Valtteri Bottas Alfa Romeo 1:26.709 129
Lewis Hamilton Mercedes 1:26.750 67
Lando Norris McLaren 1:26.890 115
Nico Hülkenberg Haas 1:27.000 110
Yuki Tsunoda AlphaTauri 1:27.123 135
Pietro Fittipaldi Haas 1:27.172 99
Frederik Vesti Mercedes 1:27.216 124
George Russell Mercedes 1:27.240 73
Theo Pourchaire Alfa Romeo 1:27.591 106

La última noticia y la más reciente d’esta selmana que remata güei vienres día 2 d’avientu, ye la confirmación de que nun vamos tener gran premiu en China tampocu en 2023 por cuenta’l coronavirus y les midíes de proteición nel país asiáticu. El calendariu yá confirmáu hai delles selmanes queda asina con un güecu vacíu que la F1 estudiará como reemplazar.

El vienres que vien tornamos con más noticies de camín a la temporada 2023. ¡Tai sollertes!

Zarrando 2022: análisis de la temporada

Yá hai dellos díes que punximos en pausa la F1 y buscamos otres fontes d’entretenimientu que nos enllenen esos momentos que dexa vacíos la máxima competición de motor dende payares-avientu a febreru-marzu. N’AsturiesF1 vamos tentar de superar la resaca post-temporada faciendo lo que meyor sabemos facer, escribir. Güei entamamos una serie d’escritos pa poner el ramu a la temporada 2022 y dir enmarcando la 2023.

Empecemos l’añu col pasu cambiáu. Entavía recuperando de lo que foi’l 2021 que nun dio tregua hasta la bandera a cuadros n’Abu Dhabi, entamábemos 2022 con un cambiu bien grande de regulaciones que prometía sacudir un pocu l’orde al que llevábemos años avezaos. Los test de pre-temporada dexaron delles entrugues al aire qu’esperaben la so rempuesta nel primer gran premiu y que poquín a pocu fuimos resolviendo: Ferrari diba bien, Red Bull diba bien, Mercedes non. Yá sólo eso prometía facer la temporada bien interesante y ye verdá que foi asina al principiu, nes primeres carreres donde yera Ferrari quien marcaba’l ritmu con Charles Leclerc al volante. Sicasí, col pasu les carreres fuimos viendo que Ferrari entraba nuna dinámica d’erros, falta de fiabilidá y nerviosismu que pasín ente pasu diba poniendo los mundiales a Red Bull al algame. Con Mercedes fuera de xuegu, Red Bull nun diba desaprovechar la oportunidá que’l baxón de rendimientu de Ferrari-y taba ufriendo. L’equipu de la bébora enerxético llevaba tiempu abondo esperando esti momentu de tornar a ponese no cimero del mundial de constructores.

Y asina foi como Max Verstappen foi ganando carreres ensin casi oposición, con Ferrari tentando de paralu pero ensin éxitu dalu y con un güeyu puestu tamién no que diba faciendo Mercedes que nun taba muertu, como diría’l cantar. De fechu, l’equipu de Grove tuvo capacidá de sobra pa sobreponese al tropezón del iniciu. Quiciás sorprendió nun velos compitiendo por victories y facese namás con una, pero teniendo en cuenta cómo empezaron la temporada, creyemos que’l fechu d’acabala obligando a Ferrari a tenelos vixilaos y coronándose en Interlagos, fala muncho de la so recuperación.

Hasta que la realidá del dominiu de Red Bull se foi faciendo más evidente, tiníemos tres equipos estremaos tentando de ser campeones del mundu en constructores y pilotos y anque ye verdá que Mercedes nunca nun tuvo nin cerca d’averase a Red Bull, naide nun quería descartalos dafechu por si acasu. N’otru post vamos falar más fondamente de lo que fizo cada equipu pero yá podemos dicir equí que Red Bull nun fizo casi nada mal. Con pocos erros, un coche potente y un gran pilotu al volante ye difícil nun ganar.

En zones más templaes de la tabla, esti 2022 pudimos esfrutar de la llucha ente Alpine y McLaren que quedaron sólos nesa disputa cuando’l restu d’equipos de mitá de la parriella fueron descolgándose. Tanto l’equipu francés como l’inglés tuvieron una temporada mui irregular, con grandes carreres así como deceiciones mayúscules. Pocu a pocu fízose claro que la maxa d’Alonso con Alpine taba desapaciendo y que Ricciardo nun daba cola tecla en McLaren, lo que fizo que l’equipu perdiera munchos puntos nel camín. A naide nun sorprende les sos salides pa 2023.

Casi podemos dicir que, en xeneral, los equipos tuvieron agrupaos, nun hebo nengún equipu que se desmarcara muncho d’otros na so llucha nel campeonatu, quiciás cola exceición de Red Bull cuando yá foi evidente que Ferrari nun diba poder con él. Per detrás d’Alpine y McLaren, atopamos otra pareya d’equipos, Alfa Romeo y Aston Martin, que protagonizaron la llucha quiciás más igualada de tola parriella. De fechu, Alfa Romeo quedó per delantre d’Aston Martin por resultaos, porque empataron a puntos. Vimos delles bones carreres de dambos equipos, y tamién munchos descalabros y faltes de fiabilidá. Tamién dalgún qu’otru sustu, como’l de Zhou en Silverstone.

La cola de la parriella disputáronla tres equipos: Haas, Williams y AlphaTauri. Pa los últimos esti 2022 foi bien deceicionante, sobre too porque l’añu pasáu andaben en disputes con Alpine y McLaren y esti añu tuvieron más problemes pa siquier puntuar. Ensin mentar dellos sustos, como’l de Suzuka pa Gasly y tamién la situación comprometida del francés con munches penalizaciones que foron restando puntos de la so llicencia poniéndolu n’apuros.

Depués d’un añu complicáu no que cinca a la rellación con direición de carrera y los momentos que se vivieron n’Abu Dhabi que propiciaron la marcha de Michael Masi, esti 2022 tampocu nun foi cenciellu. De fechu, anque se cuntó con dos responsables nel cargu, nun dexaron de sucedese les decisiones cuestionables como la grúa en Suzuka o’l final de la carrera en Monza. Ye un rol complicáu, nun hai duldes, pero ye esti un aspeutu que precisa muncha meyora en 2023. Sí que ye verdá qu’hubo más coherencia al aplicar les penalizaciones ya que se dexó más llibertá en pista no que cinca a toques ya incidentes.

Sedría inxusto considerar 2022 una temporada aburrida pol fechu de que Red Bull y Max Verstappen dominaron gran parte d’ella y sobre manera si compararon esti añu col pasáu. Pero tamién ye verdá que la empecemos con munches ganes, munches espeutatives que poquín a pocu fueron apagándose al ver la realidá que nos ufríen unos ya otros. Sicasí, podemos dicir, dende la nuestra opinión, que foi una temporada entretenida, con carreres más intenses qu’otres, mesmo que pasa otros años, onde casi tuvimos más interés puestu no que se facía en puestos más baxos que na propia llucha pol mundial una vegada que Verstappen se fizo col llideralgu. Creyemos, amás, que nun hai munches duldes en que’l gran premiu de São Paulo foi’l meyor de la temporada, con carrera al sprint incluyida y col mundial yá decidíu.

Quiciás esperábemos más emoción asociada al cambiu de regulaciones, que pensábemos diben tener más impautu, y anque dalgo tuvieron nel casu, por exemplu, de Mercedes, nun podemos ñegar que foi insuficiente pal espectáculu. Sicasí, 2023 ufre munches oportunidaes pa ver a un equipu Mercedes yá consciente de los erros del pasáu y a Ferrari con nuevu xefe d’equipu que, nel momentu que tamos escribiendo esti artículu, entá nun sabemos quien ye. La temporada 2022 nun va pasar a la historia como la meyor pero tampocu nun tuvo mal del too y sí va recordase como la que marcó’l fin d’años d’hexemonía platiada. El tiempu diría si ye tamién la del aniciu del retornu de Red Bull al dominiu de la F1.

LO MEYOR Y LO PIOR de 2022

Carrera más entretenida: Interlagos
Carrera más aburrida: Abu Dhabi

Pilotu que más sorprendió: Lando Norris
Pilotu que más deceicionó: Nicholas Latifi

Equipu que más sorprendió: Red Bull
Equipu que más deceicionó: AlphaTauri

Momentu más intensu: la victoria de George Russell n’Interlagos
Momentu más vergoñosu: la xestión de la carrera en Suzuka

Recordai que siguimos actualizando’l nuestru post de la silly season 2022, anque yá práuticamente podemos dalu por rematáu. Sicasí siguiremos actualizándolu coles novedaes d’equipos y pilotos hasta qu’entame la temporada nueva.