Month: August 2021

Hai una selmana tuvimos equí faciendo un repasu a los equipos qu’agora mesmo ocupen los cinco primeros puestos de la clasificación nel mundial de constructores. Nun hai grandes sorpreses no cimero, vuelve a reinar Mercedes, pero esti añu nun lo ta teniendo tan claro. Sicasí, la emoción nun ta solo enriba como vimos hai unes selmanes n’Hungría. La batalla por nun quedar últimu ta siendo intensa, anque paez que yá tien un perdedor claru.

ALPHATAURI HONDA

Abúltanos que nun van quedar nesti puestu cuando veamos la última bandera a cuadros de la temporada. Nun tán teniendo males carreres pero sí daqué mala suerte y paeznos que Pierre Gasly ye quien a facer abondo más que lo que fizo hasta agora. Tsunoda va medrando como pilotu, y anque tovía tien munches coses que pulir, paeznos que na segunda mitá del campeonatu, si da un pasu alantre, puede dar munches allegríes al equipu. Nos test de pretemporada diben mui fuerte y puntuaron en bastantes carreres, pero de momentu tán namás que nel sextu puestu de la clasificación, eso sí a poca distancia d’Alpine, que-yos quitó’l puestu na última carrera d’Hungría.

ASTON MARTIN MERCEDES

L’entamu de lo qu’enantes yera Racing Point foi bastante descafeináu. Anque con ellos momentos de brillu, paecía complicao creyer que la decisión de Sebastian Vettel de fichar por esti equipu diba da-y dalgo bono al cuatro vegaes campeón del mundu. Lance Stroll tampoco nun taba muncho meyor, anque sí paecía tar más a gusto que l’alemán. Sicasí, como yá pasó con otros equipos como ye’l casu d’Alpine, col pasu de les carreres, Aston Martin dio un pasu alantre, y anque entá tienen trabayu que facer si quieren ponese perriba AlphaTauri y alcanzar a Alpine, viendo lo visto estes últimes carreres, sobre manera pensando nel segundu puestu de Vettel n’Hungría (anque a la fin lu descalificaran pol tema la muestra combustible) y les vegaes que tienen atropao bonos puntos. Paeznos que la llucha pol quintu puestu va tar ente ellos y los yá mentaos Alpine y AlphaTauri.

WILLIAMS MERCEDES

N’años pasaos, cuando facíemos repasu a les temporaes, yera vezu poner a Williams no último, ensin puntos y muncho que dicir. Esti añu ta siendo mui diferente. Colos rumores de la marcha de Russell siempre presentes, l’equipu pegó un acelerón considerable na última carrera n’Hungría. Aprovechando les desgracies d’otros pero tamién faciendo valer les sos posiciones, dambos pilotos sumaron puntos, dalgo que nun se vía en Williams dende cuantayá. La casualidá fai que seya Latifi quien tea per delantre nel campeonatu de pilotos cuando ye quien peores resultaos taba sumando pal equipu, pero a la fin lo qu’interesa a la escudería ye saber que yá nun van ser últimos nel campeonatu y tiénenlo fácil pa nun ser tampocu penúltimos, anque van tener que trabayar en pista porque Alfa Romeo nun va dase. Son siete puntos namás los que separan a ún ya otru equipu, dalgo que nuna bona carrera, como la d’Hungría pa Williams, puede desapaecer y poner les coses más apertaes.

ALFA ROMEO RACING FERRARI

Nun había munchu enfotu n’Alfa Romeo al empezar la temporada y tán respondiendo a esi sintir. Ye verdá que yá sumaron dellos puntos, trés, pero abulta pocu pa los sos intereses. La carrera de Räikkönen yá paez que ta llegando al so atapecer dafechu, y nun sabemos si se xunta eso con un coche pocu competitivu y un compañeru d’equipu que tien momentos mui inspiraos en pista pero poca suerte o poca capacidá pa ponese en puntos. Y eso que tenemos visto bones coses de Giovinazzi, pero pol motivu que seya nun termina de dar esi pasu definitivu que lu coloque davezu ente los diez primeros. L’arreón de Williams n’Hungría colócalos penúltimos y mete’l miéu nel cuerpu de que Haas pueda tener una bona carrera, sumar más de trés puntos y dexalos a ellos últimos. Na segunda mitá de la temporada van tener que buscar la fórmula pa sumar, anque seya d’ún n’ún, y asina desmarcase d’esi últimu puestu qu’entavía ven mui cerca.

HAAS FERRARI

A falta de tola segunda mitá de la temporada nun paez que falemos de más si dicimos que Haas ta siendo la gran deceición de 2021. Nun esperábemos milagros pero tampocu que tuvieran tán abaxo na parriella y con un coche tan poco competitivu. Nun sedría raro qu’en llegando la última carrera sigan ocupando esi llugar y van tener qu’ameyorar muncho d’equí a esi momentu si quieren tener siquier dalguna oportunidá. Lo que pasó n’Hungría con Williams ye quiciabes un motivu pal optimismu, pero abulta complicao pal equipu estauxunidense. Nin Schumacher nin Mazepin pueden suañar con entrar en puntos por mui lloca que tea la carrera, a lo menos colo que l’equipu tien hasta agora. Podemos xulgar el so rendimientu en función de los que vemos y la llucha ente ellos, que de momentu gana Schumacher, anque tampocu tenga muncho que cellebrar. Nun sabemos cuánto lu puede ayudar esto nel futuru p’atopar un asientu na parriella. El pilotu rusu, pel so llau, tovía tien muncho que demostrar pa convencer a la xente que se merez esi asientu.

El parón de branu siempre val pa valorar lo que foi la primer parte de la temporada y, si acasu, tentar d’aldovinar lo que van ser les vinientes carreres. Sicasí, viendo lo visto hasta agora, casi paez imposible predicir lo que va pasar. Ta claro que Red Bull nun se va achantar nin dexar que seya Mercedes quien mande nes carreres aparte de nos campeonatos. Falta saber si van ser quien a ello y de qué manera, si dominarán como ficieron nesta primer parte o vamos llegar hasta la última carrera con emoción y duldes. Pela parte medio y baxo la emoción ta garantizao, con munchos equipos con posibilidaes d’ameyorar los sos puestos de clasificación d’anguaño y munchos puntos entavía por disputar. Si la segunda parte de la temporada ye la mitá d’entretenida que foi la primera, tenemos espectáculu garantizáu.

Cuando empecipió esta temporada, cásique tolos fans de la F1 esperábemos que fuera l’últimu de dominiu de Mercedes mientres nos preparábemos pa un 2022 de munchos cambios. Tres la pandemia, nun quedaba otra qu’esperar otru añu pa les nueves regles y la promesa de ver más emoción en dambos campeonatos. Sicasí, 2021 tiníanos preparada una bona ración de carreres y un Red Bull preparáu pal asaltu a los cielos. Naide nun cuntaba con ello, tampocu Mercedes. Por eso, esta temporada paga la pena paranos y aprovechar esta pausa braniega pa echar un güeyu al trabayu desendolcáu hasta agora polos equipos. Nesti primer artículu, vamos repasar lo fecho nestos primeros meses de temporada de los cinco primeros equipos na clasificación del mundial de constructores: Mercedes, Red Bull, Ferrari, McLaren y Alpine.

MERCEDES

Agora tán llíderes en dambos campeonatos pero nun foi hasta Hungría que fueron quien a ello. Paeznos que son los más sorprendíos pol cambiu nel rendimientu de Red Bull, que depués d’años foi quien a atopar la forma de pasar per delantre d’ellos. Depués de la polémica de Silverstone, n’Hungría atoparon la forma de compensar los errores d’esa carrera y d’aprovechar la mala suerte de los rivales pa dir atropando los puntos necesarios pa ser llíderes sorprendiéndose a ellos mesmo pol ritmu de carrera. Sicasí, nun tamos en temporaes anteriores ya’l retornu a lo más alto de les tables paez qu’esti añu significa menos que nunca. Hamilton va ser pilotu pa 2022, pero nun ta claro entá quién va ser el so compañeru. Les posibilidaes de Bottas son cada vegada más pequeñes y ye bastante probable que’l so asientu lu ocupe George Russell. De toles formes, como dicimos, entá (nel momentu d’espublización d’esti artículu) nun hai nada confirmao. ¿Aú podría dir el, de momentu, pilotu de Mercedes? Fálase d’un cambiu de cartes, finlandés por finlandés n’Alfa Romeo, con Kimi Räikkönen quiciás ya con pie y mediu fuera de la competición, pero nada ye oficial. Lo que sí ta claro ye que nuna temporada como esta, Mercedes va necesitalu más que nunca ya en muncha meyor forma que lo que vimos hasta agora, porque de xuru Red Bull va tornar del parón braniegu con fuercia suficiente pa poner el so llideralgu en peligru.

RED BULL RACING HONDA

Red Bull tien, posiblemente, el par de pilotos más competitivu qu’hai agora mesmo na parriella. Ye verdá que Sergio Pérez tuvo mui mala suerte en delles carreres onde tuviera sumao puntos que lu ficieran tar más arriba na clasificación de pilotos, pero ente él ya’l so compañeru Max Verstappen, tán consiguiendo dalgo que hasta agora naide cuntaba con ver hasta 2022: Mercedes ensin dominar. Sicasí, la escudería de Milton Keynes precisa más tranquilidá qu’éxitu, más paciencia que victories. Nuna temporada tan abierta, sólo l’equipu que sepa xestionar bien les carreres y sobre manera, que nun quiera ganales enantes de disputales, va ser quien consiga la victoria, dalgo que nos tien amosao Mercedes yá nel pasáu. Red Bull tien de saber tomar esi camín de bona xestión, de saber xugar les sos cartes y de facer una segunda parte de la temporada ensin errores nin prieses. Lo que vimos hasta agora ye un equipu con munches ganes, con muncha agresividá y con, a vegaes, poca paciencia. Cuidamos qu’a partir de Bélxica y depués de dos carreres siguíes nes que casi nun pudieron atropar puntos, deprenderán a trabayar nesi aspeutu.

FERRARI

La escudería italiana completó una bona primer parte de la temporada, anque entavía tán lloñe de lo que s’espera d’ellos. Tuvieron unes cuantes carreres mui buenes, con podios incluyíos en circuitos au, en teoría, nun cuntaben con más que puntuar. Dieron un bon pasu alantre comparao con 2020 que, de momentu, los empata a puntos con McLaren en tercer llugar del campeonatu de constructores, anque por delantre d’ellos por tener meyores podios. Sicasí, tovía nun tán al altor de lo que s’espera d’ellos, que ye competir con Red Bull y Mercedes n’igualdá. Ser terceros esti añu nun sedría una deceición si pensamos no que foi 2020 pero sabe a otra oportunidá perdida. El par de pilotos col que cunten esti añu, Leclerc y Sáinz, tán rindiendo muncho y sacando bon partíu al coche ufríu por Maranello. Cuidamos que nes carreres vinientes depués del parón, den esi otru pasu alantre que tol mundu ta esperando d’ellos y quiciás asina llegue dalguna victoria d’equí al final de la temporada.

McLAREN MERCEDES

Yá nun sorprende tener a McLaren de vuelta a lo cimero. L’equipu ye terceru nel campeonatu de constructores, empatáu con Ferrari, y Lando Norris ye tamién terceru nel de pilotos. Daniel Ricciardo va pasín ente pasu faciéndose al equipu. El so compañeru llevaba, hasta Hungría, una racha de quince carreres siguíes puntuando, cinco de la temporada pasada y diez d’elles nesti 2021. Entavía queda’l pasín de, definitivu que los avere a la victoria, que podría llegar si esti 2021 sigue regalándonos carreres como les que vimos hasta agora (sin dir mui lloñe, Hungría). De toles maneres, pa caltener esi tercer puestu nel mundial de constructores, l’equipu inglés va precisar d’un gran pasu alantre del so fichaxe d’esti añu. El pilotu australianu Daniel Ricciardo nun tuvo’l meyor de los anicios de temporada y ta costando ponese al altor del so compañeru, que yá fizo dos podios esti añu. Nun sabemos si ye que lu pilló despreveníu, si nun cuntaba con que Norris diba tener un rendimientu tan altu, pero pol so bien y pol del equipu, toca-y afrontar la segunda parte de la temporada con más fuercia y, sobre too, más puntos, mui importantes pa consiguir replicar el resultáu nel mundial de constructores de 2020, un éxitu pal equipu de Woking cuntando amás que Ferrari esti añu vien más fuerte.

ALPINE RENAULT

La brecha que separa a Alpine de Ferrari y McLaren ye quiciás demasiao grande como pa que seya quien a suañar siquiera con pelear con ellos pol tercer o’l cuartu puestu nel mundial de constructores, pero siendo los últimos ganadores d’una carrera, too ye posible. El cambiu de Renault a Alpine dexó munches entrugues ensin rempuesta que diban atopala pocu a pocu a midía que diba desenvolviéndose la temporada. Col retornu d’Alonso a la parriella, la cuestión taba en ver si diben ser quien a da-y un coche mínimamente competitivu a él y al so compañeru d’equipu Esteban Ocon. Recordamos que 2021 diba ser un test pa preparase pa un 2022 nel que l’equipu podría quiciás cuntar con daqué interesante pa competir por victories y campeonatos. Les primeres carreres fueron regulares más bien discretes, pero col pasu de los circuitos, la meyora del rendimientu d’Alonso diba siendo más notable. Pel so llau Ocon foi baxando, pasando delles carreres nes que l’equipu nun entendía mui bien qué yera lo que-y pasaba al so coche que nun diba tan bien como’l del asturianu. Depués de delles pruebes, hai dos carreres, en Silverstone, paecía que l’equipu diera col problema, pero nun cuntábemos con que llegando a Hungría díbemos atopalos no cimero del podiu. Ye verdá que foi una carrera con abandonos y munchos incidentes, pero siempre dicimos que pa ganar nesti tipu de carreres hai que tar ehí, hai qu’aprovechar les oportunidaes ya igual que fizo Gasly cola so primer victoria en Monza l’añu pasáu, fizo Ocon esti n’Hungría: una victoria que supo a mil victories xuntes pa un equipu ya un pilotu con munches ganes de reivindicase. Como dicimos, tienen complicao romper la brecha qu’hai ente ellos y los sos rivales, pero depués d’una victoria como la d’Hungría, y de dir meyorando col pasu les carreres, nun descartamos nada.

Dientro unos díes, espublizaremos la segunda parte d’estes reflexones braniegues analizando a los cinco equipos restantes y lo que vinieron faciendo no que llevamos de temporada.