Day: September 10, 2020

Previa del Gran Premiu de la Toscana 2020

La pandemia traxo munches novedaes a la F1 como pasó col mundu en xeneral: carreres ensin públicu, muncho protocolu, eventos que camuden de fecha o cancelaos dafechu y, sobre too, circuitos nuevos nel calendariu. El d’esti gran premiu ye ún d’ellos: tamos nel gran premiu de la Toscana 2020 que va celebrase nel circuitu de Mugello, un vieyu conocíu de los aficionaos del motor pero que nun taba previsto que tuviera nel calendariu nel futuru próximu. La selmana pasada, col gran premiu que vivimos en Monza (del que podéis lleer la crónica equí), iniciamos una tanda de carreres n’Italia que nos lleva agora a Mugello.

Y ello ye que, con tola novedá que supón competir nun circuitu “nuevu”, nel que Ferrari va cumplir el millar de grandes premios (pal que yá tienen un nuevu diseñu pal so coche y celebración apropiada con Mick Schumacher al volante d’ún de los coches míticos que llevó so padre), de lo que más vamos falar, ensin duldes ye d’una de les noticies del fin branu formuleru: Sebastian Vettel yá tien asientu pa 2021.

Tres la sorpresa que recibimos cuantayá de que’l pilotu alemán abandonaba Ferrari pa 2021, el so futuru taba un pocu nel aire. Abulta que nengún sitiu yera lo suficientemente buenu p’acoyer a un cuatro vegaes campeón del mundu, y al tiempu, los cambios futuros nes regulaciones ya’l rendimientu amosáu esti añu dexa ver que quiciás dalgún equipu del medio la tabla ye potencial candidatu a faer les coses bien nos meses venideros. Esto último paez ser que ye lo que pasó col alemán que pal 2021 va ser pilotu en Racing Point F1, escudería que va pasar a ser Aston Martin F1 pal añu que vien con, posiblemente y siempre según los rumores, Adrian Newey a bordo. Nun hai muncho que falar el inxenieru ideólogu d’un coche que-y dio a Vettel cuatro campeonatos del mundu, anque sigue paeciéndonos un movimientu arriesgáu por ser Racing Point quien son agora mesmo: un equipu, como dicimos, de la mitá de la tabla. Ye verdá qu’esti añu tán consiguiendo podios y cúntase con ellos ente los diez primeros cásique en toles carreres y la inversión pel llau de Lawrence Stroll colo que pueda aportar Aston Martin ye atractiva, pero’l pasu de Ferrari a Racing Point nun dexa de ser llamatible. L’alemán firma pues un contratu pa varios años, empezando a partir del próximu 2021.

Sicasí, nun son too sorrises. Cuando hai movimientu de pilotos, y cuando esti inclui’l d’un pilotu de los más cotizaos, siempre hai dalguién que pierde. Nesti casu, el perdedor ye’l mexicanu Sergio Pérez, qu’anunciaba la so salida de Racing Point el miércoles, pesie a que firmara l’añu pasáu por tres años más. Les razones que daba pa colar dan a entender que nun lo vio vinir y que resentía un pocu, como ye lóxico, el cambiu por tolo que tinía dao al equipu. El mexicanu queda agora nesa tierra de naide a la que pasen los pilotos de menos postín, esperando que quede dalgún sitiu vacíu pa ocupar enantes de que termine esta temporada. Suponemos que d’equí a avientu, toles carreres de Pérez sedrán una forma de reivindicase como pilotu y d’amosar qu’hai motivos pa contratalu. Podéis seguir tolos movimientos de la silly season nesti post que vamos completando con novedaes dende que van saliendo.

Nun queremos escaecer qu’esti va ser el primer gran premiu ensin la familia Williams depués de tantes y tantes temporaes de F1.

Poques más novedaes tenemos con respeutu al gran premiu d’hai namás siete díes que tan bones sensaciones nos dexó. Cuidamos qu’un circuitu nuevu traiga emociones distintes ya inesperaes, por ser novedá pa toos. Nun descartamos una victoria de Mercedes por ser ellos los que manden agora mesmo nes clasificaciones pero, depués de lo de Monza, facémoslo cola puerta abierta qu’haya dalgo que nos ufra otru gran eventu. La F1 tien falta d’ello.

Embaxo dexamos tola información preciso sobre horarios, un vídiu del circuitu y les gomes que se van usar pa esti gran premiu:

GRAN PREMIU DE LA TOSCANA
Circuitu AUTODROMO INTERNAZIONALE DEL MUGELLO
HORARIOS
VIENRES 11/09/2020
LLIBRES 1 11:00
LLIBRES 2 15:00
SÁBADU 12/09/2020
LLIBRES 3 12:00
CLASIFICACIÓN 15:00
DOMINGU 13/09/2020
CARRERA 15:10

Gran Premiu d’Italia 2020

2008. Nun circuitu de Monza moyáu, Sebastian Vettel gana la so primer carrera en F1 col equipu Toro Rosso.
2020. Nun circuitu de Monza secu pero vacíu de tifosi, Pierre Gasly gana la so primer carrera en F1 col equipu Alpha Tauri, enantes nomáu Toro Rosso.
La historia repítese.

Y si dalgo tenía falta la F1 yera d’una historia asomeyada a la qu’en 2008 protagonizó Vettel. Si amás el protagonista ye ún de los pilotos que más necesitaba reivindicase depués de tolo que tien pasao nos últimos meses, tenemos los ingredientes perfeutos pa una gran carrera. Podemos añadir que nengún de los tres grandes equipos subió al podiu y qu’esta tamién foi la ocasión na que los equipos de la parte medio de la tabla daben un puñetazu na mesa pa dicir qu’ellos tamién pueden ganar carreres y subir a podios.

Pudiera paecer que la carrera foi intensa de principiu a fin. Lo cierto ye que la primer mitá foi bastante discreta, casi tirando a aburrida, y cásique podíemos ver yá a Hamilton no cimero del podiu. Bottas tuvo una salida mui floxa y andaba perdíu pol sextu puestu con Verstappen faciendo por rondar a Hamilton y Carlos Sáinz aprovechando’l tirón de clasificar terceru’l sábadu, pero consciente de que contra Mercedes y Red Bull diba tenelo complicao. Ferrari, n’otru sábadu negru, andaben entavía más abaxo. De fechu, el primer abandonu protagonizolu Vettel que quedó ensin frenos. El suma y sigue del equipu italianu nun paez tener fin.

Otru de los qu’abandonó y desencadenó involuntariamente lo que diba venir depués en carrera foi Kevin Magnussen. Un problema col motor del coche lu dexó tiráu casi a la entrada del carril de pit y provocó un coche de seguridá que Hamilton rápidamente aprovechó pa parar. Diose la circunstancia de que’l coche de Magnussen, al tar au taba, obligó a zarrar el carril de pit, y asina se marcó a los pilotos con señales luminoses (en forma de cruz colorada) en pista. Nin Hamilton nin Giovinazzi fueron avisaos polos sos equipos de la prohibición y tuvieron que ser penalizaos, con un stop & go de diez segundos.

Enantes de que se decidiera la penalización d’estos dos pilotos, Charles Leclerc perdía’l coche d’atrás nuna curva y acababa nes proteiciones con un gran accidente del que salió ensin mayor problema pa él, anque les proteiciones tuvieron de reparase. La reparación provocó una bandera colorada qu’obligó a tolos pilotos a entrar en el carril de pit y aliniase n’orde de posición. Nesi momentu súpose la penalización de Hamilton y Giovinazzi que ponía yá en duldes esa victoria tan folgada de la que falábemos enantes.

De fechu, tres la bandera colorada, tuvimos una carrera totalmente distinta. Non sólo penalizó Hamilton, que foi quién a recuperar y acabar en puntos. También esta bandera colorada perxudicó a Red Bull, a dambos pilotos, que nun fueron a puntuar. Y no cimero tres protagonistes: Pierre Gasly, Carlos Sainz y Lance Stroll. Ellos tres diben tener tola atención el restu de la carrera: el francés por tar peleando pola so primer victoria en F1 nun gran premiu nel que Red Bull nin siquiera taba en puntos; el madrilanu tamién por llegar a ganar una carrera que yá pintaba bien dende’l principiu anque quiciás non tanto como pa suañar cola victoria. Y Lance Stroll, que foi quien a xubir al podiu y tuvo na so mano dalgo más, pero acabó desinflándose.

Les últimes vueltes fueron tenses pa los dos pilotos d’arriba, y de fechu, con un par d’elles más, ye fácil qu’en cuenta de Gasly fuera Sáinz el ganador. Pero’l francés pudo y supo imponese con un coche lixeramente inferior, nun circuitu nel que nun tinía nada que perder pero too que ganar. La gran pena foi que, siendo Alpha Tauri un equipu italianu, tuviera de celebrase ensin públicu. A falta de Ferrari, buenu ye un Alpha Tauri y de xuru la filial de Red Bull diba agradecer l’apoyu de los fans italianos.

El domingu non sólo ganó Gasly, ganó tamién la F1. Ganemos toos. Porque aparte d’una gran carrera, vimos a un pilotu que yá merecía una alegría algamar lo cimero del podiu, y éstes son les histories que presten. Mercedes ta mereciendo les victories y tar no más alto de les clasificaciones, pero ye verdá que cuando tenemos carreres nes que los protagonistes son otros, la F1 respira y dexa atrás los rumores d’aburrimientu o monopoliu de les fleches platiaes. Axallá nun seya esta la única carrera na que podamos celebrar novedaes como les d’esti eventu en Monza.

Nun vos despisteis. Tamos metíos nuna tanda de tres grandes premios n’Italia que nos lleva agora a la Toscana, al circuitu de Mugello.