Month: February 2020

Ensin munches conclusiones entá pero con delles cosines que comentar remató la primer tanda de test de la pretemporada 2020. Con tolos coches yá presentaos, mesmo que pilotos y equipos, la familia formulera axuntose otru añu más en Montmeló pa dir presentando y probando los sos nuevos coches. L’aspeutu xeneral col que nos quedamos ye que nun hebo grandes problemes nin deceiciones, sí qu’hebo dalgo polémica y que dellos pilotos piensen qu’esti añu, otra vegada, van baxase los tiempos del añu anterior.

Con tiempu soleyeru pero frescu, cubrimos los tres díes nel Circuit de Catalunya, escenariu tradicional de les sesiones de test, y únicu d’esti añu na pretemporada. Tolos equipos llegaron a tiempu, nun hebo retrasos llamatibles (como pasara l’añu pasáu por exemplu con Williams) nin problemes destacaos. Sí qu’hai dos apuntes importantes sobre esta primer parte de los test. Per un llau, el nuevu sistema DAS que Mercedes incorporó a los sos coches y que constitui una de les principales (si non la que más) innovaciones d’esti cursu. El sistema ye polémicu y tanto equipos como pilotos y xente especializao nun tardó en dar la so opinión sobre ello. En xeneral, los equipos y los pilotos coinciden en dicir que ye un sistema innovador, que pinta poderosu y que nun tienen más qu’aplaudir a Mercedes por, otra vegada, pillalos col pie cambiau y por siguir ameyorando pesie al so dominiu nos años pasaos.

Sicasí, la so viabilidá entavía nun ta asegurada, y d’equí al 15 de marzu qu’entame la temporada dafechu pueden cambiar les coses. Hai munchos aspeutos qu’estudiar y valorar pa decidir si esti nuevu DAS ye o non llegal. De momentu, lo que queda claro de too esto ye que Mercedes acalla asina los rumores de que taben con un pie fuera de la competición pa 2021. Los sos progresos ya innovaciones cuando’l restu d’equipos entá nin se decataron de que la temporada yá ta equí nun dexan de sorprender.

Per otru llau, Racing Point F1 recibió crítiques dures d’otros equipos na parriella por presentar un coche que ye, supuestamente, un calcu del Mercedes del añu pasáu. Con toles llimitaciones que pueda tener la escudería pa ponese al altor de les fleches platiaes, equipos como Haas nun duldaron n’apuntar (y atacar) nesi sen al equipu nel que compiten Sergio Pérez y Lance Stroll. Dende Racing Point nieguen que seya asina y comentaron que lo que presenten esti añu nun ye mui distinto de lo que tien fecho’l propiu equipu Haas con respeutu a Ferrari. Siguiremos la polémica de cerca. Lo que sí ye evidente ye que Racing Point tuvieron una primer sesión de test bastante bona y ente los primeros puestos de les clasificaciones de cada sesión.

McLaren pel so llau informaron de los sos bonos resultaos nesti test, asina como les bones sensaciones tresmitíes polos sos pilotos. Tanto Sáinz como Norris atroparon un bon númberu de vueltes en cada ún de los díes nos que tuvieron en pista, y paez que’l coche ta bien preparau pa competir esti 2020.

En Williams tamién hai motivos d’optimismu. George Russell, aparte de facer por afalagar al so nuevu compañeru, de quien dixo que naide nun puede facelu de menos por ser nuevu na categoría, tamién comentó qu’esti añu l’equipu tien muncha meyor pinta, yá dende los test, que’l pasáu. Ensin duldes, si esto se caltién hasta les carreres, ye una bona noticia pa la competición.

Ferrari tuvo una tanda d’entrenamientos daqué menos tranquila, anque ensin grandes problemes. Sebastian Vettel nun pudo estrenase’l miércoles por tar indispuestu, y ún de los díes el coche quedó paráu en pista. Como pasó hai dos años, paez qu’en Maranello nun tán a punto pa la temporada, polo menos non entavía, anque queda muncho que rodar. Si facemos la comparación (inevitable) con Mercedes, l’equipu alemán tien garantíes pa tornar a ser campeón del mundu otru añu más. Pero insistimos, esto ye too suponer.

Red Bull paecen dispuestos a xunise dende bien ceo a la fiesta esti añu. Les primeres sesiones de test fueron positives. Alexander Albon comentó que’l coche tinía meyor manexu esti añu que l’anterior y en xeneral tinía un meyor rendimientu, a lo menos nestos primeros díes. Bones noticies pal campeonatu, ensin duldes.

La parte intermedia de la tabla pinta bien. Suel ser la parte más interesante de la temporada depués de que los d’enriba entamen a garrar posiciones y col empiezu tan positivu de McLaren y Racing Point, sumao al emburrión de Renault nel últimu día de test, la meyora de Williams y que paez que Haas van tar como hai dos años, l’escenariu apunta a una parte intermedia más apertada entá que l’añu pasáu. Nun escaecemos a los Alfas (Alpha Tauri y Alfa Romeo), que van dar guerra tamién.

Dicho too esto, preparámosnos pa la segunda tanda de test, dende’l miércoles 26. Sedrán los últimos díes previos al empiezu de la temporada n’Australia dientro de menos d’un mes. Con entavía milenta entrugues y duldes que resolver, siguiremos de cerca tamién lo que se vea en Montmeló nestos prósimos tres díes. Podéis siguilo en redes o per equí, au espublizaremos un resume de lo visto nesta segunda parte de los test.

Yá n’otru post vos apurrimos les feches de presentación de tolos coches que van competir nesta nueva temporada 2020, xunto a les feches de los test de pretemporada. Amás, yá tenemos vidios y semeyes d’ellos que podéis dir viendo enantes de qu’entren n’aición esta selmana.

Pero primero que llegue esi momentu, queremos echar una güeyada a lo que nos espera nos meses vinientes. Entama una nueva temporada con toles entrugues, duldes ya ilusiones de siempre. Ferrari torna a ser el principal rival de Mercedes, col coche un pasu per delantre de les fleches platiaes nes apuestes, sobre manera esti añu nel que s’informaba de problemes pal campeón del mundu de constructores actual. Yá deprendimos a nun fianos de les apuestes de pretemporada y menos tovía ensin tener visto a nengún de los coches en pista, polo que diremos viendo como desenvuelve too otra vuelta.

Esti 2020 diba a regalanos un calendariu apertáu enforma con ventidós carreres, pero los acontecimientos venceyaos a l’esporpolle de la epidemia del coronavirus en China provocaron la suspensión temporal del gran premiu chinu hasta que, suponemos, la situación ameyore. Sicasí, un calendariu de ventiún eventos tamién supón un retu pa equipos y pilotos a lo qu’esti añu s’añaden dos nuevos circuitos: Hanoi, en Vietnam, qu’entra na Fórmula Ún ensin que naide nun sepa mui bien qu’esperar d’ello (y que ta pendiente conocer si se ve afectáu tamién pola alerta sanitaria), y Zandvoort, que retorna a la categoría a cuenta del ésitu del holandés Max Verstappen. Nes vinientes selmanes diremos asoleyando’l calendariu pa esta temporada, pero quedaivos con estes dos feches:

– 15 de marzu: Arranca la F1 n’Albert Park (Australia)
– 29 de payares: Zarramos la temporada en Yas Marina (Abu Dhabi)

Nos equipos, la novedá más importante ye la denominación nueva de Toro Rosso qu’agora ye Alpha Tauri. No que cinca a pilotos, dos nueves-vieyes cares al volante: Esteban Ocon vuelve a la F1 con Renault y Nicolas Latifi blinca a la primer categoría con Williams. Nesta temporada dicimos adiós a Nico Hülkenberg, del que se dicía que diba mirar pa la Indy, y Robert Kubiça, que siguirá en F1, anque de pilotu probador-desarrollador. Tola información d’equipos y pilotos va tar actualizada nos prósimos díes, a puntu pal entamu de la temporada.

Hai milenta coses pendientes de zarrar enantes de que les lluces coloraes s’apaguen n’Albert Park en menos d’un mes y que vos vamos dir concretando col pasu les selmanes. Con esti post empecipiamos una nueva temporada na que cuntamos compartir momentos bonos con vosotres y vosotros como yá ficimos n’años pasaos. ¡Arrancamos!

Entavía hai silenciu nos circuitos, anque más d’ún yá tenga daqué movimientu. Nun conocemos a los protagonistes aerodinámicos dafechu, tovía queden díes, pero dalgún qu’otru equipu yá decidió amosar lo que tien preparao pa esti 2020. Y ye que, depués de selmanes de parón, la F1 torna a la vida.

Con milenta coses que comentar (nunca nun ye un parón dafechu) vamos tomando posiciones pa lo que cuidamos que seya otra gran temporada de la máxima categoría del motor. Tenemos a los pilotos confirmaos y anque entá nun conocemos les máquines coles que van competir, sí vos podemos ufrir información en forma de feches, nomes y datos.

PRESENTACIONES DE COCHES

Haas madrugó y yá conocemos dende’l día 6 cómo va ser el so coche pa esti 2020, nel que va tornar a los colores del pasáu, anque de xuru lo que tenemos visto tendrá dalgún retoque más. El restu d’equipos van dir, demientres esta selmana, presentando les sos creaciones enantes de ponese en camín a Montmeló pa los test de pretemporada.

Abaxo vos presentamos tola información no que cinca a les presentaciones. Diremos actualizando esta tabla colos enllaces a los coches dende que se vaigan presentando. Como diximos, Haas yá enseñó’l so coche, pero la presentación oficial va ser na fecha qu’indicamos:

Presentaciones

TEST DE PRETEMPORADA

Depués de la esperiencia del añu pasáu, tornó a escoyese Montmeló, esta vegada n’esclusiva, como escenariu pa les dos tandes de test de pretemporada nestes feches.

TEST 1

TEST 2

Pasín ente pasu diremos poniéndovos al día demientres esta selmana coles novedaes que nos esperen nesti 2020 y actualizando los nuestros archivos colos protagonistes d’esta temporada que ta a piques d’entamar.