Month: October 2019

Hai carreres que, ensin dar gran espectáculu en pista, tórnen en folixes grandes namás pol ambiente que se xenera. Esi ye’l casu de México; ensin ser una carrera que se preste a grandes emociones, anque la d’esti domingu sí tuvo dalguna, namás pola atmósfera que se crea y pol despliegue que faen los qu’entamen el gran premiu, yá paga la pena la poca emoción en pista.

SÁBADU

El sábadu la pole foi de Verstappen pero heredola Leclerc. L’holandés marcara la vuelta más rápida con banderes amarielles y envede ser discretu y dicir que nun se decatara, decidió que yera bona idea comentar na rueda de prensa qu’efeutivamente nun frenara al ver l’accidente aparte de cuestionar les restricciones de seguridá de la FIA nestos casos. Estes pallabres garraron más volume entá cuando Vettel comentó qu’él viera que Bottas taba nel muru y reaicionó de forma instintiva frenando porque sabía que yera lo que tocaba. Dos maneres d’enfocar un mesmu eventu y otru patinazu más del pilotu de Red Bull, que perdió la pole y dos posiciones. El pilotu de Red Bull taba, como paez lóxico, molestu cola decisión, pero si pensamos que con otra actitú tuviera conservao la pole yá que nel momentu del accidente de Bottas yera’l pilotu más rápidu, nun podemos más que llamentar estos repentinos que-y dan dacuando.

Demientres tola fin de selmana hebo alternancia ente Ferrari y Mercedes, anque paecía que la Scuderia podía ufrir más pal domingu. La realidá ye que dambos pilotos entraron ente los tres primeros, gracies a la penalización a Verstappen, con Hamilton pel medio. Bottas, col so accidente a última hora, tovía pudo quedar sextu per detrás del otru Red Bull d’Albon. Nun tuvimos sorpreses pela parte medio-baxo de la tabla, colos dos Haas fuera na Q1, mesmo que Stroll y los dos Williams. La Q2 foi la sesión pa Pérez, que nun pudo regalar a la so xente un puestu ente los diez primeros y pa dambos Renault y Alfa Romeo, que salieron empareyaos.

Completaron los diez primeros, aparte de los yá nomaos pilotos de Ferrari, Mercedes y Red Bull, los dos McLaren y los dos Toro Rosso, que tuvieron una actuación bastante curiosina nesti gran premiu.

DOMINGU

Y como avezamos, la salida foi de les coses más intenses del domingu. Porque la verdá ye que, sacante dellos momentos y de les estratexes qu’una vegada más dexaron a Ferrari n’evidencia, el restu del gran premiu foi bastante tranquilu. La salida prometía ser una réplica de lo que pasara en Rusia: dos Ferraris en cabeza con una recta perllarga (la segunda más llarga del campeonatu) per delantre enantes d’una curva con una frenada bastante grande. Sicasí, nun foi too tan claro pa Ferrari y pronto viéronse amenaciaos pol Mercedes de Hamilton, que salió bien y Verstappen con ganes de venganza. Tantu yera’l puxu del holandés que tuvo un choque con Hamilton que dañó a dambos perxudicándolu más a él, y faciéndolu perder delles posiciones. Como vien pasando, tamién los dos McLaren tuvieron salíes reseñables, poniéndose al altor de los Red Bull y nun dexando a Bottas pasar. Y por si yeren pocos los protagonistes, tamién los Toro Rosso s’axuntaron a la folixa. Foi una salida bastante apertada y unos primeros metros d’aguantar l’aire pa ver quién salía victoriosu d’esi momentu. Hasta los dos Ferrari tuvieron el so momentu, anque ensin consecuencies pa nengún de los dos pilotos.

Con posiciones perdíes, la carrera de Verstappen nesti momentu, entá con más ganes de venganza qu’al entamu de carrera, tornóse nun festival d’adelantamientos que con meyor o pior fortuna fueron upándolu na clasificación. Sicasí, nun foi too bono y nuna maniobra con Bottas, la rueda drecha trasera tocó’l morru del Mercedes y pinchó. El Red Bull entá tenía per delantre un recorríu bastante llargu hasta boxes, cola perda de tiempu correspondiente. La carrera del pilotu holandés diba de mal a pior.

Demientres, la carrera diba aselando y los pilotos garrando les posiciones que más o menos diben caltener hasta la fin de la carrera. Na vuelta trece, Lando Norris fizo la so primer parada pero una vegada más la mala fortuna cebose con él y una de les ruedes, la delantera izquierda, quedó mal axustada. El pilotu inglés foi prudente y paró’l coche enantes d’acabar el carril de pits pa que’l so equipu pudiera retornalu, axustar bien la rueda y tornar a pista, pero’l tiempu que perdieron en too esto foi tan grande qu’al final terminaron retirando’l coche.

Na vuelta dieciséis entamó’l baille de paraes de los pilotos d’arriba. Leclerc, adoutando una estratexa a dos paraes, fizo la primera nesta vuelta. Ferrari enseñaba asina les sos cartes, mientres los Mercedes diben sumando bonos tiempos y prolongando les sos paraes. Verstappen, mientres, tenía dalgún qu’otru momentu col Haas de Magnussen que los comisarios investigaron pero nun penalizaron. La primer parada de Hamilton, que rodaba segundu nesi momentu, llegó na vuelta venticuatro. L’inglés montó gomes dures col envís de llegar hasta’l final con elles. Nesi momentu, Vettel rodaba primeru y con problemes col tráficu. La so parada llegaría bastante más tarde que les del restu, na vuelta trenta y siete. El so compañeru Leclerc tornó a pits pa la so segunda parada na vuelta cuarenta y cuatro, cuidando qu’esi cambiu de gomes diba pagar la pena. Colo que nun cuntaben yera con una parada llarga por problemes al montar una de les ruedes, dalgo qu’acabó coles posibilidaes del pilotu monegascu de lluchar pola victoria. Sicasí, el podiu siguía siendo posible.

Nun siendo tampocu una carrera mui intensa, sí que vimos momentos emocionantes d’adelantamientu. Por exemplu, Pérez tuvo bastante protagonismu, anque sólo fuera pol ruxir de la xente cuando adelantaba o lluchaba en pista con dalgún otru pilotu. Anque fuera en posiciones fuera de puntos o polos puestos más baxos de los diez primeros, l’actividá yera intensa neses posiciones. Na última vuelta, de fechu, tuvimos l’últimu incidente de la carrera, cuando Kvyat facía por adelantar al Renault de Hülkenberg. El pilotu rusu quixo pasar per onde nun había sitiu y acabó chocando col alemán. Sicasí, el Toro Rosso recibió penalización y Hülkenberg consiguió a lo menos un puntu.

La victoria de Hamilton quiciás pasó más desapercibida porque nun supunxo más qu’una bona estratexa y una bona xestión de gomes, pero son estes carreres tamién les que ganen campeonatos. La mala fortuna de Leclerc dexa dalguna cara rara ya’l tercer puestu de Bottas permite que’l campeonatu siga vivu polo menos hasta Austin. Hamilton namás necesita cuatro puntos pa ser campeón otra vuelta.

Nun foi una carrera con munchos abandonos, de fechu namás tuvimos el de Norris y l’accidente de Hülkenberg a última hora, que nin siquiera cuenta como abandonu. Fuimos testigos d’otra carrera complicada nun circuitu atípicu pola so situación y que vibró colos puntos algamaos por Sergio Pérez. Nestos momentos Force India y Toro Rosso tán empataos nel mundial de constructores, lo que pon más emoción entá nesa parte de la tabla. Paez que McLaren, pesie a nun puntuar nesta carrera, nun van tener munchu problema pa siguir cuartos. Pela parte baxo les coses siguen de la mesma forma.

En siete díes volamos a los Estaos Xuníos pal gran premiu d’Austin. Mientres llega la fecha, equí vos dexamos tolos númberos de la fin de selmana en México:

Clasificación

Carrera

Paez mentira que yá teamos a cuatro carreres de rematar esti 2019 cuando hai non munchu tiempu tábemos arranando por ver a los coches otra vegada n’Albert Park. La temporada pasa igual de rápido que van los F1 y yá tamos nel gran premiu de México, ún de los grandes eventos del calendariu. Anque’l circuitu en sí mesmu nun seya de los más emocionantes, les carreres del pasáu y l’ambiente que se xenera yá faen que pague la pena. Aparte, yá foi delles vegaes l’escenariu au conocemos quien ye campeón del mundu. Esti añu, otra vegada, Lewis Hamilton tien nes sos manes consiguilo equí. Precisa sacar catorce puntos a Bottas, que ye l’únicu pilotu con posibilidaes de ser campeón xunto al inglés. El mesmu pilotu almite que ye dalgo complicao y que viniendo d’una victoria en Xapón, Bottas ye entá un rival difícil de batir. Sicasí, la realidá ye que si non en México, sedrá na siguiente carrera cuando’l pilotu de Mercedes consiga’l que yá ye’l so sextu mundial.

Con gran parte de los equipos yá enfotaos na preparación del coche de 2020, México supón ún de los grandes premios onde se combinen la posibilidá de ver grandes actuaciones de Red Bull y sobre manera Ferrari esti añu, y con Mercedes faciendo por compensar esa superioridá de los sos rivales. En Mercedes tán un pocu perdíos pola evolución de Ferrari col pasu los meses, la so recuperación que lu permite agora acumular poles cuando enantes nin siquier podíen averase a esi primer puestu. Ta claro que la meyora del equipu italianu llega tarde pero Vettel reconoz que ye positivo rematar asina l’añu pa garrar con fuercia la temporada viniente y na que yá toos piensen. Les rectes de México pueden ayudar a que la Scuderia, col alemán o col so compañeru, triunfen equí.

Sicasí, nun podemos descartar a Red Bull. Ye verdá qu’esti añu van con Honda y tovía nun conocemos el so rendimientu nestes condiciones. Nun podemos escaecer que son especiales, destacando sobre manera l’altura y la so influyencia nos coches. Vettel falaba de cómo la eficiencia y tener un bon coche ye equí quiciás menos importante en favor d’una bona preparación d’esti p’afrontar un circuitu tan peculiar. Siguiendo colos pilotos de Red Bull, Verstappen tien un bon historial equí, pero esti añu ye too una incógnita. Albon nun quier comprometese a la hora de xulgar la so actuación, puesto que ye’l so debú equí y anque nel pasáu Red Bull fuera bien, les coses son distintes agora.

Pela zona templada de la tabla de constructores, McLaren paez tener casi nes sos manes el cuartu puestu. Depués de la descalificación en Xapón de Renault (por usar un sistema de frenos qu’incumplía les regles) y la perda de los ocho puntos que sacara l’equipu francés, paez que los de Woking tienen cenciello conservar la so posición. De fechu, ye posible que fagan medrar la distancia col restu en México por cuenta del bon rendimientu que s’espera amosen dambos pilotos.

Per detrás d’ellos, tres equipos principales peleando por quedar perriba del restu: Renault, Toro Rosso y Racing Point. L’equipu francés tien la ventaya pero una bona carrera del restu puede camudar les coses. En Racing Point tán motivaos, sobre manera nel casu de Sergio Pérez, por correr en casa, anque son conscientes de qu’esti circuitu nun ye’l meyor pa ellos. Toro Rosso y Gasly en particular aterricen en México con ganes de replicar lo que ficieron en Xapón. Dende’l so “descensu” a Toro Rosso vemos al francés muncho más motivau y con meyores resultaos.

Pela parte baxo, Alfa Romeo nun se despista y sigui pasín ente pasu sumando y faciendo bones carreres, anque insuficientes pa ponese al altor de los de más arriba. Haas pel so llau cellebra el centésimu gran premiu de Magnussen en F1 col enfotu de facer un bon trabayu, pero siendo realistes de que les dificultaes qu’acarreten dende l’aniciu de la temporada siguen ehí.

Fálase nel paddock de que les coses en Williams con Kubiça nun van tolo bien que se piensa y que decisiones de los pasaos grandes premios nun tán ayudando a que la rellación ente pilotu y equipu vaiga bien. El fechu de que’l polacu vaiga salir de la escudería a final de la temporada tampoco nun ayuda. Sicasí, nun ye too malo pa Kubiça yá que Haas valora la posibilidá de contratalu como pilotu de simulador pala temporada viniente. Demientres, otru gran premiu complicau ente ellos. Na primer sesión de llibres Nicolas Latifi va a tar a los mandos del Williams.

Nun podemos escaecer que son varios los pilotos que debuten equí. Yá mentemos a Albon, pero tamién s’atopen nesa situación Norris, Russell, Giovinazzi (anque yá fexo debú oficiosu en sesiones de llibres) y, curiosamente (por ser veteranu) Robert Kubiça.

Anque nun seya’l trazáu más atractivu, les rectes llargues y la seición del estadiu siempre motiven y el fechu de que se tenga convertío nuna de les cites preferíes de los pilotos y los equipos yá diz muncho. Les vueltes equí, setenta y ún en total, nun son llargues, lo que da quiciás esi puntín d’emoción qu’a vegaes falta nos que tienen vueltes que cubren más distancia.

N’horariu de tarde, visitamos l’Autódromo Hermanos Rodríguez por sexta vegada na so reaparición nel calendariu (y con un futuru de tres más per delantre). Estos son los horarios y la información básica del circuitu:

Y equí vos dexamos tola información sobre les gomes que se van usar demientres esti gran premiu:

Pasó’l tifón Hagibis, dexando un sábadu ensin competición de F1 y pasó’l gran premiu de Xapón, dexando una pole que nun esperábemos y una victoria que, anque nun estraña, nun yera quiciás la que taba nes quinieles de la mayoría de nós. Aparte, pasó lo que sabíemos cuantayá, sobre manera col aniciu de la temporada, que diba pasar tamién esta temporada y por sexta vegada siguida: Mercedes yá son campeones del mundial de constructores. A Hamilton namás-y queda “desfacese” de Bottas p’algamar tamién él el so sextu mundial. Col resultáu de güei nin los pilotos Ferrari nin Verstappen tienen yá posibilidaes matemátiques, quedando fuera yá dafechu de la llucha por esi campeonatu. Y anque entavía Valtteri Bottas puede ser campeón, la lóxica diznos que’l so compañeru d’equipu va ser el que, nun tardando, se faga con esti títulu esta temporada.

CLASIFICACIÓN

Foi un domingu intensu. A les diez de la mañana hora llocal (tres de la mañana equí) tuvimos la sesión de clasificación, que foi cancelada’l sábadu por cuenta del temporal que s’averaba. Énte les previsiones tan negatives optose pola prevención y mover la clasificación pal domingu, hores primero del gran premiu, y por cancelar dafechu la sesión de llibres.

Les consecuencies d’esto fueron que dos de los pilotos que na clasificación sufrieron accidentes (y causaron banderes coloraes) esto ye Kubiça y Magnussen, tuvieron a los sos equipos trabayando contra’l reló pa poder tener los coches a puntu. Kubiça salió dende’l pitlane y Magnussen últimu por tener de camudar la caxa de cambios y penalizar. L’accidente del polacu foi, aparte d’aparatosu, tempranu. Nengún pilotu marcar tiempu cuando ocurrió. El del danés foi menos espectacular anque tamién foi pronto dientro de la Q1, lo cual, anque condicionó en parte les sesiones del restu de pilotos nun foi tan determinante como si tuviera sío más alantre. Destacamos dientro de la Q1 que Stroll pasó a Q2 y los problemes de Renault pa clasificar. Ricciardo nun pasó de la primer sesión y Hülkenberg foi últimu na segunda, con problemes bultables nel coche.

Pa compensar el desastre de Magnussen, Grosjean entró ente los diez primeros col so Haas, mesmo que dambos McLaren. La pole quedó pa Sebastian Vettel, mesmo que’l récor del circuitu. Como dicíemos enantes, foi inesperada por ser Mercedes quien marcara’l ritmu’l vienres. Sicasí, les condiciones del circuitu nun yeren les mesmes y fueron de fechu los dos Ferrari los qu’ocuparon los dos primeros puestos de la parriella en carrera, con Mercedes per detrás, Bottas per delantre de Hamilton. El restu de pilotos clasificó en pares, con los dos Red Bull xuntos, mesmo que los McLaren. Gasly y Grosjean zarraron la Q3.

CARRERA

Hores depués de la sesión de clasificación, entamaba la carrera. Tres la pole inesperada de Vettel asomaben les duldes por ver si’l cambiu nes condiciones de la pista diba beneficiar a Ferrari o si lo de la clasificación fuera namás qu’un fechu puntual. Hai que partir de primeres de que la carrera nun foi vistosa nin tan entretenida como les pasaes. Lo más interesante tuvo na salida y quiciás podemos dicir que nesi momentu quedó un pocu definida pues foi tolo que pasó nesos primeros metros lo que llueu cuayaría n’apaeciendo la bandera a cuadros.

La salida de Vettel foi mala. Llegó a movese enantes de que’l semáforu s’apagara pero los comisarios nun interpretaron que se beneficiara de dalguna manera d’ello. Ye más, perdió la posición con Bottas que reaicionó rápido p’adelantalu y ponese tamién per delantre de Leclerc. El pilotu monegascu deceicionó un pocu tamién cola so salida, y na primer curva taba terceru per detrás del so compañeru y peleando con Verstappen y Hamilton por posición. Col historial que tienen tanto Leclerc como Verstappen yera fácil que pasara lo que terminó pasando: a la gueta d’un espaciu que Leclerc nun dexó, Verstappen acabó saliéndose de pista depués de tocase col Ferrari. Leclerc acabó col morru dañáu. Verstappen perdió abondes posiciones que yá nun pudo recuperar como pa lluchar pol podiu. Leclerc tuvo d’entrar a cambiar el morru (aparte de pol dañu en sí porque nun dexaba de dexar restos de coche en pista y otros pilotos yá se quexaben d’ello), camudando dafechu la estratexa de carrera que l’equipu tenía plantegada pa él.

Pero non sólo ellos fueron protagonistes. Los pilotos McLaren fixeron bones salides, poniéndose al altor de los Red Bull (Sáinz rodó bona parte de la carrera en cuartu llugar) ya nel casu de Norris, peleó con Albon por más que posición, yá qu’un accidente nel que’l pilotu de Red Bull nun dexó espaciu dalu al de McLaren, acabó con esti perdiendo tola oportunidá de metese en los puntos. De fechu, nin siquier vería la bandera a cuadros. Na vuelta quince, el Red Bull del holandés entró nel box pa nun salir yá.

Tres una salida llétrica, la situación foi estabilizando y les pieces del gran premiu moviéndose. Bottas taba nuna situación cómoda, metiendo distancia con Vettel y Hamilton, consciente de la importancia de la so posición nun circuitu como Suzuka. Pero lo interesante siguía pola cola. La parada de Leclerc y l’incidente de la primer vuelta de Verstappen llevó a que dambos pilotos volvieran a topase en pista, esta vegada nos puestos dieciséis y diecisiete. Nesta batalla, yá ensin accidentes, triunfó’l Ferrari de Leclerc, que conseguiría compensar l’eventu de la salida col pasu de les vueltes. De fechu, una de les partes que más interés tuvo na carrera foi precisamente ver los adelantamientos del pilotu monegascu nun circuitu como Suzuka que nun se presta muncho a ellos.

Un de los condicionantes d’esta carrera foi’l desgaste de les gomes. Hamilton sufrió muncho más que los sos rivales d’ella, y la distancia tanto con Vettel como, sobre manera, con Bottas, nun dexaba de medrar hacia la mitá del gran premiu. L’equipu duldaba que viendo esi desgaste la estratexa a una parada fuera a funcionar pa ellos y optaron por facer dos. Mientres, pela mitá de la tabla, Leclerc siguía escalando y aprovechando’l baille de paraes pa recuperar les posiciones que perdiera na salida.

La carrera trescurrió tranquila pa Bottas y tamién relativamente pa Vettel hasta los minutos finales, cuando la distancia con Hamilton yera mínima y el pilotu inglés tuvo a piques d’adelantalu, con namás dos vueltes pal final, siendo’l tráficu un elementu determinante nel desenllaz de les últimes vueltes. Los pilotos doblaos tornáronse en protagonistes involuntarios d’esta última batalla pol segundu llugar nel podiu, que ganó’l pilotu alemán.

Quedaría pal final l’últimu abandonu y accidente del gran premiu. Na vuelta cincuenta y tres, la última, el coche de Sergio Pérez acabó nes barreres depués d’un coche con Gasly, nuna maniobra bastante asomeyada a lo que víemos al principiu con Leclerc y Verstappen. El peor paráu nesta ocasión foi’l mexicanu, que nun pudo ver la bandera a cuadros.

La victoria quedó pues pa Valtteri Bottas, necesitáu yá d’una bona carrera na que pudiera xubise a lo cimero del caxón del podiu. Vettel foi segundu, que nun ye un resultáu malu pensando na salida que tuvo y en que nun foi penalizáu por ello. Hamilton, anque de xuru poco conforme col resultáu, atropa puntos que lu lliberen de Vettel, Verstappen y Leclerc, pa ponelu entá más cerca del so sextu títulu.

Albon salvó un pocu la imaxe d’Honda en Xapón col so cuartu puestu, siguíu de Sáinz, qu’otra vegada foi l’únicu en sumar pa McLaren pol incidente de Norris con Albon que lu dexó fuera de puntos. Renault iguaron el desastre del sábadu puntuando con dambos pilotos y Pérez, pesie al accidente, tamién entró en puntos, xunto a Gasly.

Otru día más pal escaezu en Haas. Grosjean nun foi quien a facer dalgo col décimu llugar del que partía na parriella y Magnussen tuvo momentos d’averase a los puntos, pero la clasificación de dambos dexa la sensación d’un resultáu mui probe. Alfa Romeo tampoco nun pudo puntuar y los Williams, como davezu, zarraron la clasificación anque esta vegada dambos coches vieron la bandera a cuadros.

L’incidente ente Leclerc y Verstappen considerose de mano incidente de carrera, pero la decisión camudó y dexóse pal final del gran premiu. Finalmente, Leclerc acumuló unes cuantes penalizaciones. Per un llau cinco segundos sobre’l so tiempu y dos puntos na so llicencia pol incidente con Verstappen. Per otru, pola decisión de permanecer en pista col coche dañáu, poniendo en peligro al restu de pilotos colos restos de coche que se diben soltando del so monoplaza, aparte de diez segundos más sobre’l so tiempu tamién foi penalizáu l’equipu con una multa económica de 25000€. El resultáu foi la cayida del sextu al sétimu puestu del pilotu monegascu, pa beneficiu de Ricciardo.

Sicasí, la posición del australianu ta en duldes poles protestes de Racing Point y Renault podría tener tamién dalgún tipu de sanción relacionada col incumplimiento de les regles no que cinca’l sistema de frenáu. Nel casu de que Renault llevara sanción, el beneficiau sedría, precisamente, el pilotu de Racing Point Lance Stroll. Taremos sollertes a la decisión que se tome dende la FIA.

Nun foi Suzuka un eventu memorable, pesie a tolo qu’arrodia a esti gran premiu. Sicasí, munchos van alcordase d’esta carrera: Vettel por recuperar la pole, l’equipu Mercedes por ser yá campeones del mundial de constructores, Leclerc y Verstappen por sumar otru incidente al so historial, y en xeneral tolos espeutadores por ser el fin de selmana de F1 ensin sábadu.

Ponemos agora la vista en México, au viaxamos en dos selmanes pa otru de los eventos que nos devuelve a los horarios de tarde nel tour americanu. Demientres llega’l día, equí vos dexamos tolos númberos del domingu en Suzuka:

Clasificación

Carrera

Hai carreres qu’añu tres añu, y asina demientres munchu tiempu, nun tienen falta de ser brillantes pa que tol mundu nagüe por viviles. Xapón ye ún d’esos escenarios que siempre saquen suspiros tanto a pilotos como a equipos y espeutadores. Entra en munches de les preferencies de quien sigue la F1 y ye ún de los destinos más escoyíos incluso pa la xente europeo. Too ello vien a dicinos la importancia que tien nel calendariu Suzuka.

A naide nun-y da más el madrugar, nin que nun llueva, nin que haiga pocu que ver na pista. Ye simplemente l’ambiente del circuitu lo que lu fai especial, y la xente. Los milenta fans que se concentren tolos años nel míticu trazáu xaponés son responsables tamién de qu’esti gran premiu se viva d’esta manera. Nun ye la primer nin sedrá la última vegada que sintimos a los pilotos emponderar l’actitú de la xente, la orixinalidá de les sos pancartes d’apoyu y la igualdá cola que animen a tolos pilotos. Nengún equipu nin pilotu se siente abandonáu en Suzuka.

Centrándonos no deportivo, Lewis Hamilton tien equí una de les papeles del añu pa casi facese col campeonatu. Nun ye l’únicu, pero l’inglés tien una rellación especial con esti circuitu y les sucesives victories n’él vienen a desplicanos un pocu’l motivu. Amás, Mercedes tien motivos pa sintise optimista equí depués de la sequía de poles y les victories escases dende la vuelta del parón braniegu.

Sicasí, ye posible que nun seya too tan cenciello como pinta. Los partes meteorolóxicos, siempre importantes en Xapón nesta época del añu, pronostiquen agua y aire fuerte (falábase incluso de tifones) que podríen condicionar los eventos del sábadu. Ello significaría suspender la sesión de llibres y mover la clasificación al domingu pela mañana, cuando se cuenta tener meyor tiempu. Como siempre, ye too duldes, pero l’alerta ta prevista y nun tenemos claro tampoco cuánto vamos ver los coches rodar siquier el viernes.

Con ello y con too, como dicimos, la carrera’l domingu ta prevista que seya en seco (pesie a tolo malo que lo da pa los díes previos). Sebastian Vettel señaló qu’esti ye ún de los sos circuitos preferíos (si non el que más) anque abúltanos difícil que, en condiciones normales, pase per delantre de los Mercedes. Lo mesmo podríemos dicir de Leclerc. Sicasí, nun podemos zarrar ninguna puerta a la escudería italiana viendo’l so dominiu nes últimes cites.  Sí tenemos interés en ver el rendimientu de los motores Honda en casa, sobre manera agora que tienen a dos equipos en pista y conociendo la importancia que tien pa ellos esti gran premiu. Red Bull, y a so manera Toro Rosso, tán casi obligaos a ufrir un bon espectáculu en Xapón pa que s’escaezan los años pasaos con McLaren que tantu dolor de tiesta levantaron.

Con o ensin agua’l domingu, la batalla pela parte medio de la tabla va siguir siendo quiciábes lo más interesante pa ver no que cinca a los puestos qu’entavía nun tán decidíos. McLaren paez que yá tien casi nes sos manes esi cuartu puestu pero entá queden carreres y nengún despiste ye beneficiosu. El restu d’equipos con mayor o menor distancia ente ellos sí que nun pueden dar nengún pasu atrás si nun quieren vese relegaos na clasificación.

Damos el saltu a Xapón pa esfrutar ún de los clásicos pero, como davezu, va tocar madrugar. Equí vos dexamos tola información del circuitu y los horarios del gran premiu:

Y esta ye la información sobre les gomes que se van usar demientres el fin de selmana en Xapón: