Month: March 2019

Cola primer páxina de la temporada 2019 yá escrita, tócanos ponenos a pensar na segunda: Baḥréin. El circuitu de Sakhir yá se fexo un sitiu nel calendariu ente les carreres que la más espera xente, sobre manera dempués de correr n’Albert Park au los adelantamientos son enforma complicaos.

Singapur punxo de moda’l correr pela nueche y Baḥréin decidió que pagaba la pena la inversión en lluz artificial pa allumar l’ermu nel que s’atopa’l so circuitu. Sicasí, nun ye una carrera d’ensueñu como a vegaes suxeren les semeyes que nos ufren los fotógrafos dedicaos a esti mundu. La realidá ye que la calor del ermu ya’l sable compliquen la vida a los equipos davezu. A esto súmase’l fechu de que la carrera faise pela nueche, lo que fai que namás los segundos entrenamientos ayuden a pilotos y equipos a entender meyor les condiciones nes que van competir el domingu, con temperatures más fríes que les del día.

Mercedes empecipió la temporada no cimero, anque non col pilotu que tol mundo cuntaba. Valtteri Bottas impúnxose hai dos selmanes nel trazáu d’Albert Park ya equí en Sakhir buscará confirmar que lo del primer gran premiu nun foi una casualidá. Son munches les voces que falen d’un cambiu n’actitú del pilotu finlandés, con más determín ya decisión, ya quiciábes eso tuviera daqué influyencia nel domingu. Tolos güeyos tán puestos n’elli pa ver si ye verdá qu’esti añu va competir al altor de Hamilton. El pilotu inglés nun quixo enriedase nel fechu de que perdiera la so oportunidá d’entamar el campeonatu ganando. Dempués del gran premiu supimos que’l so coche tuvo daqué dañu nos baxos del coche que pudo condicionar la so carrera.

Ferrari nun cumplió colo que s’esperaba d’ellos n’Australia ya’l nuevu xefe Mattia Binotto esclarió que camudaron delles coses pa recuperar eses décimes de diferencia con Mercedes. ¿Foi cuestión de refrixeración, mala puesta a puntu? El casu ye qu’a Vettel dáse-y bien Sakhir, consiguió la pole yá tres vegaes (ye’l pilotu que más poles tien equí) y l’añu pasáu foi una d’elles. Leclerc nun andará mui lloñe del so compañeru n’un intentu de recuperar les bones sensaciones que se tiníen enantes del entamu del campeonatu.

Aprovechamos esti momentu falando de la Scuderia pa comentar que dempués del gran premiu vamos tener test nel circuitu de Sakhir y qu’un tal Mick Schumacher va tar al volante, trayendo a la memoria de munchos alcordances de bonos tiempos. El pilotu alemán va tar compitiendo en Sakhir nel so debú na categoría de plata del motor, la F2.

Red Bull tán enfotaos nun bon resultáu en Baḥréin. Dempués de lo llograo n’Australia, tienen munches esperances puestes no que los sos dos pilotos puedan facer en Sakhir. Anque ye bien temprano pa xulgar nada, Horner quixo refuerciar la confianza de Gasly falando de que de xuru va tener oportunidaes esti añu de rellumar al llau de Verstappen. Amás, tanto en Red Bull como en Toro Rosso, aliéndase muncho optimismu nel trabayu desendolcáu con Honda.

Otros que busquen dar un pasu alantre son Renault, que tamién cuntaben con dalgo meyor n’Australia. Equí esperen aprovechase de les meyores introducíes a les sos unidaes de potencia ya, sobre too, que la suerte acompañe a Ricciardo ya pueda tener una carrera ensin incidentes.

Al principiu de la temporada suelen ser too sorrises porque si les coses salen bien ye una motivación pero si salen mal tovía queda tiempu. Nel casu de Haas la razón pa tar confiaos y contentos ye’l rendimientu que se vio de dambos coches n’Australia. Anque Grosjean nun pudo atropar puntos, lo que vimos en pista tanto na so parte como nel casu de Magnussen, que foi sestu, desplica que na escudería tean bien motivaos pa siguir trabayando y lluchar por ser el cuartu meyor equipu de la parriella. Pinta tien de que Renault esti añu nun va tenelo fácil. Nesa llínia lleguen a Baḥréin au les posibilidaes d’adelantar pueden da-yos oportunidá de dir escalando puestos na clasificación.

Ensin dexar de mirar pa la parte media de la tabla, Alfa Romeo y McLaren fueron dos de los equipos que más convencieron na primer carrera de la temporada, pensando siempre no visto na temporada pasada. Sicasí, precisen daqué más si quieren metese en puntos en Sakhir. La sesión de clasificación de Lando Norris pa McLaren foi un gran plus pal equipu, pero la deceición del abandonu de Sainz el domingu trexo de vuelta delles pantasmes.

Tornando a los test de dempués del gran premiu, Fernando Alonso va retornar a los mandos del McLaren pa participar nellos dempués de retirase, temporalmente, de la F1.

Nel casu d’Alfa, los puntos consiguíos por Räikkönen nun saben a muncho pero son una bona base pa siguir sumando nel ermu de Sakhir. Giovinazzi nun fexo un mal trabayu nel pasáu gran premiu. L’equipu almitió que tuvieron a piques d’abandonar la carrera pol dañu que tinía’l coche pero decidieron dexalu terminar ya ensin duldes la so actuación foi una de les que más llamó l’atención de la carrera.

Col equipu suizu, Racing Point y Toro Rosso dispútense los puntos. A Toro Rosso dase-y bien esti circuitu, l’añu pasáu vímoslo, y Sergio Pérez tampoco nun lo fai mal equí. Ente estos dos equipos ya’l restu d’escuderíes de mitá de la tabla, de xuru vamos tener bastante entretenimientu’l domingu.

En Williams hai motivos pal optimismu yá que paez qu’atoparon au ta’l problema del probe rendimientu amosáu n’Australia. Ellí vimos a Bottas rebasar a Kubiça mui pronto cuando cásique nin se llegara a la mitá de la carrera y eses escenes manquen a un equipu que llucha por salir del sucu nel que lleva metíu yá dos temporaes. Cualquier signu de meyora que se vea en Sakhir va ser un pasín alantre y un motivu pa siguir trabayando.

Ensin más, ponemos yá los güeyos nel circuitu de Sakhir pal segundu gran premiu d’esta temporada. Nun vos preocupéis, nesti nun hai que madrugar. Embaxo podéis atopar tola información sobre’l circuitu, los horarios y les gomes pal gran premiu de Baḥréin 2019:

Hai una lleenda en Fórmula Ún que diz que quien gana n’Australia, gana’l campeonatu. Ye un comentariu qu’añu tres añu se repite pesie a que, por exemplu, los dos años caberos nun se cumplió, yá que Sebastian Vettel foi’l ganador nel circuitu d’Albert Park mientres que’l que se coronó como campeón de la temporada foi Lewis Hamilton. Sicasí, de xuru que Valtteri Bottas quier creyer qu’hai posibilidá de qu’esi dicir se cumpla dempués de la so victoria nesti primer gran premiu de 2019. Pero vamos dir por partes:

SÁBADU

Les miraes y les apuestes taben nos dos Ferrari, polo que se viera nos test y porque paecía que’l vienres tiníen tomada la midida a Mercedes. Pero’l sábadu les fleches platiaes dieron un pasu alantre pa facese, otra vegada más, colos dos primeros llugares de la parriella. Anque foi Hamilton quien se fexo cola pole, la diferencia con Bottas foi mui pequeña, lo que prometía un domingu intensu en pista. Esta ye la sesta pole siguida de Hamilton con un tiempu de 1:20.486, nuevu récor del circuitu.

Vettel namás pudo ser terceru, cuando s’esperaba d’elli que tuviera no cimero, ya’l so compañeru nun pudo con Verstappen que foi cuartu per delantre d’elli. Les apuestes camudaron de llugar ya nun tardaron en mirar pa los dos pilotos de Mercedes dempués de la so bona actuación del sábadu. Pela mitá de la tabla tuvo too mui apetiguñao, como yá esperábemos de primeres. Norris consiguió meter el so McLaren dientro de los diez primeros, anque Sáinz nun tuvo tanta suerte y xunto a Gasly foron les dos grandes deceiciones de la Q1, sesión na que vimos una sucesión de vueltes rápides personales que dexó a dambos pilotos fuera. Williams nun pudo dar muncho más y Kubiça tuvo un golpe contra una muria que-y provocó un pinchazu y de pasu torgó la vuelta de Sainz. Renault tampoco nun tuvieron una bona xornada de sábadu dalgo que sí tuvieron los rookies (Norris, Russell y Albon) que clasificaron per delantre de los sos compañeros d’equipu.

DOMINGU

Coles pieces del tableru colocaes nos sos sitios, ensin penalizaciones, arrancó’l primer gran premiu de la temporada. Bottas tuvo una salida perbona que determinó’l restu de la so carrera. Sumao al so escelente ritmu demientres tola carrera, el finlandés nun tuvo rival en pista. Quedó claro lo seguru que taba de tener la victoria na mano cuando, aldericando col equipu pela radio, dixo que quería tamién consiguir el puntu qu’agora recibe quien fai la vuelta rápida de carrera (tando dientro de los diez primeros). Nun hai nada qu’añader al domingu de Bottas, que dio una lleición de pilotaxe, zarró un gran númberu de boques ya entamó la temporada de la meyor manera posible.

L’aniciu de la carrera, cola ya comentada bona salida de Bottas, tuvo dellos protagonistes más. Hamilton, al que nun ayudó pa nada la perda de tracción que lu dexó clavau cuando’l so compañeru d’equipu yá taba per delantre. Vettel y Leclerc, que batallaron dende bien ceo pola so posición y Ricciardo, que n’un intentu d’adelantar a Sergio Pérez, topó cola yerba y con dalgún bache (el propiu pilotu nun tinía mui claro qué fuera lo que pasara) que-y arrancó’l morru del coche, eventu que lu retrasó en pista y que terminó por condergalu al abandonu delles vueltes más tarde.

Con too y con eso, la salida nun foi mui accidentada, y los pilotos respetáronse bastante nos primeros xiros. Pocu a pocu foi formándose un tren llideráu por Bottas, y los espacios engrandándose ente los primeros ya’l restu. La batalla perriba tuvo de protagonistes a los dos Mercedes, los dos Ferrari y Verstappen. El pilotu holandés, ensin munchu ruíu, consiguió superar a Vettel en pista, p’amarrar un tercer puestu que ye’l primer podiu d’Honda dende 2008 (con Rubens Barrichello). El pilotu alemán de Ferrari vio pocu a pocu desapaecer les sos opciones de siquier consiguir xubir al podiu y tovía pudo ser peor porque’l so ritmu entamó a ser cada vegada más lentu ya la distancia col quintu, que yera Leclerc, diba amenorgando. Nun hebo instrucción esplícita (que sepamos) dende’l muru a Leclerc pa que nun adelantara a Vettel, pero’l pilotu de Mónaco nun llegó a superar al so compañeru d’equipu ya’l so ritmu tamién entamó a ser más lentu.

Les batalles más interesantes de carrera vímosles ente los equipos de la mitá de la tabla. Magnussen con Hülkenberg, Norris con Giovinazzi o Gasly con Kvyat, regaláronnos momentos intensos de los de nun despegar los güeyos de la pantalla.

Les notes negatives vinieron colos abandonos. Al que yá comentemos de Ricciardo, súmense los de Sainz y Grosjean. El pilotu madrilanu de McLaren, que paecía tener ritmu pa entrar en puntos, vio cómo acababa la so carrera cuando’l so monoplaza empezaba a soltar fumo per detrás, tinía de parar el coche xusto a la entrada del pitlane y apaecía’l fueu. Renault yá tuvo problemes d’estos nel pasáu, asina qu’en McLaren de xuru tarán perpendientes pa ver cómo solucionar esti tema y que nun se repita en nenguna carrera del futuru.

Haas l’añu pasáu tuvo a piques de consiguir un perbón resultáu n’Australia que quedó eclisáu col abandonu de dambos pilotos por un erru en boxes. Esti añu, tocó-y a Grosjean una suerte asemeyada. Una parada lenta yá lu condergó a los puestos más baxos de la clasificación y esa parada lenta debióse a qu’una de les ruedes nun quedaba bien afitada. Delles vueltes más tarde, el pilotu francés paraba’l so coche colo que paecía un problema na suspensión, posiblemente rota, que dexaba la rueda suelta y nun lu dexaba continuar nel gran premiu. El so compañeru, Kevin Magnussen, tuvo una carrera más tranquila y sólida, con delles batalles en pista y un sestu puestu bien merecíu.

Nun queremos rematar esti resumen ensin mentar a Williams. Na vuelta nueve ún de los Williams yá yera dobláu por Valtteri Bottas. Ye bien cierto que la salida de Kubiça nun foi mui llimpia pero quiciábes esti fechu val como exemplu de la situación na que s’atopa l’equipu inglés. Dambos pilotos terminaron la carrera pero a una distancia bultable del restu y anque ye positivo qu’a lo menos el coche responda y seya fiable como pa completar carreres (l’añu pasáu non siempre lo facíen) ta llueñe de ser el puntu nel que la escudería quier tar. Quéda-yos abondu trabayu per delantre.

P’acabar n’una nota positiva, el debú de tolos rookies y de los pilotos qu’entraben dafechu na Fórmula Ún o que facíen la so primer carrera con un equipu nuevu foi bastante bona en xeneral, cola esceición de Ricciardo y Sáinz. Tamién ye importante rescamplar el trabayu de Lance Stroll que salía bastante atrás na clasificación y terminó per delantre del so compañeru d’equipu, ya tamién de los dos pilotos de Toro Rosso que xunto a Gasly y al podiu de Verstappen faen que n’Honda seyan optimistes sobre’l futuru qu’espera al xigante xaponés y a les escuderíes hermanes.

El 2019 yá ta en marcha y féxolo con una carrera de les que nun entraben nes quinieles. El siguiente pasu dámoslu hacia Baḥréin dientro de quince díes, n’un circuitu completamente distintu y coles lluces artificiales como protagonistes. Hasta que llegue esi día, equí vos dexamos tolos númberos del fin de selmana.

Clasificación

Carrera

Yá podemos poner el contador a cero: tamos en selmana de Fórmula Ún. Dempués de varios meses, presentaciones de coches, confirmaciones varies y dos selmanes de test, la temporada 2019 ta a piques d’arrancar y con ella les nuestres previes.

Nun hai meyor manera d’entamar una temporada que madrugando, que ye lo que toca siempre qu’aterrizamos n’Australia. Poques quexes, sicasí, dempués de meses de sequía formulera, tornamos a ver los monoplaces compitiendo nel asfaltu. Yá pudimos tastialos un pocu hai unes selmanes, cuando a la fin echaron a rodar nel Circuit de Montmeló, pero la hora de la verdá ye agora.

Un nuevu llibru, esti de 2019, con ventiún páxines en blanco qu’enllenar y récors que valtar. Hamilton puede siguir afitándose como ún de los meyores, a la gueta los siete títulos de Michael Schumacher sumando el so sestu. Vettel puede entrar dientro del Olimpu de los dioses formuleros faciéndose col quintu. Y Verstappen puede facer historia ganando’l so primer campeonatu. Candidatos hai abondos, anque ye verdá que tola atención ta puesta enriba les fleches platiaes y los coches coloraos. Sobre manera, nel nuevu compañeru de Vettel que llega con ganes de dar guerra y de confirmar que lo que se vio en temporaes pasaes nun foi una casualidá. De xuru, Vettel va tener xera nesti 2019 dende esti mesmu fin de selmana n’Albert Park.

Al llau de Hamilton esperamos un Bottas más competitivu que dende esti primer gran premiu salga a ganar. Los papeles nel equipu paez que tán asumíos, pero echamos de menos un pocu más de competitividá ente dambos pilotos, qu’aparte de preocupase de Vettel, Hamilton tamién tenga de preocupase del so compañeru d’equipu, como antaño. N’Australia sedría una bona oportunidá d’entamar una bona temporada que, quiciábes, seya la so última en Mercedes.

La nueva pareya en Red Bull promete enforma, y la evolución de Verstappen añu tres d’añu, con dellos errores que cuidamos esti añu nun tornará a cometer, fainos naguar por velos en pista col so nuevu propulsor Honda. Si esta xuntanza acaba siendo un éxitu, tolos güeyos van xirar pa McLaren al tiempu que surden les entrugues y los deos acusando. A la escudería del toru coloráu interésa-y empecipiar con fuercia dende bien ceo, pa nun permitir que Mercedes y Ferrari escapen. Agora ensin la motivación de Ricciardo corriendo en casa, toca enfotase na dupla Verstappen-Gasly pa facer el trabayu.

Falando del australianu, son munches les ganes que tenemos de velu compitiendo col Renault. Nun amosó munchu optimismu nos test, o meyor dicho, foi bastante realista a la hora de falar d’au s’atopaba l’equipu, pero tiennos avezaos a ganar carreres onde naide nun cunta con elli, polo que nun podemos sacalu de la llista de posibles ganadores n’Albert Park, anque namás seya poles ganes coles que va salir dende la posición na parriella’l domingu.

Nun quitamos la mirada tampoco de la zona templao. Amás de Renault, hai muncho interés puestu n’Alfa Romeo (enantes Sauber) poles bones sensaciones que dexaron y por ver a Kimi a bordu. L’añu pasáu, Haas tuvieron nes manes ún de los meyores resultaos de la temporada n’Albert Park pero un abandonu doble por problemes coles gomes acabó con ello. L’equipu estauxunidense vien con fuercia, caltién a los sos pilotos y son tamién ún de los equipos a siguir de cerca dende esti primer gran premiu. Va ser interesante tamién ver a Racing Point F1 (enantes Force India) con Lance Stroll de compañeru de Pérez, ensin escaecer a McLaren, con par de pilotos nuevu: el debutante Lando Norris, nel que la escudería inglesa punxo la so esperanza p’acompañar a Sáinz nesti nuevu añu. Australia, el primer combate pa toos ellos.

Munches duldes arrodien a Williams, pero paeznos qu’a lo menos nesti gran premiu van quedar un poquín apartaes pol fechu de ver a Robert Kubiça otra vuelta compitiendo na máxima categoría del motor. Ye percomplicao facer predicciones sobre lo que pueda facer ún o otru equipu nuna carrera, anque paez que son munches les persones que nun cuenten muncho con Williams pa esta temporada dempués de tolos pilancos de los tets. Tres una pretemporada complicada, ye posible que’l fechu de terminar la carrera, si puede ser con dambos coches, seya yá un éxitu.

La primer previa del añu siempre ye la más complicada porque hai duldes abondes y muncho más naguar. Equí dexámovos tola información del gran premiu y la escoyeta de gomes pa esta primer carrera de 2019: