Dempués de pocu más d’un mes de descansu, tornamos al blogue y a esta rutina prestosa que ye escribir sobre F1. Hai munches coses sobre les que falar cuando tovía nos queda mes y mediu pa ver otra vuelta los coches compitiendo n’Australia, pero menos pa velos faciendo test en Barcelona. D’eso y de munches otres coses vamos falavos nes siguientes llínies. Esti post va dir anovándose d’equí al empiezu de les sesiones de test, de les que tamién vos falaremos cuando lleguen.
PRESENTACIONES DE COCHES
Febreru vien siendo el mes de presentación de los monoplaces nuevos que van competir por llograr el campeonatu en disputa nuna nueva temporada. Siguimos teniendo diez equipos na parriella y tolos pilotos tán, en principiu, confirmaos. Debaxo dexámovos tolos datos sobre presentaciones y llugares, equipos y nomes de coches de los equipos d’esti 2019. Nos nomes de los coches tenéis enllaces a les semeyes de caún de los monoplaces.
| Equipu | Presentación | Llugar | Coche |
|---|---|---|---|
| Haas | 7 de febreru | En llínia | Haas VF-19 |
| Toro Rosso | 11 de febreru | En llínia | STR14 |
| Renault | 12 de febreru | Enstone | RS19 |
| Mercedes | 13 de febreru | En llínia | W10 |
| Racing Point F1 | 13 de febreru | Toronto | RP19 |
| Red Bull Honda | 13 de febreru | En llínia | RB15 |
| McLaren | 14 de febreru | McLaren Technology Centre (Woking) | MCL34 |
| Scuderia Ferrari | 15 de febreru | Maranello | SF90 |
| Alfa Romeo Racing | 18 de febreru | Circuit de Catalunya | C38 |
| Williams | 11 de febreru | En llínia | FW42 |
Nel casu de Haas, la so presentación va ser más bien pa enseñanos el nuevu coche per fuera, pol cambiu d’esponsor pa 2019 mu asemeyao a lo que ficiera Williams hai unes temporaes. Ye importante alcordase de que Force India dexa pasu a Racing Point F1 mesmo que Sauber desapaez como nome pa ser agora Alfa Romeo Racing.
TEST
Les sesiones de test d’esti añu van ser les dos en Barcelona, nel Circuit de Catalunya.
TEST 1: 18 a 21 de febreru
TEST 2: 26 de febreru a 1 de marzu
Tai sollertes a esti post porque vamos dir enllazando les galeríes d’imaxes de los monoplaces nuevos cuando tean disponibles. Amás, pasín ente pasu diremos ufriéndovos el calendariu pa esti 2019, con otru bon puñáu de carreres que van tenenos pendientes de los circuitos hasta’l día 1 d’avientu. La primer carrera va ser n’Australia el 17 de marzu.