Month: December 2018

Tamos a piques de zarrar otru añu anque la temporada de Fórmula Un hai un mes llargu que remató. Con tiempu pa reflexonar, saborguiar y echar en falta coses, queremos zarrar nosotros l’añu falando de lo que pa nós foi lo meyor d’esti 2018 na máxima competición del motor:

MEYOR PILOTU: LEWIS HAMILTON

Si hai dalguién que destacó esti añu ye, ensin duldes, Lewis Hamilton. Independientemente de les preferencies que cada quién tenga no que cinca a pilotos ya equipos, naide nun puede negar que la temporada del inglés foi casi perfeuta. Yá dexó claro que cuando tien la cabeza centrada ye cuasi imparable. Podríemos dicir que ye eso lo que quiciás-y faltó a Vettel esti añu. Anque paeznos que foi’l meyor pilotu na parriella, hai que rescamplar el llabor de Charles Leclerc nel so debú na F1 y que fai que teamos deseyando velu al volante del Ferrari esti 2019 qu’entra.

MEYOR EQUIPU: MERCEDES AMG F1

Ensin sorpreses, otra vegada. Sí ye importante siñalar que Ferrari tuvo la oportunidá de ser quien llevara esti calificativu. L’entamu de la temporada foi mui sólidu nel equipu italianu pero la so evolución terminó deceicionando. Otru añu más queden a les puertes de facese col campeonatu, pero esti 2018 ye entá pior porque yeren los favoritos y nun supieron reaicionar a les evoluciones de Mercedes. Nun podemos escaecer el llabor de Sauber, dexando atrás los momentos oscuros de la temporada pasada.

MEYOR COCHE: FERRARI SF71H

Quiciás paeza una contradicción o que queramos facer un favor a Ferrari dando-y un requexu nesti repasu, pero lo cierto ye que l’equipu italianu tuvo (a lo menos en bona parte de la temporada) el meyor coche esti añu. Especialmente na primera metá del campeonatu. Dalgo ponderatible si tenemos en cuenta cómo fueron los anicios nesta dómina híbrida fai yá unos años.  En Maranello volvieron a demostrar que son quien a facer una macchina que seya quien a lluchar polo más alto y a enfrentase téunicamente a Mercedes dexando de paecer intocable.

MEYOR CARRERA: GRAN PREMIU D’AZERBAIXÁN

Ye complicao escoyer una carrera al acabar la temporada porque son munchos los momentos colos que nos quedamos, tanto bonos como malos. Bakú lleva faciendo méritu pa tar ente les meyores carreres dempués d’entrar nel calendariu formuleru ensin munchu convencimientu. Nesta ocasión, anque foi Hamilton quien venció, les circunstancies nes que lo fexo, con un pinchazu nel últimu momento de Bottas que diba ser el ganador final túvonos pendientes de tolo que pasaba en pista hasta la bandera a cuadros y non toles carreres pueden dicir eso.

MEYOR MOMENTU: POLE DE RÄIKKÖNEN EN MONZA

Anque’l resultáu final del gran premiu nun foi’l que querríen los tifosi, la llocura desatóse’l sábadu col retornu a la pole de Kimi Räikkönen. Son munches les persones que yá lu quieren retirar, pero esi día tapó munches boques que lu poníen como incapaz d’aportar nada al so equipu. Demientres tola temporada, ensin facer munchu ruíu, fexo la so parte y pudo, amás d’esta pole, sumar una victoria. El finlandés tien bien pocu qu’amosar a estes altures, pero en Monza dexó claro qu’entá puede ser el más rápidu.

MEYOR EVENTU: SILVERSTONE

El cambiu de manes de la direición de F1 ta dexando cosines nel intentu d’averar la competición a los fans. Anque entavía s’echen en falta coses que pueden ameyorar, ye positivo ver grandes premios que consiguen axuntar a un númberu bultable de persones y que la xente sigue emocionándose coles carreres. Por eso, préstanos rescamplar lo que vemos añu tres añu en Silverstone, un circuitu de los tradicionales que nunca nun deceiciona. Con un futuru inciertu, paeznos importante qu’esti tipu d’eventos nun desapaezan del calendariu pol so raigañu y por ser parte de la esencia de la competición de motor.

Zarramos asina esti 2018 que pa nosotros foi bien bayurosu. Cuidamos qu’el 2019 va tar enllenu de bonos momentos formuleros que vamos intentar dexar equí espeyaos. Deseyamos a toles persones que nos lleen un prestou 2019 ya esperamos que nel añu qu’entra podamos siguir ocupando parte de les vuestres vides falando d’una de les coses que más nos presta: la Fórmula Un. ¡FELIZ 2019!

Los llamentos pola fin d’una temporada de F1 duren lo que dura’l tiempu en qu’entamen a movese les coses. La información que recibimos agora ye poco pero val doble. Yá tenemos a tolos pilotos que van ser protagonistes de la temporada 2019 y los equipos yá tienen too puesto nel coche que-yos van a dar pa competir.

Mientres lleguen los díes de presentaciones y test, siguimos n’AsturiesF1 faciendo un pocu d’alcordanza de lo que foi esta temporada que namás terminó hai dos selmanes. Falábemos nel anterior post de lo que ficieron los cinco primeros equipos na clasificación, ello ye Mercedes, Ferrari, Red Bull, Renault y Haas. Toca falar del restu.

McLaren nun resurdió. Nun creyemos, sicasí, que dalguién creyera que’l fechu de dexar dir a Honda pa recibir a Renault diba valir pa dalgo, a lo menos al curtiu plazu. Sí nos paez qu’esta temporada tuvo de ser l’amuesa de que nun yera too culpa d’Honda y que McLaren tien de camudar munches coses si quier tornar a competir no cimero. Agora toca recuperar el tiempu que se perdió echando toles culpes fuera de los malos resultaos de los últimos años. Cola anuncia de la marcha d’Alonso al terminar la temporada, paecía que l’equipu nun podía cayer más fondo y la so apuesta por dos talentos bien mozos yera un riesgu que, quiciás tiníen de tomar. Hebo momentos bonos na escudería que permitieron a dambos pilotos atropar puntos que punxeron al equipu sextu na clasificación, muncho meyor que temporaes anteriores ya’l puntu dende’l que construyir el proyeutu pa 2019. Aparte de too esto, quiciás lo más negativo, si ye posible, ye la imposibilidá de ver a Vandoorne n’un coche curiosu. El campeón de F2 dexa’l so asientu esti añu pa dir pa la Fórmula E y paeznos que los sos dos años en McLaren nun amuesen el so talentu real. Tampoco paez qu’en Woking quixeren dar un oportunidá al pilotu de pilotar un coche más “potable”.Agora’l futuru del equipu queda nes manes de Lando Norris y Carlos Sáinz. Tai sollertes.

Force India, o meyor dicho Racing Point F1, empezaron la temporada como favoritos pa ser cuartos. Yera vezu velos facer bones primeres partes de temporada y llueu desinflase un pocu pero aguantar. Nun pudimos velo nesti 2018 ente otres coses por esi mentáu y pernomáu cambiu de nome tres la compra, per parte del padre de Lance Stroll, del equipu. La escudería quedó ensin puntos pa la segunda parte de la temporada, pero tovía foi quien a terminar nel séptimu llugar y non mui lloñe del sextu. Nun foi una temporada tan regular per parte de dambos pilotos o al menos non como la 2017 onde yera vezu atopar a ún o a l’otru, o dambos, dientro de los puntos. Ye tiempu de cambios nel equipu, d’imaxe y pilotos. Esteban Ocon, que pasa a ser pilotu reserva de Mercedes, pierde’l so asientu en favor de Stroll que va tener a tol mundu sollerte p’amosar qu’en verdá merez tar ehí y nun ye namás cuestión de perres.

El cambiu de Sauber ente la temporada pasada ya esta foi bultable. Empezando polos sos dos pilotos: Leclerc tinía tola atención enriba d’elli pol so posible futuru en Ferrari, dalgo que terminó faciéndose real gracies a les sos bones actuaciones. Nel otru llau del garaxe, el suecu Marcus Ericsson, en cuenta fundir, sacó lo meyor de sí y xustificó la so presencia na F1. Irónicamente, la so meyor temporada en F1 nun-y val pa quedase como primer pilotu en nengún equipu y va tener de conformase con ser reserva. Sauber camuda dambos pilotos, dexando pasu a la veteranía de Räikkönen y a les espeutatives de Giovinazzi. Fálase de qu’en 2019 podríen dir entá meyor, asina que tamos deseyando de velos en pista otra vegada pa confirmalo.

Toro Rosso foi campu d’operaciones pa Red Bull, que pa 2019 va empezar la so rellación con Honda. Ye verdá que la temporada pa Toro Rosso xunto a Honda entamó muncho meyor de lo que terminó, pero quedó claro que, xunto a Red Bull, el xigante xaponés puede llegar a consiguir coses grandes. Brendon Hartley nun tuvo muncha suerte nes sos carreres y les más de les vegaes quedó fuera de puntos, dalgo que terminó facilitando la so marcha pa 2019. Entren, pa sustituyilu a elli y a Gasly que promociona a Red Bull, Daniil Kvyat y Alex Albon. La escudería hermana de Red Bull caltuvo una batalla con Sauber nes últimes carreres por facese col octavu puestu del mundial de constructores, pero l’equipu suizu terminó quedando per delantre. Pa 2019, volver a empezar.

Si hai un equipu que de xuru tinía ganes de terminar 2018, tien de ser Williams. Dixéronse y cuntáronse tantes coses males del equipu de Grove que nun nos paez xusto siguir sumando más datos negativos. 2018 va quedar pal escaezu como un añu desastrosu. Y puntu. Con Sirotkin y Stroll fuera del equipu, entren Russell y Kubiça, que vienen a ser espeyu de les ilusiones anovaes coles que va Williams a 2019. Necesiten dalgo totalmente distinto a lo que se fexo en 2018 y toca ponese yá.

Con un calendariu otra vegada bien apertáu y milenta novedaes, paez que cuerre priesa dexar 2018 atrás pa enfotase yá no que vien. Sicasí, paeznos qu’esti 2018 dexó bien de momentos interesantes, carreres prestoses qu’acabaron cola cantinela d’aburrimientu que muncha xente entona dacuando y con un futuru brillante con cares nueves y promeses de batalla no más alto de la clasificación.

N’AsturiesF1 zarramos esti 2018 pa ponenos a pensar yá en 2019, pero tai sollertes porque d’equí a marzu diremos cuntandovos tolo que vaiga pasando hasta que toque tornar a ver les lluces coloraes apagase n’Albert Park.

Nun hai temporada de F1 dende qu’entremos na nueva era de unidaes de potencia na que nun sintamos crítiques. L’aburrimientu, la falta de ruíu, los pilotos de pagu y munches otres son típiques demientres los meses que dura un campeonatu. Delles cuando llega payares queden nel escaezu, otres siguen pero más seliquino ya otres nunca nun desapaecen.

Ferrari devolvió a la xente que sigue esti deporte la ilusión de ver batalles en pista que nun tuvieren protagonizaes namás por pilotos de la escudería qu’agora mesmo domina la categoría: Mercedes. Llamativamente, tamién Ferrari s’encargó por dos vegaes de dinamitar les sos oportunidaes de sumar campeonatos na so cuenta particular. Esti añu foi más llaceriante entá porque’l Ferrari que pilotaron Vettel y Räikkönen foi superior al Mercedes en bien de carreres, pero nengún de los dos pilotos foi a aprovechalo bien. Y tol mundu sabía que la supuesta inferioridá de Mercedes diba durar bien poco.

2018 foi un añu redondu pa les fleches platiaes. Ye verdá que Bottas nun sumó nenguna victoria y qu’hebo dellos momentos nos que tuvieron nel puntu de mira, llegando a almitir él mesmu que foi la so peor temporada na categoría, pero l’estáu de forma de Hamilton ye increyible. Siempre se diz d’elli que si ye quien a atopar l’equilibriu ente lo que fai en pista y lo que fai fuera d’ella ye imposible vencelu. Esti añu foi un exemplu d’ello. L’ausencia práutica d’errores pela so parte sumada a les prestaciones d’un coche y un equipu que trabaya pa ganar, ehí tenemos los cinco campeonatos atropaos hasta’l momentu.

Toos cuntamos con que Ferrari torne en 2019, porque paez que consiguió dar cola clave pa poder competir con Mercedes nel planu téunicu. Sólo precisa que los sos pilotos, y sobre too nel casu de Vettel que ye’l que más presión va tener enriba na temporada viniente, seya quien a sacar partíu a les debilidaes del equipu alemán y aprovechales pa facese más fuerte. La presencia de Leclerc paeznos perimportante polo que va suponer de motivación pal pilotu alemán y poles ganes que tenemos de velu n’un bon coche dempués de lo que fexo col Sauber esta temporada.

Nun sabemos si se puede falar de temporada de transición pa Red Bull cuntando col so cambiu de motorista pa 2019. Ello ye que l’equipu de Milton Keynes tuvo momentos bonos, sobre too nes carreres finales anque con suerte desigual pa los sos pilotos. L’añu de Ricciardo, un pocu asemeyáu al que tuvo en 2017 Verstappen, foi desesperante per momentos, anque quiciábes menos dempués de la so decisión de colar de Red Bull pa dir pa Renault. La cantidá bultable d’abandonos del australianu fai que nun lu tengamos visto lluchar por podios como esperábemos, dalgo que sí pudimos ver col so compañeru. Sicasí, Red Bull yá nun mira pa Renault si non pa Honda y paez que lo que vieron y les cuentes qu’echaron na temporada del xigante xaponés con Toro Rosso convencen bastante como pa pensar que, con un perbón chasis, Red Bull puede tar no cimero na temporada 2019. Gasly súmase asina al equipu dempués del so pasu protocolariu pola escudería hermana y toca-y midise a ún de los pilotos más ambiciosos de la parriella. L’espectáculu de xuru va ser prestosu.

Va quedanos pa siempre la dulda de si, nel casu de que Force India (agora Racing Point) nun tuviera perdío los sos puntos na mitá de la temporada, Renault tuviere termináu cuartu. Falábase mui bien al entamu de la temporada de lo que podía facer la escudería francesa pero naide nun esperaba con que valiera como pa ponese cuartos. Ye llamatible que tampoco nun ye que tuvieran carreres estraordinaries davezu, de fechu quedaron munches vegaes fuera de puntos o sólo terminaron con un coche, pero cuando llograron sumar, fixéronlo en momentos estratéxicos cuando los sos persiguidores nun lo facíen. L’equipu necesita más regularidá pa 2019, dalgo que paez que va tener si nos fiamos del criteriu de Ricciardo de firmar con ellos. Cuidamos que’l pilotu australianu quier siguir sumando podios y victories, asina que ye posible que pal 2019 velos cuartos o más arriba nun seya tan raro.

Aparte de Renault, otru equipu que merez l’aplausu del xeneral ye ensin duldes Haas. Nel tiempu que lleven na Fórmula Un la so evolución ta siendo ponderatible y esti añu fueron poques les oportunidaes que nun los vimos ente los diez primeros, sábadu o domingu. Pesie a la deceición de la primer carrera col so doble abandonu dempués de les bones espeutatives puestes no que podíen hacer ellí, la so progresión pela temporada valió-yos el quintu puestu nel mundial de constructores. El manexu de Grosjean y Magnussen sigue tando nel puntu mira, anque curiosamente’l pilotu danés nun recibió penalización dala pol so arte en pista. Sí que ye verdá que tien un estilu de llevar el coche que nos trai a la cabeza’l pilotar d’otru tiempu, menos consideráu col rival, pero tamién ye verdá qu’esti añu esa ambición valió al equipu tar ehí arriba. Lo mesmo podríemos dicir de Grosjean, magar que nel so casu a vegaes danos la sensación de que ye más despiste o torpeza qu’agresividá.

Quédennos la mitá d’equipos por analizar y tamién les carreres, pero como’l descansu ente temporaes ye bien llargu, convidámosvos a que teais sollertes a les siguientes entregues d’esti repasu a 2018.

Mentantu, podéis tamién consultar la llista de pilotos, yá confirmada y completa, que vamos ver na parriella de 2019 equí.