Day: September 4, 2018

Preparábase Italia esti fin de selmana pa un festival coloráu nel que la Scuderia salía como la principal favorita en casa, pero les coses non siempre salen como se suañen. Lewis Hamilton baltaría per dos veces los corazones de los tifosi qu’enllenaben les grades de Monza.

Si bien Vettel llideraría les dos últimes sesiones d’entrenamientos llibres, tres una primera sesión marcada pol agua qu’acabaría lliderando Sergio Pérez faciendo bonu’l momentu qu’escoyó pa marcar el tiempu, foi Räikkönen el que marcaría la pole na sesión de clasificación. Siguíu pol so compañeru Vettel, zarraben la primer llinia de salida’l domingu per delantre de los Mercedes.  El sustu nes sesiones llibres daríalu Ericsson, que sufría un accidente fuerte na segunda sesión al quedar bloqueáu el DRS na entrada de la primer curva y perdiendo’l control del coche dafechu (pueden vese les imáxenes equí).

Yá no que viemos el domingu, dambos Ferraris fueron quien a mantener les sos posiciones na salida, pero un movimiento de Hamilton sobre Vettel na Variante della Roggia onde l’inglés ganaba la posición per fuera y Vettel nun yera quien a xirar abondo, fizo que’l pilotu alemán diere un trompu perdiendo una montonera de posiciones.  Los comisarios decidiríen qu’esta maniobra foi un incidente de carrera y nun tomeríen midíes. Esto pondría a Hamilton segundu, maniobra qu’intentaría completar na cuarta vuelta pasando esta vez a Räikkönen, pero esti devolvería-y la xugada un pocu más alantre. A partir d’equí, tocante a la cabeza de carrera, xuegu d’estratexes; mientres la Scuderia decidía entrar en pit na vuelta vente, Mercedes mandaba-y el mensaxe de Hammertime a Lewis que marcaría delles vueltes rápides aprovechando l’aire llimpio, posteriormente entraría él tamién a pit mientres la escudería alemana facía llabor d’equipu dexando a Bottas per delantre del pilotu finlandés ayudando al so compañeru a reducir la distancia. Finalmente, na vuelta cuarenta y cinco, Lewis llanzaríase sobre Kimi pa llograr una primer posición que nun abandonaría yá hasta ver xiringar delantre d’él la bandera cuadros.

Per parte Vettel, la carrera convertiríase dende’l toque con Hamilton n’una serie d’adelantamientos col envís de minimizar el dañu ocasionáu pola salida de pista. Al final el pilotu alemán sedría quien a cruzar la llinia cuartu lo que, si bien lu fae ver cómo medra la distancia col llider del campeonatu, fai’l menos dañu posible tres la complicada primer vuelta que tuvo.

Bottas, amás de xugar el papel d’equipu ralentizando a Räikkönen cuando foi necesario, tuvo dellos “alcuentros” con Verstappen qu’acabaría recibiendo una sanción de cinco segundos por nun dexa-y espaciu abondu n’un intentu d’adelantamientu del finlandés. Esto fizo que Bottas llograre’l tercer caxón del podium y Vettel pudiera acabar cuartu la carrera. Verstappen acabaría quintu. El compañeru de Verstappen, Daniel Ricciardo vería como’l nuevu motor de Renault sobre’l que toos tiníen los güeyos puestos se facía fumo y nun-y dexaba otra opción qu’abandonar la carrera.

Tocante a los demás Romain Grosjean foi’l primeru del restu, pero foi descalificáu al acabar la carrera por topar los comisarios irregularidaes nel fondu planu del Haas. Tampoco-y foi la cosa bien al otru Haas, que quedaría últimu na decimoquinta posición. Quedaba entós el quintu puestu pa Esteban Ocon siguíu de Sergio Pérez que, anque’l segundu tuvo dellos roces col Haas de Kevin Magnussen, fueron quien a volver pelos fueros del equipu per segunda carrera consecutiva. Paez que’l cambiu de dueños que suponxo’l concursu d’acreedores yera’l puntu d’inflexón necesariu pa ver al equipu al que tábemos avezaos a ver.

Carlos Sáinz finalizaría octavu volviendo a los puntos mientres que lu siguiríen Stroll y Sirotkin. Fae tiempu que nun tamos avezaos a ver puntuar a dambos Williams, anque tovía tienen que siguir con esi trabayu si quieren esguilar dalguna posición nel mundial de constructores. Charles Leclerc quedaría a les puertes de los puntos mientres intenta llevantar la cabeza depués d’unos cuantos grandes premios con problemes. L’otru Sauber Ericsson entraría nel puestu quince.

Per parte de Mclaren les coses nun tienen pinta de meyorar, esperamos qu’esto seya porque tean puestu tol enfotu nel coche del añu que vien. Tres una pésima clasificación, Vandoorne acabaría duodécimu, mientres qu’Alonso nun podría acabar la carrera por quedar el motor ensin potencia.

Nico Hülkenberg, pela so parte foi decimoterceru n’un gran premiu nel que tuvo munchos problemes, siguíu por Pierre Gasly. L’otru pilotu de Toro Rosso, Brendon Hartley, tuvo un toque na salida con Vandoorne qu’acabó estrozándo-y l’alerón delanteru cola consecuencia de destrozar una de les ruedes frontales lo que fexo que nun llegara a completar la primer vuelta siquiera.

Con too, asina quedaron les clasificaciones d’esti fin de selmana. Nestos enllaces podéis ver los meyores momentos de la clasificación y de la carrera.

Clasificación

Carrera