Day: May 15, 2018

N’un momentu de la temporada nel que s’esperaben novedaes técniques de toles escuderíes quiciás la mayor novedá foi l’ausencia de cambios qu’estes evoluciones traxeron al orden de los equipos. N’un campeonatu tan competitivu como’l que vivimos nun hai qu’olvidar que toles cases tán poniendo tol enfotu en progresar los sos coches, ello ye que nun se puede falar d’evoluciones de forma aislada, sinon de ser más rápidu ameyorando’l coche que los demás. Al final d’eso va la Fórmula 1, de ser el más rápidu. Los que más sorprendieron a la vista fueron McLaren con un conceutu nuevu de morru y Ferrari con unos retrovisores montaos nel halo que llamaben bien l’atención.  Pero al final en Mercedes volvieron a topase a sí mesmos en Montmeló n’un gran premiu que dominaron dende l’empiezu al final encabezando toles clasificaciones de tol fin de selmana.

En clasificación tres dexar lliderar a Vettel nes dos primeres mangues, Hamilton metió la directa na Q3 pa zarrar xunto con Bottas la primer llínia de salida siguíos pelos dos Ferrari y los dos Red Bull. Per detrás les suertes repartíense ente Magnussen, Alonso, Sáinz y Grosjean. Un problema col cambiu dexó a Hülkenberg fuera bien ceo y Hartley nun llegó a marcar tiempu al acabar contra la muria desfaciendo de pasu otru motor nel golpe.

Yá’l domingu, anque les previsiones nos prometíen agua al 80% al final nun posó nenguna gota nel asfaltu catalán, anque les ñubes amenazaben davezu.  Ensin falta esi ingrediente, les coses volvieron a ponese interesantes nes primeres curves: Vettel perpasaba a Bottas na salida na primer curva y na tercera Romain Grosjean nun yera quien a controlar el so coche. El monoplaza del francés marchó d’atrás y el pilotu intentó dar el trompu completu manteniendo’l pie nel pedal, lo que lu fadría atravesar la pista travesándose a los coches que llegaben per detrás (puedes ver les imáxenes equí); Nico Hülkenberg y Pierre Gasly fueron los que llevaron les peores consecuencies al pegar col Haas y acabando nesi mesmu instante la so carrera. Sirotkin llibró ensin saber mui bien cómo d’esi forfugu y Alonso perdió delles posiciones al esquivar al coche que baillaba al debalu pel trazáu. Poro, coche de seguridá…

A la reanudación Fernando Alonso empezaría a esguilar puestos dende’l 11, pa ello tendría que pasar a Ocon y Leclerc; pela parte delantera, Vettel intentaba garrar al llíder col pie cambiáu entrando bien llueu na vuelta 18 a cambiar les gomes nuna estratexa que nun-yos daría nengún resultáu a la llarga. De fecho, n’un coche de seguridá virtual provocáu por un fallu nel motor del Force India d’Esteban Ocon, el pilotu de Ferrari entró a facer el segundu cambiu, n’un movimientu que resultó bastante lentu y que lu dexó cuartu detrás de Max Verstappen. L’otru Ferrari, el de Kimi, quedaría pocu enantes tamién aparcáu nel arcén por otru problema col propulsor. Nun foi un bon gran premiu pa Ferrari que ve como s’alloñen Hamilton y Mercedes nos sos respectivos mundiales.

Y entraría primeru Lewis nuna carrera que nun tuvo secretu pa él siguíu por Bottas que foi quien a mantener la segunda plaza de la mesma forma y con distancia abonda al restu de los persiguidores recordando los “bonos tiempos” de Mercedes na dómina de los híbridos. Verstappen sedría terceru tres mantener la so posición a pesar de perder parte del endplate del alerón delanteru n’un toque con un Williams que nun tendría consecuencies nel ritmu del pilotu holandés. Podiu pa Max y quintu puestu pa Ricciardo que, como nos tien avezaos, ensin facer grandes xestes nun falla nos primeros puestos dientro les posibilidaes que-y da la ferramienta de turnu.

Kevin Magnussen sedría primeru del restu siguíu por Carlos Sáinz que cuayó otra carrera consistente y  l’asturianu Fernando Alonso.  Checo Pérez quedaría novenu garrando un par de puntos pa Force India, que bona falta tienen d’ellos, mientres que Leclerc sigue dexando ver que tamos énte ún de los pilotos que va a dar que falar nel futuru. Otru puntu más pa Sauber que va sumando poquitino a poquitino pero con meyores blimes que l’añu pasáu.

Brendon Hartley pela so parte sigue ensin garrar el so puntu al Toro Rosso que, sacante’l cuartu puestu de Gasly en Baḥréin ya’l puntu d’Azerbaixán del propiu Hartley, nun son quien a llograr una regularidá nes carreres.

Ensin más, equí vos dexamos los resultaos completos del fin de selmana, asina como los resumenes en vídeu de la clasificación y de la carrera.

Clasificación

Carrera