Month: December 2017

Na primer parte d’esti resume (que podéis lleer equí por si entá nun lo ficistis) falábemos de ganadores y perdedores, refiriéndonos a equipos y pilotos. Pero tamién hai que falar de les carreres, de les sorpreses que llevemos y de les coses que nun nos cuadraron demasiao.

2017 foi un añu de dir y vinir na parrilla: Kvyat, que yá entamaba l’añu cola confianza tocada, quedaba tocáu y fundíu dempués de que Toro Rosso decidiera prescindir d’elli pa meter a Gasly en nómina. El baille de pilotos tamién afeutó a Renault, que nun aguantó con Palmer tola temporada (nun podemos culpalos) y terminó por sustituyilu por Carlos Sáinz, que na segunda mitá de la temporada camudó los collores del so coche. Esi movimientu facía que Toro Rosso quedare con un pilotu de menos y cuando tol mundo pensaba que Kvyat diba volver tener la so oportunidá, llegó directamente del WEC el neozelandés Brendon Hartley.

Si falamos de la meyor carrera del añu, ye mui posible que coincidamos munchos en qu’esa foi Baku por too lo que se vio esi día y que naide nun esperaba: la victoria de Ricciardo, el momentu Vettel-Hamilton, les batalles y adelantamientos…La verdá que foi una d’eses carreres que nun dexen descansar a la xente nin un segundu.

Y si mentamos la meyor, hai que dicir cuala ye la pior, y paeznos qu’esi duldosu honor tien de llevalu Abu Dhabi. Muncha xente del mundu formuleru falaba de la gran capacidá loxística de los organizadores del eventu nel circuitu de Yas Marina. Ensin embargu, esi despliegue nun foi sinónimu de bona carrera si no más bien tolo contrario. La pallabra más repitida pa describila foi aburrimientu, y tamos mui d’alcuerdu.

México lleva un par d’años llevando’l reconocimientu por ser el meyor eventu formuleru del calendariu y con motivu. Esti añu amás, col estra de lo que pasara un tiempu enantes de que llegaren los coches, y esi terremotu terrible que tanta tristeza dexó nel país, pudimos velos entamar una fiesta bien guapa como pa sorrir al futuru dempués de pasalo tan mal. Bien por México.

Escoyer ún de los meyores momentos de 2017 pue ser una de les coses más complicaes pola cantidá de bones hestories que vimos nesta temporada. Por quedanos con una quiciás el gran premiu de Mónaco ya’l diálogu previu a la carrera ente dos campeones del mundo como son Jenson Button y Fernando Alonso, que si vos alcordáis esi día compitió nes 500 milles d’Indianápolis.

Tampoco nun queremos olvidanos de la primer victoria de Valtteri Bottas que llegó esti añu nel gran premiu de Rusia. La llegada del finlandés a Mercedes paecía ser un parche pa cubrir l’ausencia inesperada del que yera vixente campeón del mundu Nico Rosberg, pero Bottas supo trabayar por facese un güecu nel equipu y cuenta cola aprobación d’Hamilton.

La mayor decepción d’esti 2017 paeznos que foi Williams. Yá falemos de Stroll como ún de los perdedores, pero la verdá ye que l’equipu nun tuvo a l’altura de lo qu’esperábemos d’ellos. A estes altures de 2017 entavía nun sabemos quién va pilotar xunto al pilotu canadiense en 2018 pero sólo esperamos que, seya quien seya, sirva pa que Williams despierte y nun repita los errores d’esta temporada.

Y como nun pue ser d’otra manera, cuando un añu empieza siempre se fala d’esos deseyos que se tienen pa esos 365 días que tán pa estrenar. La temporada 2018 nun entama hasta finales de marzu pero podemos dexar equí lo que deseyamos pa ella:

– Que dalgún equipu (y si puen ser dos meyor que ún) faga solombra a Mercedes en dambos campeonatos. Nun pidimos más que volver a tener batalles como nesta primer parte de la temporada.

– Que los circuitos que retornen dexen un bon tastiu y que motiven a la xente a enllenar les grades p’amosar, una vuelta más, que la Fórmula Uno ta mui viva y tien en munchos trazaos europeos entá hestoria qu’escribir.

– Que cada gran premiu seya un gran espectáculu au la xente, los pilotos y los equipos esfruten al máximu y nos fagan esfrutar a los y les que tamos al otru llau la pantalla.

Nun nos queda más, dende Asturies F1, deseyavos un añu enllenu de felicidá y muncho, munchísimo motor y carreres de les qu’esfrutar. ¡FELIZ TEMPORADA!

Tamos a piques de rematar el 2017 pero nun podíemos facelo ensin enantes echar los güeyos atrás pa repasar lo que foi esti añu na Fórmula Uno. Milenta blogues, podcasts y páxines dedicaes a esti deporte yá dieron tolos datos y toles estadístiques ya nosotros queremos sumar una migayina con esti puntu final a una temporada que dio pa bastante más de lo que paecía.

En xeneral, foi una temporada entretenida. Ye verdá qu’al final, y sobre too les últimes carreres con too decidío foi bastante aburrío, pero la primer parte de la temporada, onde Vettel y Hamilton, y Ferrari y Mercedes lluchaben por ser los meyores esti añu, foi bien emocionante. Fuimos testigos del pasu alantre nel desarrollu d’estos coches, con récords de circuitos gran premiu tres gran premiu, con adelantamientos perinteresantes (pa silenciar asina a los que duldaben que con coches más anchos eso fuera posible) y bastantes batalles inesperaes que punxeron munches veces la guinda a carreres menos vistoses.

Si tenemos que falar de ganadores y perdedores, paeznos qu’hai bastante alcuerdu: ye indudable que nel apartáu de los ganadores tenemos de meter a Mercedes por otru añu más siendo campeones y por facelo superando torgues qu’otros quiciabes nun podríen. Al marxe d’esta opción obvia, tamién queremos destacar lo fecho por Force India, un añu más, ensin duldes el meyor equipu de la parte media de la tabla y de fechu’l cuartu meyor equipu de la temporada. La combinación de pilotos y el trabayu continuu de la escudería viose recompensada con un campeonatu perbonu y esi cuartu llugar. N’años anteriores siempre los víemos empezar mui bien y dir desapaeciendo col pasu les carreres. Esti añu consiguieron mantenese a flote y dientro los puntos en prácticamente tolos grandes premios. L’únicu puntu negru de la so temporada fueron, quiciás, los incidentes en pista ente dambos pilotos, que l’equipu consiguió resolver con más o menos fortuna.

En cuantes a los perdedores, equí tamién paez qu’hai consensu: Ferrari tien de tar nesti llau, pesie a que non tola temporada foi un desastre. Paez inxusto calificalos de perdedores pero la verdá ye que fueron ellos mesmos los que dinamitaron toles sos posibilidaes de ser campeones en dambos campeonatos: la xira asiática de la Fórmula Uno foi terrible pal equipu y los sos intereses, y cuando quixeron recuperase yera tarde. Otru añu más, otra deceición más, anque esta vegada hai qu’almitir que hebo más esperances y les evoluciones ya’l trabayu nel coche dieron resultaos más visibles que n’años pasaos.

Pa facer compañía a Ferrari tenemos otru par d’equipos: Sauber y McLaren. Los primeros pol rendimientu amosáu, sabemos qu’afectaos por milenta circunstancies que nun tienen muncho que ver colo que pasa en pista pero que sí lo condicionen. Cuidamos que 2018 seya un añu munchu más positivu pa ellos cola llegada de Leclerc y les agües más calmes. Los segundos por otru añu más de falta d’entendimientu con Honda. Vamos llamalo asina porque nun creyemos que nengún de los dos llaos olvidara como facer el so trabayu. Nel 2018 dambes partes tomen caminos separtaos dientro del mesmu mundu formuleru y col optimismu propiu de los nuevos entamos. Honda con Toro Rosso, McLaren con Renault. ¿El resultáu de dambes combinaciones? D’equí a un añu vos lo cuntamos.

No que cinca a ganadores y perdedores na parrilla de pilotos, una vuelta más, Hamilton tien por fuercia de tar ente los primeros. Pesie a tener dellos momentos de vese cuestionáu poles sos formes alloñaes de los circuitos (y que sabemos que siempre foi ún de los puntos febles del pilotu británicu) la verdá qu’esti añu vímoslu bastante más capaz de controlar esti tipu de coses ya xestionar les sos emociones y nun dexar qu’estes lu afectaren en pista.

Otru “ganador” pa nosotros ye Esteban Ocon. Na so primer temporada completa como primer pilotu, esta vegada en Force India, malpenes lu vimos fuera de los puntos, lo cual nun dexa de ser almirable. Cuidamos que 2018 seya l’añu nel que confirme qu’esti 2017 nun foi una ilusión y que tamos énte ún de los pilotos de referencia pal futuru.

Nel otru llau, dientro de los perdedores, anque con matices, metemos a Vettel. Esti añu vimos coses nel alemán a les que nun nos tien avezaos y que quiciás yeren espeyu de falta de confianza ya incapacidá de sobreponese a los problemes. La so actitú en Baku, l’erru en Singapur…son sólo exemplos de situaciones que nun tamos avezaos a vivir con un pilotu como Vettel que suel controlar meyor esti tipu de circunstancies. Hamilton ganó por méritos propios de la mesma forma que Vettel perdió polo mesmo.

A Vettel sumamos Stroll y Ericsson. Stroll tuvo dellos momentos brillantes que maquillen un pocu la so actuación en xeneral pero, xunto a Williams, el so añu foi bastante deceicionante. Ericsson, pel so lláu, tampoco nun dio pa muncho: nun sumó puntos pal so equipu, tuvo más d’un accidente inxustificáu y, sinceramente, nun amosó la razón pola qu’en Sauber siguen confiando n’elli. Tuvo la suerte de tener al llau a Pascar Wehrlein que tampoco nun pudo dar muncho más de sí cola ferramienta de la que disponía.

Y hasta equí la primer parte de les reflexones d’esti 2017. Pal caberu día del añu volvemos cola segunda parte.