Day: October 3, 2017

Dicía Niki Lauda esti domingu que Mercedes agotaba esti fin de selmana la so suerte pal restu de la temporada. Dicíalo dempués de ver que Vettel nun podía pasar de Q1 el sábadu por un problema nel turbu. Eso condergaba al alemán a tener que salir últimu’l domingu. La esperanza del equipu Ferrari yera Kimi Räikkönen que por mui poco nun consiguió la pole, que foi pa Hamilton. Cuidaben na Scuderia que’l finlandés podría poner n’aprietos a Hamilton mientres Vettel intentaba escalar puestos pa ponese a batallar nos puestos d’arriba. Pero non, nun diba ser tampoco asina y, sin nin siquiera poder facer la vuelta de formación, Räikkönen tinía de retirase por un problema asemeyáu, a priori, al de Vettel. Si l’alemán quería consiguir dalgo, diba tener de ser pola so propia cuenta.

El sábadu, dempués de la FP3, Ferrari atopó un problema nel motor de Vettel que fizo que decidieren cambiar la unidá de potencia completamente ya en tiempu récord (lo normal suelen ser alredor de cuatro hores, y l’equipu emplegó namás dos hores). Tolos aplausos pola rapidez ya eficacia, quedaron apagaos cuando’l turbu del coche de Vettel empezó a dar guerra, faciendo que tuviera que metese en boxes. Intentaron volver a sacalu, a lo menos pa poder metese na Q2, pero nun fueron quien. Sabiamente, cuntando con salir últimos el domingu, cambiaron otra vez d’unidá de potencia, de forma qu’agora tienen dos d’elles pa les cinco carreres que queden.

Con Vettel mui atrás na parrilla y Räikkönen fuera de la ecuación, too paecía dicir que diba ser un paséu pa Hamilton. Pero Verstappen encargóse bien ceo de que nun fuera asina. Anque nes primeres vueltes l’inglés lideró la carrera, nunca foi quien a abrir güecu col holandés y un ratu más tarde, viose superáu por él. Dempués del gran premiu, Hamilton almitió que nun quixo arriesgase a recuperar el llideratu con Vettel tan atrás na parrilla. Conociendo a Verstappen y cómo se les gasta en pista, nun nos paez que fuera a vender la so posición barato.

Nel otru llau de los garaxes de dambos equipos, Bottas consiguió plantar cara a Ricciardo y demientres les primeres vueltes rodó a bon ritmu. Ensin embargu, pronto l’australianu diba ponese per delantre, ya’l finlandés tendría de conformase col cuartu puestu que-y quitaba Vettel a delles vueltes del final. El pilotu de Mercedes reconoció que nun entendía por qué la so carrera fuera tan floxa. De fechu, dambos pilotos manifestaron que tuvieron problemes cola batería, lo que fizo que’l so rendimientu nun fuera óptimu y que Red Bull pasara perriba d’ellos.

El focu d’atención de la carrera foi, ente otros, la capacidá de Vettel pa dir escalando posiciones y salvar tolos puntos posibles dempués del desastre del sábadu. Pudo llegar a ponese terceru, pero pronto abandonó la batalla con Ricciardo, pa tristeza del australianu que tenía ganes d’un pocu de competición con elli, porque les gomes del so Ferrari nun daben más de sí.

Como dicíemos, Mercedes taben preocupaos al terminar el gran premiu polos problemes cola batería en dambos coches, más acentuao nel casu de Bottas. Col campeonatu en la cabeza, Hamilton optó pola solución más segura y Bottas peleóse col coche pa consiguir acabar quintu. Amás, paez ser que les meyores que s’incorporaron al so coche nun funcionaron como s’esperaba, polo que, de cara a esti fin de selmana que vien, van tener que trabayar nesi aspectu.

Red Bull y Verstappen veníen necesitando una victoria nesti 2017. Anque ganar un gran premiu nun compensa tola mala suerte del pasáu, el pilotu holandés merecióse esta victoria. Ye mucha la xente qu’opina que nesta segunda ocasión, tien más méritu que la primer vez que ganó en Barcelona del añu pasáu, porque Rosberg y Hamilton taben fuera de carrera y foi cásique una victoria heriedada. Pero en Malasia 2017, la victoria foi too mérito d’una cabeza bien amueblada ya’l máximu de concentración pa nun cometer errores. El doble podiu con Ricciardo terceru nun lu veíamos dende l’añu pasáu, tamién equí en Malasia. Ricciardo defendióse bien de Vettel y anque la batalla foi curtia, regalónos dellos momentos emocionantes.

Ferrari consiguió un resultáu bastante decente pa la pinta que tinía al empiezu la carrera. Anque nun ye ideal, y cásique puen dicir adiós al campeonatu de constructores, el cuartu puestu de Vettel foi lo menos malo de tol fin de selmana. Nun olvidamos mencionar que nin siquiera al final tuvo l’alemán dalgo de tranquilidá. Y ye que nos momentos finales, dempués de ver la bandera a cuadros, Vettel atopóse con Stroll en pista. El pilotu canadiense de Williams taba garrando un pocu goma cuando, a la so drecha apaecía Vettel faciendo lo mesmo. L’encontronazu terminó con un choque ente dambos que dexó a Vettel con tres ruedes y teniendo qu’usar a Pascal Wehrlein de taxi. Curiosamente, el pilotu de Ferrari llevó con elli’l volante del coche, dalgo que la FIA nun permiti.

McLaren y, especialmente Vandoorne, mostraron un rendimientu inesperáu en Malasia. Singapur yera un circuitu que-yos beneficiaba, pero Malasia nun tenía fama d’ello. Ensin embargu, el pilotu belga clasificó sétimu (con Alonso décimu) y en carrera tamién consiguió terminar nesi puestu. Ensin ayudes en forma de lluvia, lo que vimos foi un bon coche con un pilotu que cada vegada ta más inspiráu en pista. Nel llau d’Alonso, que nun entró en puntos, vimoslu na so llínia esti añu de quexase por radio, especialmente de Magnussen nesta ocasión, ya estorbando a Vettel cuando esti taba lluchando con Ricciardo pol podiu. Nel mundial de constructores, Stoffel Vandoorne saca-y tres puntos al so compañeru d’equipu.

Force India volvió a tener a los dos pilotos dientro de los puntos y yá van doce carreres. Anque nun foi una carrera plácida pa nengún de los dos, la importancia d’esta regularidá ye evidente: tienen casi nes sos manes el cuartu puestu del mundial. Sergio Pérez corrió tando malu, lo que fai que la so sexta posición tenga más méritu entá. Ocon pel so llau tuvo un gran premiu bastante accidentáu, siendo protagonista en dellos incidentes, como na salida, onde chocó contra Massa, llevándose un pinchazu, y más tarde con Sáinz, que chocaría contra elli y faciéndolu trompear. El francés terminó siendo décimu pero nun taba nada contentu col resultáu.

Williams por fin consiguieron puntuar con dambos coches, anque fuera nos puestos octavu y novenu. Stroll salía mui atrás na parrilla, pero con una bona carrera y mostrándose seguru en pista a la hora de frenar los adelantamientos d’otros, consiguiría amás terminar per delantre de Massa, que tamién tuvo más problemes con otros coches. La suerte pa Williams continuó gracies a que nengún de los sos persiguidores, Renault y Toro Rosso, consiguieron puntuar, lo que-yos da un respiru de cara al final de la temporada.

Haas nun pudieron puntuar nesta ocasión, anque’l director d’equipu Guenther Steiner nun taba esmolecíu por ello, pues opina que dambos pilotos ficieron una bona carrera. Grosjean nun compartía esa opinión, yá qu’amás viose últimu n’un momentu de la carrera n’un intentu por evitar choques na salida. Magnussen siguió sumando amigos en pista, esta vegada con Alonso, y trabayando la so fama de pilotu suciu. Ta claro que’l danés nun se corta a la hora de lluchar en pista y quiciás dellos pilotos, avezaos a que los dexen pasar, nun con capaces d’entender qu’un Haas-yos plante cara.

Toro Rosso, col debut de Gasly, nun pudo entrar en puntos. Sáinz, dempués del incidente con Ocon, terminaría retirándose con un problema llétricu nel coche. Gasly fexo una bona carrera, conservadora, pero segura. Almitió qu’entá tenía munches coses qu’ameyorar, sobre too nel manexu de les gomes. Amás, paez que demientres la carrera tuvo dalgún problema col suministru de llíquidu del coche, dalgo vital en carreres como Malasia.

Renault tuvo una carrera basta probe, con dambos pilotos terminando nos puestos quince y dieciséis. Hülkenberg tuvo una mala salida que yá llueu lu condicionó pal restu de la carrera. Palmer tuvo dalgún encuentru con Magnussen en pista y llegó a trompear dos vegaes, pero en regla xeneral, los xefes de Renault taben bastante enfadaos colo que vieron en pista pues esperaben muncho más del rendimientu del coche. Amás, la estratexa de paraes tampoco nun foi la meyor. Un fin de selmana pa olvidar.

Los pilotos de Sauber tuvieron suertes distintes en pista: Wehrlein opinaba que la so carrera fuera buena, dientro lo que cabe cuando termines nos puestos más baxos de la tabla. Ericsson pel so llau taba lloñe de tar contentu cola so carrera. Vasseur tamién opinaba que la carrera fuera relativamente bona pa ellos. En términos d’estratexa, foi quiciás no que más destacaron, pesie a nun ser quien a amortizalo en carrera.

Clasificación

Carrera