Month: September 2017

Acabose l’horariu européu pa dexar pasu a los madrugones asiáticos. Singapur tratónos bien y dexonos siguir viendo Fórmula Uno a unes hores decentes, pero nun vamos poder dicir lo mesmo de Malasia. El circuitu de Sepang verá’l domingu la so última carrera, a lo menos nel futuru prósimu, dempués de que’l so contratu pa celebrar un gran premiu nun viese l’anovamientu tres de diecinueve años nel calendariu formuleru. Son munches les voces que se xunieron pa llamentase por que nun tengamos una carrera en Malasia en 2018, tanto ente los pilotos como dientro los equipos.

Llegamos asina a Malasia y con ello a ún de los circuitos más duros no que cinca a les condiciones a les que se somenten los pilotos. Naide nunca va escaecer la visita de Kimi Räikkönen tiempu ha pa garrar un xeláu, dexando claro que en Sepang fai munchu calor. Y ye que les altes temperatures (l’añu pasáu hasta 60ºC en pista), la humedá y la climatoloxía cambiante, faen d’esti gran premiu una caxa de sorpreses. A too esto, tenemos d’añader rectes llargues y curves complicaes, que convierten a esti circuitu n’ún de los favoritos de munchos na parrilla.

El fin de selmana en Singapur dexó munchos aspeutos llamatibles, ente ellos, el bon rendimientu de Mercedes el domingu. L’equipu alemán, siguiendo’l so criteriu d’amosase enfotaos dientro de la prudencia, nun cuntaba con la victoria que llevaron na carrera pasada, y tienen razones pa sintise optimistes en Malasia. Como dicimos, siempre dientro de la prudencia yá que naide nun olvida la escena del pasáu 2016 na que se vía a Hamilton abandonando esta mesma carrera por un problema col motor. Munchos dirán qu’esto mesmo vivióse con Vettel en Singapur, esi puntu d’inflexón onde la temporada s’inclina pa ún o otru llau, pero paeznos que nun podemos dar por zarráu esti campeonatu entá. Y de xuru que Hamilton va tener eso en mente cuando monte en coche’l próximu vienres.

Yá por partes, Ferrari, dempués del so primer doble abandonu en dellos años, punxeron procuru en pasar rápido de páxina y pensar nesti gran premiu. 28 son munchos puntos y ocho paecen poques carreres, pero como comentábemos n’anterior crónica, Vettel yá foi quien a ser campeón superando distancies más abultaes. Lo que ta claro ye que la Scuderia nun pue permitise otru fin de selmana como’l pasáu, especialmente pensando en que Mercedes cada vegada ta más cerca de volver a facese col campeonatu de constructores por cuartu añu consecutivu.

En Red Bull conserven bones alcordances del añu pasáu cuando los sos dos pilotos, aprovechando la desgracia de Hamilton, llucharon pol primer puestu del podiu. Al final, diba ser Ricciardo quien se fadría cola victoria, y lleguen nesta ocasión coles mesmes ganes ya intención de repetir lo que se vivió hai doce meses. Amás, esta selmana supimos qu’Aston Martin va facer la so entrada na F1 de mano de la escudería de Milton Keynes como sponsor, na llínia de lo que ficiera Infiniti hai unos cuantos años.

Force India confirmaba nel gran premiu anterior que va cuntar con los sos dos pilotos actuales pa 2018, zarrando asina la puerta a les especulaciones propies d’esta época del añu. Insisten na importancia de dar esta noticia con tiempu suficiente pa centrase nes carreres que queden, onde cásique tienen aseguráu el cuartu puestu nel campeonatu de constructores, y pa dir pensando nel proyeutu del añu que vien sabiendo con qué pilotos van cuntar. Sergio Pérez consiguió’l so primer podiu en 2012 nesti circuitu y, anque nun ye un trazáu que-yos beneficie especialmente, les meyores que van incorporando deberíen ayudalos a ser competitivos.

Y ye que detrás vien Williams, un equipu qu’esti añu ta dexando bastante que deseyar pa lo qu’esperábamos d’ellos. Agora mesmo, casi podríemos dicir que se fala más d’ellos pol tema de los sos pilotos pa 2018 que poles carreres que tán faciendo. Son tres los pilotos qu’opten a esi asientu: per un lláu Robert Kubiça, que dende que volvió al mundu formuleru nun dexa de salir en les quinieles de casi tolos equipos con un güecu qu’ocupar; el propiu Felipe Massa, que dempués d’anunciar la so retirada l’añu pasáu, agora paez que yá nun tien tantes ganes de marchar, y Paul Di Resta, que yá tuvo la so oportunidá de mostrar que ta más que preparáu pa ponese al volante dempués de la so decente actuación en Hungría. Unu d’estos tres pilotos podría convirtise en compañeru de Lance Stroll.

Toro Rosso tovía ta saborguiando’l cuartu puestu de Sáinz en Singapur y que tan importante foi pa los sos intereses na clasificación de constructores. Ensin embargu, la noticia nun ye esa si non que, d’equí a final de temporada, Daniil Kvyat va dexar de ser pilotu nel equipu pa dexar el so asientu al francés Pierre Gasly, firme candidatu a ocupar esi asientu pa…2018. Y ye que’l miércoles la escudería hermana de Red Bull anunciaba esti cambiu alegando que Gasly taba listu pa dar el pasu y que Kvyat nun taba dando la talla. Especúlase con que, de fechu, el rusu sedría compañeru de Gasly en 2018, pero esti desplante públicu paez insinuar lo contrario. El pilotu francés va llevar el númberu 10.

En Renault, dempués de tar nel puntu mira en Singapur por toles anuncies que protagonizó, paez que les agues yá tán más calmes y puen centrase nes carreres que queden y que, en teoría, podríen se-yos favorables. Col futuru de Palmer nel aire, la escudería francesa llega a Malasia col convencimientu de que puen entrar en puntos si consiguen estrayer el máximu rendimientu al so monoplaza y si llogren xestionar bien la degradación de les gomes. El pilotu inglés de Renault, que consiguió los sos primeros puntos en Fórmula Uno nel últimu gran premiu, mostróse confiáu de poder facer bien les coses equí tamién. Como se suel dicir nesti mundu del motor, ta corriendo por consiguir un asientu pal añu que vien.

Nel equipu Haas lleguen con ganes, sobre too nel llau de Grosjean que faló d’esti circuitu como ún de los sos favoritos nel calendariu. Na mesma llínia que’l restu d’equipos, en Haas tán preparaos pa les condiciones cambiantes y dures con que los puea sorprender Sepang.

McLaren lleven dos selmanes intentando olvidar lo que pudo ser y nun foi en Singapur nel garaxe d’Alonso pa centrase en consiguir sacar lo máximo del coche pa esta carrera. Anque sobre’l papel nun ye Sepang un circuitu nel que puean brillar, son conscientes de que les circunstancies cambiantes puen ayudalos nesi intentu. Amás, Honda comentó que’l motor d’Alonso nun paecía tar dañáu dempués del incidente en Singapur, polo que van poder usalu otra vuelta equí y ensin penalización.

Sauber anunciaba va unos díes que Charles Lèclerc, pilotu de F2 y actual llíder de la categoría, va participar en dalgunos entrenamientos llibres en Malasia, Estaos Xuníos, México y Brasil. Vemos nesta decisión un pasu alantre nel intentu de Ferrari de meter a los sos pupilos en Sauber, al estilu Red Bull-Toro Rosso. El futuru de Wehrlein y Ericsson ye una incógnita, sobre too si tenemos en cuenta que la mano de la Scuderia ye mui allargada y los pilotos esperando la so oportunidá, mui numberosos.
Equí podéis atopar tola información sobre’l circuitu de Sepang. Los horarios pal fin de selmana son los siguientes:

• vienres: primer tanda d’entrenamientos llibres a les 5:00 de la mañana y la segunda a les 9:00 de la mañana.
• sábadu: tercer tanta d’entrenamientos llibres a les 8:00 de la mañana y la sesión de clasificación a les 11:00 de la mañana.
• domingu: la carrera ye a les 9:00 de la mañana.

Debaxo, tola información sobre les gomes elexíes por Pirelli pa esti gran premiu:

Tres lo que víemos el viernes y el sábadu, paecía claro que Mercedes y Hamilton nun teníen nenguna oportunidá de facese cola victoria nesti gran premiu de Singapur. Dempués de ver a los Red Bull no más alto nos entrenamientos y a Vettel facese cola pole’l sábadu, naide taba siquiera pensando en Hamilton, que diba empezar la carrera quintu, nin en Bottas, que salía sextu.

Pero apaeció una invitada d’eses que suel poner daqué d’entretenimientu en toles carreres: l’agua. Xusto enantes del gran premiu, víemos como los cielos de Singapur soltaben una montonera d’agua que diba quedando nel asfaltu que hores dempués diben ocupar los monoplaces pal gran premiu. Anque paró pa cuando les lluces coloraes s’apagaron, ensin duldes tuvo un efeutu importante tanto na decisión de les gomes que montar de primeres (neumáticos de lluvia pa toos menos un par de valientes con intermedios) como nos movimientos que ficieron los pilotos nos primeros metros dempués de la salida.

Y foi precisamente ehí onde quedó determinada la carrera. Vettel tuvo una salida regulera, mientres per detrás los Red Bull arrancaron con fuercia igual que’l so compañeru Räikkönen. Foi pa defendese d’esos ataques que Vettel, n’un movimientu quiciás demasiao arriesgáu, movíase a la izquierda pa zarrar a Verstappen que tocaba a Räikkönen, qu’apaecía a la so vez a la izquierda del pilotu holandés, y facía que’l finlandés terminare poniéndose a l’altura de Vettel y dándo-y n’ún de los laterales. Tanto’l Red Bull de Verstappen como’l Ferrari de Räikkönen quedaron fuera de carrera nesi momentu. Vettel sedría quien a continuar unos metros anque col coche tocáu y perdiendo aceite, lo que fexo que trompeara y chocara escontra’l muru, perdiendo l’alerón delanteru. La carrera terminaba asina tamién pa Vettel.

Otru de los afeutaos por esti accidente foi Fernando Alonso, que fexo otra de les sos perbones salides, darréu clasificar ente los diez primeros el sábadu, y que vio como perdía toa oportunidá de consiguir puntos al convirtise en víctima de los choques ente los Ferrari ya’l Red Bull. El McLaren pudo continuar delles vueltes, pero taba claro que’l coche nun taba bien y tomaron la decisión de retirar el coche.

Dempués de recuperanos de tolo que tuviera pasao nestos primeros momentos de carrera, teníemos a Hamilton lliderando la carrera y a Ricciardo detrás. El pilotu de Red Bull intentaría por tolos medios pasar al pilotu británicu, pero sacante los momentos nos que había coche de seguridá en pista, el Mercedes mostrose sorprendentemente superior a lo que s’esperaba y sobre too comparándolu col Red Bull. Fueron varies les ocasiones nes que Ricciardo tuvo a Hamilton a tiru. Delles vueltes dempués del incidente del primer xiru, Kvyat acababa estrelláu escontra’l muru dempués d’un fallu n’un xiru y, coles condiciones de pista de Singapur, el coche de seguridá tuvo de volver salir. Tola ventaxa que Hamilton consiguiera meter ente elli y Ricciardo desapaecía, y la decisión de Red Bull de facer entrar al so pilotu a montar nueves gomes, paecía albidrar que podía poner a Hamilton en problemes. Nun sedría asina, y dende que’l coche de seguridá abandonaba’l trazaú, el Mercedes volvía a meter tiempu col so inmediatu persiguior.

Sedría otru coche de seguridá (esta vez por cuenta d’Ericsson, que facía un trompu y terminaba estrelláu na vuelta 37) el que recortara otra vuelta la distancia ente dambos pilotos, que foi historia namás que la carrera se reanudaba. Ye curioso que Bottas nun amosó’l mesmu ritmu que’l so compañeru. De fechu, una de les anéudotes de la carrera ye l’adelantamientu protagonizáu por Palmer al pilotu finlandés de Mercedes. Ensin embargu, ésti terminaría siendo terceru, anque bien lloñe d’alcanzar a Ricciardo que terminaría siendo segundu.

La segunda parte de la carrera, que terminó por tiempu dempués de tolos coches de seguridá, nun sedría tan entretenida, pero permitiríanos ver a xente como Sáinz, Palmer y Vandoorne en puestos de puntos a los que nun nos tienen avezaos. La carrera calterizose amás pol altu númberu d’abandonos: namás doce pilotos vieron la bandera a cuadros.

Mercedes fueron ensin dulda nenguna los ganaores (inesperadamente inesperaos) d’esti fin de selmana. Dempués de dos díes nos que naide nun confiaba nes sos posibilidaes, terminaron el domingu más llíderes nel campeonatu de constructores y abriendo más brecha nel de pilotos, con Hamilton agora ventiocho puntos perriba Vettel.

Ferrari, obviamente, fueron los grandes perdedores. La cara d’Arrivabene dicíalo too nel garaxe y ye qu’a estes altures de la temporada terminar una carrera colos dos coches fuera ye un duru golpe. Sobre too si tenemos en cuenta que n’once años este ye namás la segunda vez que-yos pasa. Nun tenemos claro qu’a nivel de constructores seyan quién a recuperar lo que perdieron en Singapur, pero paeznos llueu pa dicir que Hamilton lo tien too fecho de cara al campeonatu. Anque ye verdá que lo tien mui bien, Vettel yá remontó una distancia asemeyada nel pasáu, en dos ocasiones, pa terminar coronándose campeón. Ta claro que nun ye la meyor manera de terminar un gran premiu, sobre too dempués de la pole del sábadu, pero paeznos que ye precipitao dicir que yá lo tien too perdío.

La decepción quiciás fueron Red Bull. Igual ye un poco inxusto dempués de ver lo bien que foi’l Mercedes, pero teníen toles papeletes pa facese cola victoria con ún o l’otru pilotu, y terminaron, otra vez (yá van tres nel casu de Ricciardo) nel segundu puestu. Verstappen suma otru abandonu, esta vegada ensin que fuera la so culpa nin del coche. Ye inevitable entrugase n’onde taría na tabla si la so temporada nun se tuviera visto afeutada polos problemes nos coches y los abandonos por accidente.

Force India decepcionaron el sábadu, con una clasificación na que dambos pilotos quedaben fuera de los diez primeros. Consiguieron aprovechase de les condiciones daes dempués de la primer vuelta en carrera, y Pérez terminaría siendo quintu. Ocon nun brilló tanto como’l so compañeru, terminó décimu, anque sigui col so historial de puntuar en toles carreres de la temporada (menos una). El domingu confirmábase que dambos pilotos van siguir con Force India pa 2018.

Y si Force India decepcionaben en clasificación el sábadu, Williams facíalo entá más, nin siquiera siendo quién a metese na Q2. Sí que ye verdá que Stroll nunca pilotara un monoplaza en Singapur ya él mesmu almitía que nun taba cómodu del too. Ensin embargu, el domingu consiguía metese ente los diez primeros, gracies a un aciertu a la hora de cambiar a gomes ultrasoft. Consiguía terminar octavu mientres que Massa, pal que la estratexa siguiría siendo’l llevar intermedios, namás podía ser undécimu.

Toro Rosso quedó a les puertes del podiu con Carlos Sáinz. El madrileñu fexo un perbón trabayu demientres tola carrera, sabiendo aprovechar les sos oportunidaes y terminando cuartu, el so meyor resultáu col equipu. Dempués de la confirmación de que va pilotar en Renault pa 2018, ye una forma de dir despidiéndose dexando al equipu mui cerca de pasar a Williams, a los que tienen a siete puntos. Nel otru lláu del garaxe, una vuelta más, Kvyat nun diba ver la bandera a cuadros tres sufrir un accidente que lu dexaba fuera de carrera na vuelta 11. Carrera tres carrera, el futuru del pilotu rusu ta cada vegada más pendiente d’un filu, ya les sos actuaciones nun ayuden nel so favor. La marcha de Sáinz quiciás lu alivie un pocu pensando en que Toro Rosso nun quiera tener a dos pilotos nuevos pa 2018 con motorista tamién nuevu (alcordaivos que la escudería va montar motores Honda pal añu qu’entra) pero la verdá ye que lo que se-y ve en pista nun ye positivo.

Esta carrera va ser recordada por bien de pilotos, unos polo bueno ya otros polo malo. Nel casu de los de Renault, Hülkenberg rodaría gran parte de la carrera en cuartu puestu, pero un problema nel coche lu dexaría fuera. Ensin embargu, y pa variar, el so compañeru Jolyon Palmer, del que sabíemos el vienres que nun va pilotar en Renault pa 2018, terminaría puntuando en sextu puestu. La verdá ye qu’en tola carrera lu veríemos bastante centráu ya incluso lo bastante inspiráu como p’adelantar a un Mercedes, como yá dicíemos. Nun creyemos que-y vaiga servir de muncho de cara al so futuru si les carreres vinientes nun se paecen a esta, pero de la mesma forma que falamos de les sos probes actuaciones, rescamplamos lo bien que lo fexo nesta carrera.

Haas consiguieron dos puntinos a sumar na so batalla con Renault nel campeonatu de constructores. La carrera de Grosjean foi bastante más tranquila que la de Magnussen, que terminaría retirándose con problemes na so MGU-K pero que nos diba dexar dellos momentos en pista a los que yá nos tien avezaos. Ye una pena que nun consiga terminar más carreres en puntos, sobre too cuando ye por cuenta de problemes col coche. De toles formes, la escudería estaoxunidense tien a Renault a cinco puntos de distancia, polo que nes próximes carreres podríemos velos pasar per delantre del equipu francés.

McLaren consiguió sumar puntos con Stoffel Vandoorne, que consiguía terminar séptimu y volver a sumar puntos. N’una carrera onde dambos coches teníen grandes posibilidaes de sumar, el vese envueltu nel accidente de la primer vuelta, condicionaba la carrera d’Alonso, que nun terminaría. Sepárenlos munchos puntos de Haas como pa pensar en que vaigan a ser quién a pasalos, pero per otru lláu, la so batalla con Sauber paez casi ganada.

Sauber nun pudieron sacar nengún beneficiu de lo que foi pasando demientres la carrera, y sólo terminaron con Wehrlein, que sedría duodécimu ya últimu. Ericsson, como yá diximos, trompeaba y terminaba escontra’l muru na vuelta 37, quedando fuera. Con namás cinco puntos, la escudería suiza zarra la clasificación de constructores con cada vegada menos posibilidaes de reenganchase a la batalla con McLaren.

Embaxo podéis atopar tolos númberos que nos dexaron el sábadu (clasificación) ya’l domingu.

Clasificación

Carrera

Dempués de terminar les carreres n’Europa, pegamos un saltu hasta Singapur na primer de les carreres del tour asiáticu. Y qué meyor manera qu’empezar que cola carrera nel circuitu de Marina Bay, una de les favorites pa munchos pilotos ya equipos. Va ser esta la décima carrera que se dispute, polo qu’a la fiesta que yá trai la F1 va sumase esti eventu. Falar de Singapur ye falar d’una carrera que demanda muncho de pilotos ya equipos de la mesma forma por cuenta les altes temperatures, la humedá ya’l fechu de que los horarios busquen adautase al horariu européu. Amás, ye esta una de les carreres más llargues del calandariu, casi siempre averándose a les dos hores de duración en munches ocasiones.

Aparte, el coche de seguridá suel ser protagonista en toles carreres (hebo ún en tolos grandes premios disputaos hasta agora) y la cercanía de les muries fai que nun heba sitiu pal despiste. La estratexa de paraes va tener de cuntar col desgaste de les gomes asina como col coche de seguridá y tamién la dificultá p’adelantar en pista. La pole suel dir venceyada a la victoria yá que na mayor parte de los casos, quien empezó dende’l primer güecu de la parrilla foi quien ganó la carrera. Amás, a diferencia d’otres ocasiones, los entrenamientos llibres van poder ayudar a los equipos a entender meyor la evolución de la pista n’unes condiciones a les que nun tán avezaos.

Mercedes sabe que nun son l’equipu más fuerte en Singapur por lo que la so intención ye minimizar daños y, si pue ser, sacar una victoria inesperada como l’añu pasáu. Ye verdá que paez qu’esti circuitu favorez a Ferrari y Red Bull más qu’a les fleches platiaes, pero yá sabemos qu’esto nun ye torga pa que tean enriba y seyan candidatos a ganar el domingu. El fechu de que lleguen lliderando dambos campeonatos tien de ser, ensin duldes, un motivu extra pa lluchar pola victoria.

Amás, el miércoles supimos que Valtteri Bottas siguirá siendo pilotu Mercedes pa 2018, una decisión que nos paez bien acertada dempués de ver les actuaciones del finlandés no que vamos de temporada.

Ferrari pel so lláu, anque nun quieren dicilo al altu la lleva, saben que tienen más papeletes de facese col primer puestu nesta carrera que Mercedes. Agora mesmo atópense per detrás de Mercedes en dambos campeonatos, y de la mesma forma que pal equipu alemán el ser llíderes diba ser un motivu de llucha, pa Ferrari tien de selo l’intentar recuperar esi llideralgu que perdíen en casa la selmana pasada nel campeonatu de pilotos.

Red Bull va encargase de que nun seya Ferrari quien s’imponga’l domingu, y tienen bastantes posibilidaes de consiguilo yá que ye un circuitu que se-yos suel dar bien. Ricciardo foi segundu l’añu pasáu, dempués d’una bona sesión de clasificación el sábadu y elli mesmu dicía que Singapur ye una de les munches posibilidaes de victoria que-yos queden d’equí a final de temporada. De Verstappen sólo podemos esperar que nun se vea influyíu por nengún problema ayenu a elli nin por nengún incidente en pista que lu dexe fuera de la llucha pelos primeros puestos. Anque se cuestione la so forma de conducir ye verdá que s’echa de menos que tea enriba lluchando por podios.

Force India tien en Singapur unu de los sos aliaos. Ye una carrera que se-yos suel dar bien y si a esto sumamos el fechu de qu’esti añu nun dexen de puntuar (yá son diez les carreres nes que dambos coches acabaron dientro los puntos) l’equipu llega a Marina Bay con munches esperances y posibilidaes de dir consolidándose yá nel cuartu puestu del campeonatu de constructores. Amás, siguin trayendo meyores lo cual ye dalgo mui positivo pa una escudería que siempre se vía torgada na segunda metá de la temporada pola so incapacidá pa siguir evolucionando’l coche.

Per detrás d’ellos vien Williams, viendo como cada vegada tienen menos oportunidaes d’averase a Force India y como Renault, Toro Rosso y Haas van sumando puntos y ameyorando. Anque en Monza nun lo ficieron mal, la falta de regularidá nes carreres fai que nun consigan sumar los puntos necesarios pa consiguir esi cuartu puestu que s’esperaba d’ellos al principiu la temporada.

Toro Rosso tán nel puntu mira nesti gran premiu. Per un lláu, pola marcha del so pilotu Carlos Sáinz, que ye’l pilancu del equipu yá que la irregularidá de Kvyat fai que sólo sume’l pilotu madrileñu. Per otru, pol fin del so contratu con Renault pa firmar un acuerdu con Honda a partir de 2018. Ente tantes novedaes, la escudería pretende consiguir un bon resultáu n’un circuitu que se-yos da bastante bien ya onde nel pasáu yá consiguieron puntuar.

Haas tamién confíen en tener una bona actuación el domingu. Dánse-yos bien los circuitos nos que se desixe muncha carga aerodinámica, como ye’l casu, polo que cuenten con metese ente los diez primeros nesta gran premiu. Amás, ponen tamién l’atención nel tratamientu de les gomes, dalgo mui necesario pa poder consiguir el bon resultáu qu’esperen.

Renault tamién llegaben estos díes en mediu d’una cantidá de rumores de la silly season: como yá dicíemos, falábase de que Carlos Sáinz podría ser pilotu de Renault dende la próxima carrera en Malasia anque otres fuentes falaben de la próxima temporada. Esti vienres facíase oficial que sedría pa 2018. Amás, parte d’esti movimientu vendría de la mano de la ruptura de McLaren con Honda pa montar motores Renault, dexando que seya Toro Rosso quien trabaye agora con Honda, como yá comentemos.

No que cinca a lo deportivo, Renault vienen con ganes a Singapur yá que tienen esperances de facer una bona actuación n’un circuitu que-yos sienta bien. Lleguen amás con delles meyores nel coche y cola intención de siguir sumando puntos p’alcanzar a Williams na clasificación de constructores. Pel mediu van tener que lluchar con Toro Rosso y Haas que lleguen con ganes y posibilidaes a Singapur.

McLaren anunciaben oficialmente la so separación de Honda esti vienres. Al mesmu tiempu, anuncien que pa 2018 van montar motores Renault. Cuestiónase dende munchos frentes la decisión yá que nun queda claro de qué manera pue beneficiar a McLaren esti cambiu, pero paez que busquen d’esta manera retener a un Fernando Alonso que nun querría siguir nel equipu si Honda siguía suministrando motores. Nun sabemos si la decisión ye acertada o non, pero paez que sí que ye firme y que ta a piques de confirmase.

Pal domingu, la escudería inglesa busca sumar puntos n’un circuitu que-yos beneficia muncho más que los dos pasaos. Anque siempre la prioridá ye terminar carreres, equí yá piensen en puntos un pocu na llínia de les espectatives coles que llegaben a Hungría y onde l’equipu terminara con dambos pilotos ente los diez primeros.

Sauber anunciaba esta selmana pasada un nuevu sponsor, Flex-Box, que trabaxen con conteneores de carga. Nun dexa de ser una bona anuncia pal equipu’l cuntar con sofitu nestos tiempos tan baxos polos que tán pasando y, a la espera de ver cómo se-yos da Singapur, lleguen equí coles mesmes ganes de consiguir sumar dalgún puntu qu’en carres anteriores.

El horariu en Singapur sigui l’européu, polo que nun hai madrugones entá. Los primeros entrenamientos llibres empiecen el vienres a les 10:30 y los segundos a les 14:30. El sábadu, los terceros llibres van ser a les 12:00 y la clasificación a les 15:00. Pal domingu queda la carrera al horariu habitual, les 14:00.

Equí vos dexamos información sobre’l circuitu de Marina Bay y embaxo podéis atopar tola información sobre les gomes que se van usar nesti gran premiu:

 

Llegamos a Monza pa reencontranos con una d’eses carreres que, anque nun seyan emocionantes, tienen esi toque especial que dan el tiempu y los fans. Y ye que si dalgo se fala demientres el fin de selmana del gran premiu d’Italia ye de los Tifosi. Deseyando ver a la Scuderia no más alto del podiu, nesta ocasión tuvieron de conformase con ver a Vettel terceru dempués de que Mercedes dominaren de principiu a final.

Y ye que yá dende’l sábadu, onde tuvimos d’esperar dos hores pa poder ver la primer sesión de clasificación completa, Hamilton dexaría claro que-y daba igual correr en casa Ferrari y que nesti gran premiu-yos tiníen tomada la medida. L’agua nun diba impedir que’l británicu se convirtiera nel pilotu de Fórmula 1 con más poles de la hestoria, sesenta y nueve, superando namás y na menos qu’a Michael Schumacher.

Ensin embargu, de poco diba servir la clasificación del sábadu. Dempués de la espera y de delles sorpreses (como la de Stroll clasificando cuartu) tol trabayu fechu nesa xornada diba quedar en nada gracies a les penalizaciones qu’una gran parte de los pilotos sufrieron: los dos Red Bull, Sáinz, Hülkenberg, Pérez, los dos McLaren. Pilotos como Magnussen o los Sauber, que nun pasaran a la Q2, atopáronse con una posición en parrilla dientro los diez primeros (nel casu del danés) y nos puestos once y doce pa los Sauber.

La salida, anque daqué floxa pa Hamilton, foi relativamente llimpia, yá que víemos delles engarradielles que resultaben con dalgunos alerones dañaos. Pérez tendría dalgun toque col Williams de Massa, pero’l so Force India respondió cómo s’esperaba pa compensalo y consiguir puntuar. El brasileñu volvería a ser protagonista pero esta vez con Verstappen, col que chocaría, dexando al pilotu de Red Bull con un pinchazu y la obligación d’entrar en boxes, condicionando asina la so estratexa pal restu la carrera. Aparte, tamién víamos parte del alerón de Grosjean desapaecer por un incidente con Ricciardo, que llimitaría les posibilidaes del francés pa les vueltes restantes.

La carrera foi bastante llimpia y anque vimos batalles, lo que más llamaría l’atención sedríen los momentos de radio d’Alonso dempués d’otru encuentro en pista con Palmer y que terminó con penalización de cinco segundos de stop-and-go pal británicu, y otra engarradiella ente Magnussen y Verstappen por facese col últimu puntu disputáu, que terminaría col holandés décimu y el pilotu de Haas dexando claro lo que pensaba de la so maniobra pa facese col puestu.

En Mercedes non sólo brilló Hamilton: el so compañeru d’equipu, Valtteri Bottas, nun tuvo la meyores de les salides (como tampoco nun tuvo la meyor de les clasificaciones el sábadu) pero consiguió sobreponese y dexar atrás al Force India d’Ocon y al Williams de Stroll pa ponese segundu y nun abandonar esi puestu hasta ver la bandera a cuadros. Naide pudo con Mercedes, nin siquiera los Tifosi. Yeren conscientes de la so superioridá equí ya nun duldaron n’amosalo.

Ferrari nun supo y nun pudo vencer a Mercedes. Pesie al apoyu de los aficionaos, nin Vettel nin Räikkönen (que ficieron una sesión de clasificación permala) pudieron siquiera plantar cara a les fleches platiaes. Vettel almitió tener dellos problemes nel coche na segunda parte de carrera que casi lu facía tar más pendiente de que nun lu adelantara Ricciardo que de ponese a l’altura de los Mercedes. Räikkönen nun tuvo a gusto en tol fin de selmana ya’l domingu nun terminó de sintise cómodu en pista. Vettel cedió’l llideralgu del campeonatu de pilotos dempués de tar primeru dende la primer carrera. Agora tien a Hamilton a tres puntos.

Red Bull partíen como los más perxudicaos, pola cantidá de posiciones que perdíen por cuenta les penalizaciones, pero dempués de ver l’espectáculu de Daniel Ricciardo demientres tola carrera pa consiguir terminar cuartu (gracies que nun había más vueltes) con un coche que nun diba dir tolo bien que s’esperaba y de ver cómo Verstappen consiguía puntuar dempués del incidente con Massa, paeznos que nun podemos más qu’aplaudilos pol rendimientu. El tragu de Monza yá ta pasáu, y Singapur (la siguiente carrera) pinta meyor pa ellos. Viendo lo que vimos en Monza, nun ye llocura pensar que puen pensar en ganar ellí.

El Force India d’Esteban Ocon partía terceru na parrilla de salida’l domingu, y anque nun pudo facer nada pa defendese del Mercedes de Bottas y del Ferrari de Vettel, y más tarde del de Kimi, sí que supo batallar con Stroll, al que tinía delante, y consiguir terminar per delantre de dambos coches, sumando otru puñáu de puntos pal so equipu y manteniendo la so racha positiva de carreres. El so compañeru, Sergio Pérez tuvo menos fortuna en pista y partía dende más atrás por una penalización (caxa de cambios) pero pudo terminar en puntos lo que resulta positivo pal equipu pensando en que Williams tamién puntuaría colos dos pilotos.

Los de Grove tuvieron una carrera bien buena anque nun dexamos de pensar en cómo tuviera sío si tuviera llovío. El sábadu víemoslos a los dos nos puestos cimeros pero’l domingu nun pudieron mantenese ehí, anque consiguieron terminar séptimu (Stroll) y octavu (Massa). Stroll volvió a dar otru golpe na mesa, contundente, pero quiciás tovía insuficiente polo irregulares que son. Williams ta necesitáu de sumar puntos tolos domingos y colos sos dos pilotos y hasta agora nun ye dalgo que tean cumpliendo. Ensin embargo, hai que reconoce-yos que, dempués de munches carreres más discretes, en Monza ficieron un bon papel.

Haas tuvo mala suerte con Grosjean el sábadu y el domingu. El francés sedría protagonista d’un accidente na recta principal poles condiciones d’agua nes que s’atopaba la pista. Quedó fuera de la clasificación ya’l domingu, el so incidente con Ricciardo yá nun diba permiti-y lluchar por puntos. Terminaría décimoquintu. Magnussen pel so llau, anque quedó undécimu, rodó munches vueltes dientro los puntos, pero una última disputa con Verstappen dexaría al equipu Haas ensin puntos en Monza.

Nengún de los pilotos de Toro Rosso taba satisfechu cola so carrera y ye que en nengún momentu se vieron ritmo pa poder facer dalgo en pista y averase a les posiciones de puntos. Anque’l resultáu de Kvyat nun ye tan malu si pensamos en carreres pasaes y en que quedó per delantre del so compañeru, nun ye un resultáu del que se sientan arguyosos. Sabíen que diben pasalo mal equí, y les penalizaciones a Sáinz nun ayudaben, pero de xuru que cuntaben con dalgo un poco más positivo. De toles formes, como tolos pilotos que tuvieron una mala carrera en Monza, yá tán pensando en Singapur.

Dende’l puntu de vista del motor, Renault triunfó de la mano de Red Bull, pol bon rendimientu qu’amosó la escudería en pista, pero dende’l puntu de vista del equipu, Monza foi decepcionante. Hülkenberg nun pudo más que terminar décimoterceru n’una carrera na que’l so compañeru tornaría atopase con Fernando Alonso y sobre’l que cayería tola so ira. El británicu sigui atrapáu na so espiral de mala suerte y aparte de la penalización, nin siquiera podría terminar la carrera. Al final reconoció que podíen tener consiguió dalgo más porque’l coche nun diba del too mal pero, como dicimos, la mala suerte nun lu abandona.

Sauber consiguió terminar per delantre de McLaren esta vegada, pero sólo con un pilotu y nel puesto décimosextu, asina que, anque Wehrlein comentara que se sintiera cómodu en pista y col coche, hai que reconocer que siguen ensin motivos pa cellebrar. Ericsson nun pudo terminar la carrera por problemes col coche y l’equipu suma otra carrera más ensin puntuar. Les oportunidaes pa facelo van menguando y la distancia con McLaren, anque invariable, cada vegada paez más complicada de salvar.

Anque viendo lo que víemos esti domingu, con dambos coches metíos nel garaxe enantes de tiempu, quiciás Sauber nun debiera perde enxamás la esperanza. Monza nun yera un bon circuitu pa McLaren, y anque Alonso nos regalaba otra bona ración de mesaxes de radio, falando de karma énte les penalizaciones a otros pilotos, lo cierto ye que volver a ver dambos coches con un NT (nun terminó) nes llistes de resultaos, ye bien triste. Con cambios de motor y ensin ellos, el rendimientu del equipu sigue siendo nulu y la paciencia cada vegada menor. Fálase muncho del inminente divorciu ente McLaren y Honda, pero nun hai nada zarrao.

Suponemos que d’equí a dos selmanes, pal gran premiu de Singapur, sepamos dalguna novedá más nos cambios de motoristes y equipos. De momentu, embaxo podéis atopar tolos datos que nos dexó’l gran premiu de Monza 2017:

Clasificación

Carrera

D’una carrera mítica a otra: pegamos el saltu dende Spa a Monza, el templu de la velocidá como munchos decidieron nomalu. Y ye qu’esti fin de selmana vamos ver dalgunes de les puntes de velocidá más altes del campeonatu. Son munchos los pilotos que destaquen l’atmósfera de motor que se vive en Monza, gracies sobre too a la presencia de los Tifosi que tarán deseyando ver a los sos pilotos no más alto del podiu.

Les gomes que trai Pirelli a esti gran premiu (que podéis ver embaxo) van sufrir les demandes d’esti circuitu, que tamién destaca pola necesidá de trabayar n’un coche que, anque fundamentalmente pensáu pa dir más rápido que n’otros circuitos, necesita una combinación d’aspeutos pa dir bien: bien en velocidá, bien en frenos, bien a la hora de garrar les curves. Dende Mercedes tienen claro que necesiten eso si quieren facese cola victoria equí.

Ye importante destacar tamién los cambios no que cinca al combustible, que dende esti gran premiu va sufrir restricciones pasando d’un consumu de 1,2 ml a 0,9 por cada 100 km. El motor Mercedes que lleven agora Hamilton y Bottas ta adautáu a la primer midía, lo que significaría que dambos pilotos deberíen usar esos motores pa lo que resta de temporada o cambialu coles consiguientes penalizaciones.

Falando de penalizaciones, tamién sintíamos esta selmana a Ross Brawn comentando que taben considerando la posibilidá d’eliminar les penalizaciones de posición como castigu por cambiu de pieces. Nun ta clara l’alternativa, pero dempués de ver a pilotos como Vandoorne con 65 puestos en Spa, sí que nos paez que’l tema necesita reflexón y, probablemente, un cambiu.

En Mercedes confíen no que puedan facer esti fin de selmana en Monza pero como siempre, y equí con más razón, con la precaución de saber que Ferrari tán mui fuertes y amás corren en casa. El papel que xueguen los fans nes carreres atopámoslu equí multiplicáu por diez. Hamilton tamién afirmaba que Ferrari tienen, actualmente, meyor coche de Mercedes. Nun sabemos si ye dalgo que cree de verdá o simplemente quier quitase d’enriba la etiqueta de favoritu.

Ferrari pel so lláu y como yá vinimos diciendo, aterricen en Monza sabiendo que cuenten con un extra pa esti gran premiu: los Tifosi. Vettel confiaba en ser capaz de quedar per delantre de Hamilton en carrera pesie a que nun tien tán claro que seya’l so coche’l meyor de los dos. Anque nos centremos muncho na velocidá, lo cierto ye que tolos equipos rescamplen que nun ye sólo velocidá lo que se necesita nesti circuitu, y quiciás ye ehí onde Ferrari pue atopar el puntu feble de Mercedes y vencer equí.

Red Bull nun lleguen na meyor de les condiciones a Monza: aparte de les males sensaciones de Verstappen y los sos comentarios sobre lo que pasó’l domingu pasáu, onde volvió a abandonar, el pilotu holandés va enfrentase a una penalización por cambiu de motor, lo cual nun ayuda al optimismu nel so lláu del garaxe. Ensin embargo, tampoco hai motivos pa sorrir nel casu de Ricciardo yá qu’elli tamién va tener penalizaciones nesti gran premiu. Amás, en términos xenerales, Red Bull nun van equí tán bien como otros equipos, polo que consiguir un bon resultáu va ser más complicao de lo normal pa ellos.

Force India tuvieron nel puntu mira dende’l domingu pola actuación de los sos pilotos en Spa y poles decisiones posteriores del equipu de restrinxir la so llibertá de lluchar en pista. Comprensiblemente, nun existe interés nel equipu d’arriesgar el cuartu puestu que con tantu méritu ocupen pola mala actuación de los sos pilotos, y muncho menos si ye ente ellos. Ye una pena que pilotos tán prometeores como estos dos tengan que vese llimitaos d’esta forma, anque per otru lláu, nun sorprende del too. Seya como seya, l’equipu cuenta consiguir un bon resultáu en Monza pa siguir sumando puntos y afianzase nesi cuartu puestu.

Williams tamién lleguen a Monza con esperances de consiguir un bon puñáu de puntos que los ayude a nun desenganchase na so batalla con Force India nel campeonatu de constructores. Stroll sigui, creyemos, necesitaos de más resultaos positivos si quier convencer del too yá que Baku ya’l so primer podiu queden lloñe na memoria. Massa, pel so lláu, llega a Monza enllenu de bones sensaciones y ganes de facer una bona carrera.

Toro Rosso nun vienen teniendo bonos resultaos en Monza y ye esi’l so principal oxetivu equí. Dambos pilotos tienen potencial pa tar ente los diez primeros, pero sabemos que sólo Sáinz vien consiguiendo esto de forma más o menos regular. Pa esti gran premiu, el pilotu madrileñu va partir con diez posiciones de penalización por cambios nel coche. Kvyat, al que la solombra de Pierre Gasly cada vegada-y debe paecer más alargada ya oscura, nun consigui remontar el vuelu y anque l’añu pasáu consiguió salvar l’asientu, nun tenemos claro qu’esti añu, si continua como hasta agora, vaiga poder conservalu de la mesma forma.

En Haas tienen claro que la clave en Monza pue tar en la sesión de clasificación. Ensin embargo, pensamos que, viendo los problemes que Grosjean vieno teniendo colos frenos en carreres de la primer parte de la temporada, ye posible qu’eso seya lo que más tengan de cuidar.

Renault almite qu’esti ye un gran premiu duru pal motor, y dempués de lo visto en Red Bull, de xuru que tendrán tolos güeyos puestos no que faiga’l so propiu coche y los sos pilotos. Hülkenberg dicía que, anque ye un circuitu que s’esfruta, la lixereza del coche a vegaes failos sintir inestables, como si’l coche, en cuenta dir pela carretera, fuera flotando. La escudería francesa quier facelo lo meyor posible equí sabiendo que les carreres vinientes van ser muncho meyores pa ellos. Lleguen con meyores aerodinámiques coles qu’esperen poder sacar resultaos positivos el domingu.

Falábase qu’esti fin de selmana McLaren diba anunciar el so divorciu definitivu de Honda. Demientres la selmana comentábase que l’abandonu d’Alonso en Spa nun fuera por nengún problema col motor, que nun fuera culpa de Honda, si non más bien la decisión del pilotu asturianu de dexar una carrera de la que nun podía sacar nengún provechu. Seya como fuere, la rellación ente dambes compañíes ye cada vez más tensa y les actitúes d’Alonso al respeutu nun ayuden. El futuru del pilotu podría tar tan cerca como en Williams (o incluso McLaren si deciden montar motores Renault) y tan lloñe como Indycar, otra vegada de la mano d’Andretti.

De toles formes, McLaren nun cuenta con tener una carrera positiva equí, conscientes como son de les sos llimitaciones. Intentarán, como puedan, terminar la so carrera y ver si en dalgún momentu, l’acción en pista pue ayudalos a consiguir dalgún puntu. Siendo realistes, paeznos complicao. Ensin embargu, nun va ser too negatividá en Honda y esti domingu van facer una exhibición pa conmemorar el cincuenta aniversariu de la so victoria equí en Monza col RA300. Dempués de tiempu, van tener dalgo pa sorrir y esfrutar.

Pa terminar con Sauber, hai poques coses nueves que comentar sobre ellos aparte de les enormes ganes que tienen de consiguir resultaos positivos y d’adelantar a McLaren nel campeonatu de constructores y, como pasa cola escudería británica, aprovechase de cualquier eventu de carrera onde puean colase dientro de los diez primeros.

Embaxo podéis atopar les gomes seleicionaes por Pirelli pa esti gran premiu y equí tola información sobre’l circuitu: