Month: October 2016

Ensin casi respiru, yá tamos en México. Esta va a ser la última vez que tengamos carreres en dos selmanes siguíes nesta temporada y ye que yá nos queden namás tres per delantre. L’añu pasáu llegábemos al Autódromo Hermanos Rodríguez con Hamilton campeón del mundu. Esti añu llegamos con Rosberg llíder y una diferencia de ventiséis puntos ente dambos pilotos de Mercedes. Ye dicir, ta too por ver y anque Hamilton ganara esta carrera y Rosberg nun terminara, entá tendría una ventaxa, bien pequeña, d’un puntín. La verdá ye que l’alemán lo meyor que pue facer l’alemán ye nun complicase la vida, siempre dir a ganar pero ensin metese en problemes que comprometan la so carrera. Si lo fai asina, nun duldamos de que va ser el prósimu campeón del mundu de Fórmula Uno.

L’añu pasáu, esti Gran Premiu foi unu de los que meyor imaxe dexó no que cinca a l’asistencia del públicu. El fechu de tener a Sergio Pérez na pista fexo d’efeutu llamada pa que la xente s’animare a ver al so compatriota. Esti añu a falta d’ún tenemos dos mexicanos na parrilla, con Esteban Gutiérrez como pilotu de Haas.

Varios pilotos actuales entá nunca nun probaron esti circuitu, asina qu’esti ye un aspeutu interesante y a tener en cuenta, porque pa ellos va ser too nuevo. Toos coinciden nes ganes de ponese al volante del coche pa probar el trazáu. A ellos axúntense los pilotos que l’añu pasáu pilotaron per primer vegada y qu’en xeneral tienen bien de ganes de que llegue esti Gran Premiu.

Güeyu a los pilotos Renault y a los Manor yá que nengún de los sos pilotos tuvo en México enantes. Tamién tenemos de poner atención a lo que faga Haas dempués de consiguir un puntín en casa, y lo que dea de sí McLaren dempués d’una bona actuación n’Austin.

Fuera de pista, tendremos que tar pendientes en cuantes que termine’l Gran Premiu yá que Williams paez que van anunciar los sos pilotos pa 2017. Alcordaivos que nel artículu sobre la silly season, vamos poniendo les novedaes de los pilotos que vamos sabiendo.

Metémonos de cabeza yá nel Gran Premiu de Fórmula Uno, antepenúltima carrera del calendariu.

Equí vos dexamos la información de los neumáticos escoyíos y dellos datos sobre’l circuitu:

Les carreres pasaes veníen dexándonos empiezos pila interesantes que de dalguna forma determinaben el restu la carrera. N’Austin tuvimos una salida llimpia na que Hamilton salió bien y nun s’apeó de la primer posición en carrera hasta ver la bandera a cuadros. Rosberg perdió la so posición (segundu) con Ricciardo, y per detrás víemos incidentes ente los Force India y Williams, que resultó cola retirada de Hülkenberg y la entrada a boxes de Bottas, que yá nun pudo recuperase y namás pudo ser décimosextu.

Les vueltes centrales de carrera fueron un dir y vinir d’estratexes, con Red Bull intentando ganar a Mercedes, a lo menos a Rosberg yá que Hamilton tuvo intratable, y fracasando. Verstappen entró primero de lo previsto teniendo en cuenta les gomes coles qu’empezara la carrera (y comparándolo col so compañeru) y pocu a pocu fuimos viendo que diben a por toes (el mesmu pilotu dixo por radio al equipu que nun taba corriendo pa quedar cuartu). Ensin embargu, nun diba ser too positivo pa Red Bull n’Austin yá qu’un problema na caxa cambios dexólu tiráu provocando un coche de seguridá virtual. El pilotu holandés yá comprometiera la so carrera entrando en pits y pillando por sorpresa a los mecánicos que nun cuntaben con elli. Al pocu sintíemoslu disculpase diciendo que pensara que lu llamaren a boxes.

El coche de seguridá perxudicó sobre too al so compañeru d’equipu, que perdió la segunda posición con Rosberg.

Otru que quedó fuera foi Kimi Räikkönen, dempués de la so segunda parada en boxes pal equipu Ferrari, demientres rodaba cuartu. Un fallu a la hora de apertar la tuerca de la rueda trasera drecha obligolu a parar el coche cuando taba nel carril del pitlane. Aparte de quedar fuera de carrera, la FIA penalizó a Ferrari con 5000€ de multa. Vettel pel so llau tuvo una carrera más tranquila.

Gracies a la retirada de pilotos clave dientro de los diez primeros como yeren Räikkönen, Verstappen y Hülkenberg, nun sorprendía ver a dambos McLaren dientro los puntos y a Sáinz en quintu llugar. Fueron precisamente Sáinz y Alonso los protagonistes de la última batalla de la carrera pol quintu puestu, cola que se fexo l’asturianu. Enantes, tamién lu víemos bregar con Massa pa ser sextu. Demientres, el so compañeru d’equipu consiguía ser novenu dempués d’adelantar diez posiciones en carrera. Ta claro que los sábados pa McLaren son dalgo mui ameyorable (el sábado, Alonso calificó duodécimu y Button décimonovenu).

En pista vimos bien de batalles, unes más llimpies qu’otres, como ye’l casu de Pérez y Kvyat, que tuvieron dellos momentos en pista que resultaron cola penalización de diez segundos del pilotu rusu y dos puntos na so llicencia. Dempués de la so renovación con Red Bull, nun foi una carrera demasiao positiva pa elli. Tampoco nun lo fue pa Palmer (Renault) que tuvo una carrera complicada y na que, según elli, se vio torgáu pol so compañeru d’equipu cuando elli yera más rápidu. Acabó quedando décimoterceru, per detrás de Magnussen. Dempués d’acabar la carrera, los comisarios decidíen penalizar al pilotu danés con 5 segundos por nun ceder la so posición a Kvyat dempués de salise, polo que les posiciones finales de dambos cambien y Kvyat queda undécimu con Magnussen décimosegundu.

Ye importante rescamplar el décimu puestu de Grosjean, un puntín en casa que de xuru sabe como si fueren un cientu dempués d’unes cuantes carreres con problemes y duldes sobre’l rendimientu del equipu. Tamién, dientro la batalla ente Force India y Williams, paecía que l’equipu de Grove diba sacar un buen puñáu de puntos dempués del incidente de Hülkenberg y los problemes de Pérez, pero al final pudieron compensalo col mexicanu quedando xusto per detrás de Massa y Bottas fuera de los puntos.

Xunto a Hülkenberg, Verstappen y Räikkönen, tamién se retiró Gutiérrez.

Estes son les clasificaciones que nos dexó el fin de selmana:
Clasificación

Carrera

Dempués de la xira asiática, n’onde Rosberg dio un golpe d’autoridá na mesa respondiendo de la meyor manera posible a los sos críticos y Hamilton viose envueltu n’una engarradiella colos periodistes, aterrizamos nel otru llau del globu, concretamente n’Austin, ciudá del estáu de Texas, au va cellebrase’l Gran Premiu de los Estaos Xuníos nel COTA (Circuit Of The Americas).

De mano vamos toos predispuestos a ver a Hamilton triunfar nesti circuitu, yá que yá lo fexo en carreres pasaes y amás ye un ambiente que-y presta y lu suel motivar, pero viendo les últimes carreres onde, en teoría, diba ser dominaor, paeznos más conveniente dexar un signu d’interrogación énte’l posible desenllaz d’esta carrera’l domingu.

Estes dos selmanes, l’atención tuvo tamién puesto nel anunciu de Hülkenberg del so fichaxe pola escudería Renault. Consideramos al alemán un pilotu mui completu y capaz de grandes coses con un bon coche, y albidramos qu’esti movimientu pue ser sinónimu de les bones espectatives de Renault pa 2017. Asina pues, Force India atópase con un güecu qu’enllenar, y Renault con dos pilotos (Magnussen y Palmer) pa un solo asientu. Fálase muncho de les posibilidaes de dambos pa 2017 pero nun hai nada definitivo, anque Magnussen espresaba l’otru día en tuiter el so deseyu de siguir cola escudería francesa.

Protagonistes d’esti gran premiu yá tán siendo l’equipu Haas por razones obvies: equipu estaoxunidense en territoriu estaoxunidense y con posibilidaes de ser quien a facer dalgo decente en pista. Siempre se fala del desapegu que tienen los aficionaos estaoxunidenses hacia la Fórmula Uno, anque paez que gracies a esti gran premiu empiecen a interesase más. La presencia de Haas en parrilla nun dexa de ser otru aliciente pa ellos y l’equipu de xuru tará deseyando dexar una bona imaxe ente’l so públicu na so primer carrera en casa.

Otros que tienen l’atención enriba son McLaren. Dempués de la probe actuación de Xapón, lleguen a Austin con ganes de facelo bien y arrancar sorrises a los sos fans. Dambos pilotos falaben enantes del gran premiu del retu que supón pa ellos esti circuitu al tiempu que los fai esfrutar.

En xeneral, tolos equipos naguaben por tornar al COTA, un circuitu que l’añu pasáu se convirtiera n’una piscina por cuenta les lluvies torrenciales del fin de selmana de carrera y qu’obligara a suspender la sesión de calificación del sábadu. Nun se fala de la mesma situación meteorolóxica nesta ocasión, pero tamos seguros de que vamos ver un bon espectáculu.

Cmo siempre, equí tenéis la información sobre’l circuitu y les gomes escoyíes por cada pilotu:

Terminamos la xira de madrugones col gran premiu de Xapón y con una nuevu exemplu del bon momentu de forma nel qu’atopamos a Nico Rosberg con una nueva victoria na so cuenta personal y treinta y trés puntos perriba’l so compañeru d’equipu, Lewis Hamilton, que sigui segundu.

Empezaba’l gran premiu en Suzuka con una salida menos vistosa que les de carreres anteriores, pero con un nuevu error de Lewis Hamilton que lu dexaba, enantes de la primer curva, nel octavu llugar. El so compañeru foi quien a defendese de los ataques iniciales de los pilotos que diben per detrás, y yá nun s’apeó d’ehí hasta ver la bandera a cuadros. De fechu, salvo n’una sesión de calificación, Nico Rosberg nun dexó’l primer puestu en tol fin de selmana.

Dempués d’una salida más bien tranquila, quedónos claro qu’a Hamilton diba toca-y bregar pa ponese a la caza’l so compañeru, pero que nun diba ser cenciello pues tenía per delantre a xente como los Ferrari, Red Bull y Sergio Pérez.

Víemos paraes bien ceo, como nel casu de los Red Bull na vuelta diez, buscando gana-y la partida cola estratexa a Ferrari, dalgo que finalmente conseguiríen con Verstappen. La mayor parte de los equipos optaron por dos paraes, cola esceición de Renault, Sauber y Williams, y pol neumáticu duru como opción más favoratible en pista. De fechu, fueron los que más apostaron polos neumáticos blandos los que más sufrieron ensin sacar muncha rente d’ellos en carrera.

Dempués de les primeres paraes, Hamilton espabiló, y llegó adelantar cuatro pilotos n’una vuelta y paecía que podía ponese en plan pa recuperar el tarrén que yá-y tenía ganáu de sobra Rosberg. Pero atopó con un Max Verstappen inspiráu que tenía otra idea na cabeza. Dambos sedríen protagonistes en carrera gracies a la batalla de les últimes vueltes por facese pola segunda posición del podiu.

Vettel tuvo bien de tiempu per delantre de Hamilton, pero una vez más, con una estratexa que munchos cuestionaron, fexo’l so pit-stop saliendo per detrás del pilotu inglés, anque con gomes blandes, suxiriendo que quiciás buscaben adelantar en pista. Ensin embargu, l’alemán nun foi quien a ello, teniendo de conformase col cuartu puestu dempués d’empezar séptimu poles tres posiciones de penalización qu’arrastraba dende Malasia.

Les vueltes centrales de carrera fueron tranquiles, anque víemos bien d’aición en pista, munchos adelantamientos pa lo que nos tien avezaos Suzuka. Na última parte de carrera too paecía indicar que la carrera diba quedar coles posiciones que teníemos, pero los doblaos xugaron un papel perimportante en dellos momentos, y les quexes de los pilotos d’arriba fueron numberoses (especialmente les de Vettel).

Na última vuelta, Verstappen consiguió eliminar l’amenaza de Hamilton axustando al másimu la frenada y faciendo que’l pilotu inglés se saltare la chicane y fuera llargu, dando el segundu puestu del podiu al holandés.

Como anéudota de la carrera, el mesaxe que Nico Hülkenberg dexaba a Bottas n’unu de los adelantamientos más guapos que vimos güei: dempués de varios intentos de pasar al finlandés, el pilotu de Force India atopaba’l so momentu y poníase per delantre, dempués de lo que dicía “See you later!” (“¡Vémonos llueu!”). Avezaos como tamos a que los pilotos namás usen la radio pa falar col equipu o quexase de lo que pasa en pista, coses como estes nun dexen d’arrancanos una sorrisina.

Amás, Mercedes yá son campeones 2016 de constructores, con 593 puntos, amosando una vegada más la so superioridá. 2017 va suponer un cambiu pa tolos equipos, de xuru pa ellos tamién, pero de momentu puen esfrutar del so tercer campeonatu consecutivu.

La siguiente parada llévanos al otru llau del globu, a Austin, pal gran premiu d’Estaos Xuníos. Acabáronse los madrugones, empiecen les carreres p’acompañar la tarde. Pero enantes de centranos nos viaxes al continente americanu, equí vos dexamos tolos númberos que nos dieron esti sábadu y domingu:

Clasificación

Hebo les siguientes penalizalizaciones en parrilla:

• Vettel: 3 puestos qu’arrastraba por una maniobra na primer curva nel GP anterior
• Raikonnen: 5 posiciones por carmbiu de caxa de cambios
• Button: 35 por cambiu de PU

Carrera

Entá col tastu de Malasia na boca, aterrizamos en Xapón, n’una de les carreres más emblemátiques del calendariu y de les más apreciaes por pilotos, equipos y fans. Son munchos los qu’esperen con ganes la llegada d’esti gran premiu, que suel dexar perbones sensaciones d’un añu pa otru.

Anque’l puntu mira ta puestu enriba los dos pilotos lluchando pol campeonatu, ensin duldes quien más protagonismu va tener como equipu nesti gran premiu va ser McLaren. La escudería inglesa cuerre na que consideren la so segunda casa (gracies a la rellación con Honda) ya’l pilotu Jenson Button, igual que Fernando Alonso, tienen una rellación mui estrecha col país. De fechu, Alonso decidió sumar penalizaciones en Malasia pa poder salir ensin torgues a esti gran premiu, tala ye la importancia de la imaxe que dean en pista.

Detrás de Mercedes, Red Bull y Ferrari siguen na so batalla pol segundu puestu del mundial de constructores, mesmo que Force India y Williams pol cuartu. Anque paez que, visto lo visto hasta agora, va ser Red Bull quien triunfe, nel casu del cuartu puestu, nun ta claro entá y les prósimes cinco carreres van ser cruciales pa dambes escuderíes. Force India paez asentada nos puntos con dambos pilotos, lo más importante, demientres que Williams nun consigui algamar esa regularidá vital pa sumar puntos, como víemos el domingu pasáu en Sepang.

Per detrás de dambos, anque bien lloñe, ta McLaren, que como yá diximos llega a Suzuka cola necesidá de facelo bien delantre de tol mundo que va tar sollerte a los sos movimientos. En Fórmula Uno nun se pue fallar si quies tar arriba, y si cuerres nel gran premiu de to casa, paez que menos entá.

Toro Rosso paez tener dexao la so llucha por superar a McLaren, pero nun podemos confianos yá que colos dos pilotos que tienen nes sos files, too ye posible, asina que tendremos de tar pendientes de lo que fagan tamién en Xapón.

Echando un güeyu a la parte baxo la tabla, Haas paez tar cómodu col octavu puestu na clasificación y ensin vese amenazáu por Renault, a venti puntos nel novenu. La batalla pol décimiu sigui ente Sauber y Manor, separtaos namás que por un puntu, un puntu que val un cientu pa equipos como ellos.

Toca madrugar otra vuelta, un poquín más entá que pa Malasia. Estos van ser los horarios:

Vienres, 07/10/2016
Llibres 1: 3:00 AM
Llibres 2: 7:00 AM

Sábadu, 08/10/2016
Llibres 3: 5:00 AM
Calificación: 8:00 AM

Domingu 09/10/2016
Carrera: 7:00 AM

Equí tenéis los datos del circuitu y estos son los neumáticos qu’escoyó cada pilotu pa esti eventu:

Esti fin de selmana nun se nos podíen apegar les sábanes por teníemos cites a primer hora lo mesmo’l sábadu como’l domingu. El sábadu una sesión de calificación ensin munches novedaes tocante a lo que tamos avezaos, anque esta vez toco-y a Hamilton facese cola pole y víemos a un McLaren metese en Q3 ensin que fuera por fallu d’un terceru. Y si nun fuera pola penalización de Fernando quiciabes taríemos falando d’unos primeros puestos por pareyes d’equipu.

Los que decidimos que pagaba la pena madrugar un domingu pa ver el Gran Premiu de Malasia, tuvimos tascando bien de veces los güeyos pa ver si lo que tábemos viendo nun yera cosa del sueñu perdíu.

Y ye que nin siquiera tuvimos d’esperar a la carrera pa qu’empezaran las sorpreses. La primera vieno de la mano de Felipe Massa que nun pudo siquiera dar la vuelta de formación y tuvo salir dende’l pitlane, dalgo que condicionaría dafechu la so carrera, dexándolu fuera de los puntos nel puestu catorce. P’añadir a lo de Massa, Sáinz quexábase de que’l coche s’apagara, pero por suerte pal pilotu de Toro Rosso, foi quién a ponelu en marcha otra vuelta y participar na carrera ensin mayor problema, anque nun pudo metese nos puntos.

Cuando por fin les lluces colloraes s’apagaron, tábemos toos sollertes a lo que podía pasar na primer curva dempués de la recta de salida. Y como vien siendo vezu esta temporada, pasó de too: pasó per detrás, onde Magnussen recibió un golpe de Kvyat na parte trasera del coche que faría al danés retirase unes vueltes dempués; pasó pel mediu, con pilotos como Fernando Alonso alcanzando los puntos dempués de salir últimu; y pasó, sobre too, per delantre. Los protagonistes esta vez diben ser Verstappen, Rosberg y Vettel. Yá nun ye la primer vez que hai hestories ente Vettel y Verstappen esti añu, y un mal cálculu a la hora tomar la curva y el relativu pocu espaciu col que s’atopó’l pilotu de Ferrari, fexo que colisionara con Rosberg de la que peleaba por adelantar a Verstappen. Pal pilotu de Mercedes eso significó trompear y quedar últimu dafechu últimu. Pal de Ferrari, romper la suspensión y retirase.

Ye la segunda vez na que Rosberg se ve obligáu a demostrar que nun ye un pilotu blandu, y qu’elli tamién pue facelo bien entamando dende atrás. Dempués del choque con Vettel, echo la carrera adelantando y faciendo por alcanzar los puestos d’arriba.

Hamilton pel so lláu, pudo ver pelos sos retrovisores lo que pasaba, pero en nengún momentu vio peligrar la so posición, dempués d’una bona salida pela so parte. Cuando la carrera foi asentando, quedó claro que la cosa diba tar ente elli, los Red Bull y quedaba por ver hasta onde sedría quien a llegar Rosberg. Kimi taba ehí, pero nun paecía tener el ritmu suficiente pa ser un peligru pa Hamilton.

Red Bull optó por parar a Verstappen bien temprano, enantes que’l restu de los de cabeza, n’un intentu por colocalu primeru y poder lluchar pola victoria col pilotu de Mercedes. Verstappen aguantó lliderando la carrera, hasta que tuvo de parar otra vez, onde foi Hamilton quien se puso en cabeza otra vez. Dempués d’esto, vimos una batalla bien guapa entre los dos pilotos Red Bull, con Verstappen quexándose de que’l so compañeru yera más lentu y pidiendo que lu dexaren pasalu. L’holandés intentólo, pero Ricciardo plantó-y cara en tou momentu.

Cola pelea de dambos Red Bull, Hamilton siguía metiendo-yos tiempu, y paecía que la balanza diba inclinándose pal so llau. Y foi entonces cuando la cámara de la FOM quedaba fixa nel coche del pilotu inglés y víemos como un fumu yá familiar salía de la parte trasera del coche, xunto con llames. El motor Mercedes del coche de Lewis Hamilton morrió, dexándolu asina fuera de carrera y a los Red Bull como triunfadores del gran premiu, con Ricciardo ganando la so primer carrera dempués de dos años ensin victories.

Demientres, Rosberg siguía la so cabalgada hacia’l podiu, faciéndose col tercer puestu xusto per delantre de Kimi. Foi precisamente n’un adelantamientu a Kimi onde penalizaben al alemán por un toque col pilotu finlandés. Lo que pa munchos foi un incidente de carrera ensin más, significó diez segundos de penalización pa Rosberg, que dende esi momentu lluchó por dexar ente elli y el pilotu de Ferrari un marxe superior a esa penalización. Consiguiólo y el tercer caxón del podiu foi pa él.

Aparte de Hamilton, quedaben fuera de carrera los dos Haas (Grosjean con problemes de frenos y Gutiérrez con una rueda floxa que se soltó del coche y que se traduxo en penalización económica pal equipu), Magnussen pol choque de Kvyat, Nasr con problemes nel motor (anque la xustificación que dieron paez que foi otra).

Hebo munchos pilotos destacaos nesti gran premiu, por exemplu Fernando Alonso que quedó séptimu dempués d’empezar la carrera últimu o Rosberg, cola so recuperación dempués del incidente en carrera. Pero dempués de dieciséis carreres y munchos disgustos, paeznos que la estrella del domingu foi pa Jolyon Palmer, que n’un fin de selmana complicáu pal equipu, consiguió sumar el so primer puntu del campeonatu. Nun tenemos claro que-y valga pa conservar el so asientu en Renault pa 2017, pero dempués de tar varies veces a tiru, por fin llegó’l momentu pa elli de sumar.

Equí vos dexamos tolos resultaos del sábadu y domingu:

 

Clasificación

Alonso saldría últimu al sumar 45 posiciones de penalización por cambiu d’elementos de la unidá de potencia

Carrera