Month: August 2016

A piques de pasar páxina y ponenos a mirar pa Monza n’un par de díes, vamos facer un repasín a l’actuación de los equipos nel pasáu gran premiu de Bélxica:

– Mercedes: como vien siendo vezu, los grandes triunfadores de la carrera. A la victoria de Rosberg ensin nengún problema xúnise’l tercer puestu del so compañeru Lewis Hamilton que salía dende atrás poles penalizaciones acumulaes por cambios d’unidaes de potencia. Agora’l británicu tien tres unidaes de renta pa tirar lo que queda de temporada.

– Red Bull: Verstappen tuvo en boca de tola xente, pa bien y pa mal, anque foi’l so compañeru Ricciardo’l que fexo’l meyor trabayu (o’l más rentable) quedando segundu. L’holandés ta ganándose bien d’enemigos en pista, al tiempu qu’almiradores fuera d’ella, y nun nos paez que vaiga ser mui bien acoyíu esti fin de selmana polos tifosi en Monza dempués de les sos engarradielles con Vettel y Räikkönen.

– Force India: tres de Mercedes, los que meyor trabayu ficieron como equipu ensin dulda. Vien dándose-yos bien esti circuitu y de fechu, cuartu y quintu puestu paez que saben a poco teniendo en cuenta qu’enantes de la bandera colorada too paecía indicar que Hülkenberg podía pensar nesi tercer puestu del caxón. Al final nun pudo ser, sicasí dambos pilotos ficieron una carrera mui completa y l’allegría del equipu al adelantar a Williams nel campeonatu de constructores dizlo too d’una escudería que nun dexa de sorprendenos cada temporada.

– Ferrari: de xuru que los dos pilotos de la Scuderia suañaron con Verstappen estos díes, y anque nun-yos fue mal del too en carrera teniendo en cuenta l’incidente nel primer xiru y tolos altos y baxos, de xuru qu’aspiraben a muncho más n’un circuitu que (especialmente a Räikkönen) se-yos suel dar bien. Agora tán tolos güeyos puestos en Monza, el so feudu y onde de xuru fadrán por facer una bona carrera enfrente la so xente. Si Verstappen nun se mete en mediu esta vez, claro…

– McLaren: nun dexen de repitise les ocasiones nes qu’una carrera que puede da-yos un bon garapiellu puntos a la escudería británica termina siendo un calvariu pa dalgún de los sos pilotos. Pesie a que toles torgues túvoles Alonso demientres el fin de selmana, el que lo sufrió en carrera foi Button. L’asturianu fizo séptimu y Button viose fuera de carrera a les poques vueltes del empiezu por un incidente nel que Wehrlein interpretó mal la so maniobra en pista dexándolu ensin tiempu pa frena y qu’acabó llevándolu per detrás. Dambos pilotos quedaron fuera. Bonos puntos pa McLaren, que yá ta perriba Toro Rosso na clasificación de pilotos.

– Williams: probablemente aspiraben a más, y tinía la pinta nos entrenamientos y na sesión de calificación de qu’asina diba ser. Consiguieron puntuar con dambos coches, siendo Bottas octavu y Massa décimu, pero son puntos que saben a pocu viendo los resultaos de Force India. Toca siguir trabayando.

– Haas: les primeres vueltes del gran premiu fueron bien entreteníes pa los equipos de la parte media de la tabla, porque viéronse upaos a los puntos gracies a tolos incidentes qu’hebo. Ensin embargu, nel casu del equipu americanu y pesie a facer una bona carrera, nun fueron quien a quedase neses posiciones y resultaron décimosegundu (Gutiérrez) ya décimoterceru (Grosjean).

– Toro Rosso: otra escudería que marcha de Spa con deceición ye, ensin duldes, Toro Rosso. Ente lo descafeináu qu’anduvo Kvyat tol fin de selmana (nun ta faciendo muncho por quedase na Fórmula 1 visto lo visto en pista) y la mala suerte de Sáinz, que vio como quedaba ensin goma trasera por un reventón, l’equipu nun pudo facese con nengún puntu y vio como McLaren lu adelantaba na clasificación de constructores. Paez qu’empieza la parte más duro de la temporada con un motor ensin evoluciones y onde-yos tocará reducir daños sacando tolo que puedan del chasis y pensando en 2017.

– Renault: el sustu del gran premiu vieno de la mano de Kevin Magnussen que se salía xusto al terminar Eau Rouge a l’altura de la salida del pit-lane. Anque lu víemos acoxar, súpose darréu que nun fuera nada y que ta garantizada la so presencia en Monza esti fin de selmana. Bones noticies. La verdá ye que l’arranque de la carrera pa ellos foi bien interesante, fueron de los que se beneficiaron de los incidentes, y llegaron a tar nos puntos, séptimu ya octavu, pero nun duró muncho. Al final, Palmer sólo pudo ser décimoquintu.

– Manor: con Wehrlein fuera, yera cosa d’Ocon el dexar a Manor en bon llugar, y dientro la so llucha particular con Sauber, féxolo. Quedó xusto per delantre de Nasr y completó’l so primer gran premiu ensin problemes y amosando una perbona actitú. Yá quedó confirmao que d’equí a final de temporada (salvo cambios inesperaos) va quedase en Manor, ensin tener que responder a les llamaes de Renault como tercer pilotu.

– Sauber: ente la irregularidá qu’amuesen ya’l tar perdiendo la batalla escontra Manor, en Sauber tienen bien poco que cellebrar. Spa nun foi una bona carrera pa ellos. Suma y sigui.

Enantes de metenos de cabeza na segunda mitá de la temporada qu’empieza en menos d’una selmana nel míticu Spa, vamos echar una güeyada a lo que foi la primer parte no que cinca a los equipos:

– Mercedes: malapenes los vemos pasalo mal, anque esti añu yá dieron más d’un sustu a los sos xefazos, paez que tamos a piques de ver una repitición de lo que foi l’añu pasáu la batalla ente los dos pilotos por facese col títulu, con Hamilton un pasu per delantre. Pol bien de la competición, esperamos que Rosberg seya quién a volver a ponese a l’altor de les sos primeres carreres.

– Red Bull: dempués de les vueltes y amenaces del añu pasáu, y d’empezar la temporada con bastante discreción, el cambiu de pilotu xugó a favor de dambes partes (non tanto na del sacrificáu Kvyat). Agora mesmo son el segundu equipu nel campeonatu, non sólo por puntos: paez que por fin-y garraron la midía a Ferrari y van tar pegándose colos italianos hasta’l final de la temporada.

– Ferrari: esperábase de Ferrari que fueren quién a facer tremar, anque fuera un pocu, a les fleches platiaes, pero hasta agora paez que nun tan pol llabor. Cola marcha de James Allison y ensin nenguna victoria entá no que va de temporada, la paciencia na escudería italiana va acabándose y les idees en forma soluciones tamién. Ensin embargu, cuntamos con velos rellumar anque seya un pocu na segunda parte del campeonatu.

– Williams: la escudería inglesa ta sacando bueno resultaos pal baxu rendimientu que ta amosando esta temporada (baxu siempres comparándolu col añu pasáu, por exemplu). Esperábamos muncho más d’ellos, anque entá-yos queden bien de carreres pa facenos cambiar d’opinión.

– Force India: tolos años, Force India, seliquino, van colándose nos puestos d’enriba, onde teóricamente nun deberíen tar, faciendo podios y carreres mui completes. Esti añu puen poner n’apuros a Williams, que yá los ven de regüeyu, y anque ye verdá que siempres suelen baxar un pocu na segunda parte de la temporada, cuntamos con siguir velos bregando por esi cuartu puesto nel mundial.

– Toro Rosso: ye difícil xulgar el llabor de la escudería dempués del cambiu de pilotos: Sáinz sigui fuerte, puntuando regularmente y faciendo carreres competitives. Cola marcha de Verstappen convirtióse nel llíder dafechu del equipu, y la probe actuación de Kvyat dende que tornare fai qu’esta seya más obvia entá. El rusu nun termina de cuayar dempués del incidente que fexo que Red Bull decidiere relegalu a la escudería hermana en beneficiu de Verstappen. Munchos piensen que yá nun hai sitiu pa elli na F1 y que va ser unu de los que veamos desapaecer l’añu que vien. Les carreres vinientes sedrán les que decidan y na segunda parte de la temporada acusarán más l’usar un propulsor del añu pasáu que nun evoluciona.

– McLaren: l’empiezu de la temporada nun foi tan desastre como 2015, pero entá sigue costando asimilar el ver a McLaren nel puestu séptimu de constructores y aplaudiendo’l fechu d’entrar na Q3 y garrar puntos los domingos. Quéda-yos munchu trabayu per delantre, con un 2017 nel horizonte con posible cambiu de pilotos (Button dexaría’l so asientu a Vandoorne) y la promesa de tornar a ser competitivos. Na segunda parte de la temporada cuntamos con velos siguir sumando puntos ya dando pasinos, insuficientes pa esta temporada pero positivos si pensamos na so situación hai doce meses.

– Haas: les primeres carreres sorprendieron pa bien, y llueu impúnxose la lóxica y la realidá de ser un equipu nuevu na competición. De toles formes, el fechu de tar puntuando, anque nun seya en toles carreres, yá ye un méritu y tamos viendo a Gutiérrez faer carreres mui sólides y a Grosjean arrampuñar puntinos que los ponen perriba de les espeutatives de munchos na clasificación.

– Manor: siempres empiecen les temporaes cola idea de que lo d’ellos ye pensar en terminar carreres, pero esti añu tamos viendo un pasín más. Non sólo terminen carreres si non que tamién pueden suañar con sumar puntos como yá pasó con Wehrlein n’Austria, rompiendo col mitu de que Manor (o cualquier escudería “pequeña” sólo pue puntuar en Mónaco). Con Haryanto fuera del coche (anque vaya a siguir tando vinculáu al equipu) tócanos ver de lo que ye capaz Ocon, pupilu de Mercedes, nesta segunda parte.

– Sauber: la escudería suiza son, ensin duldes, los más castigaos económicamente nesta temporada. La entrada d’una nueva direición promete da-yos puxu pa sumar anque seya un par de puntinos que los ayuden a pasar a Manor na clasificación. Viendo lo que vimos hasta agora paez difícil.

Aprovechando’l parón braniegu, tócanos echar un güeyu a lo que ficieron los equipos el domingu nel Gran Premiu d’Alemaña nel Hockenheimring:

– Mercedes: como dicíemos nel resume de la carrera, Rosberg foi otra vuelta’l so pior enemigu, complicándose la vida na salida y dexando a Hamilton, que fexo un trabayu perbonu, más llíder na calificación y ganaor de la carrera. Queremos pensar que nun va ser esti’l principiu del final de les opciones del alemán al títulu y que’l parón va servir pa qu’organice les sos idees y dexe atrás esti complexu d’inferioridá que-y fae facese pequeñu enfrente’l so compañeru.

– Red Bull: el pasu alantre de la escudería austríaca ye evidente, pa desgracia de Ferrari. Dambos pilotos acompañaron a Hamilton nel podiu n’Alemaña, ya en nengún momentu amosaron debilidá frente a Rosberg, como pudimos ver na pista especialmente del llau Verstappen.

– Ferrari: hebo dellos cambios na selmanada pasada na estructura interno del equipu, y anque nun se-y pue echar la culpa de los resultaos de la escudería a eso, sí que ye verdá que quiciás son de los que más van agradecer esti parón pa reorganizase ya continuar puxando por facese col segundu puesto na clasificación de constructores.

– Force India: una de les cualidaes del equipu ye que, ensin facer munchu ruiu, van consolidando les sos actuaciones añu tres d’añu. Siguen na so batalla particular con Williams, a los que de momentu tienen perbaxo nel campeonatu. Dambos pilotos fixeron un bon trabayu, otra vuelta, na carrera, anque Pérez paecía nun tar mui contentu con como-y fueron les coses demientres el fin de selmana.

– McLaren: comentábemos nel resume’l fechu de que McLaren llegaba a Alemaña cola necesidá de meter a dambos pilotos ente los diez primeros y nun dexar de sumar puntos. Eso foi asina demientres casi tol gran premiu hasta’l final onde víemos a Alonso desinflase. Los problemes col combustible pasaron-yos factura a dambos, al asturianu más qu’a Button, que pudo facese con dellos puntos quedando octavu. Entá nun entendemos mui bien qué foi lo que fexo qu’Alonso considerare apropiao, dempués de tar avisáu de la necesidá d’aforrar combustible, el desdoblase de Verstappen cuando esti lu pasó en pista, dalgo que fexo que Pérez aprovechase la batalla p’adelantalu y que dende esi puntu, Alonso nun pudiera más que ver cómo lu adelantaben los sos perseguidores más cercanos. Terminó siendo décimosegundu.

– Williams: suma y sigui de Williams, n’otra carrera deceicionante col abandonu de Massa y el puestu novenu de Bottas que tuvo suerte de que la carrera nun durase dalguna vuelta más. Otru equipu que de xuru taba naguando pol parón braniegu pa esclariar les sos idees. Buena falta-yos fai.

– Haas: Gutiérrez ta empezando a sacudise la presión de tar siempre per detrás del so compañeru d’equipu y lleva yá dellos GPs faciendo bones actuaciones y dexando’l coche a la vera los puntos. Nesta ocasión, foi undécimu, siendo Grosjean décimoterceru dempués de ser penalizáu por cambiar la caxa cambios.

– Toro Rosso: Pesie a que nun tán faciendo una mala temporada, yá empiecen a acusar les sos carencies con respeutu a otros equipos con más presupuestu y avances (por exemplu, McLaren, que gracies a los puntos de Button y a que nengún de los pilotos de Toro Rosso puntuare, yá-yos saquen un puntu). Kvyat sigui cola so batalla particular por atopar el so sitiu nel equipu y por asegurase’l futuru pa 2017, daqué que naide nun ve claro, nin siquiera elli. Sáinz pela so parte tuvo una de les sos peores carreres, nun puntuando dempués de ser penalizáu con tres posiciones el sábadu por bloquear a Massa demientres la sesión de calificación.

– Renault: Palmer tuvo una actuación bien bona’l sábadu en calificación anque nun pudo repitilo’l domingu, y xunto al so compañeru sólo pudieron ser décimonovenu ya décimosextu respeutivamente. La escudería ta, como nun podía ser d’otra manera, centrada yá nel coche de 2017 y los sos pilotos lluchando por esi asientu que-yos garantice volver a correr pa la temporada que vien. La sombra d’Ocon (pilotu reserva de Renault y de formación pa Mercedes) ye bien allargada.

– Sauber: Nun esperábemos milagros a dos carreres dende qu’anunciaron el cambiu na so direición. Sí ye verdá que cuntamos con velos espoxigar nes carreres vinientes, pero nun foi nada sorprendente velos nel fondu la parrilla otra vuelta na sesión de calificación, nin que la so carrera fuera discretina. L’aplausu podemos da-ylu a Nasr polos sos adelantamientos al principiu la carrera, anque nun sirvieren pa muncho y tuviera d’abandonar unes cuantes vueltes dempués. Ericsson foi décimooctavu.

– Manor: Dambos coches consiguieron terminar la carrera, pesie a dalgún qu’otru incidente en pista ente los pilotos. Lo que más se comenta agora mesmo sobre Manor nun ye tanto lo que faen dientro la pista (anque Wehrlein tornó a facer una bona sesión de calificación el sábadu) si non lo que pasa fuera y la falta del dinero que garantiza l’asientu a Haryanto. Pudo correr n’Alemaña, y anque dende’l gobiernu indonesiu paez que tienen claro’l so compromisu col equipu, nun ta claro que lu vaigamos ver correr en Bélxica dempués del parón. Na carrera, Wehrlein acabó décimoséptimu ya’l so compañeru vixésimu.