Month: July 2016

Entá ensin recuperanos del too de Hungría, pegamos el saltu a Alemaña pal so Gran Premiu nel circuitu de Hockenheim. Aterrizamos equí dempués d’un añu d’ausencia d’esti GP por cuenta los problemes de Nürburgring (l’otru circuitu que lu entama) en 2015. De momentu paez qu’el d’esti añu tira palantre, yá cuntamos con que seya asina nos años vinientes.

Llegamos a Alemaña con Hamilton llíder nel campeonatu de pilotos, non con un marxe descomanáu, pero sí con un colchón pa dir faciendo lo que yá fixera n’años pasaos, ganar carreres, sumar puntos y facese col campeonatu otra vuelta. Rosberg necesita ser muncho más ambiciosu nes sos estratexes y al volante, yá que ta visto qu’en momentu que Hamilton-y mete un pocu presión pierde puxu y dexa que tolo trabayao s’esbarrumbe. Esti añu cuenta con una ventaxa y ye qu’en dalgún momentu de les carreres de la segunda parte’l campeonatu, Hamilton va vese penalizáu pol cambiu na unidá de potencia, lo que yá ye una torga de diez posiciones en parrilla. Ye d’ehí d’onde Rosberg pue sacar beneficiu, aparte de faciendo carreres nes que nun abra la puerta al so compañeru, o cualquier otru pilotu que-y meta un pocu presión, nel primer xiru de la primer vuelta.

Hockenheim ye la última carrera de la primer parte del campeonatu, y buen momentu pa dir valorando lo fecho hasta agora. Hai equipos, como Renault, que yá tán pensando (con tola razón) nel coche pa 2017. Otros tienen un güeyu neso ya otru en siguir atropando puntos pal campeonatu, tolos que tengan entá daqué que consiguir. Paez raro ya drástico dicir esto cuando entá queda la mitá’l campeonatu, pero paez que hai escuderíes que nun pinten meyor pa esa segunda parte.

De momentu, tolos güeyos puestos nel circuitu alemán y no que puen facer ellí, ya en casa, los pilotos de Mercedes (Rosberg por partida doble). Per detrás, güeyu a la batalla tanto de pilotos como de constructores de Red Bull y Ferrari, y a la de Williams y Force India, y tamién al puxu de Sauber por el puntín de Manor que los dexa como últimos.

Enantes de metenos de cabeza al gran premiu d’Alemania que yá ta casi enriba nós, vamos echar una güeyadina a la carrera del domingu nel Hungaroring. Una fin de selmana con una clasificación pasada por agua que casi l’allarga per dos hores con cuatro banderes coloraes (sí, cuatro, anque el peligru colos coches fuera pista nel estáu nel que taba’l circuitu obligaba a tomar más precauciones de la cuenta). Tres una Q1 d’apuestes ente parones y cambios de xuegos de neumáticos según diba secando’l firme y faciendo carril les coses fueron normalizándose en Q2, sicasí yeren a vese variaciones na clasificación en puestos onde nun tamos avezaos fai tiempu con unos Red Bull que paecíen amenazar a los Mercedes, hasta una Q3 na que too volvia a la “normalidá”. Una normalidá na que-y tocaba esta vez a Rosberg salise cola d’él.
En cuantes la carrera, nun ye que fuera la carrera más vistosa de la temporada, y sobre too teniendo en cuenta les carreres tan bones que tuvimos los dos años pasaos. Si acasu, y como vien siendo vezu esti añu, lo que dio más de sí foi la salida, onde Rosberg vía como la so pole del sábadu desapaecía y tornába en segundu caxón del podiu ensin que pudiera facer muncho por evitalo. Anque nun foi tan cenciello como pue paecer y Hamilton tuvo de pelease non sólo col so compañeru d’equipu si non tamién colos Red Bull, especialmente el de Ricciardo, que tuvo a puntu quita-y la primer posición, anque llueu terminara terceru en carrera.

Les vueltes siguientes fueron más o menos tranquiles pal llíder de carrera (y agora mesmo, tamién de campeonatu) ya en xeneral pa tolos pilotos, cola esceición de Kimi Räikkönen ya Max Verstappen, que tuvieron casi tola carrera engarriaos por ver quien quedaba per delantre, dalgo qu’a la fin consiguió’l pilotu holandés, y de Jenson Button, que vio la carrera torgada primero con un problema col frenu, y llueu con una penalización per parte direición de carrera polo que consideraron un mesaxe prohibíu (según el reglamentu) y que lu penalizó con un drive through. Tornó otra vuelta’l debate de lo conveniente o non d’estes penalizaciones, sobre too dempués de les quexes espresaes pol propiu pilotu al so equipu demientres la carrera, onde cuestionaba que nun se consideraren los sos problemes de frenu razón de sobra pa necesitar ayuda del muru, por ser un tema de seguridá y non d’ayuda al pilotu. De toles maneres, por si nun tuviera poco, el pilotu inglés viose fuera de carrera por cuenta una perda d’aceite nel coche, siendo l’únicu pilotu retiráu del gran premiu. El so compañeru foi séptimu, protagonizando l’anéudota del gran premiu por tener sío séptimu en toles sesiones tanto llibres como calificación ya llueu tamién en carrera.

Prestonos enforma la carrera de Palmer, anque tuvo la mala suerte de facer un trompu tando en puntos ya perder la oportunidá de sumar daqué pal equipu y pa si mesmu de cara al campeonatu de pilotos. Tamién tuvo un día aceutable Felipe Nasr, anque’l so equipu nun consiguiera facer lo mesmo, daqué ensin dulda positivo pa elli y pa Sauber, recién rescatáu económicamente por una compañía suiza. Nun tuvieron tanta suerte Massa y Kvyat, con una carrera bastante probe, dalgo que nun ayuda a la so imaxe y al so futuru, cada vuelta más cuestionáu, nes sos respeutives escuderíes.

Equí vos dexamos la tabla de calificación del sábadu ya la del domingu. Hamilton ta agora llíder del campeonatu con seis puntos perriba Rosberg. Ricciardo ye terceru, con sólo un puntu más que Räikkönen y cinco que Vettel, que ye quintu.

Clasificación

Carrera

Enantes del descansu formuleru n’agostu, quédennos dos carreres en fin de selmanes siguíos. La primera d’elles, Hungría.

El circuitu de Hungaroring ye unu de los favoritos del calandariu, pa pilotos, equipos ya fans en xeneral polos cambios ya oportunidaes qu’ufre pa ver bones carreres y polo caprichosu que suel ser el tiempu, siendo les tormentes dalgo a esperar demientres el fin de selmana.

Una de les primeres noticies coles qu’entamamos esti fin de selmana ye la compra de Sauber pola empresa Longbow Finance S.A. Yá vos dicíemos hai unes selmanes qu’andaben a la gueta de compraor que-yos ayudare a salir de la situación económica complicada na que taben pero nun se sabía entá si diba ser un sofitu económicu o lo que pasó, la compra dafechu del equipu. Anque’l nome va caltenese, Peter Sauber va dar un pasu atrás, ya en principiu Monisha Kaltenborn va siguir como xefa d’equipu ya CEO.

Hungría ye circuitu especial pa munchos pilotos, si non que-yos lo digan a Fernando Alonso y Jenson Button que ganaron la so primer carrera de Fórmula Uno ellí. Dende McLaren, confíen en que seya esta una buena carrera pa dambos na que puedan siguir sumando puntos y ameyorando les sos prestaciones. Otros que tán faltos d’un pocu tranquilidá son Ferrari. Dempués de confirmar la so aliniación pa 2017, calteniendo a dambos pilotos, nun dexaron d’apaecer voces crítiques que cuestionen el papel que tán faciendo esti añu. La verdá ye que, pal potencial qu’amosaben a entamos de temporada, nun tán respondiendo como s’esperaba y entá tamos por ver la so victoria nesti 2016.

Tamién hai tensión na zona más alta la tabla, onde los dos pilotos de Mercedes tán separtaos por namás un puntu, que pue desapaecer (o medrar) na carrera’l domingu. Hai un par d’años víemos a Hamilton salvar los muebles dempués de quedar fuera de clasificación el sábadu, pero paeznos qu’esti añu va tar más enfotau no que pueda facer el so compañeru que nel restu de coses.

Tola atención (y les esperances pa una victoria non-plateada) ta puesta en Red Bull. Ricciardo yá sabe lo que ye ganar en Hungría, féxolo en 2014, ya’l so compañeru d’equipu ta apuntando maneres p’apuntase otra victoria nesti 2016. Siendo como ye Red Bull el favoritu pa poner n’apuros a Mercedes, paeznos que’l tar sollertes de lo que fagan en pista ta más que xustificao.

Taremos amás pendientes del tiempu que faga, yá que, como diximos enantes, les tormentes nun son rares nesta época del añu nel circuitu y eso pue ayudar a que veamos otra bona carrera.

Teníemos abondes esperances en que’l Gran Premiu de Gran Bretaña fuera unu d’esos que queden pa l’alcordanza, cuando se fai memoria de lo vivío en dellos años de la Fórmula Uno. Nun tenemos claro qu’esti vaiga ser el casu, anque pue dicise que d’entamu pintaba bien.

Quedaben namai que venti minutos pa que s’apagaren les lluces ya empecipiare la décima carrera de la temporada, cuando los cielos ingleses s’abrieron pa dexar pasu a un bastiazu que dexo bien moyada la pista y a la xente qu’esperaba que llegare la hora de salir a pista. Muncha xente frotaba les manes pensando no qu’eso significaba: agua en pista suel ser sinónimu de coses interesantes pa ver. Pero tamién suel ser sinónimu de munches duldes sobre si ta bien o no pa correr. Ya eso fexo que la carrera tuviere d’entamar detrás del coche seguridá. Como casi siempres, esto nun prestó a munchos, demientres otros dicíen que yera lóxico. De toles formes, cinco vueltes dempués, víemos por fin a los pilotos pisar l’aceleaor, anque ensin munches floritures: al pocu ratu Hamilton yá tenía una ventaya bultable y diba caltenela hasta’l final.

Lo más entretenío vieno de la mano de les salides del pista y los trompos, gracies al agua qu’entá quedaba, y les lluches ente Rosberg y Verstappen pol segundu puestu del podiu. Per detrás, Vettel sufriendo (tuvo un fin de selmana bastante malu, tornó a tener problemes cola caxa cambios y tuvo penalización pal domingu, y amás, en carrera, foi penalizáu con cinco segundos sobre’l so tiempu por un incidente con Massa), Ricciardo, que nun foi quien a tar a l’altura del so compañeru d’equipu, y Räikkönen, peleau colos Williams y col agua.
En xeneral nun foi una carrera entretenida, si acasu al principiu, y sobre too cuando marchó’l coche seguridá y una bayura pilotos entró a cambiar gomes, faciendo del pit lane un caos nel que los comisarios nun metieron mano. Onde sí la metieron foi na decisión de Mercedes de “chiva-y” a Rosberg la solución a un problema cola caxa cambios que nun lu dexaba meter séptima. Costó-yos diez segundos de penalización que lu fixeron cayer al tercer puestu, en beneficiu de Verstappen, que quedó finalmente segundu.

Tornó abrise’l debate sobre lo útil o non que son les prohibiciones de los mesaxes de radio: ayeri foi obvio qu’a Mercedes-y compensaba más dexar a unu de los sos pilotos terceru diciendo-y lo que tinía de facer pa solucionar el so problema nel coche, enantes de nun dicir nada y quedar fuera de carrera.

¿Ye necesario llegar a esti puntu? Cada vegada hai más xente que piensa qu’estes regles nun valen pa nada, pero tamién qu’hai falta de dar más autonomía a los pilotos nel coche. El problema vien cuando unu d’ellos tien d’enfrentase a milenta combinaciones de botones nel so volante ya interpretar lo que tola teunoloxía desarrollada hasta agora-y pide en cada momentu. Ta claro que naide nun queremos ver a pilotos que son marionetes dirixíes dende’l muru ensin nengún tipu de capacidá de decisión, pero tamién ye verdá qu’estos pilotos conducen máquines cada vuelta más sofisticaes y que non siempre son quién a dar col puntu necesariu pa resolver un problema tando en pista (víemoslo en Baku onde énte’l mesmu problema, Hamilton nun foi quien a resolver lo que-y pasaba al coche demientres Rosberg sí, y nun pudieron recibir ayuda nenguna dende’l muru). De xuru que siguiremos falando muncho d’esti tema, que ta lloñe de quedar solucionáu.

No que cinca’l restu d’equipos, McLaren nun cumplió les espeutatives, quedando fuera de los puntos con dambos coches dempués de tar ente los diez primeros casi tol fin de selmana; Williams tuvo munchísimos problemes demientres tola carrera y quedaron tamién fuera de los puestos d’arriba, y Sauber, dempués d’una calificación onde nun pudieron cuntar con Marcus Ericsson que tuvo un accidente bien feu na tercera práutica, sólo terminó con Nasr. Fálase de que nun tardando van anunciar la compra del equipu por dalguna empresa, pero entá nun se sabe si va ser parte l’equipu o van facese cargu de too. La verdá ye que cada carrera amosen más dificultaes y paez qu’esa compra podría ser una solución pa ellos.

Manor nun tuvo tanta suerte como la selmana pasada n’Austria, y tanto Wehrlein como Haryanto quedaron fuera, dambos por salida de pista. Otros que van necesitando que llegue’l parón de branu son Renault, que quedaron tamién con dambos coches fuera de carrera. Haas nun tuvo demasiada suerte, ellos mesmos reconocíen que la lluvia de xusto enantes de la carrera-yos rompiera totalmente la estratexa: Gutiérrez acabó nel puestu dieciséis y Grosjean nun terminó.
Meyor-yos fue a Toro Rosso, que tornaron a puntuar colos sos dos pilotos, Sáinz otra vuelta perriba Kvyat, que sigui ensin despuntar dempués de pasar de Red Bull a Toro Rosso hai un par de meses.

La próxima parada ye Hungría dientro dos selmanes, penúltimu gran premiu enantes de les vacaciones pa la Fórmula Uno, y una de les carreres que siempre suel dar que falar. Taremos sollertes.

Equí vos dexamos tolos datos de la calificación del sábadu y la carrera d’ayeri:

Clasificación

*Marcus Ericsson nun participó na calificación dempués del so accidente na tercera práutica. Vettel tuvo penalización de cinco posiciones por cambiu na caxa cambios. Empezó nel puestu once’l domingu.

Carrera

*NT: Nun terminó
**Nico Rosberg foi penalizáu con 10s sobre’l so tiempu mesmo que Sebastian Vettel.

Entá tamos recuperando del Gran Premiu d’Austria y de tolos comentarios que salieron d’elli (dempués del choque de Hamilton y Rosberg, Mercedes yá dixo que nun diben tirar d’órdenes d’equipu pa meter en vereda a los sos pilotos, pero que diben a ser más estrictos con ellos) llegamos a Silverstone con delles novedaes, como la renovación de Räikkönen pa otru añu en Ferrari.

Ye esti un fin de selmana que siempre emociona a pilotos y fans, y ayeri quedara claro otra vuelta demientres la rueda de prensa de los pilotos, onde taben los tres británicos que formen parte de la parrilla d’esti añu, Jenson Button, Lewis Hamilton y Jolyon Palmer. Anque en situaciones distintes, con Hamilton n’una situación bastante más agradable que los otros dos, de xuru qu’esti gran premiu va ser especial pa toos ellos.

Güeyu al tiempu, espérase agua pa cásique tol fin de selmana, poro munchos de los equipos van intentar saca-y partíu a eses condiciones (como yá fixeren n’Austria hai dellos díes). Y güeyu especial a lo que pueda facer Manor neses circunstancies. Yá pasaron a Sauber na clasificación d’equipos, dexando n’evidencia que nun son l’equipu más floxu de la parrilla. McLaren van con dos tokens más, tamién esperando ser quien a repitir el resultáu d’Austria.

Amás, vamos tener a Occon nel Renault de Magnussen, y a Leclerc nel de Gutiérrez en Haas, aprovechando la oportunidá p’amosar les sos cualidaes pa la Fórmula Uno pa quien pueda tar interesáu. Alcordaivos qu’Ocon ta compitiendo nel DTM de la mano de Mercedes y Leclerc ta en GP3 con ART GP.

Ye hora de ponese manes a la obra, entama’l Gran Premiu de Gran Bretaña 2016 en Silverstone.

Vais permitimos qu’esta entrada llegue un pocu más tarde de lo normal y que sirva de resume pa lo que foi el Gran Premiu de la selmana pasada en Spielberg enantes de poner los güeyos en Silverstone.

Dempués de que’l tiempu nun diera más que previsión d’agua pa tol fin de selmana, nun pilló a naide por sorpresa que nun parare de llover en tol fin de selmana y que, gracies a eso, viéremos cosines interesantes en calificación y carrera, por exemplu, un McLaren (el de Button) acabando quintu en calificación y llegando a ponese segundu en carrera. Cuntaba cola ventaxa de les penalizaciones de Rosberg y Vettel, pero igualmente foi’l pilotu inglés quien más-y provechu-y sacó al tiempu, como suel ser normal (nun ye raro qu’agora en McLaren nagüen por más lluvia pal finde viniente). Acabó sextu.

Vettel tornó a tener mala suerte, pinchando a mitá de carrera y quedando fuera. Rosberg paecía a piques de facese con otra victoria hasta que, llegando a la última vuelta, en Mercedes volvieron a echar les manes a la cabeza al velos tocase, quedando más perxudicáu Rosberg, que de tar primeru acabó quintu y gracies. Hamilton féxose cola victoria y colos abucheos del públicu. Segundu nel podiu tuvo Verstappen, repitiendo otra bona carrera, aprovechando tolo posible les oportunidaes y les circunstancies de carrera. Nel tercer llugar atopamos a Kimi, que como vien siendo vezu, aprovecha que nun ta’l so compañeru pa ser elli quien suba al podiu. Trabayu d’equipu ensin duldes.

Nun foi la carrera de Toro Rosso, que víen como en pocu tiempu se-yos descolgaben Kvyat primero y llueu Sáinz daqué apaecío a lo que-yos pasó a Force India, que nun pudieron ver a los sos pilotos puntuar. Tampoco nun fue la carrera d’Alonso, que tuvo bien atrás demientres parte de la carrera y terminó abandonando.

Ensin embargu, quién entá tará cellebrando ye Manor, col puntu consiguíu pol pupilu de Mercedes, Pascal Wehrlein, ensin que naide cuntara con ello. Ensin duldes, unu de los meyores del gran premiu. Haas consiguió puntos gracies a Grosjean que foi quien a metese nel puestu séptimu. Williams sólo sacaron un par de puntinos pola novena posición de Bottas. Massa tuvo de retirase.

El restu equipos siguieron na so llínia, Renault ensin dar muncho que falar y Sauber despertando dacuando.

Dempués de la novedá de Bakú, aterrizamos n’un vieyu conocíu pa pilotos y fans: el Red Bull Ring. Tamos nel Gran Premiu d’Austria.

De les llargues rectes d’Azerbaixán pasamos a lo verde de Spielberg, n’un entorno que casi paez sacáu de cuentu. L’añu pasáu Rosberg féxose cola victoria y paez que tien munches papeletes pa repitir nesti, anque de xuru Hamilton tará pensando en facer qu’eso nun pase.

McLaren lleguen con optimismu, paez-yos qu’Austria pue ser un bon llugar pa ellos pa sumar puntos dempués de la sequía de los últimos GPs. Tenemos muncho enfotu no que pueda facer Red Bull en casa y tamién si Ferrari sedrá quién por fin a abrir la llata les victories. Williams ficiéralo bien l’añu pasáu con Massa nel podiu y suponemos que vengan con ganes de facelo igual de bien si non meyor, col permisu los Mercedes. Güeyu tamién a Force India, que lleguen con ganes de siguir faciendo podios tamién, y a los Toro Rosso.

Pela parte d’atrás, Sauber necesita facer una bona carrera pa consiguir llevantar la moral d’un equipu castigau polos problemes económicos, mesmo que Renault, que namás consiguieron puntuar una vegada no que va de temporada y anden faltos d’esos puntos que se-yos resisten. Tamos seguros de que Manor siguirá dando guerra per detrás, ya aprovechando los problemes de los d’enriba pa facese güecu en puestos más altos.

Tai sollertes, entama un nuevu fin de selmana de Fórmula Uno.