Month: April 2016

Demientres tolos equipos tán pensando yá na siguiente ronda de la temporada, nós paramos un pocu pa echar una güeyada a lo que foi l’últimu gran premiu dende’l puntu vista los equipos. Nun hai qu’escaecer que tolos pilotos fueron quien a terminar la carrera, anque la so suerte en carrera foi bien distinta:

– Mercedes: anque nun podemos falar de desastre como tal, el fin de selmana pa Lewis Hamilton foi lo más paecío. Tando avezáu a los puestos de delantre, un séptimu sabe a poco, sobre too si quien ta no cimero ye’l to compañeru d’equipu y rival. Nun tenemos duldes de que Hamilton nun tardará en dar guerra otra vuelta, pero l’entamu la temporada pillolu col pie cambiáu…o con Rosberg mui inspiráu, nun queremos quitar méritu al alemán. El domingu, pesie a la salida, amosó otra vez por qué ta onde ta con 34 puntos perriba’l restu.

– Ferrari: Quiciás podemos entender a Vettel cuando-y echó la bronca a Kvyat al final la carrera: la maniobra del rusu casi-yos cuesta la carrera a dambos pilotos de Ferrari y a lo meyor podía tenela evitao. O non. Asina son les carreres, como dicía’l pilotu de Red Bull. Seya como fuera, tanto Vettel como Räikkönen salvaron los muebles, Vettel quedando segundu y Kimi, dientro lo malo, quintu.

– Red Bull: Yá Ricciardo nos dexare cola boca medio abierta al quedar segundu na calificación, y anque diben bien, nun creyemos que muncha xente esperare velos ehí enriba: Kvyat terceru, Ricciardo cuartu, pinchazu incluyíu. ¿Tará entamando Red Bull a garrar confianza o esi podiu sedría solo casualidá?

– Williams: Massa dicía que taba contentu cola so carrera, mesmo que Bottas. Siendo sextu y décimu, nun ye pa dici-yos que non, pero siguimos esperando (y yá van tres carreres) esperando pol puxu que-yos víemos l’añu pasau.

– Toro Rosso: Dambos coches dientro los puntos, y otru gran premiu ensin sustos. Los mozos de la parrilla tán entamando a asentar la cabeza, anque siguen ensin mieu a la hora de planta-yos cara a los demas pilotos. Da-yos igual que seyan campeones del mundo o rookies. Y con ello, vienen los puntos: octavu Verstappen, novenu Sáinz.

– Force India: Dicía Nico Hülkenberg en Twitter que paez qu’esti añu lu mirare un tuertu no que va de temporada, y la verdá que nun se pue dicir que l’alemán tea teniendo muncha suerte nes carreres. El so compañeru foi undécimu, demientres qu’elli terminó nel puestu quince. Con Force India ta pasándonos apaecío a con Williams: siguimos esperando que despeguen.

– McLaren: esperábemos muncho más d’ellos. Pasaron bona parte la carrera ente los diez primeros, pero al final, terminaron quedando práuticamente igual que na calificación. Button arriesgó col últimu stint y les gomes, Alonso dixo que nun daba más de sí’l coche. Suma y sigue.

– Haas: la suerte qu’acompañó a la escudería americana nes dos primeres carreres nun tuvo en China. Gutiérrez consiguió quedar primero que’l so compañeru (foi décimocuartu y Grosjean décimonovenu) n’una posición bastante estremada de lo que víemos en Sakhir o Melbourne. Va toca-yos siguir trabayando nes próximes carreres.

– Sauber: gran premiu discretu pa Sauber. Ensin munchu ruíu, dambos pilotos acabaron la carrera, en puestos de la parte baxa pero ensin quexes. Nasr llevó lo d’él nel coche con Hamilton pero pudo completar el gran premiu. Ericsson foi décimosextu y elli vixésimu.

– Renault: Magnussen intentó convencenos de que Renault tenía motivos pa sorrir, asina que dalgo tien de saber que nun sepamos nosotros porque la verdá ye qu’entá nun-y vimos la bona cara al resurdíu equipu francés. El danés foi décimoséptimu y el so compañeru d’equipu, Palmer, terminó últimu.

– Manor: Wehrlein de xuru tendrá yá escaecío l’error del sábadu que lu dexó fuera de la calificación bien ceo, y enfotaráse nel fechu de que dambos coches terminaron la carrera y nun fueron últimos. Wehrlein acabó décimuoctavu y Haryanto vixésimoprimeru.

Tercer carrera de la temporada y vuelta al sentíu común y al formatu de clasificación al que tábemos avezaos hasta l’añu pasáu. Irónicamente la fórmula vieya trexo sorpreses nuna sesión de clasificación na que viemos a Red Bull asomar el focicu en primera llinia de parrilla y a Hamilton que nun pudo marcar tiempu por un problema mecánicu.

Yá en carrera, la salida foi una vez más el puntu débil de Mercedes onde Rosberg vio cómo Ricciardo-y garraba la primer posición, pa recuperala un par de vueltes depués ayudáu pola diferencia de potencia ente los coches mientres Ricciardo topaba cola torga d’un pinchazu que lu obligaba a entamar una remontada qu’acabaría na cuarta posición. Lewis Hamilton volvía a teneles nes primeres curves con Felipe Nasr teniendo que camudar el morru del coche y Kimi tuvo lo de so con Vettel, nun ataque de Kvyat na segunda curva que l’alemán calificó de “suicida”. El finlandés tuvo d’entamar la so remontada que lu dexaría detrás de Ricciardo, ayudaos dambos por un Coche de Seguridá que salió a pista pocu depués pola cantidá de restos de coches qu’habia en pista.

Col desfile de coches escontra los boxes que s’abrió nesi impass de la carrera Vettel aprovechó p’adelantar a dos coches en pitlane, aprovechando que Hülkenberg reducía velocidá pa dar tiempu a qu’atendieren primero al so compañeru d’equipu nel box de Force India. Hamilton aprovechó les vueltes que tuvo’l coche de seguridá en pista pa cumplir colos compuestos obligatorios de neuḿaticos faciendo dos paraes nesi intervalu tiempu.

A partir d’ehí, Rosberg llideraría la carrera con cierta comodidá y l’espectáculu treslladaríase unes posiciones más atrás. Parte de la carrera pudimos ver a McLaren dientro los puntos pa terminar por quedar nunes, vamos dicilio, decepcionantes posiciones pa lo que s’esperaba d’ellos, mesmo que Renault, que siguin estancaos nes posiciones baxes ensin que paeza qu’haiga forma de que camuden les coses, anque Magnussen seya optimista.

Nun mentimos si dicimos que dempués del Coche de Seguridá, la carrera foi quedando perfilada y namás nos ufrió dellos adelantamientos y dalguna qu’otra estratexa que nun valió pa cambiar muncho les coses. Ye importante recordar que nun hebo nengún abandonu pesie a tolos choques que pudimos ver.

Estos son los resultados de la clasificación y de la carrera:

Calificación

Carrera

Dexamos pasar unos díes pa ponenos manes a la obra y analizar lo que foi l’actuación de los equipos nel pasáu Gran Premiu de Baḥréin. Como yá diximos, foi una carrera vistosa que nos fexo desquitanos un poco de lo que víemos, otra vez, el sábadu. Ye d’agradecer qu’a lo menos les carreres tean dando de sí:

– Mercedes: la victoria de Rosberg ya’l tercer puestu de Hamilton falen por si mesmos, pero ye verdá que tamos viendo delles cosines que nos faen creyer entá na humanidá d’esti equipu. L’arranque de les carreres sigui siendo daqué que-yos da dolor de cabeza y que los sos competidores tán sabiendo aprovechar. De toes formes, la capacidá de recuperación del equipu ye mui grande y de xuru nun tardarán n’atopar la solución a esi puntín de debilidá.

– Ferrari: ver a Vettel aparcar el coche nuna escapadera (paez ser que con un problema nos inyectores que pueden obligalu a estrenar unidá de potencia en China) cuando nin siquiera terminara la vuelta formación fexo que muncha xente punxera’l gritu nel cielu pola fiabilidá de los motores de la escudería italiana. Ensin embargu, viendo’l rendimientu del coche de Kimi, qu’algamó’l segundu caxón del podiu, nun creyemos que tengan que preocupase tovía.

– Red Bull: Nestes dos primeres carreres, Horner ta más enfotau n’echar enriba’l nuevu sistema de clasificación que sobre cualquier otra cosa, y nesa discreición anda moviéndose Red Bull estes dos carreres. Pesie a que Kvyat nun entamara n’Australia cola torga qu’eso ye pal equipu nel campeonatu, en Baḥréin dambos pilotos tuvieron a lo d’ellos, regalándonos delles batalles en pista, y consiguiendo sumar un puñáu de puntos col cuartu puesto de Ricciardo ya’l séptimu de Kvyat.

– Haas: siempre teniendo en cuenta que namás llevamos un par de carreres, lo de la escudería americana nun dexa de ser d’aplausu. Si yá nos sorprendíen en Melbourne col sextu puestu de Grosjean, en Baḥréin afitóse con un quintu, anque nun sepan entá lo que ye terminar un gran premiu con dambos coches por cuenta l’abandonu de Gutiérrez.

– Toro Rosso: nun sabemos si hebo toque d’atención de puertes pa dientro dempués de lo visto n’Australia, pero la verdá ye que nesta ocasión, vimos a dambos pilotos más calmaos. L’abandonu de Sáinz dexó a Verstappen a cargu de sumar puntos pal equipu, terminando na carrera nel puestu sextu.

– Williams: de los d’arriba, igual son los qu’entá nun amosaron lo que s’esperaba d’ellos. Anque nun empezaben de mui atrás, lo cierto ye qu’ente l’incidente de Bottas con Hamilton na primer vuelta, que-y valió un drive-through, y llueu la mala decisión (y van…) al montar neumáticos, podemos dicir que la carrera de los dos pilotos de Williams foi daqué descafeinada, siendo Massa octavu y Bottas novenu.

– McLaren: Debutaba Vandoorne, y debutó con puntu, siendo décimu, poniendo-y el llistón bien altu a Fernando Alonso pa China. La mala suerte acompañó a Jenson Button, que na vuelta 9 quedó tiráu cuando l’ERS decidió dexar de furrular. El británicu dicía que’l coche diba como pa quedar quintu o sextu, polo que los fans de McLaren, ensin enfotase demasiao, quiciás puen entamar a recuperar un poquín de sorrisa que perdieren en 2015.

– Renault: otros que siguen ensin convencenos, la escudería francesa ye un sacu llástimes. Ente la sanción del sábadu a Magnussen, que lu fizo salir dende’l pitlane, y que Palmer nin siquiera pudo entamar el gran premiu, yá van dos veces que queden a les puertes de los puntos. Sin ser eso malo del too, esperábemos un pocu más d’ellos.

– Sauber: nun son bonos tiempos pa Sauber no económico, pero en pista ficieron un trabayu bastante decente en Baḥréin. Vimos a Ericsson, qu’acabó nel puestu doce, engarrase con unos cuantos pilotos y a Nasr, con un coche según elli inconducible, salir del últimu puesto nel que quedó na clasificación del sábadu, pa terminar decimocuartu.

– Manor: llevamos yá unos cuantos aplausos, y ensin duldes Pascal Wehrlein merezse otru. Yá’l sábadu consiguiera daqué abondo meritorio como foi dexar el so coche nel puestu dieciséis, pero ye que’l domingu vímoslu pelease con otros pilotos, amargar la carrera d’otros tantos (que-y lo digan a Magnussen) y tresmitir la sensación de solidez qu’hai tiempu necesitaba Manor. El so compañeru foi más discretu, pero a lo menos dambos consiguieron terminar el gran premiu, décimoterceru Wehrlein y Haryanto décimoséptimu.

– Force India: l’actuación más decepcionante de tol gran premiu foi quiciás la de Force India. Teníennos avezaos a tar ente los diez primeros en Baḥréin, incluso a tar nel podiu, y velos quedar nel puestu quince (Pérez) y dieciséis (Hülkenberg) foi ensin dulda lo que menos esperábemos d’ellos. Cuntamos cola so recuperación pa China.