Day: March 1, 2016

Segunda selmana de test y segunda partida de póker que vemos nel asfaltu de Montmeló, anque los Mercedes yá “s’atrevieron” a calzar gomes más blandes y a dexar ver un ritmu de carrera más orientáu a clasificación, nun dexamos de pensar que tanto ellos como Ferrari tán escondiendo cuales son les sos cartes reales (como en mayor o menor midida ta faciendo tol mundo, tamién ye verdá). La cuestión ye que la flecha platiada conducida por Nico Rosberg fízose col meyor tiempu de güei y el segundu meyor no que llevamos de tests a poco más de 2 décimes del marcáu por Vettel la selmana anterior. Hai que dicir que Vettel marcó aquel tiempu col compuestu ultrablandu y Rosberg marcó la so vuelta col blandu. Los actuales campeones del mundu encabezaron tamién la tabla de vueltes totales dando 172 xiros al circuitu ente los dos pilotos, mientres que Verstappen foi el pilotu que más vueltes dio en solitario nun Toro Rosso que yá amosaba’l so diseñu pa la presente temporada cola pretensión de Tost de subir a dalgún podium (cosa que nun ye fácil si pensamos que va a correr cola versión del añu pasáu de la unidá de potencia de Ferrari, paecen enfotaos nel chasis que tan buen tastu dexó en 2015).

Si foi otra xornada “monótona” más pa los de Brackley, Kimi tuvo problemes pa sumar vueltes por mor d’un problema na caxa de cambiu que-y quedó trabada na octava marcha y forzó una bandera colorada en pista. Anque Alonso tamién fizo apaecer el mesmu color de la bandera xusto cuando tocaba la parada pa comer, la verdá ye que nun pueden tar más que satisfechos en McLaren güei, con un coche en tercer posición na tabla de tiempos y 93 vueltes en bolsu; o lo que ye lo mesmo, McLaren tuvo un entrenamientu normal como fai tiempu que nun pasaba. Boullier achacaba la ganancia al nuevu compuestu que-yos preparó Esso y, anque terceros nun ye una posición real, sí que los asitia nun llugar dende’l que pueden pensar en desarrollar na dirección correcta. Namás depende que se tomaren les decisiones técniques correutes tocante al motor na fábrica d’Honda pel iviernu y que seyan quien a desenvolver un plan d’evolución que permita dir meyorando. De momento, habrá que tar atentos a ver si estes sensaciones siguen nos díes que resten.

La tercer bandera colorada de la tarde vieno de la mano de Kevin Magnussen, anque tampoco tien quexa al ser quien a pasar del cientu de vueltes.  Renault ye un de los equipos que más problemes tán teniendo nesti principiu de temporada y paez que yá van siendo quien a facer dalgún progresu.

El restu de pilotos siguió col so programa, siendo Haas y Manor los que tuvieron más problemes pa completar vueltes y dientro de los pilotos paez que Haryanto va a ser el que tenga más problemes pa nun quedase descolgáu d’un paquete qu’amenaza compactu y con escoses diferencies. Habrá que comparar los resultaos de Werhlein pa ver hasta qué puntu ye la falta d’adautación al monoplaza del pilotu la diferencia que se ta viendo o si a Manor tovía-y falta un puntu pa allegase al restu. Material nun-y faltará esti añu.

Sauber estrenó’l C35 nos mesmos puestos que dexaba al C34, anque con capacidá de dir probando meyores y afinando’l coche col que, agora sí, van a participar esti añu.  Los tiempos güei son los siguientes:

Y, en total, la suma de vueltes por cada equipu ye la siguiente

* Unidaes de potencia o coches de 2015

Yá tamos toos. Sauber y Toro Rosso yá presentaron los sos monoplaces oficialmente asina que yá podemos dicir que la parrilla ta completa. Ensin duldes, güei, la máxima espectación va tar del llau d’estes dos escuderíes, por ver lo que nos ufren pa esti 2016. Del STR11 yá teníemos referencies, pero’l C35 ye una incógnita total.

Siendo esti l’últimu test enantes d’empecipiar la temporada, los equipos pondrán enfotu en garrar tola información posible que-yos permita poner los coches a puntu de cara al GP d’Australia del día 20 de marzu.

De momentu, primer día de la segunda tanda de test en Montmeló, y güeyos puestos en:
– Renault, ¿van a ser quién a alloñase de los problemes que tuvieron nos primeros test?
– Manor, especialmente pol fechu de tener a Rio Haryanto al volante güei. Tol mundo espera qu’amuese yá un pocu de consistencia al volante del MRT05.
– Ferrari y Mercedes, los dos pesos pesaos, en teoría, d’esta temporada van dir buscando nesta primer sesión continuar nel camín del últimu día de los anteriores test. ¿Va a siguir sorprendiendo’l W07 a los sos propios pilotos cola so solidez?
– McLaren-Honda, y la so necesidá d’intentar continuar inspirando confianza, magar seya una poca.
– Force India y Williams, les formiguines del test anterior, con permisu de Mercedes, nun dieron muncho que falar nos test pasaos, anque Hülkenberg, con Force India, consiguiera ser el más rápidu del tercer día. Tamién interesa ver hasta onde puen llegar Red Bull dempués d’una tanda de test discretina.
– Haas, hai interés abondu por saber si lo de la selmana pasada foi bona suerte o casualidá y non la promesa de tener un nuevu equipu na parrilla qu’en cuenta quedase nos puestos d’atrás va tar faciendo ruiu pelos del mediu.

Ensin más, dexámosvos cola llista pilotos pa güei martes:

MERCEDES AMG F1: Nico Rosberg / Lewis Hamilton
SCUDERIA FERRARI: Kimi Räikkönen
WILLIAMS F1 RACING: Valtteri Bottas
RED BULL RACING: Daniil Kvyat
FORCE INDIA: Nico Hülkenberg
RENAULT: Kevin Magnussen
SCUDERIA TORO ROSSO: Max Verstappen
SAUBER F1 TEAM: Felipe Nasr
McLAREN-HONDA: Fernando Alonso
MANOR: Rio Haryanto
HAAS: Esteban Gutiérrez

Nun escaezáis qu’al final del día vamos contavos tolo que pasó en Montmeló nesti primer día.