Dempués d’una visión xeneral de lo que foi’l Gran Premiu d’Australia, vamos dir parándonos equipu a equipu valorando un pocu’l rendimientu qu’amosaron tol fin de selmana.
– Mercedes: naide duldaba que diben de favoritos y especialmente dempués de ver como Hamilton taba a la cabeza de toles sesiones de llibres, por muncho agua que cayera’l vienres, y cómo se facía cola pole nuna sesión de calificación que dexó a tola xente desencantao. Intuyíase que diben facer un 1-2 como vien siendo la tónica nos últimos GPs, y anque al final foi asina, la batalla presentada por Ferrari a la salida y demientres la carrera fízonos albidrar que nun van ser too roses esti añu pa la escudería alemana. Victoria pa Nico Rosberg y segundu caxón del podium pa Hamilton, salvando los muebles dempués d’una mala salida.
– Ferrari: toles esperances tán puestes, dende cuantayá, na escudería rosso, y anque a Kimi sigue escorriéndolu la mala suerte, amosaron dambos que son l’equipu que puede poner en problemes a Mercedes. Posiblemente entá nun seyan quién a quita-yos la pole, pero ta visto qu’en carrera y cola estratexa afayadiza (ayeri Vettel vio escapar la victoria por cuenta d’una mala elección de los neumáticos) puen aspirar a munches más victories que l’añu pasáu.
– Red Bull: ye complicao facer una valoración xeneral del aniciu per parte de la escudería por cuenta de los problemes de Kvyat non sólo na calificación del sábadu sinon también ayeri cuando, tres la vuelta de formación nin siquiera pudo ocupar el so güecu na parrilla. El llabor sólido de Ricciardo, que foi cuartu, fainos pensar que tienen dao un pasu alantre dempués d’un 2015 con altes y baxes, pero va tocános esperar pa saber si foi sólo cosa d’un GP.
– Williams: la discreición vien siendo la pallabra a usar pa describir lo que vienen faciendo Williams dende los test. Ayeri en carrera, Massa terminó quintu y Bottas octavu, dempués de sufrir una sanción por cambiar la caxa cambios que lu fizo cayer a la posición 16. Tamos toos sollertes pa ver si por fin son quien a dar más de si, algamando una victoria que se-yos escapa dende tiempos de Pastor Maldonado en Barcelona 2012.
– Haas: ensin dulda, la sorpresa del GP diola Romain Grosjean col so sextu puestu en carrera. Pa un equipu recién entráu na máxima competición del motor ye muncho más qu’un bon resultáu y, anque nun podemos enfotanos en que toles carreres seyan asina (hai que tener en cuenta tolos factores que se dieron en carrera, ente ellos la bandera colorada) naide nun ñega que ye un mui bon empiezu. L’apunte negru púnxolu Esteban Gutiérrez, que quedó fuera del GP dempués d’un accidente con Fernando Alonso na vuelta 17.
– Force India: Con Hülkenberg dientro los puntos y Checo Pérez nel puestu 13, Force India completó un GP normalín, sumando puntos siempre necesarios pa un equipu como ellos, pero ensin facer grandes coses. Pérez pasó la carrera ensin ser quién a salir de los puestos que nun dan puntos, viéndoles colos Toro Rosso, los Renault y, dacuando, el McLaren de Jenson Button.
– Toro Rosso: tres de pasar perriba la escudería hermana en calificación, y de tener a Verstappen cuartu pela primer parte de la carrera, paez que sabe a pocu los dos últimos puestos que dan drechu a puntos (Sáinz novenu, Verstappen décimu). Dambos pilotos siguen dando muestres de por qué tán ehí y nel casu de Verstappen, una vez más, d’esi ímpetu que calteriza a los más mozos. Anque Helmut Marko se faiga’l llocu cuando-y pregunten que-y paeció l’actitú de Verstappen, de xuru qu’hebo dalgún tirón d’oreyes al pilotu holandés.
– Renault: bon trabayu de Renault en xeneral, non sólo na carrera sinon tamién na calificación y los llibres. Jolyon Palmer quedó a un puestu d’algamar los sos primeros puntos en F1 y el sábadu foi unu de los protagonistes d’una sesión de calificación que la mayoría queremos olvidar. El so compañeru, Magnussen, quedó per detrás d’elli, nel puestu 12, dempués de sufrir un pinchazu nos primeros metros de carrera.
– McLaren: yá se tien dicho y escrito muncho sobre l’accidente de Fernando Alonso nel GP, asina que nun vamos a dir sobre ello. No que cinca al GP, aparte de la so retirada, la escudería británica nun dio tantes muestres de meyora como s’esperaba, con errores na elección de neumáticos pel llau de Button que fizo que terminare n’un descafeináu puestu 14.
– Sauber: con Ericsson fuera xuegu y Nasr nel puestu 15, l’actuación de Sauber nel GP d’Australia 2016 ensin duldes nun va pasar a la hestoria como la meyor carrera pa esti equipu.
– Manor: la mala suerte cebose con Rio Haryanto que nun pudo completar el GP y tuvo de quedase nel garaxe demientres la bandera colorada. El so compañeru, Pascal Wehrlein, quedó 16.
