Day: February 22, 2016

Tests d’iviernu 1 – Reflexones del primer día

Güei pudimos ver yá los coches nel so mediu natural: la pista, cola intención de dir desaniciando les duldes de cara a la temporada.  Quiciás salgan decepcionaos los qu’esperaben una revolución, anque probablemente tovía nun tengamos visto nada en rellación a lo que vamos a ver el restu de la temporada.

Vettel foi el más rápidu del día, meyorando yá’l tiempu que marcó na Q3 del GP d’España, siguiolu Hamilton que foi quien a rodar nada menos que 156 vueltes (polo que paez tienen un oxetivu de rodar ente 600 y 800 km al día). Detrás d’ellos, Ricciardo estrenó el TAG-Heuer en tercer posición siguíu pol Williams de Bottas y el Force India de Celis.

Ente lo que tuvieron un día más complicáu ta McLaren, que tovía nun tenemos claro si empecipia a ver la lluz al final del túnel, anque Boullier nun paez tar mui contentu pesie a que llograron dar bastantes más vueltes que nel estrenu de l’añu pasáu.  Tamién tuvo problemes Toro Rosso, onde la caxa de cambios fizo parar a Sainz pela tarde por precaución y nun lu dexó pasar de les 55 vueltes nun Toro Rosso “qu’estrenaba” PU Ferrari, eso sí, la evolución de 2015. Per detrás d’ellos quedaría Ericsson que pilotaba el Sauber C34 de 2015 a la espera d’estrenar el nuevu coche la selmana que vien. Manor llograba 54 vueltes y desaniciar el so nome de les últimes posiciones a les que tábemos avezaos mientres que Haas, nel so debut na competición, sufrió un fallu nel alerón delanteru que tamien los impidió siguir dando vueltes a Montmeló. Sicasí, nel equipu americanu paecíen enfotaos en que’l problema nun yera grave. Renault, a la cola, intenta recomponer l’equipu mientres intentaben resolver dalgunos pequeños problemes col coche (paez ser que col software) y nun pasaben de ser los más lentos del día.

Hai pistes que nos dan a entender que vamos tener coches más rápidos esti añu, poques sorpreses nos equipos a los que-yos ta costando entamar la temporada (nun dexa de ser curiosa la comparación ente Red Bull y Renault, llevando supuestamente la mesma PU anque la marca del toru la lleve renomada). Quiciabes Sauber, al salir coche del añu pasáu, seya la meyor referencia pa ver onde s’alluga’l restu en comparanza a la temporada pasada. Pero lo dicho, tovía nun salimos de les grandes incógnites que presenta esta temporada, veremos a ver mañana…

Los númberos en cuantes a meyores tiempos y rodaxe güei fueron estos:

Pilotu Equipu Tiempu Neumáticu  Vueltes
Vettel Ferrari 1:24.939 M 69
Hamilton Mercedes 1:25:409 M  156
Ricciardo Red Bull 1:26.044 M 87
Bottas Williams 1:26.044 M 80
Celis Force India 1:26.298 S 58
Button McLaren 1:26.735 S 84
Sainz Toro Rosso 1:27.180 M 55
Ericsson Sauber 1:27.555 M 88
Wehrlein Manor 1:28.292 S 54
Grosjean Haas 1:28.399 M 31
Palmer Renault 1:29.356 M 37

 

 

Test d’iviernu 1 – Previa día 1

Ayeri facíemos una intro xeneral de lo que diben ser los test qu’entamen güei nel Circuit de Catalunya, con munches coses a les que mirar y munches espectatives que cumplir.

Güei, día 1, güeyu a:
– Renault: la escudería francesa yá presentó’l so coche pa 2016 dempués del amagu que mos ficieron a principios de mes coloriando’l del añu pasau colos colores corporativos. Hai munches ganes de ver debutar a Jolyon Palmer, campion 2015 de GP2.
– Haas: ensin duldes, el nuevu equipu de la parrila despierta espectación y va ser unu de los que más atención garren estos díes. Anque cuenten con dos pilotos yá conocíos na F1, tamién tenemos ganes de ver cómo s’apaña Grosjean col so nuevu equipu.
– Manor: mentiríemos si dixéremos que nun hai nada que ver per parte de Manor yá que demientres el parón d’iviernu y cola so nueva aliniación de pilotos consiguieron tornase n’unu de los equipos a los que güeyar nestos tests. En cuantes a los pilotos, el debut de Wehrlein como pilotu oficial de F1 ye unu de los aspectos más atractivos.
– Red Bull: con tolo que dieron que falar l’añu pasau y demientres el parón d’iviernu, tenemos ganes de ver qué pasa cola xuntanza con TAG Heuer.
– McLaren-Honda: lleíemos hai un pocu que, a lo menos, el coche arrancó nel garaxe enantes de salir a pista. Dicir esto de McLaren tendría de tar prohibío pero viendo’l 2015 que dexaron a les sos espaldes, casi tamos falando de dalgo a tener en cuenta.

Mercedes presentó oficialmente el so coche hai unos minutos y anque tienen enriba d’ellos el sambenitu de ser el coche punteru de la parrilla, nun vemos signos de nerviosismu na escudería. Ferrari llega cola esperanza d’averase un pocu más a les fleches platiaes y Williams d’averase a los italianos.

Force India va puxar por dir metiéndose, pasín ente pasu como vienen faciendo, ente los equipos d’arriba. Sauber y Toro Rosso nun van correr colos sos coches oficiales, poro vamos tener poco que comentar d’ellos.

Güei van tar rodando:

MERCEDES AMG F1: Lewis Hamilton
SCUDERIA FERRARI: Sebastian Vettel
WILLIAMS F1 RACING: Valtteri Bottas
RED BULL RACING: Daniel Ricciardo
FORCE INDIA: Alfonso Celis
RENAULT: Jolyon Palmer
SCUDERIA TORO ROSSO: Carlos Sainz Jr.
SAUBER F1 TEAM: Marcus Ericsson
McLAREN-HONDA: Jenson Button
MANOR: Pascual Wehrlein
HAAS: Romain Grosjean

Al final del día vos diremos comentando si toes estes reflexones se vieron espeyaes en pista y si hebo dalguna sorpresa.
F1 is back!