Gran Premiu de Singapur 2024

Hai dellos fines de selmana que, según entamen, yá paez que se puede predicir lo que va pasar cásique dende’l vienres. Y ye que yá dende los primeros entrenamientos llibres podíemos albidrar que Lando Norris taba perriba del restu. Dominó nos llibres y tamién na clasificación y, como yera d’esperar, na carrera.

En 2023, el rendimientu de Red Bull foi bastante probe, pero nun foi’l casu esti fin de selmana. Ye verdá que Verstappen tuvo de peliar col coche más de lo que nos tien avezaos, como vien siendo normal nes últimes carreres, y que Sergio Pérez nun pasó nin a Q3, pero l’holandés foi quien a minimizar daños quedando clasificando segundu y quedando segundu per detrás de Norris en carrera.

La carrera foi tranquila, con una salida mui llimpia. Dellos coches tuvieron d’esquivase nel primer xiru pero ensin consecuencies. De fechu, nun tuvimos nin coche de seguridá y los dos abandonos fueron por problemes aisllaos y non por accidentes. Foi más bien una carrera estratéxica, na que Mercedes nun foi quien a sacar lo meyor de sí depués d’una gran clasificación per parte de Hamilton y Russell que llueu nun fueron quien a maximizar, viéndose dambos superaos por Piastri, que clasificó quintu pero quedó nel podiu per delantre d’ellos el domingu.

Ferrari fueron quiciás la deceición del fin de selmana puesto que dambos pilotos tiníen potencial pa desafiar a McLaren pola primer posición y nel podiu pero nengún de los dos pudo clasificar bien, con Sáinz incluso teniendo un accidente en clasificación que lu dexó ensin oportunidá pa peliar polos primeros puestos en parriella. Leclerc nun tuvo tampocu una actuación brillante’l sábadu, dalgo que lu condicionó pal domingu pesie a que dambos fueron quien a compensar un pocu la mala actuación y quedar per delantre de Hamilton, que nun tuvo mui contentu coles gomes y nun pudo caltener la posición de podiu que tinía’l sábadu.

La carrera de Norris nun tuvo munchu secretu: el coche yera rápidu, él mostrose muncho más centráu qu’otres vegaes sobre too na salida, el so puntu débil, y pudo xestionar gomes y distancia con Verstappen dende’l principiu. Pudo permitise incluso arriesgar dellos momentos pasando mui cerca de la muria ensin consecuencies. Dambos McLaren yeren los únicos que podíen pasar con confianza perriba los pianos del trazáu de Singapur, dalgo que’l restu de pilotos evitaben na midía que-yos permitíen los sos monoplaces.

Pela parte media tuvimos interesantes momentos ente Alonso, Sáinz y Pérez, col pilotu d’Aston Martin tornando a sumar puntos con un coche claramente inferior a los otros dos. Nico Hülkenberg tuvo una gran actuación de sábadu que-y permitió acabar nos puntos el domingu. L’alemán yá nos tien avezaos a facer bones vueltes de clasificación, y esti sábadu nun foi esceición. Pérez zarró los diez primeros con una actuación bastante discreta que, una vegada más confirma la importancia de la posición más que de la rapidez del coche nel trazáu de Singapur.

A les puertes de los puntos quedó Franco Colapinto. Williams tuvo un fin de selmana d’altibaxos y de fechu Albon tuvo d’abandonar bien pronto en carrera. L’equipu RB apuntaba maneres nos entrenamientos llibres pero dambos pilotos quedaron fuera de puntos. Nel casu de Ricciardo, el so llabor consistió en quita-y a Lando Norris el puntu de vuelta rápida que l’inglés tinía nes últimes vueltes, faciendo trabayu d’equipu pa Red Bull. Ye irónico que se tea falando de qu’esti gran premiu foi l’últimu del pilotu australianu al que podría reemplazar Liam Lawson pal restu de la temporada.

Otru día pal escaezu d’Alpine y Stake, lloñe de los puntos. Tampoco nun foi un bon fin de selmana pa Magnussen, qu’acabó abandonando, nin pa Stroll que quedó nel puestu décimocuartu, a un mundu del so compañeru d’equipu.

La F1 tómase otru descansu de tres selmanes enantes de ponese en movimientu otra vuelta nel circuitu d’Austin. Ellí veremos abondos equipos con novedaes y meyores, ente ellos Red Bull, que de xuru van apertar más les coses pola llucha en dambos mundiales. Mientres llega’l día, equí vos dexamos tolos númberos que nos dexó esti fin de selmana de carreres en Singapur.

Previa del Gran Premiu de Singapur 2024

Ensin descansu, aterrizamos na bahía de Singapur pal viniente gran premiu d’esti 2024 qu’avanza pasín ente pasu hacia’l so final. Entavía tenemos abondes carreres qu’esfrutar y munchos puntos que disputar. Con McLaren agora lliderando’l campeonatu de constructores y Ferrari a la gueta de la feble segunda posición de Red Bull y sabiendo que, precisamente, esti trazáu ye un de los piores pal equipu de la bébora enerxético, esti fin de selmana promete dexanos momentos intensos otra vegada.

Pa que nun perdáis nada, equí vos dexamos tola información que precisáis pa esti fin de selmana:

GRAN PREMIU DE SINGAPUR
Circuitu MARINA BAY STREET CIRCUIT
HORARIOS
VIENRES 20/09/2024
LLIBRES 1 11:30
LLIBRES 2 15:00
SÁBADU 21/09/2024
LLIBRES 3 11:30
CLASIFICACIÓN 15:00
DOMINGU 22/09/2024
CARRERA 14:00

Y éstes son les gomes que van usar pilotos ya equipos demientres esti gran premiu:

Gran Premiu d’Azerbaixán 2024

A estes altures de la temporada abúltanos que podemos afirmar que 2024 ta siendo un gran añu pa la F1, non sólo polo que tamos viendo en pista si non, y sobre too, polo inesperao de les situaciones que se tán viviendo.

Por si tiníemos poco, Lando Norris encargose de poner un pocu más d’intensidá al domingu de competición en Bakú clasificando fuera de la Q2. Esta selmana previa a Azerbaixán, l’equipu McLaren decidió pidir a Piastri qu’ayudare a Norris na so gueta del títulu. Viendo la sesión del sábadu abultábanos que bien pocu diba poder facer l’australianu pol so compañeru, pero viendo’l resultáu, el so trabayu bien val un mundial, el de constructores. A la fin, Norris pudo recuperar, minimizar daños y quedar incluso per delantre de Verstappen, pero con una renta insuficiente de puntos si quier ser campeón.

Y ye que llegamos a la clasificación del sábadu ensin tener mui claro quien podía facer la pole por tener un bon númberu de pilotos que yeren candidatos a ello, incluyendo a Sergio Pérez, que tuvo mui inspiráu, más que’l so compañeru, demientres tol gran premiu. Sicasí, quien consiguió imponese al restu, una vegada más, foi Charles Leclerc, que ye’l meyor clasificador en Bakú magar la victoria se-y resiste. Esti domingu tinía una bona oportunidá d’acabar con esi particular historial de poles ensin victoria. Salía siguíu de Piastri y de Carlos Sáinz, que foi quien a meter el so coche na tercera posición nun trazáu que nun se-y suel dar bien. Sergio Pérez clasificó per delantre de Verstappen en cuartu llugar y siguiólu George Russell. El vixente campeón del mundu namás pudo ser sextu en clasificación y lu siguieron Lewis Hamilton, que’l domingu salió dende’l pitlane y aprovechó a camudar pieces que yá penalizaben, Fernando Alonso qu’esprimió tolo que pudo’l so Aston Martin y, pa rematar los diez primeros, dambos Williams, col debutante en Bakú Franco Colapinto superando al so compañeru d’equipu Alex Albon, que foi décimu. Tenemos que destacar tamién l’actuación de Oli Bearman, que competía col Haas de Kevin Magnussen (sancionáu esta carrera) y que quedó undécimu per delantre de Hülkenberg, que tuvo de conformase con ser décimoterceru.

El domingu, l’iniciu de carrera foi llimpiu en xeneral no más alto de la parriella, con Leclerc imponiéndose anque ensin ser quien a poner muncha distancia colos sos rivales. Sicasí, el monegascu foi quien a llegar en primer llugar a les paraes. Les estratexes variaron ente los qu’escoyeron dos paraes y los qu’entamaron con gomes dures y fueron a una, como foi’l casu de Norris o Albon. Na segunda tanda de vueltes de Leclerc, con Piastri cada vegada más cerca, un escesu de confianza resultó nel australianu atacando ensin que Leclerc lo esperara. Asina, Piastri púnxose primeru y nun abandonó esa posición hasta ver la bandera a cuadros. La frustración de Leclerc yera evidente pues vía que, otra vuelta, perdía’l beneficiu d’una gran vuelta de clasificación el sábadu. Nun podemos dicir que nun intentó superar al so rival, pero Piastri entamó una defensa mui fuerte que torgó tolos intentos del monegascu.

Per detrás de dambos taben llibrándose continues batalles ente Pérez y Sáinz pol tercer puestu na carrera. Russell vixilaba la carrera dende lloñe pero cada vegada más cerca. Verstappen, sextu, vía como Norris diba avanzando na clasificación, faciendo bonu’l rendimientu del so McLaren y tamién la xestión de gomes. L’inglés allargó la parada mucho más incluso qu’Albon y asina púnxose nuna situación de poder facer una tanda de vueltes corta con unes gomes muncho más rápides y nueves que les que llevaba Verstappen. Esto ayudó a que Norris pudiera dir acortando la distancia que recuperó l’holandés en parando’l pilotu de McLaren y que quedó en nada con delles vueltes pal final.

Tábemos a piques de rematar la carrera cuando llegó’l momentu que diba tener l’impautu más bultable na carrera. Pérez y Sáinz taben cada vegada más cerca, col español casi rozando’l tercer puestu del mexicanu. Sicasí, nuna maniobra d’adelantamientu ciertamente un pocu estraña, dambos pilotos acabaron na muria, arruinando les sos carreres y un bon númberu de puntos, aparte del emburrión moral pa Pérez d’acabar nel podiu y per delantre del so compañeru. Los beneficiaos d’esti incidente fueron Russell, qu’heriedó un tercer puestu col que nin siquier suañaba a dos vueltes del final; Lando Norris, qu’acabó cuartu depués d’empezar nel puestu décimoquintu; Fernando Alonso, que pudo meter el so Aston Martin nun meritoriu sextu puestu; los dos pilotos de Williams, que sumaron puntos; Lewis Hamilton, que depués d’entamar dende’l pitlane foi quien a quedar novenu y, finalmente, Oli Bearman, que sumó puntos pa Haas. El pilotu inglés suma más puntos que Kevin Magnussen y amás failo con dos equipos distintos, depués de tener que sustituyir en Xida a Carlos Sáinz en Ferrari al principiu de la temporada.

Pela parte baxo, Tsunoda y Stroll tuvieron d’abandonar bien pronto por un toque ente dambos que dañaría los sos monoplaces y acabaría n’abandonu. Sigui la frustración n’Alpine y Sauber mientres ven como Williams y Haas pocu a pocu van alloñándose d’ellos na clasificación. RB tampocu nun sacó gran cosa d’esti gran premiu col abandonu yá nomáu de Tsunoda y con Ricciardo nel décimotercer puestu. Sicasí, entavía tán perriba del restu d’equipos de la parte baxo de la tabla.

Y asina, dexamos Bakú pa poner rumbu a Singapur pal viniente gran premiu que yá se disputa esta selmana. Mientres llega’l día y la nuestra previa, podéis ver tolos númberos que dexó’l gran premiu n’Azerbaixán equí.

Previa del Gran Premiu d’Azerbaixán 2024

Dende qu’entró nel calendariu de la F1 ye verdá que Bakú dexó delles carreres bien interesantes ya emocionantes. Anque yá sabemos lo que pasa cuando naguamos por emoción en pista, esti añu abulta que, viendo cómo se tán desenvolviendo los grandes premios, vamos tener abondo d’ello. Ferrari llega cola sorrisa tovía na cara tres la victoria en casa, Red Bull con ganes de desquitase de lo que vivieron en Monza y McLaren tentando de ver si dan col puntu necesariu pa nun dexar de ganar carreres.

Aterrizamos amás en Bakú cola noticia recién de la incorporación d’Adrian Newey a Aston Martin ya’l terremotu que pudiera causar pal futuru de la F1 n’años vinideros. Vos recordamos qu’esti fin de selmana Kevin Magnussen nun va poder compitir por tar penalizáu n’habiendo algamao tolos puntos de penalización de la so llicencia. Va ocupar el so llugar Oliver Bearman quien va formar parte del equipu, como sabéis, en 2025 xunto a Esteban Ocon.

Equí vos dexamos tola información d’horarios que precisais pa nun perder detalle d’otru fin de selmana de carreres:

GRAN PREMIU D'AZERBAIXÁN
Circuitu BAKU CITY CIRCUIT
HORARIOS
VIENRES 13/09/2024
LLIBRES 1 11:30
LLIBRES 2 15:00
SÁBADU 14/09/2024
LLIBRES 3 10:30
CLASIFICACIÓN 14:00
DOMINGU 15/09/2024
CARRERA 13:00

Ya estes son les gomes que van usar los equipos demientres esti gran premiu na capital d’Azerbaixán:

Gran Premiu d’Italia 2024

De les posibles combinaciones de lo que diba pasar nel circuitu de Monza esti fin de selmana de xuru que mui pocos albidraben que’l resultáu diba ser el que foi. Y ye que la Scuderia tornó a lo cimero del podiu pa goce de los tifosi.

Dende hai dellos grandes premios, McLaren paez siempre tar un pasu per delantre del restu d’equipos yá dende’l vienres, con permisu de Mercedes que dacuando tamién se reivindica, y de Max Verstappen. Les circunstancies finales inesperaes faennos entender cómo McLaren, col coche más rápidu de la parriella, con dos perbonos pilotos al volante, entavía tien que creyese que tien capacidá d’alcanzar a Red Bull en dambos campeonatos.

El domingu Ferrari arriesgó y ganó. Cásique tábemos avezaos a que l’equipu italianu nun se prodigue en tomar bones decisiones no que cinca a estratexa, pero esta vegada l’apuesta a una parada pagó la pena nel casu de Leclerc. Sáinz tuvo de conformase con quedar a les puertes del podiu pero non ensin pasar bona parte de la carrera peliando por él.

En McLaren tornemos a ver indecisión, incapacidá pa establecer unos roles que permitan a los pilotos saber qué esperar l’ún del otru en pista. Norris continúa teniendo salides probes pesie a facer pole y ye dalgo que ta pagando, sobre manera cuando’l so compañeru d’equipu decidi atacalu nos primeros momentos d’un gran premiu. L’equipu inglés precisa d’un pocu d’orde y como dicíemos arriba, creyese que col coche que tienen ye posible pa ellos llegar a ganar el campeonatu. N’Italia tornaron a pecar d’indecisión y probe xestión de la carrera y Ferrari pasó perriba cola so estratexa. Ye verdá que dambos pilotos quedaron nel podiu, pero tiníen capacidá pa ganar el gran premiu.

Red Bull y Verstappen en particular tuvieron otru fin de selmana pal escaezu, y yá van siendo unos pocos. L’holandés nun pudo pasar de ser sétimu. Mercedes tampoco nun brilló escesivamente y viose superáu por Ferrari n’estratexa, dalgo a lo que nun solemos tar avezaos. Sicasí sumaron un bon puñáu de puntos.

Pela parte media-baxa de la tabla, rescamplar la penalización de Kevin Magnussen, qu’acabó décimu, por un incidente con Gasly. El pilotu danés agotó asina tolos puntos de la so llicencia y nun va poder compitir dientro dos selmanes en Bakú. Suponemos que’l so sustitutu seya Oliver Bearman. Per otru llau, bon debú de Fabio Colapinto ocupando l’asientu dexau por Logan Sargeant. Anque’l so compañeru entró en puntos al ser novenu, él quedó nun bon puestu doce.

Rematamos la xira europa col deliriu en Monza y ponemos la vista yá en Bakú pal viniente gran premiu. Ente que llega la fecha, podéis consultar tolos númberos que dexó’l gran premiu d’Italia equí.

Previa del Gran Premiu d’Italia 2024

Italia ye siempre un escenariu perespecial non sólo pola so historia nel deporte del motor si non tamién pola so afición. Los tifosi siempre dan esi toque que nun tienen otros circuitos y anque abulta complicao que veamos a un pilotu de Ferrari no cimero del podiu esti domingu, la ilusión nun ye dalgo que falta enxamás cada añu nel trazáu italianu.

Esti añu vamos cuntar cola presencia na primer sesión d’entrenamientos d’Andrea Kimi Antonelli, que suena como’l principal candidatu pa cubrir el güecu que dexa Hamilton en Mercedes a partir de 2025, El pilotu italianu ta acabante de cumplir los dieciocho años y va debutar na F1 con Mercedes na mentada sesión.

Amás, bien temprano esta selmana recibimos la noticia de que Fabio Colapinto, pilotu arxentín que compite en F2 col equipu MP Motorsport, va sustituyir a Logan Sargeant lo que queda de 2024. Nun llega de sorpresa viendo los resultaos que taba collechando’l estauxunidense dende l’entamu la temporada y quiciás el ramu foi l’accidente del sábadu pasáu en Zandvoort.

Pa que nun perdáis detalle nengún de lo que vamos vivir esti fin de selmana, equí vos dexamos tola información que precisáis:

GRAN PREMIU D'ITALIA
Circuitu AUTODROMO NAZIONALE DI MONZA
HORARIOS
VIENRES 30/08/2024
LLIBRES 1 13:30
CLASIFICACIÓN 17:00
SÁBADU 31/08/2024
LLIBRES 2 12:30
SPRINT 16:00
DOMINGU 01/09/2024
CARRERA 15:00

Ya éstes son les gomes que van usar equipos y pilotos nel circuitu de Monza pa esti gran premiu, l’últimu en territoriu européu:

Gran Premiu de Países Baxos 2024

De vuelta de les vacaciones, la F1 retornó al circuitu de Zandvoort, nos Países Baxos, au nos últimos tres años Max Verstappen foi’l dominador absolutu de les carreres con poles y victories. Sicasí, esti 2024 ya confirmó na so primer parte que nun díbemos repitir patrones del pasáu y aportábemos al circuitu neerlandés con duldes de que’l pilotu de casa pudiera facer otra vuelta lo que fizo nel pasáu.

Y nun nos equivocamos. Con nueves meyores nos sos coches, McLaren foi bastante superior al restu demientres tol fin de selmana, nun circuitu con condiciones cambiantes no meteorolóxico y dalguna qu’otra bandera colorada que llimitaron el tiempu en pista. El sábadu, los entrenamientos llibres fueron en moyao pero la clasificación en seco, y un fuerte accidente de Logan Sargeant condicionó tola sesión por cuenta’l tiempu que llevó arreglar les proteiciones y dexar tol circuitu en bones condiciones. Con estes blimes aportábemos a la clasificación na que Lando Norris foi superior en tiempu yá non sólo a Max Verstappen, qu’entavía foi quien a ser segundu ensin tener el coche más rápidu, si non tamién al so compañeru d’equipu, Oscar Piastri, que tuvo de conformase col meyor tercer tiempu. Per detrás, suerte estremao pa los Mercedes, con Russell cuartu pero Hamilton nel puestu doce y sumando una penalización por bloquiar a Sergio Pérez que lu terminó dexando nel puestu quince. Ferrari fexo un pocu lo mesmo, con Leclerc partiendo sextu pero Sáinz nun siendo quien a entrar na Q3. El madrilanu malpenes tuvo tiempu de probar la pista en condiciones normales, depués de tener un problema cola caxa de cámbeos el vienres que lu dexó ensin rodar cásique tola segunda sesión de llibres, dalgo que tampocu nun pudo facer el sábadu na tercer sesión polo que yá comentemos. Sergio Pérez foi quien a clasificara nuna quinta posición que sigui sabiendo a poco pero que maquiella les posiciones de la primer tanda de carreres d’esta temporada y que’l mexicanu tien preciso escaecer ya superar. Aprovecharon la cayida en Q2 de Sáinz y Hamilton tanto Gasly como Albon, qu’acompañaron a los Aston Martin nes posiciones finales de la Q3 pero Albon foi descalificáu y tuvo de salir muncho más abaxo na parriella. El fin de selmana pintaba oscuru pa Williams. La posición dexada por Albon permitió a Sáinz acabar partiendo dende la décima posición.

El domingu les condiciones de carrera fueron en seco, ensin amenacia d’agua pa la carrera. La clave taba na salida que ficiera Lando Norris, dalgo que yá-y tien torgao la posibilidá de victoria en delles carreres pasaes. Con too y con eso, l’inglés tornó otra vuelta a tener una salida non mala pero sí pior que la de Verstappen, que nun tuvo problema dalu pa superalu ensin casi llegar a la primer curva. Coles dificultaes que, en principiu, presenta Zandvoort p’adelantar, albidrábemos que’l pilotu de Red Bull namás tendría de dedicase a xestionar bien la carrera y dir metiendo distancia col McLaren de Norris, que tinía a Russell xusto per detrás depués de que Piastri perdiera posición con él. Sicasí, la distancia nun llegaba y pasín ente pasu, el McLaren de Norris diba averándose al Red Bull de Verstappen y acababa por superalu cola mesma facilidá cola qu’enantes se viera sobrepasáu na salida. Dende esi momentu, la carrera de Norris llimitose a nun cometer errores y, él sí, dir metiendo distancia con Verstappen. Foi evidente dende bien temprano que’l McLaren tamién yera mui superior en carrera y vímoslo claro coles paraes, nes que Norris pudo permitise parar cuando-y vieno meyor ensin necesidá de reaicionar a les aiciones de Red Bull, dalgo que sí víemos n’otres carreres. Col gran premiu controláu, l’inglés foi agrandando la so distancia con Verstappen, mientres l’aición vinía per detrás con Piastri peliando con Russell y Leclerc por esi tercer güecu nel podiu. Russell nun pudo facer una bona xestión de les gomes y pronto se descolgó de la llucha ente Leclerc y Piastri, que’l monegascu acabó ganando. Foi un bon domingu pa Ferrari na que les estratexes funcionaron y el ritmu, anque non al altor de los dos primeros, foi lo suficientemente buenu como pa llevalos al podiu y colocar a Sáinz en quinta posición, per detrás de Piastri. L’australianu tuvo siempre dalgo per detrás del so compañeru d’equipu pesie a les meyores nel so coche, pero suma bonos puntos que coloquen a McLaren a namás trenta de Red Bull nel mundial de constructores.

Per detrás de Sáinz quedó Sergio Pérez, otru puestu discretu pa lo que se demanda d’él, pero que suma puntos pal equipu. Foi además quien a quedar per delantre de dambos Mercedes, que tamién tuvieron suerte estremao nesti gran premiu. Russell nun taba mui contentu n’acabando’l gran premiu mientres Hamilton, qu’acabó en puntos depués de salir dende bien atrás, comentaba tenelo pasao bien demientres la carrera. Per detrás d’ellos acabó Gasly, que suma dos bonos puntos p’Alpine nuna época de munchu cámbeu nel equipu francés y zarró Fernando Alonso. Aston Martin continúen a la gueta del rendimientu qu’amosaben l’añu pasáu y que nun terminen d’atopar nesti. De fechu, Lance Stroll namás pudo ser décimoterceru.

Nico Hülkenberg tuvo de conformase con ser undécimu mientres el so compañeru d’equipu acabó décimooctavu depués d’entamar dende’l pitlane por camudar pieces na so unidá de potencia. Nun foi un bon gran premiu pa Haas con abondes salides de pista y munchos problemes tanto dientro como fuera del circuitu. Per detrás, nel puestu doce, acabó Daniel Ricciardo, dellos puestos per delantre del so compañeru Yuki Tsunoda que namás pudo acabar décimosetimu. Nengún de los dos pilotos tien el so futuru aseguráu na escudería ya’l fechu de quedar fuera de puntos, anque seya per delantre del to compañeru d’equipu, nun abulta suficiente pa la maquinaria de Red Bull que yá entama a mirar pa otros llao a la gueta sustitutos.

Pocu que cellebrar tamién p’Albon, qu’al final nun pudo recuperar más qu’unes poques posiciones depués de la so descalificación y acabó per detrás de Stroll, siguíu d’Ocon que yá paez tar fuera d’onda colos intereses d’Alpine depués de la so anuncia de qu’en 2025 va correr con Haas. Logan Sargeant quedó per detrás del francés. El pilotu americanu ta nel puntu de mira depués del grave accidente del sábadu que torgó la so sesión de clasificación y que suma a la factura y los gastos extra de Williams que nun tán como facer desembolsos d’esa cantidá. Coméntase que Sargeant podría quedar fuera del equipu como primer pilotu yá dende la viniente carrera en Monza.

Zarraron la clasificación los dos Sauber, con Bottas per delantre de Zhou y otra carrera enllena de problemes y probe rendimientu que suma a les duldes sobre lo que pueda ser el futuru del equipu que dende 2025 va ser Audi. Como tán agora mesmo, van tener que camudar muncho les coses si quieren ser mínimamente competitivos en llegando 2026.

Ponemos el ramu a esti gran premiu dexándovos tolos númberos y resultaos que nos dexó y que podéis consultar equí. Nós ponemos rumbu a Italia, el míticu circuitu de Monza pa unu de los grandes premios más especiales de la temporada.

Previa del Gran Premiu de Países Baxos 2024

Depués d’un merecíu parón, la F1 torna a l’actividá y failo en casa del vixente campeón del mundu, Max Verstappen. El circuitu de Zandvoort va ser l’escenariu del primer gran premiu de la segunda parte d’esti 2024 que tantes sorpreses nos ta dexando. Hasta agora yá fueron siete los pilotos que fueron quien a ganar una carrera, y anque’l dominiu de Verstappen paez fuera de duldes abulta que nel campeonatu de constructores Red Bull va precisar de dalgo más que de lo que faga’l pilotu neerlandés. Equí vos dexamos tola información que precisáis pa nun perder nada de lo que se vien esti fin de selmana en Zandvoort:

GRAN PREMIU DE PAÍSES BAXOS
Circuitu CIRCUIT ZANDVOORT
HORARIOS
VIENRES 23/08/2024
LLIBRES 1 12:30
LLIBRES 2 16:00
SÁBADU 24/08/2024
LLIBRES 3 11:30
CLASIFICACIÓN 15:00
DOMINGU 25/08/2024
CARRERA 15:00

Ya éstes son les gomes que vamos ver demientres tol fin de selmana:

Gran Premiu de Bélxica 2024

El añu pasáu cuando tiníemos una carrera atípica o un ganador inesperáu yera una gran sorpresa, como foi’l casu de la victoria de Carlos Sáinz en Singapur. Esti 2024 ta tornándose nun vezu lo de nun cuntar con Red Bull a lo menos pa ganar la carrera. Y ye qu’otra vuelta tuvimos otru ganador que nun ye Max Verstappen, anque esta vegada l’holandés tornó a ser el pilotu calculador al que tamos avezaes. Verstappen partía con una penalización de diez posiciones pa la carrera, pero eso nun impidió que fuera’l más rápidu’l sábadu. Sorprendió más ver a Leclerc en segundu llugar y más entavía a Pérez en terceru. Les condiciones de la pista, moyada, permitieron dellos cambios que, por exemplu, dexaron a McLaren dalgo más abaxo de lo que vien siendo vezu estes últimes carreres.

Sicasí, el domingu la hestoria foi bien distinta ya’l sol foi protagonista absolutu. Los equipos cuntaben con un bon númberu de gomes por nun tener usao nenguna’l sábadu demientres la sesión de clasificación y la degradación d’elles yera una preocupación de partida. Carlos Sáinz foi l’únicu de los diez primeros que tentó dalgo diferente al restu partiendo con gomes dures cuando’l restu lo facía con medios.

La salida foi limpia pero otra vegada volvimos a ver a Norris perdiendo posiciones. Esta vegada l’inglés diba dise llargu na primer curva, lo que permitió a Hamilton y Sáinz adelantalu. L’inglés acabaría recuperando la posición a Sáinz, pero non a Hamilton. Foi una carrera mui estratéxica en tolos garaxes, coles paraes siendo clave pa recuperar o perder posiciones. Verstappen foi ún de los primeros en parar, provocando una estampida de paraes al restu de pilotos que lu arrodiaben, sacante Sáinz que siguía cola so estratexa de partida, estremada del restu, y Norris, que foi a pie cambiáu demientres tola carrera y perdió dafechu la posición tamién col holandés.

Los más de los pilotos escoyeron una estratexa a dos paraes, hubo quien fexo más, pero George Russell, yá conocíu polo bien que xestiona gomes, decidió apostar pola parada única, dalgo que lu acabó colocando no más alto de la clasificación. Abultaba imposible que fuera quien a aguantar con eses gomes tantu tiempu, pero l’inglés foi’l primeru en ver la bandera a cuadros, siguíu mui de cerca pol so compañeru d’equipu Lewis Hamilton, que pocu a pocu foi averándose pero que nun lu pasó. El viernes les coses pintaben bien mal pal equipu alemán que tuvo de revertir los cambios qu’incorporara, tornando al coche qu’usaron en Silverstone y Hungría. Per detrás de dambos Mercedes, a pocu más d’un segundu llegó Piastri que foi aprovechándose de la batalla ente los Mercedes pa dir acortando distancies. Sicasí, l’australianu nun tendría tiempu siquier d’entrar en DRS de Hamilton enantes del final de la carrera.

Pero, el resultáu de los tres primeros diba camudar un pocu depués de la fin del gran premiu cuando conocimos la descalificación de Russell por nun llegar al pesu mínimu requeríu pola FIA en rematando’l gran premiu. Ello ye que’l ganador ye Lewis Hamilton, siguíu de Piastri y con Leclerc terceru, masimizando les oportunidaes de Ferrari nun gran premiu nel que nun cuntábemos muncho con ellos. Verstappen nun pudo alcanzar el podiu, poniendo otra vuelta sobre la mesa les carencies que ta teniendo esti añu’l Red Bull, o la meyora de rendimientu del restu, en comparación con 2023. Norris tuvo de conformase con ser quintu.

Otra deceición llevaría Pérez, que depués de partir segundu na parriella, sólo pudo sumar el puntu de la vuelta rápida, y foi sétimu. El so futuru, como yá vinimos diciendo, ta más que cuestionáu, y nun sedría raro que’l contratu que firmó a finales de xunu anovando por un añu con opción a otru quedara en nada. Per detrás d’él atopamos a Fernando Alonso y zarraron los diez primeros Esteban Ocon, que supo aprovechar bien la velocidá del Alpine y el bon rendimientu del coche esti fin de selmana, y Daniel Ricciardo.

L’únicu abandonu del gran premiu foi Zhou Guanyu qu’afonda nel mal momentu de forma del equipu Sauber esta temporada.

Parón braniegu y munches coses nes que pensar, ente descansu y descansu. Mientres torna la F1 n’Holanda, vos dexamos qu’echéis equí un güeyu a los númberos que dexó’l gran premiu de Bélxica.

Previa del Gran Premiu de Bélxica 2024

Aportamos a Bélxica con ganes de disputar un nuevu gran premiu nel circuitu de Spa pero al mesmu tiempu ensin querer que llegue’l parón braniegu que vien depués. Esta primer parte de la temporada de F1 ta dexándonos munchos y perbonos momentos, asina como grandes sorpreses qu’esperamos vivir otra vuelta nel míticu trazáu belga. Equí vos dexamos tola información que precisáis pa que nun perdáis nada del fin de selmana:

GRAN PREMIU DE BÉLXICA
Circuitu SPA-FRANCORCHAMPS
HORARIOS
VIENRES 26/07/2024
LLIBRES 1 13:30
LLIBRES 2 17:00
SÁBADU 27/07/2024
LLIBRES 3 12:30
CLASIFICACIÓN 16:00
DOMINGU 28/07/2024
CARRERA 15:00

Y éstes son les gomes que van montar los equipos demientres esti gran premiu: